Basileia Ena Hereva Momokani Uhedia Hadoa
“Daba neganai, bona adorahi neganai danu, uhe do oi hadoa.”—HADIBAIA TAUNA 11:6.
1. Hari inai negai Keristani taudia be edena dala ai uhe idia hadoa?
IDAUNEGAI Heberu taudia dekenai biru gaukara be mai anina bada. Unai dainai Iesu, iena tanobada maurina ibounai lalonai Gwauhamata Tanona ai ia noho tauna, be iena laulau sivaraidia dekenai biru herevadia ia gwauraia. Hegeregere, ia gwau Dirava ena Basileia harorolaia gaukarana be uhe hadoa karana bamona. (Mataio 13:1-9, 18-23; Luka 8:5-15) Ema bona hari, herevana biru gabuna ai ita noho o lasi, to lauma dalana ai uhe ita hadoa be Keristani taudia edia mai anina bada gaukarana.
2. Edena dala ai iseda haroro gaukara be mai anina bada, bona hari inai negai unai gaukara karaia totona dahaka idia karaia?
2 Hari nega dokona lalonai Baibel ena hereva momokani hadoa gaukarana ita karaia be hahenamo namo hereana. Roma 10:14, 15 ese unai gaukara ena anina badana ia gwauraia: “Bema haroro tauna be lasi neganai, edena bamona do idia kamonai? Bona haida bema idia siaidia lasi, haroro taudia be edena bamona do idia haroro? Buka Helaga dekenai ia torea hegeregerena, ia gwau: ‘Sivarai Namona ena moale idia mailaia taudia edia aena, be namo herea momokani, ani.’ ” Dirava ese unai gaukara ia henia bona hari inai nega lalonai mai lalo-goada ida ita karaia be mai anina bada. Unai dainai Iehova ena Witnes taudia be gado 340 dekenai Baibel bona Baibel stadilaia bukadia printaia bona hariharilaia gaukarana idia karaia mai goada ida. Unai buka idia hegaegaelaia totona edia hedikwota ai bona tano idauidau ena brens opesi ai volantia taudia 18,000 bona ma haida idia gaukara. Bona Witnes taudia kahirakahira 6 milioni be tanobada hegegemadai unai Baibel herevalaia bukadia idia hariharilaia.
3. Basileia ena hereva momokani hadoa karana amo dahaka ia vara?
3 Unai gaukara badana ese dahaka ia havaraia? Keristani oreana ia matamaia negana hegeregerena, hari inai nega ai taunimanima momo ese hereva momokani idia abia dae. (Kara 2:41, 46, 47) Bapatiso matamata Basileia pablisa taudia edia namba ia bada herea be mai anina, to anina bada gauna be unai haroro karana badana ese Iehova ena ladana hahelagaia bona ia sibona be Dirava momokanina ia hamomokania karana ia durua. (Mataio 6:9) Ma danu, taunimanima momo be Dirava ena Hereva idia diba dainai unai ese edia mauri ia hanamoa bona hahemauri do idia abia diba.—Kara 13:47.
4. Aposetolo taudia be edena bamona idia haroro henia taudia idia laloa bada?
4 Aposetolo taudia idia diba sivarai namona ese mauri ia havaraia diba bona unai be mai anina bada, bona idia haroro henia taudia idia ura henidia bada. Aposetolo Paulo ena hereva dekenai ia hedinarai goevagoeva, ia gwau: “Umui ai lalokau henia bada dainai, ai ese Sivarai Namona umui dekenai ai henia. Bona inai sibona lasi, to ai be ai noho hegaegae, aiemai mauri umui dainai do ai atoa diho, badina be umui ai lalokau henia bada noho.” (1 Tesalonika 2:8) Unai bamona taunimanima laloa bada karana idia hahedinaraia neganai, Paulo bona aposetolo taudia be Iesu bona guba anerudia idia tohotohoa, idia danu be unai taunimanima hamauridia gaukarana dekenai gaukara bada idia karaia. Namona be Dirava ena guba hesiai taudia edia anina bada gaukaradia Basileia ena hereva momokani hadoa gaukarana dekenai ita laloa, bona iseda maduna hagugurua totona ita idia hagoadaia totona edia haheitalai ita itaia be namo.
Iesu—Basileia Ena Hereva Momokani Hadoa Tauna
5. Iesu be tanobada ai ia noho neganai dahaka gaukara ia karaia momo?
5 Iesu, tau goevadaena, be mai ena siahu iena nega taudia dekenai tauanina gaudia namodia momo ia henia totona. Hegeregere, iena negai gorere dekenai edia lalohadai kereredia momo ia hamaoromaoroa diba, eiava ma saiens daladia ai taunimanima edia diba ia habadaia diba. To, iena haroro ia hamatamaia neganai ia hahedinaraia goevagoeva iena gaukara be sivarai namona do ia harorolaia. (Luka 4:17-21) Bona iena haroro ena dokona kahana ai, ia gwau: “Hereva momokani gwauraia hedinarai totona lau vara, bona lau mai inai tanobada dekenai.” (Ioane 18:37) Unai dainai Basileia ena hereva momokani uhedia hadoa gaukarana ia karaia momo. Iena negai idia noho taudia be Dirava bona Iena ura ia hadibadia be mai anina bada bona Iesu ese ia henia diba edukeisen idaudia edia anina be maragi.—Roma 11:33-36.
6, 7. (a) Iesu be guba dekenai ia do daekau lasi neganai dahaka gwauhamata ia henia, bona edena dala ai ia hagugurua noho? (b) Iesu ena lalohadai haroro gaukara dekenai be edena bamona oi laloa?
6 Iesu be sibona ia gwauraia Basileia ena hereva momokani Hadoa Tauna. (Ioane 4:35-38) Nega namodia iboudiai sivarai namona ena uhe ia hadoa. Au dekenai ia mase neganai danu, vaira negana ai tanobada paradaisona ena sivarai namona ia harorolaia. (Luka 23:43) Ma danu, hisihisi auna dekenai ia mase neganai sivarai namona harorolaia gaukarana ia laloa bada karana ia hadokoa lasi. Guba dekenai ia do daekau lasi neganai, aposetolo taudia ia haganidia Basileia ena hereva momokani uhedia idia hadoa noho bona taunimanima be hahediba taudia ai idia halaoa. Bena Iesu ese gwauhamata badana ta ia karaia. Ia gwau: “Lau be hanaihanai umui danu ita noho ela bona tanobada dokona.”—Mataio 28:19, 20.
7 Unai hereva amo Iesu ia gwauhamata, sivarai namona harorolaia gaukarana do ia durua, do ia hakaua, bona do ia naria “ela bona tanobada dokona.” Ema bona hari, Iesu be haroro gaukarana ia laloa bada noho. Ia be iseda Hakaua Tauna, Basileia ena hereva momokani hadoa gaukarana ia biagua. (Mataio 23:10) Ia be Keristani kongregesen ena Kwarana dainai, Iehova vairanai unai tanobada ibounai gaukarana ia naria.—Efeso 1:22, 23; Kolose 1:18.
Aneru ese Sivarai Namona Idia Harorolaia
8, 9. (a) Aneru be edena dala ai idia hahedinaraia taunimanima edia gaukara idia laloa bada? (b) Edena dala ai ita gwau diba ita be aneru ese idia itaia drama taudia bamona?
8 Iehova ese tanobada ia havaraia neganai, aneru ‘be ane idia abia hebou, bona mai moale danu idia boiboi.’ (Iobu 38:4-7) Unai nega amo, unai guba anerudia be taunimanima edia gaukara idia laloa bada. Iehova ese ia gaukaralaidia taunimanima dekenai Iena hereva idia gwauraia totona. (Salamo 103:20) Unai be momokani iseda nega ai sivarai namona harorolaia gaukarana dekenai. Aposetolo Ioane dekenai idia henia apokalupo herevana lalonai, ia ese “aneru” ta ia itaia “guba ena ataiai ia roho lao” bona ia ese “noho hanaihanai Sivarai Namona do ia gwauraia hedinarai. Taunimanima ibounai dekenai ia gwauraia, bese ibounai, iduhu ibounai, gado ibounai bona kopina idauidau ibounai taudia. Ia boiboi goadagoada, ia gwau, ‘Dirava do umui gari henia, ia do umui hanamoa bada, badina be Dirava ese taunimanima ibounai do ia kota henia ena nega ia ginidae vadaeni. Guba bona tanobada, bona davara, bona ranu guridia ibounai ia karaia Diravana do umui tomadiho henia.’ ”—Apokalupo 14:6, 7.
9 Baibel ia gwau aneru be “Dirava ena hesiai gaukara laumadia . . . Dirava ese idia ia siaia lao, mauri do idia abia taudia durua totona.” (Heberu 1:14) Aneru be mai ura bada ida edia gaukara idia karaia neganai, ita bona iseda gaukara idia itaia diba. Taunimanima momo ese drama dekenai ita idia itaia hegeregerena, ita be guba taudia vairadiai iseda gaukara ita karaia. (1 Korinto 4:9) Ita laloa namonamo bona ita moale bada danu badina ita diba ita sibona lasi to haida danu be Basileia ena hereva momokani idia hadoa!
Mai Ura Bada ida Iseda Maduna Ita Hagugurua
10. Hadibaia Tauna 11:6 ena sisiba namona be edena bamona iseda haroro gaukara dekenai ita badinaia diba?
10 Dahaka dainai Iesu bona aneru be iseda gaukara idia laloa bada? Iesu ese badina ta ia gwauraia: “Lau hamaoroa umui dekenai, dika tauna ta ena lalona ia giroa dainai, Dirava ena aneru be unai bamona do idia moale.” (Luka 15:10) Ita danu be unai hegeregerena taunimanima ita laloa bada. Unai dainai, ita hekwarahi bada Basileia ena hereva momokani uhedia be gabu ibounai ita negea totona. Hadibaia Tauna 11:6 ena hereva be iseda gaukara dekenai ita badinaia diba. Unuseniai Baibel ena sisiba ia gwau: “Daba neganai, bona adorahi neganai danu, uhe do oi hadoa. Badina be oi diba lasi, do ia tubu namonamo o lasi. Sedira daba gauna, bona adorahi gauna ruaosi do idia tubu namonamo.” Momokani, taunimanima tamona ese iseda hereva ia abia dae neganai reana ma handred haida eiava tausen haida ese idia dadaraia. To aneru bamona, “dika tauna ta” be hahemauri ena sivarai ia abia dae neganai ita moale.
11. Baibel herevalaia gaudia be edena bamona anina idia havaraia diba?
11 Sivarai namona harorolaia totona gaukara be bada herea. Iehova ena Witnes taudia ese idia gaukaralaia Baibel herevalaia gaudia be mai anina bada unai gaukara durua totona. Dala haida ai, unai duahiduahi gaudia be gabu ibounai dekenai ita negea uhedia bamona. Ita diba lasi edena be anina do ia havaraia. Nega haida unai duahiduahi gauna be tau ta amo ma ta dekenai idia henia hanai ela bona ta ese ia duahia. Iesu bona aneru be reana idia vara gaudia idia naria, kudou maoro taudia dekenai namo idia havaraia totona. Ekspiriens haida mani oi laloa, idia hahedinaraia Iehova be ita laloa lasi daladia ai taunimanima ese idia abia duahiduahi gaudia amo namo bada ia havaraia diba.
Dirava Momokanina Ena Gaukara
12. Magasin gunana ta be edena dala ai ruma bese ta ia durua Iehova idia diba totona?
12 Lagani 1953 ai, Robert, Lila, bona edia natudia be siti badana ta idia rakatania bena idia lao Pennsylvania, U.S.A., ena biru gabuna ai ruma gunana ta dekenai idia noho. Idia vareai murinai, Robert ia ura ruma lalonai vadavada henunai digudigu daiutuna ta ia karaia. Reirei haida ia kokia murinai, haba ena murinai be bita ese idia negea pepapepa, walnut uhe kopidia, bona momoru haida ia davaria. Unuseniai The Golden Age magasin ta ia noho. Robert ia ura henia bada sivaraina unai magasin lalonai be natudia ubua dalana ia herevalaia gauna. Unai magasin lalonai Baibel amo hakaua herevadia idia hahedinaraia goevagoeva dainai ia moale bada, bena ia ese Lila ia hamaoroa “The Golden Age ena tomadiho” lalonai do idia vareai. Wiki haida idia ore lasi lalonai, Iehova ena Witnes taudia idia mai edia ruma dekenai, to Robert ese ia hamaorodia iena bese be “The Golden Age ena tomadiho” sibona idia ura henia. Witnes taudia ese idia hahedinaraia The Golden Age be ladana matamatana, Awake!, idia henia. Robert bona Lila be Witnes taudia ida Baibel idia stadilaia, bena gabeai bapatiso idia abia. Bena, idia danu, be edia natudia edia lalonai hereva momokani uhedia idia hadoa bona anina bada idia gogoa. Hari, unai bese taudia 20 bona ma haida, Robert bona Lila edia natudia ibounai 7 danu, be Iehova Dirava ena bapatiso hesiai taudia.
13. Puerto Rico dekenai dahaka ese tau ta mai ena adavana ida ia durudia Baibel idia laloa totona?
13 Lagani 40 bamona gunanai, Puerto Rico amo tau ta mai ena adavana ida, William bona Ada, be Baibel stadilaia idia laloa lasi. Iehova ena Witnes taudia be edia iduara ai idia pidipidi neganai, unai tau bona hahine be ruma ai idia noho lasi bamona idia kara koikoi. Dina ta William ia ura ruma dekenai gau ta ia hanamoa dainai, taunimanima ese idia negea gaudia hoihoilaia gabuna ta dekenai ia lao. Unai gabu amo ia raka lasi neganai, momoru udaia tini badana lalonai ielo bamona grin bukana ta ia itaia. Unai buka be lagani 1940 ai Iehova ena Witnes taudia ese idia halasia bukana, ladana Religion. William ese buka ia laohaia ruma dekenai bona ia moale bada badina tomadiho koikoi bona tomadiho momokanina edia idau ia duahia. Unai murinai Iehova ena Witnes taudia idia vadivadi neganai, William bona Ada be mai moale ida edia haroro herevadia idia kamonai bona idia ida Baibel idia stadilaia hamatamaia. Hua haida murinai bapatiso idia abia lagani 1958 ena Divine Will Intenesenel Hebouhebouna dekenai. Ema bona hari, idia ese taunimanima 50 bona ma haida idia durudia iseda Keristani tadikaka oreana taudia edia kahana ta ai idia lao totona.
14. Ekspiriens ta ese ia hahedinaraia hegeregerena, iseda Baibel herevalaia gaudia be dahaka idia havaraia diba?
14 Karl ena mauri lagani be 11 sibona bona ia kara kava momo. Ia laloa nega momo hekwakwanai ia davaria. Iena tamana, Germany ena Methodist haroro tauna ta, ese ia hadibaia mase murinai kara dika taudia be hel lahina ai idia araia. Unai dainai Karl be hel dekenai ia gari bada. Dina ta lagani 1917 ai, Karl be dala dekenai pepapepa ta mai ena toretore ia itaia bona ia abia. Ia duahia neganai, iena matana be karaharaga henanadai ta idia itaia: “Hel be dahaka?” Unai pepapepa ese taunimanima ia boiridia pablik tok ta dekenai, hel do idia herevalaia, bona Bible Student taudia, hari idia gwauraidia Iehova ena Witnes taudia, ese do idia karaia. Lagani tamona bamona murinai, Baibel stadi sisina momo murinai, Karl ia bapatiso, bena unai amo Bible Student ta ai ia lao. Lagani 1925 ai idia boiria Iehova ena Witnes taudia edia tanobada hedikwota dekenai ia gaukara totona—unuseniai hesiai gaukara ia karaia noho. Unai Keristani gaukarana, lagani 80 ia hanaia vadaeni, be dala dekenai ia noho pepapepana ta amo ia matamaia.
15. Iehova bema ia ura neganai dahaka ia karaia diba?
15 Momokani, ita taunimanima ita diba lasi aneru be unai ekspiriens lalonai edena bamona gaukara idia hakaua. To, namo lasi ita daradara Iesu bona aneru be haroro gaukara dekenai gaukara bada idia karaia bona Iehova ese iena ura hegeregerena idia vara gaudia ia hakaudia. Inai ekspiriens bona unai bamona gaudia ma momo ese idia hahedinaraia ita hariharilaia buka bona magasin be namo idia havaraia diba.
Kohu Namona Ita Ia Henia
16. Korinto Iharuana 4:7 ena hereva amo dahaka ita diba?
16 Aposetolo Paulo ia gwau “diari [“kohu namona,” NW ] ai abia taudia, be hodu.” Unai kohu namona be Dirava ese ia henia haroro gaukarana, bona Iehova ese unai kohu namona ia henia taudia be hodu. Unai tanobada taudia idia goevadae lasi bona edia goada be mai ena dokona dainai, Paulo ia gwau unai gaukara idia abia ese ia havaraia gauna be inai: “Taunimanima ibounai do idia diba inai siahu badana be Dirava sibona dekena amo, ai dekena amo ia mai lasi.” (2 Korinto 4:7) Oibe, gaukara ita hagugurua totona ita abidadama diba Iehova ese ita dekenai siahu do ia henia.
17. Basileia ena hereva momokani uhedia ita hadoa neganai dahaka do ita davaria, bona ena be unai ia vara to dahaka dainai ita lalo-goada noho be namo?
17 Nega momo iseda ura ita dadaraia. Reana teritori haida dekenai ita haroro be mai ena hekwarahi eiava iseda dala ia hadikaia sisina. Ma gabu haida ai taunimanima momo be idia hesiku vadaeni, bona idia dagedage danu. Reana unai bamona gabu ai ita hekwarahi bada bona toana be anina ia vara lasi. To ita gwau diba lasi hekwarahi ta be anina lasi badina gau badana ta ia noho. Namona be oi laloa, oi hadoa uhedia dainai taunimanima be harihari moale oi henia diba bona vaira negana ai mauri hanaihanai idia abia diba. Salamo 126:6 ena hereva be nega momo ia momokani, ia gwau: “Uhe idia abia lao neganai idia tai noho taudia, be mai moale danu do idia giroa mai, bona anina idia mailaia neganai ane do idia abia.”
18. Edena dala ai iseda haroro gaukara ita laloa noho, bona dahaka dainai unai ita karaia be namo?
18 Namona be nega iboudiai dala ita tahua Basileia ena hereva momokani uhedia be mai hariharibada ida ita hadoa. Namona be ita laloaboio lasi, ena be uhe ita hadoa bona ita dairia, to Iehova ese ia hatubua noho. (1 Korinto 3:6, 7) Oibe, Iesu bona aneru be edia gaukara idia hagugurua hegeregerena, Iehova ia ura ita danu be iseda hesiai gaukara ita hagugurua. (2 Timoteo 4:5) Namona be iseda hadibaia dalana, iseda lalohadai, bona iseda ura bada haroro dekenai ita laloa hanaihanai. Badina be dahaka? Paulo ia haere, ia gwau: “Inai kara namodia do oi karaia noho, badina unai dekena amo, oi sibona ese mauri do oi davaria, bona oi dekenai idia kamonai taudia danu ese mauri do idia davaria.”—1 Timoteo 4:16.
Dahaka Ita Dibaia?
• Edena dala haida ai iseda hadohado gaukara ese namo ia havaraia?
• Edena dala ai Iesu Keriso bona aneru be hari inai negai haroro gaukarana lalonai idia gaukara danu?
• Dahaka dainai mai hariharibada ida Basileia ena hereva momokani uhedia ita hadoa be namo?
• Iseda haroro gaukara lalonai idia hesiku vadaeni taudia eiava dagedage taudia ita davaria neganai, dahaka dainai ita haheauka be namo?
[Pictures on page 15]
Idaunegai Israela ena biru taudia hegeregeredia, hari inai negai Keristani taudia be mai hariharibada ida Basileia ena hereva momokani uhedia idia negea
[Picture on page 16, 17]
Iehova ena Witnes taudia be gado 340 dekenai Baibel herevalaia gaudia idia printaia bona idia hariharilaia