Dirava Idia Hamoalea Bouboudia
“Hahelagaia Taudia Badadia ibounai edia gaukara be harihari gaudia bona boubou gaudia Dirava dekenai idia henia.”—HEBERU 8:3.
1. Dahaka dainai taunimanima idia mamia Dirava ena heduru idia abia be namo?
BAIBEL negana ena histori tahua tauna, Alfred Edersheim, ia gwau: “Toana be boubou karana be taunimanima edia ‘kara korikorina,’ guriguri karana hegeregerena; idia ta ese ta ena hemami ia sibona dekenai ia hahedinaraia, ma ta ese iena hemami Dirava dekenai ia gwauraia.” Kara dika be tanobada ai ia vareai negana amo, ia ese lalona ena mamina dikana ena hisihisi, Dirava amo ita daudau ena mamina, bona heduru be lasi mamina ia mailaia. Unai gaudia dainai heduru ita abia be namo. Ita lalo-parara diba bema taunimanima be unai bamona hekwakwanai ta lalonai idia noho neganai, idia mamia Dirava ena heduru idia abia be namo.—Roma 5:12.
2. Baibel lalonai Dirava dekenai idia henia boubou ginigunadia be dahaka dahaka?
2 Baibel ese nega ginigunana Dirava dekenai boubou gaudia henia karana ia herevalaia be Kaino bona Abela edia sivarai lalonai. Ita duahia: “Dina ta Kaino ese uma ena anina haida ia mailaia, Lohiabada dekenai ia henia, boubou gauna totona. Inai murinai Abela danu ese iena mamoe, vara guna gaudia, digara gaudia ia mailaidia.” (Genese 4:3, 4) Unai murinai, ita davaria Noa, Dirava ese iena nega ena kara dika uruna be abata badana amo ia haorea neganai Dirava ese ia hamauria tauna, ese ‘boubou patana dekenai gabua ore boubou gauna’ be Iehova dekenai ia henia. (Genese 8:20) Nega momo, Aberahamo, Dirava ena abidadama hesiai tauna bona ena turana, be Dirava ena gwauhamata herevadia bona ena hahenamo ese ia doria dainai, “boubou patana ia karaia, bona Lohiabada dekenai ia tomadiho.” (Genese 12:8; 13:3, 4, 18) Gabeai, Aberahamo ese ena abidadama ia tohoa gauna badana ia davaria, Iehova ese ia hamaoroa iena natuna Isako be gabua ore boubouna bamona do ia henia. (Genese 22:1-14) Ena be unai sivarai be kwadogi, to idia ese boubou karana dekenai gau momo idia hahedinaraia, do ita itaia hegeregerena.
3. Boubou edia anina tomadiho lalonai be dahaka?
3 Unai sivarai bona Baibel ena sivarai ma haida amo, ia hedinarai goevagoeva Iehova ese boubou totona taravatu ia do henia lasi neganai, boubou karana be tomadiho ena kahana badana ta. Unai hegeregerena, buka ta ese “boubou” ena anina ia gwauraia “tomadiho karana ta, ia lalonai gau ta be dirava bamona tauna dekenai idia henia, taunimanima edia hetura karana namona unai helaga tauna ida idia havaraia, hagoadaia, eiava hanamoa totona.” To unai ese mai anina bada henanadaidia, do ita laloa namonamo be namo henanadaidia, ia havaraia, hegeregere: Dahaka dainai tomadiho lalonai boubou karana be mai ena anina? Edena bamona boubou be Dirava ese ia abidia dae? Bona gunaguna idia karaia bouboudia edia anina hari ita dekenai be dahaka?
Dahaka Dainai Boubou Karana be mai Ena Anina?
4. Dahaka ia vara Adamu bona Heva dekenai idia kara dika neganai?
4 Adamu ia kara dika neganai, mai ena ura ida ia karaia. Ia ese kara namo bona kara dika hadibaia auna ena huahua ia abia bona ia ania karana be mai ena ura ida ia gwau-edeede karana. Unai gwau-edeede karana ena davana be mase, Dirava ese guna ia gwauraia hedinarai goevagoeva hegeregerena: “Inai huahua oi ania dina dekenai do oi mase momokani.” (Genese 2:17) Gabeai Adamu bona Heva ese kara dika ena davana idia abia—idia mase.—Genese 3:19; 5:3-5.
5. Dahaka dainai Iehova ese Adamu ena natudia dekenai dala ia kehoa, bona Ia ese idia totona dahaka ia karaia?
5 To, Adamu ena natudia be edena bamona? Adamu amo kara dika bona goevadae lasi maurina idia abia dainai, taunimanima ginigunadia ruaosi bamona idia danu be Dirava amo idia daudau mamina, helaro lasi mamina, bona mase idia abia. (Roma 5:14) To, Iehova be hahemaoro maoromaoro bona siahu bada Diravana sibona lasi to ia be lalokau Diravana—lalokau be iena kara badana ta. (1 Ioane 4:8, 16) Unai dainai ia ese dala ia kehoa unai gauna ia hanamoa totona. Baibel ese inai hereva, “kara dika ena davana be mase” ia gwauraia murinai, ma ia gwau, “to Dirava ena harihari gauna davana lasi be mauri hanaihanai, Iesu Keriso iseda Lohiabada lalonai ita noho dainai.”—Roma 6:23.
6. Iehova ena ura be dahaka Adamu ena kara dika amo ia vara dika dekenai?
6 Iehova Dirava ese unai harihari gauna ia hamomokania totona Adamu ena kara dika dainai ia haboioa gaudia ia koua diba gauna ia henia. Heberu gado ai, inai hereva ka·phar ʹ ena anina ginigunana be “koua” eiava reana “dahua oho,” bona danu idia hahanaia “kara dika ena davana karaia.”a Eiava ita gwau diba, Iehova ese dala namona ta ia kehoa Adamu amo ia vara kara dika koua totona bona unai amo ia vara dika ia dahua oho, bena unai harihari gauna idia abia diba taudia be kara dika bona mase amo ia ruhaia diba.—Roma 8:21.
7. (a) Dirava ese Satani dekenai davana ia gwauraia neganai, dahaka helaro ia hedinarai? (b) Taunimanima be kara dika bona mase amo ia ruhadia karana ena davana be dahaka?
7 Kara dika bona mase ena igui amo ruhaia karana ena helaro be taunimanima ginigunadia ruaosi idia kara dika murinai ia hedinarai. Satani, gaigai ese ia laulaulaia tauna, ena davana ia gwauraia neganai, Iehova ia gwau: “Lau ese badu oi bona hahine ihuanai do lau atoa bona oiemu garana bona iena garana ihuanai. Ia ese emu kwarana do ia haberoa bona oi ese iena aena geduna do oi haberoa.” (Genese 3:15, NW ) Unai peroveta herevana dainai, unai gwauhamata idia abidadama henia taudia dekenai helaro ia hedinarai. To, unai ruhaia karana be mai ena davana. Unai gwauhamata Garana be maoromaoro do ia mai lasi Satani haorea totona; unai Garana be ena aena geduna ai bero do ia abia, anina be, mase ena hisihisi do ia abia, to nega sisina lalonai sibona.
8. (a) Kaino be edena dala ai lalohisihisi ia havaraia? (b) Dahaka dainai Abela ena boubou gauna be Dirava ese ia abia dae?
8 Ita laloa diba Adamu bona Heva ese unai gwauhamata Garana be daika idia laloa momo. Heva ese ena natuna ginigunana, Kaino, ia havaraia neganai, ia gwau: “Lohiabada ena durua dekenai mero ta lau abia.” (Genese 4:1) Ia laloa reana gabeai iena natuna be Garana ai do ia lao, a? Herevana unai bamona ia laloa eiava lasi, to Kaino, bona ena boubou gauna, ese lalohisihisi idia havaraia. To, iena tadina Abela be idau, ia hahedinaraia Dirava ena gwauhamata ia abidadama henia bona unai dainai ia ese ena mamoe amo vara guna gaudia be boubou gauna totona Iehova dekenai ia henia. Ita duahia: “Abela ese Dirava ia abidadama henia, bona boubou gauna Dirava dekenai ia henia. Dirava ese Abela ena boubou gauna ia ura henia, to Kaino ena boubou gauna ia ura henia lasi. Abela ese Dirava dekenai ia abidadama henia, unai dainai Dirava ese kara maoromaoro tauna ia gwauraia.”—Heberu 11:4.
9. (a) Abela be dahaka ia abidadama henia, bona edena bamona unai ia hahedinaraia? (b) Abela ena boubou gauna ese dahaka ia karaia?
9 Abela ena abidadama be Dirava ia noho ia abia dae karana sibona lasi, Kaino danu ese unai ia abia dae. To Abela ese Dirava ena gwauhamata, kamonai taudia hamauria totona Garana ta do ia mailaia gwauhamatana, ia abidadama henia. Edena bamona do ia vara be ia diba lasi, to Dirava ena gwauhamata amo Abela ia diba ta be ena aena geduna ai bero do ia abia. Oibe, reana ia laloa rara bubua karana be mai ena anina—boubou karana ena anina unai. Abela ese mauri ena Badina dekenai ia henia harihari gauna be mauri bona rara, unai be toa ta ia hahedinaraia Iehova ena gwauhamata ia ura henia dikadika bona ena guguru negana ia naria noho. Unai abidadama karana dainai Iehova ese Abela ena boubou gauna ia moalelaia, bona dala maragina ta ai, unai ese boubou karana ena anina ia hahedinaraia—unai dala amo kara dika taudia be Dirava dekenai idia lao diba ena lalo-namo abia totona.—Genese 4:4; Heberu 11:1, 6.
10. Boubou ena anina be edena bamona ia hedinarai goevagoeva Iehova ese Aberahamo ia noia Isako do ia bouboulaia neganai?
10 Iehova ese Aberahamo ia hagania iena natuna Isako be gabua ore boubouna bamona do ia henia neganai, boubou ena anina ia hedinarai goevagoeva. Ena be unai boubou idia karaia lasi, to ia ese gabeai Iehova do ia karaia gauna ia laulaulaia—iena Natuna tamona be boubou gauna hereadaena bamona do ia henia, Iena ura taunimanima dekenai ia hagugurua totona. (Ioane 3:16) Mose ena Taravatu lalonai idia karaia boubou karadia bona harihari gaudia amo Iehova ese ia abia hidi taudia be peroveta dalanai ia hadibaia dahaka do idia karaia be namo, edia kara dika do ia gwauatao totona bona edia hahemauri helarona idia hagoadaia totona. Unai amo dahaka ita dibaia?
Iehova ese Ia Abia Dae Bouboudia
11. Israela ena hahelaga tauna badana ese ia karaia boubou gaudia edia kahana rua be dahaka, bona edia badina be dahaka?
11 Aposetolo Paulo ia gwau: “Hahelagaia Taudia Badadia ibounai edia gaukara be harihari gaudia bona boubou gaudia Dirava dekenai idia henia.” (Heberu 8:3) Mani oi itaia Paulo ese idaunegai Israela ena hahelaga tauna badana ese ia karaia boubou gaudia be kahana rua dekenai ia hapararaia, “harihari gaudia” bona “boubou gaudia,” eiava “kara dika kokia totona boubou gaudia.” (Heberu 5:1) Taunimanima ese harihari gaudia idia henia edia lalokau bona tanikiu idia hahedinaraia totona, danu, turana karana, lalo-namo, eiava abia dae karana havaraia totona. (Genese 32:20; Aonega Herevadia 18:16) Unai hegeregerena, Taravatu ese ia gwauraia harihari gaudia momo be Dirava dekenai idia henia “harihari gaudia” bamona, ia ese do ia abidia dae bona lalo-namo henidia totona.b Taravatu idia hadikaia dainai gau haida do idia henia, bona kerere idia hamaoromaoroa totona ‘kara dika kokia boubou gaudia idia karaia.’ Pentateuch bukadia, ese boubou gaudia bona harihari gaudia idauidau dekenai gau momo herea idia hahedinaraia, bona Esodo, Levitiko, bona Numera ese unai idia herevalaia momo. Ena be ita ese unai gau iboudiai ita lalo-parara bona laloatao be auka, to unai boubou idauidau edia gau badadia haida ita laloa be namo.
12. Baibel lalonai, edeseniai Taravatu ese ia gwauraia boubou gaudia, eiava harihari gaudia idia herevalaia?
12 Ita itaia Levitiko karoa 1 ia lao 7 lalonai, mai anina bada boubou idauidau ima—gabua ore boubouna, paraoa boubouna, maino karaia boubouna, kara dika boubouna, bona kerere ena davana karaia boubouna—ta ta idia herevalaia, ena be idia haida be nega tamona idia karaia hebou. Danu, ita itaia unai boubou gaudia be unai karoa lalodiai nega rua idia herevalaia, dala idaudia ai: nega ta be Levitiko 1:2 ia lao 6:7 ai, boubou patana ai dahaka idia bouboulaia idia herevalaia, bona nega iharuana be Levitiko 6:8 ia lao 7:36 ai, hahelaga taudia bona boubou karaia taudia totona idia atoa siri gaudia idia herevalaia. Bena, Numera karoa 28 bona 29 lalonai, ita gwauraia diba sediual ta ita davaria, unuseniai idia hahedinaraia dahaka be dina ta ta, pura ta ta, hua ta ta, bona lagani ta ta edia aria negadia ai do idia bouboulaia.
13. Harihari gaudia bamona ta ena ura hegeregerena Dirava dekenai idia henia boubou gaudia oi herevalaia.
13 Harihari gaudia hegeregerena eiava Dirava ena lalo-namo abia totona ta ena ura hegeregerena ia henia boubou gaudia edia huanai be gabua ore bouboudia, paraoa bouboudia, bona maino karaia bouboudia. Diba bada taudia haida idia laloa inai hereva “gabua ore boubouna” ena anina Heberu gado ai be “ia daekau boubouna.” Unai be maoro badina gabua ore boubouna ai, idia alaia animal be boubou patana ai idia gabua bona bonana namona be guba ai Dirava dekenai ia daekau. Gabua ore boubouna ena idau gauna badana be ena rara sisina be boubou patana ena kahana ibounai dekenai idia negea murinai, animal ibounai be Dirava dekenai idia henia. Hahelaga taudia ese “inai boubou vamu ena kahana ibounai boubou patana dekenai do [idia] gabua ore. Inai vamu boubouna be mai ena bonana namona Lohiabada dekenai.”—Levitiko 1:3, 4, 9; Genese 8:21.
14. Paraoa boubouna be edena bamona idia karaia?
14 Paraoa boubouna be Levitiko karoa 2 ai idia herevalaia. Ia be ta ena ura hegeregerena ia henia boubouna, nega momo dehoro amo idia hapariparia bona bonana namona muramura ena pauda ladana libano idia atoa. “Hahelagaia tauna ta ese iena imana dekenai paraoa mai ena olive dehoro sisina, bona bonana namona muramura ena pauda ibounai do ia abia, bona unai gau toi be boubou patana ena latanai do ia gabua ore. Unai be Lohiabada dekenai henia ena toana. Unai boubou idia gabua ena bonana be namo herea Lohiabada dekenai.” (Levitiko 2:2) Libano be bonana namona muramura helagana ena kahana ta, unai be palai dubuna bona dubu lalonai muramura mai bonana namona gabua patana dekenai idia gabua. (Esodo 30:34-36) Toana be King Davida ese unai ia laloatao bena ia gwau: “Lau ura egu guriguri do oi abia dae, bona ena mamina oi dekenai be namo, muramura mai bonana namona bamona. Bona lau ura egu imana lau abia isi kara ena namo, be adorahi boubouna ena namo hegeregerena, oiemu vairana dekenai.”—Salamo 141:2.
15. Dahaka dainai maino karaia boubouna idia karaia?
15 Ta ena ura hegeregerena ia henia boubouna ma ta be maino karaia boubouna, Levitiko karoa 3 dekenai idia herevalaia. Heberu gado ai, inai hereva “maino” ena anina be tuari eiava nega dikana ta amo ruhaia karana sibona lasi. Studies in the Mosaic Institutions bukana ia gwau: “Baibel lalonai, ena anina be unai bona Dirava ida maino ai ita hetura karana, kwalimu, bona moale danu.” Unai dainai, maino karaia bouboudia idia karaia, edia maino Dirava ida naria totona lasi, hegeregere iena lalona hanamoa totona lasi to Dirava ese ia lalo-namo henidia taudia ese ia ida idia moalelaia mainona dainai edia tanikiu eiava moale hahedinaraia totona. Hahelaga taudia bona boubou idia karaia taudia ese Iehova dekenai idia bouboulaia animal ena rara bona digara idia henia murinai ena hidio idia ania. (Levitiko 3:17; 7:16-21; 19:5-8) Hairai bona laulau dalanai, boubou ia karaia tauna, hahelaga taudia, bona Iehova Dirava ese aniani ta idia ania hebou, unai ese idia huanai ia noho mainona ia hahedinaraia.
16. (a) Dahaka dainai kara dika boubouna bona kerere davana karaia boubouna idia karaia? (b) Unai ruaosi bona gabua ore boubouna edia idau be dahaka?
16 Kara dika koua eiava Taravatu hadikaia karana gwauatao totona idia karaia boubou karadia rua be kara dika boubouna bona kerere davana karaia boubouna. Ena be unai boubou ruaosi be boubou patana dekenai idia gabua danu, to idia be gabua ore boubouna amo idia idau, badina unai boubou lalodiai animal ibounai be Dirava dekenai idia bouboulaia lasi to ena digara bona ena kahana haida sibona. Animal ena kahana orena be kamepa ena murimuri ai idia negea eiava nega haida hahelaga taudia ese idia ania. Unai idau karana be mai anina bada. Gabua ore boubouna be Dirava dekenai harihari gauna bamona idia henia ia kahirakahira idia lao diba totona, unai dainai unai boubou ibounai be Dirava sibona dekenai idia henia. Mani oi laloa danu, gabua ore boubouna be hanaihanai kara dika boubouna eiava kerere davana henia boubouna murinai idia karaia, unai ese ia hahedinaraia kara dika tauna ena boubou gauna be Dirava ese ia abia dae totona, ena kara dika ia gwauatao guna be namo.—Levitiko 8:14, 18; 9:2, 3; 16:3, 5.
17, 18. Dahaka dainai kara dika boubouna idia karaia, bona dahaka dainai kerere ena davana karaia boubouna idia karaia?
17 Taravatu utua tauna ena kerere be guna ia laloa lasi bona ia karaia, tauanina ena manoka dainai ia karaia, neganai sibona Dirava ese kara dika boubouna ia abia dae. “Bema tau ta ia diba lasi dainai, ia kara dika kava, o Lohiabada ena taravatu ta ia utua kava,” vadaeni unai kara dika tauna be ena dagi, eiava ena gini hanua taudia vairanai, hegeregerena kara dika boubouna ta do ia henia. (Levitiko 4:2, 3, 22, 27) To, idia helalo-kerehai lasi kara dika taudia be idia hamasedia; idia totona boubou gauna ta be lasi.—Esodo 21:12-15; Levitiko 17:10; 20:2, 6, 10; Numera 15:30; Heberu 2:2.
18 Kerere davana karaia boubouna ena anina bona ena badina be Levitiko karoa 5 bona 6 dekenai idia hahedinaraia goevagoeva. Reana ta be ia kara dika mai ena ura ida lasi. To, reana iena kara dika amo ena dekena taudia eiava Iehova Dirava edia maoro ta ia hadikaia dainai ia kerere, bona unai kerere ia hamaoromaoroa be namo. Kara dika edia orea haida idia gwauraia. Haida be ta sibona ese ia karaia kereredia (5:2-6), haida be ‘Lohiabada ena helaga gaudia’ dekenai idia karaia kereredia (5:14-16), bona haida, ena be ita gwau diba lasi unai gaudia idia diba lasi momokani, ura dikadia eiava tauanina ena manoka dainai idia vara kereredia (6:1-3). Unai kara dika ia gwauraia hedinarai sibona lasi, to taravatu hegeregerena kerere tauna ese davana ia karaia bona kerere davana karaia boubouna be Iehova dekenai do ia henia.—Levitiko 6:4-7.
Gau Namona ta Do Ia Mai
19. Ena be Israela taudia ese Taravatu bona ena boubou karadia idia abia, to dahaka dainai Dirava ena lalo-namo idia abia lasi?
19 Mose ena Taravatu, mai ena boubou gaudia idauidau, be Israela taudia dekenai ia henia, unai amo Dirava dekenai idia lao diba iena lalo-namo bona ia ida maino idia abia bona idia dogoatao noho totona ela bona gwauhamata Garana ia ginidae. Aposetolo Paulo, Iuda tauna ta, ese inai bamona ia gwauraia: “Taravatu be iseda naria tauna bamona, ia mai bona Keriso ia ginidae. To Keriso ia ginidae neganai, abidadama dekena amo Dirava ena vairanai do ita maoromaoro diba.” (Galatia 3:24) To madi, Israela besena ese unai naria karana idia abia dae lasi to unai hahenamo idia hadikaia. Unai dainai, Iehova dekenai edia boubou momo be gau dikana bamona, ia gwau: “Emui mamoe umui gabua, bona emui boromakau edia digara, umui gabua gaudia lau abia, be ia davana vadaeni lau dekenai. Lau be boromakau, bona mamoe, bona nanigosi edia rarana dekenai lau hesiku vadaeni.”—Isaia 1:11.
20. Lagani 70 C.E. ai, dahaka ia vara Taravatu bona ena boubou karadia dekenai?
20 Lagani 70 C.E. ai, Iuda taudia edia nega, mai ena dubu bona hahelaga taudia, ia ore. Unai murinai, Taravatu hegeregerena idia karaia boubou gaudia be anina lasi. Unai ena anina be boubou gaudia, Taravatu ena kahana badana ta, be anina lasi hari inai neganai Dirava idia tomadiho henia taudia dekenai, a? Unai be hereva gabena lalonai do ita tahua.
[Footnotes]
a Insight on the Scriptures bukana, Watchtower Bible and Tract Society of New York, Inc. ese ia halasia bukana, ia gwau: “Baibel ai idia gaukaralaia hegeregerena, ‘kara dika ena davana karaia’ ena anina badana be ‘koua’ eiava ‘gau ta henia bona ena gabunai ma gau ta abia,’ bona idia henia gauna, eiava ‘koua’ gauna, be gau gunana hegeregerena. . . . Adamu ese ia haboioa gauna ena davana maorona karaia totona, goevadae tauna ta ena mauri be kara dika boubouna bamona do idia karaia be gau badana.”
b Nega momo Heberu herevana idia hahanaia “harihari gauna” be qor·banʹ. Iesu ese taravatu hadibaia taudia bona Farisea taudia edia kara dikana ta dainai ia gwau henidia ena sivarai ia torea neganai, Mareko ia gwau “kobana” ena anina be “Dirava dekenai ia atoa vadaeni” harihari gauna.—Mareko 7:11.
Anina Oi Gwauraia Diba, A?
• Dahaka ese idau negai idia noho abidadama taudia ia hagoadaia Iehova dekenai boubou gaudia idia henia totona?
• Dahaka dainai boubou gaudia idia karaia be namo?
• Taravatu henunai dahaka mai anina bada bouboudia idia karaia, bona edia anina be dahaka?
• Paulo ena hereva hegeregerena, Taravatu bona ena boubou karadia edia badina badana be dahaka?
[Picture on page 14]
Abela ena boubou gauna ese Dirava ia hamoalea badina unai boubou gauna ese ia hahedinaraia Iehova ena gwauhamata ia abidadama henia
[Picture on page 15]
Oi ese inai laulau lalonai ia vara karana oi laloa bada, a?