Oi be Keristani ‘Tau Badana’ Vadaeni, A?
APOSETOLO Paulo ia gwau: “Lau mero neganai mero bamona lau hereva, mero bamona lau laloa, bona mero bamona hereva ena anina lau tahua.” Momokani, guna ita ibounai be beibi bamona. To, hanaihanai unai bamona ita noho lasi. Paulo ia gwau: “Hari lau be tau dainai mero ena kara lau rakatania vadaeni.”—1 Korinto 13:11.
Unai hegeregerena, lauma dalana ai, Keristani taudia ibounai be beibi bamona idia matamaia. To gabeai, ibounai edia ‘abidadama do ia tamona, bona edia diba Dirava ena Natuna dekenai danu be tamona. Bona idia be tau badadia do idia halaoa, oibe, Keriso ena bada hegeregerena danu do idia abia gwauraia.’ (Efeso 4:13) Korinto Ginigunana 14:20 be ita ia hagoadaia, ia gwau: “Lauegu varavara taudia e, natuna maragi bamona do umui laloa lasi. . . . To inai laloa dobu gaudia totona, tau badadia bamona inai gaudia do umui laloa.”
Hari inai negai, Keristani tau badadia eiava lo taudia idia noho be hahenamo ta Dirava ena taunimanima dekenai, badina lauma dalana ai matamata taudia be momo herea. Keristani tau badadia be kongregesen idia hagoadaia. Idia bamoa kongregesen ena lalohadai badana, eiava lalona veria siahuna, ena namo do idia habadaia.
Tauanina be vaia do ia tubu ela bona ia bada, to lauma dalana ai ita tubu daekau karana be nega bona hekwarahi sibona amo do ia vara. Ita hoa lasi, Paulo ena negai, ena be Keristani taudia haida be lagani momo lalodiai Dirava idia hesiai henia, to lo taudia ai idia lao totona ‘hereva badadia idia tahua’ lasi. (Heberu 5:12; 6:1) Oi be edena bamona? Herevana lagani momo lalodiai eiava nega sisina sibona lalonai Dirava oi hesiai henia, namona be mai momokani ida oiemu noho dalana oi tahua. (2 Korinto 13:5) Oi be momokani idia gwauraia diba Keristani lo taudia ta, eiava tau badadia ta, a? Bema lasi, edena dala amo idia ta bamona oi lao diba?
“Laloa Dobu Gaudia Do Umui Laloa”
“Koikoi taudia edia hadibaia . . . koikoi hereva be lai bamona,” bona karaharaga lauma dalana ai beibi bamona taudia idia “doria lao, doria mai, vadaeni idia hure kava davara dekenai bamona.” To, Paulo ia gwau: “Lalokau dekena amo, . . . Keriso ena mauri dala lalonai do ita tubu daekau momokani, bona Keriso be iseda orea ena kwarana.” (Efeso 4:14, 15) Edena dala amo ta be unai bamona ia karaia diba? Heberu 5:14 ia gwau: “Aniani korikori be tau badadia idia ania diba. Idia sibona ese edia lalona idia hadibaia lou, hadibaia lou, ela bona idia manada vadaeni. Unai neganai idia be maoro bona kerere edia toana idia diba namonamo.”
Mani oi laloa, lo taudia be edia lalona idia gaukaralaia karana, eiava Baibel ena taravatu idia badinaia loulou karana, amo edia laloa dalana idia hadibaia namonamo. Momokani, tau ta be karaharaga lo tauna ai ia lao diba lasi; to nega ia hanaia lalonai lauma dalanai ia tubu. Unai sibona lasi, to lauma dalanai oiemu tubu karana durua totona, sibona emu stadi be gau badana—bona Dirava ena Hereva ena dobu gaudia tahua karana be mai anina bada. Idia hanaia laganidia lalodiai, Gima Kohorona be dobu gaudia momo ia herevalaidia. Lo taudia be unai bamona herevadia idia dadaraia lasi badina unai “hereva haida edia anina davaria be auka.” (2 Petero 3:16) To, unai bamona aniani aukana idia ania mai edia ura bada ida!
Haroro Bona Hadibaia Taudia mai Edia Lalo-goada
Iesu be iena hahediba taudia ia hamaorodia, ia gwau: “Unai dainai do umui lao, bese ibounai be diba tahua taudia do umui halaoa, bona Tamana, Natuna, bona Lauma Helaga ena ladanai do umui bapatiso henia idia dekenai. Bona idia dekenai do umui hadibaia, umui dekenai lau henia hereva ibounai be do idia badinaia.” (Mataio 28:19, 20) Danu, bema haroro gaukara oi goadalaia, unai ese lauma dalanai oiemu tubu dalana do ia durua momokani. Bema oiemu noho dalana be hegeregere, mani oi hekwarahi haroro gaukara oi karaia goadagoada totona.—Mataio 13:23.
Nega haida, mauri lalonai idia vara hekwakwanai idauidau dainai, nega be hegeregere lasi ita haroro totona. To, haroro tauna bamona oi “raka goada” neganai, oi hahedinaraia oi dekenai “Sivarai Namona” be mai anina bada. (Luka 13:24; Roma 1:16) Bena, abidadama taudia edia haheitalai tauna namona ai do oi lao.—1 Timoteo 4:12.
Kara Maoromaoro Badinaia Taudia
Danu, lo tauna ai oi lao ena anina be oi hekwarahi kara maoromaoro oi badinaia noho totona. Salamo 26:1 dekenai, Davida ia gwau: “Lohiabada e, lau do oi gwauraia kerere lasi, badina be lau ese kara maoromaoro lau karaia vadaeni.” Kara maoromaoro ena anina be kara namo bona goeva momokani. To, ena anina be kara goevadae lasi. Davida be kerere badadia haida ia karaia. To, sisiba ia abia dae bona iena dala ia hamaoromaoroa dainai, ia hahedinaraia iena kudouna dekenai Iehova Dirava ia lalokau henia noho. (Salamo 26:2, 3, 6, 8, 11) Kara maoromaoro ena anina be mai kudouna ibounai ida badinaia. Davida ese ena natuna Solomona ia hamaoroa, ia gwau: “Oiemu tamana ena Dirava dekenai do oi manada momokani, bona iena hesiai gaukara do oi karaia mai oiemu kudouna ibounai.”—1 Sivarai 28:9.
Kara maoromaoro badinaia ena anina ta be ita “be tanobada ena lasi,” bese idauidau edia politikol karadia bona tuari dekenai ita vareai lasi. (Ioane 17:16) Danu, kara kereredia, hegeregere sihari kava, heudahanai, bona drag gaukaralaia kerere karadia amo oi gini siri be namo. (Galatia 5:19-21) To, kara maoromaoro badinaia ena anina be unai gaudia dadaraia karana sibona lasi. Solomona ia gwau: “Bema muramura mai ena bonana namo lalonai, lao idia mase neganai, unai muramura ena bonana do ia dika. Unai bamona danu, kavakava sisina ese aonega, bona taunimanima matauraia kara ia hadikaia noho.” (Hadibaia Tauna 10:1) Oibe, “kavakava sisina,” hegeregere memero bona kekeni edia hevaseha kereredia eiava lebulebu karadia, ese “aonega” tauna ena ladana ia hadikaia diba. (Iobu 31:1) Vadaeni, namona be oi hahedinaraia oi be lo tauna, unai dainai oi hekwarahi oiemu kara ibounai idia namo totona, bona ‘dika ibounai oi rakatania.’—1 Tesalonika 5:22.
Dirava Badinaia Taudia
Danu, lo Keristani tauna be Dirava ia badinaia tauna. Efeso 4:24 ai ita duahia bamona, aposetolo Paulo ese Keristani taudia ia hagoadaia, ia gwau: “Mauri matamata do umui atoa, dabua matamata umui atoa bamona. Inai mauri matamata dainai, emui toana be Dirava ena toana bamona, ia ese ia karaia gauna. Inai mauri matamata ena kara be maoromaoro, helaga bona [badinaia momokani kara].” Greek Revarevadia lalonai, Baibel idia torea gadona ai, inai hereva “badinaia momokani” be helaga, kara maoromaoro, bona hemataurai kara ia kikilaia. Dirava badinaia tauna be abidadama bona helaga tauna; Dirava ese ia henia maduna iboudiai ia laloa namonamo.
Unai Dirava badinaia karana ita habadaia daladia haida be dahaka? Dala ta be oiemu kongregesen ena elda taudia ida oi gaukara hebou. (Heberu 13:17) Lo Keristani taudia idia diba Dirava ese Keriso ia abia hidi, ia be Keristani kongregesen ena kwarana, unai dainai idia ese ‘Dirava ena orea naria’ totona idia abia hidi taudia idia badinaia. (Kara 20:28) Unai abia hidi elda taudia edia siahu ita hepapahuahulaia eiava dadaraia be maoro lasi! Danu, namona be “hesiai tauna mai ena kamonai, bona mai ena kara maoromaoro” bona nega korikori dekenai lauma aniani halasia totona ia gaukaralaia daladia ita badinaia be namo. (Mataio 24:45) Namona be ita ura dikadika Gima Kohorona bona ia bamona bukadia edia hereva ita duahia bona ita badinadia.
Oiemu Kara Dekena amo Lalokau Hahedinaraia
Paulo be Tesalonika Keristani taudia ia tore henidia neganai, ia gwau: “Emui lalokau umui ta ta dekenai danu ia bada lao noho.” (2 Tesalonika 1:3) Lauma dalanai ita tubu lalonai, lalokau ita habadaia be kahana badana ta. Ioane 13:35 lalonai, Iesu ia gwau: “Unai dekena amo taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.” Unai bamona tadikaka lalokau henia karana be hemami amo ita hahedinaraia gauna sibona lasi. Vine’s Expository Dictionary of Old and New Testament Words, ia gwau: “Lalokau be ia havaraia karadia sibona amo ita dibaia diba.” Oibe, unai kahana dekenai lo tauna ai oi lao ena anina be kara dekena amo lalokau oi hahedinaraia!
Hegeregere, Roma 15:7, ia gwau: “Umui ta ta do umui abia dae.” Lalokau oi hahedinaraia dala ta be inai, namona be kongregesen hebou dekenai emu tadikaka bona kamonai matamata taudia oi hedavari henia—mai lalokau bona ura bada ida! Idia oi dibadia. Namona be “haida edia namo” oi tahua. (Filipi 2:4) Reana heabidae karana oi hahedinaraia, bona oiemu ruma dekenai idia oi boiridia be namo. (Kara 16:14, 15) Nega momo, reana idia haida edia kara kerere ese oiemu lalokau do ia tohoa, to idia oi “lalokau henia noho” karana oi dibaia noho lalonai, oi hahedinaraia oi be lo tauna ai oi lao noho.—Efeso 4:2.
Iseda Kohu Ita Gaukaralaia Tomadiho Momokani Ita Durua Totona
Idaunegai, Dirava ena taunimanima haida sibona mo be edia maduna idia hagugurua bona Iehova ena dubu helaga gaukarana idia durua. Unai dainai, Dirava be peroveta taudia, hegeregere Hagai bona Malaki ia siaidia, unai kara dekenai iena taunimanima do idia hagoadaia. (Hagai 1:2-6; Malaki 3:10) Hari inai negai, lo Keristani taudia be mai moale ida edia kohu idia gaukaralaia Iehova tomadiho henia karana idia durua totona. Unai bamona taudia ita tohotohoa, bona Korinto Ginigunana 16:1, 2 ena sisiba ita badinaia be namo, hanaihanai moni sisina ita atoa siri kongregesen bona Iehova ena Witnes taudia edia tanobada ibounai gaukarana ita durua totona. Dirava ena Hereva ia gwauhamata, ia gwau: “Uhe momo do ia hadoa tauna be anina momo do ia geia.”—2 Korinto 9:6.
Oiemu kohu ma haida, hegeregere oiemu nega bona goada oi laloaboio lasi. Namona be anina bada lasi gaudia amo “nega namona [oi] hoia.” (Efeso 5:15, 16, NW; Filipi 1:10) Namona be oiemu nega gaukaralaia namonamo dalana oi dibaia. Unai bamona oi karaia neganai, Kingdom Hall hanamoa bona Iehova tomadiho henia gaukaradia ma haida do oi durua diba. Unai dala ai oiemu kohu oi gaukaralaia dainai, unai ese ia hamomokania oi be lo Keristani tauna ai oi lao.
Oi Hekwarahi Lo Tauna ai Oi Lao Totona!
Tau bona hahine, idia stadi goada bona diba momo idia abia taudia, haroro gaukara idia goadalaia taudia, idia kara maoromaoro, Dirava idia badinaia bona lalokau idia hahedinaraia, bona edia goada bona kohu amo Basileia gaukarana idia durua taudia, be hahenamo bada idia havaraia. Unai dainai, aposetolo Paulo ena hereva ita daradaralaia lasi, ia gwau: “Namona be Keriso ena hadibaia hereva, diba hamatamaia gaudia ita rakatania. Bona iena hereva badadia do ita tahua”!—Heberu 6:1.
Oi be Keristani lo tauna, eiava tau badana vadaeni, a? Eiava, lauma dalana ai, gau haida dekenai oi be beibi bamona? (Heberu 5:13) To, herevana edena bamona, namona be oiemu lalona oi hadaia, sibona emu stadi, haroro gaukara, bona oiemu tadikaka lalokau henia karadia do oi goadalaia. Lo taudia ese oi dekenai idia henia sisiba bona matahakani idauidau oi abia dae be namo. (Aonega Herevadia 8:33) Namona be oiemu Keristani maduna ibounai oi huaia. Oiemu nega bona goada oi henia neganai, “ita ibounai iseda abidadama do ia tamona, bona iseda diba Dirava ena Natuna dekenai danu be tamona. Bona ita be tau badadia do ita halaoa, oibe, Keriso ena bada hegeregerena danu do ita abia gwauraia.”—Efeso 4:13.
[Blurb on page 27]
Keristani tau badadia be kongregesen idia hagoadaia. Kongregesen ena lalohadai badana, eiava lalona veria siahuna, ena namo idia habadaia.
[Pictures on page 29]
Lo taudia be ma haida edia namo idia laloa bada, unai amo kongregesen lalonai hemami namona idia havaraia