Pioneer Taudia Durudia
1 Taunimanima idia diba Dirava ena taunimanima be haroro gaukara idia karaia goadagoada. Ena be ita haida sibona be pioneer gaukara ita karaia diba, to namona be ita ibounai be pioneer taudia edia lalohadai ita abia, unai anina be mai iseda lalona ibounai ida gaukara ita karaia. Taunimanima momo herea be pioneer gaukara idia karaia, bona unai taudia ita hamoaledia bona idia ita hagoadaia be namo.
2 Pioneer gaukara dekenai vareai bona gaukara karaia noho be gaukara badana. Pioneer taudia ese haroro gaukara bona hahediba gaukara edia kahana badana idia karaia. Unai gaukara idia karaia totona idia hekwarahi bada bona edia ura haida idia reaia. Taunimanima ma haida ese dahaka idia karaia diba unai pioneer gaukara idia karaia goadagoada taudia idia durudia bona idia hagoadaia totona?
3 Heduru Haida: Elda taudia be pioneer taudia idia durudia be gau badana. Elda taudia ese pioneer taudia danu idia haroro hebou neganai unai ese pioneer taudia ia hagoadaia. Elda taudia momo be lagani tamona lalonai nega tamona edia kongregesen lalonai idia noho pioneer taudia iboudiai ida idia haroro hebou. Unai dala amo elda taudia be pioneer taudia edia gaukara dainai idia dekenai hanamoa herevadia idia henia diba bona idia durudia diba edia gaukara idia hanamoa totona. Reana pioneer taudia ese edia sediual do idia haidaua unai elda taudia danu do idia haroro hebou totona. Danu, namona be elda taudia ese teritori ena bada do idia laloa namonamo grup taudia edia haroro gabuna ia hegeregere totona. Pioneer taudia danu idia gaukara hebou totona, ma nega haida, hegeregere adorahi eiava hanuaboi neganai haroro totona idia hebou diba danu. Idia heduru pioneer taudia idia momo ena hua lalodiai unai be heduru namona.—Isa. 40:11.
4 Hesiai taudia ese pioneer taudia idia durudia dalana be idia danu idia haroro hebou bona kongregesen ena gaukara idia karaia namonamo. Pioneer taihudia idia moale bema tadikaka idia noho haroro gaukara ena grup idia gunalaia totona. Namona be buka bona magasin idia naria taudia idia hegaegae namonamo buka bona magasin idia hegeregere tadikaka bona taihu idia abidia totona. Bema hesiai taudia ese unai gaukara idia naria namonamo unai ese pioneer taudia ia durudia edia haroro gaukara idia karaia goadagoada totona.
5 Iboudiai Idia Heduru Diba: Pablisa taudia idia heduru diba dalana be nega momo pioneer taudia danu idia haroro hebou. Haroro gaukara dekenai pablisa taudia ese pioneer taudia idia bamodia bona idia durudia dainai pioneer taudia idia moale. Hua tamona lalonai nega tamona o nega rua pioneer taudia danu ita gaukara hebou totona reana dala ita hegaegaelaia diba. Tauanina durua gaudia be pioneer taudia dekenai ita henia diba, bona pioneer taudia be unai heduru dainai idia moale.—Fil. 4:14-19.
6 Ruma bese lalonai ta ia pioneer neganai, iena famili taudia ese idia durua bada diba. Nega momo, bema ruma bese edia maduna idia haria namonamo, edia taunimanima ta eiava ma haida ese pioneer gaukara idia karaia diba. Taihu ta ena natudia be toi, bona pura iboudiai dina rua lalonai moni gaukara ia karaia. Iena natuna mero rua edia heduru be aniani idia hoia bona ruma ena gaukara idia karaia. Kekeni ena heduru be ruma ia hagoevaia bona aniani ia nanadu. Unai kekeni ese sikuli ia haorea neganai, dina rua lalonai moni gaukara ia karaia bona pioneer gaukara ia hamatamaia danu. Sinana bona kekeni edia moni gaukara dinadia idia idau. Ruma bese lalonai unai bamona idia heduru heheni neganai, haida be idia pioneer diba bona ruma bese ibounai ese hahenamo idia davaria.
7 Idia gaukara namonamo pioneer taudia be dala idauidau dekenai kongregesen idia durua diba. Mai goada danu idia gaukara bona edia haheitalai namona amo ma haida idia hagoadaia edia hesiai gaukara idia habadaia totona. Oibe, namona be idia ita durudia. Mai lalo-tamona dekenai ita gaukara hebou neganai ita iboudiai do ita moale bona unai ese Iehova ena ladana do ia hanamoa.
[Questions]
1. (a) Pablisa ta ta iboudiai be dahaka idia karaia diba? (b) Namona be iseda lalohadai pioneer taudia dekenai be dahaka?
2. Dahaka dainai pioneer taudia ita durudia bona idia ita hagoadaia be gau badana?
3. Elda taudia ese pioneer taudia be edena dala idauidau amo idia durudia diba oi gwauraia hedinarai.
4. Hesiai taudia ese pioneer taudia idia durudia diba daladia oi gwauraia hedinarai.
5. (a) Pioneer taudia durudia totona, pablisa ta ta iboudiai ese dahaka idia karaia diba? (b) Filipi 4:14-19 ena hereva hegeregerena, pioneer tauna Paulo idia durua totona, kongregesen taudia ese dahaka idia karaia?
6. Ruma bese lalonai bema ta ia pioneer neganai, iena ruma bese taudia ese dahaka idia karaia idia durua totona?
7. Mai lalo-tamona dekenai pioneer taudia ita durudia neganai, dahaka ia vara?