Antioka Dekenai Dagedage ese Orea Ia Habadaia

STEFANO be ena Keristani abidadama dainai idia hamasea bena dagedage ia vara neganai, Iesu ena hahediba taudia momo be Ierusalema amo idia heau siri. Idia heau mauri gabuna ta be Antioka, Suria dekenai, kilomita 550 bamona not kahana ai. (Kara 11:19) Unuseniai idia vara gaudia be mai anina Keristani dalana ena sivarai dekenai. Idia vara gaudia ita lalo-pararalaia totona, namona be Antioka ena sivarai sisina ita diba.

Roma Basileiana ena siti iboudiai amo, ena bada, ena taga, bona ena dagi dekenai Roma bona Alesandria sibona ese Antioka idia hanaia. Unai Suria hanua badana be mai ena siahu bada Meditereinien davara gabuna ena not bona ist kahana ai. Antioka (hari Antakya, Turkey) be bouti idia loaloa diba Oronotes Sinavai badinai ia gini, unai sinavai ese dala ia kehoa Antioka ena bouti kamokau gabuna, Seleukia Pieria dekenai, ena daudau be kilomita 32. Ia be Roma bona Tigris-Eufrate Kourana ena hoihoi dala badana ia biagua. Ia be hoihoi hanua badana ta dainai, Roma Basileiana ena hanua ibounai ida bisinesi ia karaia, bona taunimanima idauidau be unuseniai idia loaloa, idia be Roma Basileiana ena gabu ibounai amo tomadiho karadia edia sivarai idia mailaia.

Antioka dekenai Greece tomadiho bona aonega ia bada momokani. To histori torea tauna Glanville Downey ia gwau, “Keriso ena nega lalonai, gunaguna tomadiho karadia bona aonega herevadia be taunimanima ta ta edia lalohadai hegeregerena idia karaia, taunimanima be edia hekwakwanai idia hanaia bona idia ura gaudia idia tahua neganai sibodia edia ura hegeregerena idia tomadiho.” (A History of Antioch in Syria) Momo be Iuda ena Dirava tamona tomadiho henia karana, ena guriguri dalana, bona ena taravatu dekenai idia moale.

Antioka siti be lagani 300 B.C.E. ai ia vara negana amo Iuda orea badana be unuseniai ia noho. Haida idia gwau edia namba be 20,000 ia lao 60,000 bamona, noho taudia edia namba amo unai be 10 pesen ia hanaia. Histori torea tauna Josephus ia gwau Seleucid edia king besena ese Iuda taudia idia hagoadaia siti lalonai idia noho, bena idia dekenai citizen ena maoro iboudiai idia henia. Unai neganai, Heberu Revarevadia be Greek gado ai idia noho. Unai ese Mesia totona idia naria Iuda taudia edia lalona ia veria. Unai dainai, Greece taudia momo be Iuda ena tomadiho idia abia dae. Unai gau iboudiai dainai Antioka be gabu namona Keristani ena hahediba taudia halaoa gaukarana totona.

Idau Bese Taudia Haroro Henidia

Iesu murinai idia raka taudia be dagedage dainai Ierusalema amo idia heau siri neganai Iuda taudia sibodia dekenai edia abidadama idia harorolaia. To Antioka dekenai, Kupro bona Kurene amo hahediba taudia haida be “Helene taudia dekenai” idia haroro. (Kara 11:20) Ena be Pentekoste 33 C.E. murina amo Greece gado idia diba Iuda taudia bona Iuda tomadiho idia abia dae idau bese taudia idia haroro henidia, to Antioka dekenai haroro gaukara be kara matamatana bamona. Iuda taudia sibodia lasi to haida danu idia haroro henia. Momokani, Idau Bese tauna Korenelio bona ena bese be hahediba taudia ai idia lao vadaeni. To Iehova ena amo ia abia matahanai ese aposetolo Petero ia hadibaia Idau Bese taudia haroro henia karana be maoro.​​—⁠Kara 10:​1-​48.

Unai siti lalonai gunaguna amo Iuda taudia hutuma idia noho bona Iuda bona Idau Bese taudia idia badu heheni momo lasi dainai, Iuda lasi taudia idia haroro henia diba bona sivarai namona idia abia dae namo herea. Ia hedinarai Antioka be gabu namona unai ia vara totona, bona ‘momo be hereva idia abia dae.’ (Kara 11:21) Bona Iuda ena tomadiho idia abia dae taudia, guna dirava koikoidia idia tomadiho henia idau bese taudia unai, be Keristani taudia ai idia lao neganai, dala idauna ai idia hegeregere unai bamona idia karaia noho Idau Bese taudia idia haroro henia totona.

Antioka dekenai idia vara gaudia edia sivarai idia kamonai neganai, Ierusalema kongregesen ese Banaba idia siaia unai sivarai ia tahua totona. Ia idia abia hidi be aonega bona lalokau karana. Ia be Kupro tauna, Iuda lasi taudia idia haroro henia matamaia taudia haida bamona. Banaba be Antioka ena Idau Bese taudia ida ia noho hebou diba. Idia danu be do idia laloa ia be edia hanua tauna ta.a Idia karaia gaukarana ia durua diba. Unai dainai “ia ginidae neganai, Dirava ena hariharibada ia itaia, bona ia moale bada, bona ibounai dekenai ia hereva goada, idia ese mai edia kudouna ibounai Lohiabada do idia badinaia,” bona “taunimanima momo be Lohiabada ena orea dekenai idia vareai.”​​—⁠Kara 11:​22-​24.

Histori torea tauna Downey ia gwau, “Antioka dekenai haroro idia hamatamaia neganai anina idia havaraia ena badina be reana unai siti lalonai misinari taudia be Iuda ena badu taudia idia gari henidia lasi, Ierusalema dekenai idia davaria hegeregerena; danu, unai siti be Suria ena siti badana dainai, ena gavana be tuari orea ena biaguna, bona unai dainai taunimanima idia noho namonamo, hanua taudia idia heatu haraga diba lasi Ierusalema ai ia vara bamona, unuseniai Iudea naria taudia (unai nega ai) be Iuda ena badu taudia idia biagua diba lasi.”

Unai gau namodia dainai bona gaukara be bada dainai, Banaba be reana ia laloa heduru ia abia be namo, bona ena turana Saulo ia laloa. Badina be dahaka Saulo, eiava Paulo, ia laloa? Ia hedinarai ena be ia be aposetolo 12 tauna ta lasi, to Paulo be idau bese taudia dekenai aposetolo dagi ia abia. (Kara 9:​15, 27; Roma 1:5; Apokalupo 21:14) Unai dainai, Paulo be bamoa tauna namona Idau Bese taudia edia siti Antioka dekenai sivarai namona harorolaia totona. (Galatia 1:16) Unai dainai Banaba ia lao Taso dekenai, Saulo ia davaria, bona Antioka dekenai ia mailaia.​​—⁠Kara 11:​25, 26; rau 26-7 ai ia noho maua itaia.

Dirava ese Ladana Ia Hatoa Keristani Taudia

Lagani tamona lalonai, Banaba bona Saulo be “taunimanima momo idia hadibaia noho. Bona Antioka hanua dekenai Iesu [ena] diba tahua taudia be edia ladana idia atoa ‘Keristani.’ Inai be nega ginigunana inai ladana idia abia.” Iuda taudia be reana Iesu murinai idia raka taudia idia gwauraidia lasi Keristani taudia (Greece gado) eiava Mesia taudia (Heberu gado), badina idia abia dae lasi Iesu be Mesia, eiava Keriso, bona ia murinai idia raka taudia bema idia gwauraidia Keristani taudia unai be Iesu idia abia dae karana hegeregerena. Haida idia laloa reana Dirava momokani idia diba lasi taudia be gadara eiava hevaseha dalana ai unai ladana Keristani idia henia. To Baibel ia hahedinaraia Dirava ese unai ladana Keristani ia henia.​​—⁠Kara 11:​26.

Keristani Greek Revarevadia lalonai, unai ladana ida idia torea hereva haida, nega momo idia hahanaia “ladana idia hatoa,” be nega ibounai idia gaukaralaia bema gau ta be siahu ta, Dirava ese ia siaia tauna ta, eiava Dirava ese ia karaia. Unai dainai diba tahua taudia be idia hahanaia “Dirava ese ia siaia tauna ena hereva gwauraia,” “Dirava ida herevahereva,” eiava “Dirava ena taravatu ta eiava sisiba ta henia, guba amo hadibaia.” Dirava ese Iesu murinai idia raka taudia edia ladana ia atoa Keristani taudia dainai, reana Iehova ese Saulo bona Banaba ia hakaudia unai ladana idia henia totona.

Unai ladana matamatana idia gaukaralaia noho. Taunimanima do idia daradara lasi Iesu murinai idia raka taudia be Iuda edia orea amo idia idau momokani. Lagani 58 C.E. bamona ai, Roma tuari orea biagudia idia diba momokani Keristani taudia be daidia. (Kara 26:28) Histori torea tauna Tacitus ia gwau lagani 64 C.E. ia ginidae neganai, Roma taudia momo be unai ladana idia gaukaralaia danu.

Iehova ese Iena Abidadama Taudia Ia Gaukaralaidia

Sivarai namona be Antioka dekenai ia bada haraga. Iehova ena hahenamo dainai bona Iesu murinai idia raka taudia idia ura bada idia haroro noho dainai, Antioka be Keristani ginigunadia edia hanua badana ta ai ia lao. Dirava ese unai kongregesen ia gaukaralaia ma tano haida dekenai sivarai namona idia abia lao totona. Hegeregere, aposetolo Paulo be gabu matamatadia ai ena misinari loaloa iboudiai ia karaia neganai, Antioka amo ia matamaia.

Hari iseda negai danu, ena be dagedage ia vara to haida idia gaukara goadagoada bona ura momokani dainai Keristani dala momokanina idia abia lao gabu momo dekenai, bona unai amo taunimanima momo be sivarai namona idia kamonai bona idia moalelaia.b Unai dainai bema tomadiho momokani oi abia dae dainai dagedage oi abia, namona be oi laloatao Iehova ese ia koua lasi be mai ena badina. Keristani ginigunadia edia negai hegeregerena, hari inai negai taunimanima be Dirava ena Basileia ena sivarai idia kamonai be namo bona ena kahana dekenai idia gini goada totona. Oiemu lalona oi hadaia mai abidadama ida Iehova do oi hesiai henia noho ese reana ma ta do ia durua hereva momokani ena diba maorona do ia abia totona.

[Footnotes]

[Box/Pictures on page 26, 27]

Saulo Ena “Sivarai Lasi Laganidia”

SAULO be lagani 45 C.E. bamona ai Antioka dekenai ia lao, bona unai ia do vara lasi neganai Kara bukana lalonai Saulo idia herevalaia nega ginigabena be Ierusalema lalonai haida ese idia alaia toho karana ia koua bona tadikaka haida ese Taso dekenai idia siaia. (Kara 9:​28-30; 11:25) To unai be lagani 9 gunanai, lagani 36 C.E. bamona ai. Unai nega​​—⁠idia gwauraia Saulo ena sivarai lasi laganidia​​—⁠lalonai ia be dahaka ia karaia?

Ierusalema amo, Saulo be Suria bona Kilikia gabudia dekenai ia lao, bona Iudea kongregesen idia kamonai: “Guna inai tau ese ita ia dagedage henia, to hari ia be Sivarai Namona ia harorolaia noho. Iseda abidadama, guna ia haorea toho gauna be hari ia ese ia harorolaia noho!” (Galatia 1:​21-23) Reana unai ripoti be Antioka lalonai Banaba ida ia gaukara negana ia herevalaia, to ita daradara lasi Saulo be unai nega ia do mai lasi neganai ia noho kava lasi. Lagani 49 C.E. ia mai neganai, kongregesen haida be Suria bona Kilikia ai idia noho. Ta be Antioka dekenai, to haida idia laloa Saulo ena sivarai lasi laganidia idia gwauraia negana ai ma haida be iena gaukara dainai idia vara.​​—⁠Kara 11:26; 15:​23, 41.

Diba tahua taudia haida idia laloa Saulo ena mauri lalonai anina bada kara haida be unai nega ai idia vara. Ia be ‘Keriso ena hesiai tauna’ dainai ia mamia hisihisi momo be iena misinari gaukara negana lalonai bema idia vara lasi, do ita hekwarahi idia vara negana ita gwauraia totona. (2 Korinto 11:​23-27) Edena negai Iuda taudia be nega ima Saulo idia kwadia nega 39? Nega toi au amo idia kwadia be edeseniai? Edeseni dibura ruma ai “nega momo” idia koua? Roma dekenai dibura ai idia atoa be gabeai. Ita diba nega tamona idia dadabaia bona dibura ai idia negea​​—⁠Filipi dekenai. To ma gau haida be edena bamona? (Kara 16:​22, 23) Toretore tauna ta ia gwau reana Saulo be unai nega ai “Hanua Gwauta dekenai Iuda edia dubu lalonai ia haroro dalana dainai dubu biagudia bona hanua biagudia ese idia dagedage henia.”

Saulo be bouti ai ia loaloa neganai nega hani bouti ia mutu, to Baibel ese unai nega tamona sibona ia herevalaia, bona idia gwau unai ia vara Korinto taudia dekenai ena hekwakwanai edia sivarai ia torea murinai. (Kara 27:​27-44) Unai dainai ma nega toi be reana idia vara iena loaloa ma haida ai bona unai loaloa edia sivarai ita diba lasi. Inai haida eiava idia iboudiai be reana unai “sivarai lasi laganidia” lalonai idia vara.

Ia vara gauna ma ta be reana unai nega ai bona 2 Korinto 12:​2-5 dekenai ia herevalaia. Saulo ia gwau: ‘Keriso ena tauna ta lau diba, lagani 14 idia lao vadaeni, ia idia abia daekau guba ena atai dekenai momokani. Dirava ese ia abia daekau Paradaiso dekenai. Hunia hereva ia kamonai, taunimanima idia gwauraia diba lasi herevadia.’ Ia hedinarai, Saulo be sibona ia herevalaia. Unai be lagani 55 C.E. bamona ai ia torea dainai, lagani 14 gunanai be 41 C.E., bona unai be “sivarai lasi laganidia” lalonai ia vara.

Unai matahanai dainai ita diba Saulo be lalo-parara idauna ia abia. Unai ese ia durua ia be “Iuda lasi taudia totona aposetolo gaukara [ia] karaia” totona, a? (Roma 11:13) Unai ese iena laloa dalana, torea dalana, bona hereva dalana ia haidaua, a? Saulo be hereva momokani ia abia negana bona Antioka dekenai idia boiria negana edia huanai idia noho laganidia ese idia durua diba ia abia bona ia hegeregere maduna haida ia huaia totona, a? Herevana unai henanadai edia haere be dahaka, to ita diba Banaba ese Antioka dekenai haroro gaukara gunalaia totona Saulo ia boiria neganai, unai gaukara goadagoada tauna be ia hegeregere momokani unai gaukara ia karaia totona.​​—⁠Kara 11:​19-​26.

[Map on page 25]

(For fully formatted text, see publication)

SURIA

Oronotes

Antioka

Seleukia

KUPRO

MEDITEREINIEN DAVARANA

Ierusalema

[Credit Line]

Mountain High Maps® Copyright © 1997 Digital Wisdom, Inc.

[Pictures on page 24]

Atai: Hari inai negai Antioch

Huanai: Saut amo Seleucia toana

Henu ai: Seleucia bouti gabuna ena haba