Tomadiho Haida Oi Tahua be Namo, A?

MIGUEL hari ia be Iehova ena Witnes tauna ta South America dekenai ia gwau: “Kahirakahira lagani tamona lalonai Keristani heboudia lau lao, bona Dirava ena Basileia be haida dekenai lau herevalaia karana lau moalelaia. Bena reidio dekenai tomadiho program idauidau lau kamonai henia matamaia bona televisen dekenai haroro taudia lau raraia. Lau laloa unai bamona program ese lau do idia durua tomadiho idauidau taudia do lau lalo-pararalaia namonamo totona. Lau lalo-parara edia hahediba herevadia be Baibel ena hereva hegeregerena lasi, to lau ura lau diba.”

Unai tano tamona ai, Jorge ese tomadiho momokani be haida dekenai ia hadibaia goadagoada. To, nega ta, ia danu be reidio bona televisen dekenai tomadiho edia program idauidau ia kamonai matamaia. Nega momo ia gwau: “Haida idia laloa gaudia oi dibaia be namo.” Hahediba hereva koikoidia kamonai henia karana ese ia idia hadikaia diba idia henanadailaia neganai, ia gwau: “Baibel ena hereva momokani ia diba tauna ena abidadama be gau ta ese ia hamanokaia diba lasi.” Unai sivarai rua ese mai anina bada henanadai idia havaraia, Haida idia abia dae gaudia ita kamonai henia be aonega karana, a?

Keristani Tomadiho Momokanina Dibaia Dalana

Aposetolo taudia idia mase murinai, Keristani tomadihona ena toana idia tohotohoa tomadiho koikoi momo be metairametaira idia vara bona tomadiho momokanina idia hamiroa. Iesu be unai ia diba guna dainai, ia ese Keristani momokanina be Keristani koikoidia amo ita dibaia dalana ta ia hahedinaraia. Ia gwau: “Umui naria namonamo, peroveta koikoi taudia garina. Idia mai noho, edia toana be mamoe bamona, to edia lalona be uda sisia dagedage bamona.” Bena ma ia gwau: “Edia huahua dekena amo do umui diba idia be namo o dika.” (Mataio 7:​15-23) Iesu ena murinai idia raka taudia momokanidia be ia hadibaia gaudia idia badinaia, bona edia kara namodia dainai maoromaoro oi dibadia. Iesu ia karaia hegeregerena, taunimanima idia vadivadi henia bona Baibel amo Dirava ena Basileia idia gwauraia hedinaraia. Iesu ena haheitalai idia badinaia dainai, tanobada ena politikol bona bese edia hepapahuahu amo idia gini siri. Idia abia dae Baibel be Dirava ena Hereva bona hereva momokani bamona idia matauraia. Dirava ena ladana idia gwauraia hedinarai. Dirava ese ia hadibaia lalokauna badinaia totona idia hekwarahi dainai, tuari lalonai idia vareai lasi. To, idia ta ta idia kara henia tadikaka bamona.​​—⁠Luka 4:​43; 10:​1-9; Ioane 13:​34, 35; 17:​16, 17, 26.

Baibel ena hereva hegeregerena, “umui ese kara maoromaoro tauna bona dika momokani tauna, Dirava ia hesiai henia tauna bona Dirava ia hesiai henia lasi tauna, edia idau do umui itaia lou momokani.” (Malaki 3:​18, NW ) Hari inai negai, tomadiho momokani taudia be edia lalohadai bona kara dekenai idia tamona, Keristani taudia ginigunadia hegeregeredia. (Efeso 4:​4-6) Unai bamona Keristani taudia korikoridia oi davaria neganai, dahaka dainai haida idia abia dae gaudia oi henanadailaia eiava oi ura dibaia be namo?

Hahediba Koikoi Taudia Dainai Oi Naria Namonamo

Baibel ese ia hahedinaraia, ena be Baibel ena hereva momokani oi dibaia murinai, lauma dalanai hahediba koikoi herevadia ese oi idia hamiroa ena dika ia noho. Aposetolo Paulo ia gwau: “Umui naria namonamo, tau ta ese taunimanima edia aonega hereva kava dekena amo umui ia koia garina. Inai bamona hereva be sene taudia edia kara, bona tanobada idia gunalaia lauma dikadia dekena amo idia mai, Keriso dekena amo lasi.” (Kolose 2:⁠8) Unai siri ese laulau namona ia hahedinaraia! Dagedage animal ese oi idia abia bona ania hegeregerena, hahediba koikoi taudia ese oi idia hadikaia diba.

Momokani, Paulo ese haida idia abia dae gaudia ia laloa danu. Nega ta ena hereva ia hamatamaia neganai ia gwau: “Atena taudia e, lau itaia vadaeni, dirava idauidau momo umui laloa bada. Badina be umui emui hanua lalonai lau loaloa bona umui emui tomadiho henia gaudia lau itaia neganai, boubou patana ta lau davaria, iena latanai revareva inai bamona idia torea, ‘Ita diba lasi Dirava ena.’ ” (Kara 17:​22, 23) To, Paulo be Greek taudia edia aonega hereva idia gwauraia namonamo taudia edia hereva ia kamonai hanaihanai lasi.

Tomadiho koikoi idia matamaia dalana bona idia abia dae gaudia oi dibaia be gau ta to idia oi kamonai henia be ma gau ta.a Iehova be “hesiai tauna mai ena kamonai, bona mai ena kara maoromaoro” ia abia hidi iena Hereva amo idia abia hahediba herevadia do idia gwauraia totona. (Mataio 4:4; 24:45) Paulo ia gwau: “Lohiabada ena pata dekenai noho aniani, bona lauma dikadia edia pata dekenai noho aniani ruaosi be nega tamona umui ania diba lasi. Edena bamona? Umui ura Dirava umui habadua, a?”​​—⁠1 Korinto 10:​20-22.

Reana guna hahediba koikoi taudia haida be Keristani taudia momokanidia, to nega ta hereva momokani idia rakatania bona kerere dalana idia badinaia. (Iuda 4, 11) Unai kara dainai ita hoa lasi. “Hesiai tauna mai ena kamonai, bona mai ena kara maoromaoro,” horoa Keristani oreana ia laulaulaia tauna, ia herevalaia murinai, Iesu ese “hesiai tauna dikana” ia herevalaia, idia be maumau momo oreana, idia gwau, “lauegu biaguna be do ia giroa mai haraga lasi,” bona ia ese iena hesiai turadia ia botaia. (Mataio 24:​48, 49) Nega momo, unai taudia bona edia murinai idia raka taudia be mai edia hahediba herevadia maorodia lasi; edia ura gauna tamona be haida edia abidadama do idia hadikaia. Unai taudia ia herevalaia neganai, aposetolo Ioane ia gwau: “Bema tau ta umui dekenai ia mai, bona inai Keriso ena hadibaia hereva ia gwauraia lasi neganai, emui ruma dekenai do umui abia dae lasi. Bona hanamoa hereva do umui henia lasi.”​​—⁠2 Ioane 10; 2 Korinto 11:​3, 4, 13-​15.

Tomadiho momokani idia tahua kudou-maoro taudia be tomadiho idauidau amo idia kamonaia gaudia idia laloa namonamo be namo. Nega korikori ai, Dirava ese hereva momokani idia tahua kudou-maoro taudia do ia hanamoa. Baibel ese Dirava ena amo ia mai aonegana ia herevalaia, ia gwau: “Bema oi tahua, siliva do oi tahua bamona, bema oi tahua goada, kohu momo, idia hunia gaudia, do oi tahua bamona, unai neganai . . . Dirava do oi diba.” (Aonega Herevadia 2:​4, 5) Dirava ena aonega be Baibel amo bona Keristani kongregesen amo idia dibaia bona Iehova ese unai aonega idia badinaia taudia ia hanamoa dalana idia itaia dainai, Keristani taudia momokanidia be tomadiho koikoi edia hahediba herevadia idia kamonai noho lasi.​​—⁠2 Timoteo 3:​14.

[Footnote]