Tanobada—Hahetoho Gabuna Sibona, A?

UNAI be moale bada gauna! Ia kwalimu. Unai stiuden kekenina be wiki rua lalonai mai hekwarahi ida eksam ia karaia, vadaeni ripoti namona ia abia. Hari ia ura henia moni gaukarana do ia abia diba.

Taunimanima momo ese edia mauri inai tanobada dekenai be unai bamona idia laloa. Idia laloa ia be taunimanima ibounai do idia abia hahetohona ta. Unai hahetoho lalonai idia “kwalimu” taudia ese mase murinai mauri idauna ta, mauri namona unai, do idia abia. Bema hari ita abia mauri​​—⁠bona momo edia mauri be auka​​—⁠be taunimanima ese do idia abia diba mauri namo hereana, unai be dika. Ena be iena mauri ena kahana badana lalonai ia gorere lasi bona ia taga, to Baibel ese ia sivarailaia tauna Iobu ia itaia: “Hahine edia bogana, amo ita vara taudia, iseda mauri dinadia be momo lasi, bona iseda hekwarahi be bada herea.”​​—⁠Iobu 14:⁠1.

New Catholic Encyclopedia ese taunimanima momo idia abia lalohadai ia hahedinaraia, ia gwau: “Dirava ia ura taunimanima ese guba hairaina idia abia. . . . Taunimanima ese guba ena hahenamo idia abia neganai moale do idia abia.” Vanegai, United States dekenai, Church of Christ oreana ese tahua gaukarana idia karaia neganai, idia haere taudia 87 pesen idia gwau idia laloa idia mase murinai do idia lao guba dekenai.

Keristani lasi taudia momo danu idia laloa idia mase murinai tanobada do idia rakatania bona gabu namona ta dekenai do idia lao. Hegeregere, Muslim taudia, edia helaro be do idia lao guba paradaisona dekenai. Buddhist ena Pure Land tomadihona idia badinaia taudia China bona Japan dekenai, idia laloa bema Buddha ena Doko Diba Lasi Diarina ena ladana “Amitabha,” idia gwauraia loulou neganai, idia be Pure Land, eiava Western Paradise lalonai do idia vara lou, unuseniai moale bada herea do idia abia.

To, Baibel, tanobada ibounai lalonai gado momo herea ai idia hahanaia bona halasia buka helagana, ia gwau lasi tanobada amo ita heau mauri be namo eiava ia be gabu ma ta dekenai ita hanaia totona do ita noholaia gabu. Hegeregere, ia gwau: “Kara maoromaoro taudia ese, Dirava ia henidia tano dekenai do idia noho ela bona hanaihanai.” (Salamo 37:29) Baibel lalonai Iesu ena haroro herevana badana ia noho danu: “Manau taudia ese hahenamo do idia abia: idia be tanobada do idia abia.”​​—⁠Mataio 5:​5, King James Version.

Momo edia lalohadai be tanobada dekenai ita mauri daudau lasi, unai dainai mase ena iduara amo mauri idauna mai moalena do ita abia. Bema unai be momokani, mase be hahenamo ta. To taunimanima momo ese mase be unai bamona idia laloa, eiava idia hekwarahi inai mauri idia hadaudaua totona? Idia vara gaudia ese idia hahedinaraia bema taunimanima ese gorere lasi bona noho namo maurina idia moalelaia, idia ura lasi idia mase.

To, badina iseda mauri inai tanobada dekenai be dika bona hisihisi amo ia honu, momo idia do laloa guba be maino korikori bona moale davaria gabuna tamona. Guba sibona be maino gabuna, dika bona heiriheiri ibounai idia noho lasi, a? Bona mase murinai mauri idauna ta be guba ena gabu ta sibona dekenai ia noho, a? Baibel ena haere dekenai do oi hoa. Mani oi duahia noho.