Duahia Taudia Edia Henanadai

Bema ta be sibona ia hamasea, ia namo bema Keristani hesiai tauna ta ese ena mase guria herevana do ia karaia, a?

Keristeni hesiai taudia ta ta sibona ese abia hidi do ia karaia, bema ena lalona ena mamina ia namo sibona ia hamasea tauna ena mase guria herevana do ia karaia totona. Abia hidi ia karaia neganai, inai henanadai ia laloa be namo: Iehova ena lalohadai sibona hamasea karana dekenai be dahaka? Ia be momokani sibona ia hamasea, a? Lalona ena mamina dikana ese sibona hamasea karana ia havaraia, a? Oiemu gabu dekenai idia noho taudia ese sibona hamasea karana be edena bamona idia laloa?

Ita be Keristeni taudia dainai, ita laloa bada gauna be Iehova ese sibona hamasea karana be edena bamona ia laloa. Iehova dekenai taunimanima edia mauri be dava bada gauna bamona bona helaga. (Genese 9:5; Salamo 36:⁠9) Mai ena ura ida sibona ia hamasea tauna be ala-ala karana ia karaia, bona unai dainai Iehova ese unai kara ia ura henia lasi. (Esodo 20:13; 1 Ioane 3:​15) Unai ese ia hahedinaraia sibona ia hamasea tauna totona mase guria herevana do idia karaia lasi, a?

Israela ena King Saulo mani oi laloa. Pilistia taudia ida ia tuari negana ginigabena ai ia diba do ia roho mauri lasi neganai, ia ura lasi iena inai taudia ese ia idia hadikaia dainai, “Saulo ese iena tuari kaia ena matana dekenai ia moru, sibona ia hamasea.” Pilistia taudia ese iena mase tauanina idia davaria neganai, idia abia bona Betesana hanua ena magu dekenai idia kokoa. Iabese Gileada taudia ese Pilistia taudia idia karaia karana idia itaia neganai, idia ese mase tauanina idia kokia oho bona idia gabua. Murinai iena turia idia abia bona idia guria. Danu dina 7 idia aniani lasi, Israela taudia dekenai unai be edia lalo-hisihisi hahedinaraia karana ta. (1 Samuela 31:​4, 8-​13; Genese 50:10) Davida, Iehova ena horoa tauna, ese Iabese Gileada taudia idia karaia karana ia dibaia neganai, ia gwau: “Lohiabada ese umui do ia hanamoa, badina be umui emui abidadama be emui biaguna Saulo dekenai umui hahedinaraia, vadaeni umui guria. Lohiabada ese iena bogahisihisi, bona iena durua umui dekenai do ia henia.” (2 Samuela 2:​5, 6) Baibel ese ia hahedinaraia lasi Iabese Gileada taudia ese King Saulo totona mase guria ena hebou idia karaia dainai idia gwauraidia dika. Unai sivarai bona edia kara dika dainai idia guria lasi taudia edia sivarai mani oi hahegeregerea. (Ieremia 25:​32, 33) Keristani hesiai tauna ese Saulo ena sivarai do ia laloa diba bema ia ura sibona ia hamasea tauna ena mase guria herevana ia karaia.

Unai hesiai tauna ese danu mase guria herevana ena badina do ia laloa namonamo. Iehova ena Witnes taudia be mase guria ena hebou idia karaia neganai, mase diba lasi souli herevana idia abia dae taudia bamona idia karaia lasi, gabu ma ta dekenai mase tauna siaia lao ena lalohadai kererena idia abia lasi. Unai hebou ena badina badana be mase tauna ena namo totona lasi, to idia taitai taudia edia lalona hagoadaia bona idia mai taudia dekenai mase taudia dekenai dahaka ia vara idia gwauraia hedinarai totona. (Hadibaia Tauna 9:​5, 10; 2 Korinto 1:​3-5) Mase guria herevana idia karaia ena badina badana ma ta be idia mai taudia dekenai idia hahedinaraia iseda mauri be kwadogi sibona. (Hadibaia Tauna 7:⁠2) Sibona ia hamasea tauna ena mase guria herevana idia karaia neganai, unai badina idauidau do ia hagugurua diba, a?

Momokani, haida do idia laloa inai tauna be iena ura dainai sibona ia hamasea, bona ia diba ia be Iehova dekenai ia kara dika. To nega ibounai unai hemami hamomokania dalana ta ia noho, a? Reana unai kara ia karaia haraga sibona, a? Taunimanima haida be sibona idia hamasea toho to edia lalona idia haidaua bona unai kara idia karaia lasi. Tau ta ia mase murinai iena kara dainai do ia helalo-kerehai diba lasi.

Oi laloa diba gauna badana ma ta be lalona bona hemami gorerena dainai sibona hamasea karadia momo idia vara. Idia ita gwauraia momokani diba sibona idia hamasea taudia. Tahua gaukara haida hegeregerena, sibona idia hamasea taudia 90 pesen be lalona, hemami, eiava drag manadalaia edia hekwakwanai idia abia taudia. Iehova ese unai bamona lalona dikana dainai sibona ia hamasea tauna ena dika do ia gwauatao diba, a? Unai tauna be Iehova ena matana ai, do ia gwauatao diba lasi kara dikana ia karaia be ita hahemaorolaia diba lasi. Keristani hesiai tauna ese mase guria herevana do ia karaia eiava lasi ia laloa neganai, reana sibona ia hamasea tauna ena noho bona ena medikol sivarai do ia laloa.

Gau ma ta ita laloa danu be namo: Oiemu gabu dekenai idia noho taudia be sibona hamasea karana bona unai tauna ena mase dekenai dahaka idia laloa? Unai be mai anina bada elda taudia dekenai, badina edia gabu dekenai idia noho Iehova ena Witnes taudia edia kongregesen ena ladana idia laloa bada. Unai gabu taudia ese sibona hamasea karana idia laloa dalana, bona unai kara ia karaia tauna idia laloa dalana hegeregerena, reana elda taudia do idia laloa taunimanima vairanai mase guria herevana be kongregesen ese do idia karaia lasi eiava Kingdom Hall dekenai do idia karaia lasi.

To, bema Keristani hesiai tauna ta idia noia mase guria herevana ia hakaua totona, reana do ia laloa ia sibona ena lalohadai hegeregerena ia karaia, do ia karaia diba. Bema unai ia karaia, namona be ia laloa namonamo bona reana unai tauna do ia toreisi lou diba herevadia ia gwauraia goada lasi. Ia mase tauna ena vaira negana be Iehova ena imana ai ia noho, bona ta ia gwau diba lasi unai mase tauna be do ia toreisi lou eiava lasi. Hesiai tauna ena hereva lalonai be Baibel ena hereva momokani mase dekenai do ia gwauraia diba bona lalo-hisihisi taudia ia hagoadaia.