Taiwan Ena Raisi Umadia Dekenai Sivarai Namona Idia Harorolaia

Ita be Abidadama Taudia

Taiwan Ena Raisi Umadia Dekenai Sivarai Namona Idia Harorolaia

NEGA momo Taiwan dekenai medu bada ia diho, unai dainai lagani ta ta ibounai nega rua raisi momo idia gogoa. Nega ta ta, medu negadiai medu ia diho lasi, bona uhe idia mase. Unai ia vara neganai, biru tauna ese ena gaukara ia hadokoa, a? Lasi. Ia diba ia haheauka be namo. Ia ese uhe matamatadia ia hatubua bona ena uma dekenai ia hadoa lou. Bena, nega ia namo neganai, biru tauna ese aniani namona ia abia. Nega haida lauma dalanai hadohado bona anina abia karana be unai bamona.

Lauma Dalanai Anina Abia Karana Lalonai Oi Haheauka

Idia hanaia lagani lalodiai Iehova ena Witnes taudia Taiwan dekenai be idia gaukara goada, anina idia havaraia lasi gabudia ai Baibel ena hereva momokani ena uhe idia hadoa bona anina idia abia totona. Haheitalai ta be Miao-li County. Unai gabu dekenai nega haida idia haroro neganai, haida idia kamonai. Unai dainai lagani 1973 ai spesel painia tadikaka ta bona ena adavana idia siaia unuseniai ful-taim Basileia harorolaia gaukarana idia karaia totona. Matamanai, haida ese sivarai namona idia ura henia. To, karaharaga unai ura ia boio. Bena unai spesel painia taudia be ma gabu ta dekenai idia siaia lao.

Lagani 1991 ai, ma spesel painia rua be unai gabu dekenai idia siaia lao. To idia vara gaudia ese ia hahedinaraia lou unai be nega maorona lasi lauma dalanai taunimanima idia tubu totona. Lagani haida murinai, unai spesel painia taudia idia siaia lou idia laloa anina momo do ia havaraia gabudia dekenai. Unai dainai, nega sisina lalonai unai tano ia noho kava.

Idia Gaukara Goada Lou Dainai Anina Namona Idia Abia

September 1998 ai, idia laloa namona be idia hekwarahi Taiwan dekenai pablisa be lasi gabudia amo anina momo do idia havaraia gabudia idia tahua. Unai be edena bamona idia karaia? Hua haida lalonai spesel painia gaukara idia karaia taudia 40 be pablisa be lasi to taunimanima momo idia noho gabudia dekenai idia siaia lao.

Miao-li County lalonai idia hakapua hanua rua be unai gaukara totona idia abidia hidi teritori huanai. Headava lasi taihu hani be hua toi lalonai unuseniai do idia haroro unai teritori ena namo idia tohoa totona. Idia ginidae bena daudau lasi murinai, mai moale ida idia torea idia davaria kamonai taudia be momo. Hua toi unai gabu dekenai edia painia gaukara idia karaia ore neganai, idia be Baibel stadi momo idia karaia. Danu, idia ese buka stadi grup ta idia haginia bona kahirakahira ia noho kongregesen ta ena elda ta ese idia ia durua.

Unai taihu toi idia hahedinaraia goevagoeva idia ura idia tubu namonamo noho “uhe” matamata idia naria noho. Unai dainai, idia rua be idia abia hidi spesel painia gaukara do idia karaia totona, bona ihatoina be unuseniai regula painia gaukara ia karaia. Kahirakahira ai ia noho kongregesen ena elda ta be unai gabu dekenai ia lao idia ia durua totona. Taunimanima 60 ia hanaia be unai gabu dekenai idia henia pablik tok ginigunana kamonai totona idia lao. Hari kahirakahira ia noho kongregesen ese unai grup matamata ia durua noho Sunday ibounai hebou do idia abia totona bona buka stadi haida idia karaia danu. Kahirakahira unai gabu dekenai kongregesen matamata do idia haginia.

Haheauka Karana Dainai Taiwan Ena Kahana Ma Haida Dekenai Hahenamo Idia Abia

Gabu ma haida ai danu, be unai bamona ia vara. I-lan County lalonai, motumotu ena notist kahanai, Kongregesen Buka Stadi matamatana ta be hua haida spesel painia gaukara idia karaia taudia idia gaukara gabuna dekenai idia haginia.

Adorahi ta ai ruma-ta-ruma-ta gaukara idia karaia lalonai, hua haida spesel painia gaukara ia karaia taihuna ta ese tau matamata ta ia davaria bona ia dekenai kongregesen heboudia edia lista pepana ia hahedinaraia. Unai tauna be maoromaoro ia henanadai: “Kerukeru hanuaboi ena hebou dekenai lau mai diba, a? Bema oibe, edena dabua lau karaia be namo?” Unai painia taihu ia davaria pura ta ta iboudiai Baibel stadi 8 ia karaia. Baibel stadi taudia haida be karaharaga palani idia karaia sivarai namona idia harorolaia pablisa taudia ai idia lao totona, bona edia tahua gauna be bapatiso do idia abia.

Unai taoni dekenai ia noho hahinena ma ta be lagani momo lalodiai dubu dekenai ia lao, to ta ia davaria lasi ia dekenai Baibel do ia hadibaia totona. Baibel stadi herevana ia kamonai neganai, maoromaoro ia abia dae. Idia hagoadaia do idia stadilaia gauna ia hegaegaelaia guna. Unai hua haida spesel painia gaukara ia karaia taihu be stadi ia karaia totona ia ginidae neganai, ia davaria unai hahine be ena stadi totona ia hegaegae vadaeni, noutbuk ta ia hoia bona do idia stadilaia kahana ena henanadai ibounai ia torea. Bona unai henanadai ta ta dekenai ena haere ia torea. Danu, do idia stadilaia kahana lalonai idia noho siri iboudiai ia torea. Unai taihu be stadi ginigunana ia karaia totona ia ginidae neganai, unai hahine be stadi kahana ginigunadia toi ia hegaegaelaia vadaeni!

Dongshih, Taiwan ena ihuanai, unai bamona gaudia idia vara danu. Hua toi lalonai unuseniai spesel painia gaukara idia karaia taudia ese buklet 2,000 mai kahana idia hariharilaia. Hua ihatoina ai, idia be Baibel stadi 16 idia karaia noho. Unai taoni be September 21, 1999 ai, Taiwan ena ihuanai ia vara tano mareremarere ese ia hadikaia momokani, to kamonai taudia haida be lauma dalanai idia tubu noho, ena be Kingdom Hall dekenai idia hebou totona hora ta bamona idia raka lao. Oibe, haheauka karana be gau badana anina namona ita abia totona, herevana ia be tauanina gauna eiava lauma gauna.

[Map on page 8]

(For fully formatted text, see publication)

CHINA

Taiwan Strait

TAIWAN

[Credit Line]