Heduru Ena Noinoi Ta

BRAZIL hahinena ta ia gwau: “Dirava ese lau ia laloaboio vadaeni!” Iena adavana ia mase haraga murinai, ia laloa hari ena mauri be anina lasi. Nega ta ia lalohisihisi eiava reana heduru totona ia noinoi tauna ta oi durua toho, a?

Taunimanima haida edia lalona ia hegeregere lasi dainai edia mauri idia hadokoa​​—⁠bona idia momo be matamata taudia. Folha de S. Paulo niuspepa ia gwau, Brazil dekenai tahua karana ta ese ia hahedinaraia “sibona idia hamasea matamata taudia edia namba be 26 pesen amo ia bada daekau.” Hegeregere, Walter,a tau matamatana ta São Paulo dekenai, mani oi laloa. Ia be tama sina lasi, ruma lasi, nega ia davaria diba lasi ia sibona totona, bona heduru idia henia diba turadia be lasi. Iena hisihisi haorea totona, Walter ese ena lalona ia hadaia nesehanai amo do ia paudobi.

Adavana lasi sinana ta, Edna, be natuna rua ia abia vadaeni neganai, tau ma ta ia davaria. Hua tamona murinai, unai tau ena sinana, meamea karadia lalonai ia vareai bona inuinu kekero hahinena, ena ruma dekenai idia noho hebou matamaia. Edna ese natuna ma ta ia abia, ia inuinu momo, bona ia lalo-metau bada dainai ia ura sibona ia hamasea. Dokonai, kota ena hereva dainai ena natuna naridia ena maoro ia haboioa.

Buruka taudia be edena bamona? Guna, Maria be moale bona hereva momo hahinena. To, ia buruka neganai, iena nesi gaukarana dainai ia lalo-hekwarahi momo badina kerere ia karaia garina ia gari. Unai dainai ia lalo-metau. Sibona ia hanamoa toho murinai, doketa amo heduru ia tahua, bona toana be ia abia heduruna ese ia durua. To iena mauri lagani be 57 bona ena gaukara ia haboioa neganai, lalo-metau be ia giroa bona ia bada herea dainai ia laloa heduru dalana be lasi. Maria ese sibona hamasea karana ia laloa matamaia.

Profesa José Alberto Del Porto, São Paulo University tauna ia gwau: “Daradoko taudia 10 pesen be sibona idia hamasea toho.” U. S. pablik-helt dipatmen gunalaia tauna, Dr. David Satcher, ia gwau: “sibona idia hamasea taudia edia namba ese ala-ala dainai idia mase taudia edia namba ia hanaia.”

Nega haida sibona hamasea toho karana be heduru abia ena noinoi. Bona momokani ruma bese taudia bona turadia idia ura ena helaro ia haboioa tauna totona gau maorona do idia karaia. Momokani, do oi durua lasi bema inai bamona herevadia oi gwauraia: “Oi lalohisihisi lasi,” “Taunimanima momo edia hekwakwanai ese oiemu ia hanaia,” eiava, “Ita ibounai be nega ta ta dina dikana ita abia.” To, namona be tura korikorina bona kamonai namonamo tauna ai ita lao be namo, ani? Oibe, namona be lalo-metau tauna ita durua toho bena do ia itaia mauri be mai anina.

France ena toretore tauna Voltaire ia gwau: “Ia lalohisihisi dainai, tau ta be sibona ia hamasea hari, to bema sibona ia hamasea lasi to pura ta lalonai ia haheauka, iena ura be do ia mauri.” Vadaeni, edena dala ai idia dara-doko taudia ese do idia davaria mauri be mai ena anina?

[Footnote]

[Picture on page 3]

Sibona idia hamasea matamata taudia bona taunimanima badadia edia namba be ia bada daekau

[Picture on page 4]

Ena helaro ia haboioa tauna be edena bamona oi durua diba?