Duahia Taudia Edia Henanadai
Baibel ena hahegani hegeregerena rara gaukaralaia dalana maorona ita laloa neganai, ta ena rara medikol daladia ai idia gaukaralaia karana be Iehova ena Witnes taudia ese edena bamona idia laloa?
Keristani taudia ta ta be sibona ena ura hegeregerena eiava medikol herevana ta sibona dainai kara ta ia abia hidi lasi, to Baibel ena hereva do ia laloa momokani be gau badana. Unai be ia bona Iehova vairanai mai anina gauna ta.
Iehova, iseda mauri ia henia Diravana, ena taravatu be rara ita ania lasi. (Genese 9:3, 4) Idaunegai Israela taudia edia Taravatu lalonai, Dirava ese rara gaukaralaia ena hetoana ia atoa badina rara be mauri ia laulaulaia. Hahegani ia atoa, ia gwau: “Mauri gaudia ibounai edia mauri be rara [lalonai]. Unai dainai lau Lohiabada ese lau oda henia vadaeni rara ibounai be boubou patana dekenai do idia bubua, taunimanima edia kara dika davana do ia karaia totona.” To bema tau ta ia ura aniani totona animal ta ia alaia, dahaka do ia karaia? Dirava ia gwau: “Ia ese rarana do ia habubua tano dekenai, bona tano kahu dekena amo unai rara do ia koua.”a (Levitiko 17:11, 13) Iehova ese unai hahegani ia gwauraia loulou. (Deuteronomi 12:16, 24; 15:23) Iuda taudia edia Soncino Chumash ia gwau: “Rara do umui haboua lasi to tano dekenai umui bubua karana amo idia hahedinaraia idia ania be hegeregere lasi.” Israela tauna ta ese mauri gauna ma ta ena rara do ia abia lasi, haboua lasi, bona do ia gaukaralaia lasi, badina ena mauri be Dirava ena.
Mesia ia mase neganai, Mose ena Taravatu badinaia ena maduna ia ore. To, Dirava ena lalohadai, rara ia helaga lalohadaina, ia do noho. Dirava ena lauma helaga ese aposetolo taudia edia lalona ia hamarerea neganai Keristani taudia idia hagania ‘rara do idia ania lasi.’ Unai hahegani do idia laloa maragi lasi. Unai be mai anina bada karana, sihari kava karadia eiava kaivakuku tomadiho henia karadia idia dadaraia be mai anina bada hegeregerena. (Kara 15:28, 29; 21:25) Lagani 1900 murinai, rara henia hanai karana ia bada neganai, Iehova ena Witnes taudia idia lalo-parara unai kara be Dirava ena Hereva ia utua karana.b
Nega haida, gorere tauna ta be opereisen ia do abia lasi bona pura haida idia do noho neganai, doketa ese do ia hamaoroa ena rara do idia haboua (preoperative autologous blood donation, eiava PAD), bena unai amo bema ia dekenai rara do idia henia be namo, sibona ena rara do idia henia hanai diba. To, unai bamona rara haboua, atoa, bena henia hanai karana be Levitiko bona Deuteronomi edia hereva ia utua momokani. Idia gwau rara do idia haboua lasi; do idia bubua diho—Dirava dekenai idia henia lou bamona. Momokani, Mose ena Taravatu be hari ita ia guia lasi. To, Iehova ena Witnes taudia be unuseniai idia noho hakaua herevadia idia laloa bada, bona edia lalona idia hadaia ‘rara do idia ania lasi.’ Unai dainai, idia be rara idia henia lasi, eiava rara idia haboua lasi gabeai idia henia hanai totona, badina unai rara ‘idia bubua’ diho be maoro. Unai bamona rara henia karana be Dirava ena taravatu utua karana.
Ta ena rara dekenai idia karaia gaudia haida eiava tohoa karadia haida dekenai ia hedinarai goevagoeva lasi unai be Dirava ena taravatu utua karadia. Hegeregere, Keristani taudia momo be edia rara sisina idia henia do idia tohoa o idia sekea totona, bena unai rara idia negea. Reana doketa ese rara dekenai do idia karaia medikol karadia ma haida do idia gwauraia danu.
Hegeregere, opereisen daladia haida idia badinaia lalonai, rara haida be tauanina murimurina ai idia hahanaia bema kara ta ladana hemodilution idia karaia. Iena tauanina lalonai ia do noho rara dekenai ranu bamona gauna idia atoa. Gabeai, idia hahanaia rara haida be ena tauanina lalonai idia haheaua vareai lou, unai amo iena rara edia sel idia bada lou. Unai hegeregerena, bero dekenai ia aru vareai rarana idia abia bona hagoevaia diba, bena unai amo gorere tauna dekenai rara ena sel kakakakadia idia henia lou diba; unai idia gwauraia cell salvage. Dala idauna ma ta dekenai, rara be masini ta dekenai idia haheaua lao bona unai masini be unai nega lalonai tauanina ena kahana haida (hegeregere, kudou, baragi, eiava nadinadi) ese idia karaia gaukarana ia karaia. Bena unai masini amo rara be gorere tauna dekenai ia lao lou. Dala ma haida dekenai, rara be kahana idauidau haria masini (centrifuge) ta dekenai idia haheaua lao, unai amo idia dika gaudia idia kokia diba. Eiava rara amo kahana ta idia hapararaia bena haida idia atoa tauanina ena kahana ma ta dekenai. Danu rara tohoa karadia haida dekenai rara sisina idia abia muramura danu idia mikisi totona, bena unai murinai gorere tauna dekenai idia atoa vareai lou.
Gau maragidia momo idia idau diba, bona dala, muramura, bona tohoa gaudia matamatadia do idia havaraia. Unai gaudia ta ta lalohadailaia bona dala ta abia hidi be aiemai maduna lasi. Keristani tauna sibona ese opereisen ta, medikol tohoa karana ta, eiava gorere hanamoa dalana ta idia karaia lalonai iena rara do idia gaukaralaia dalana do ia abia hidi. Nega bada ia noho lalonai, doketa eiava medikol tauna do ia nanadaia opereisen o medikol karadia idia karaia lalonai iena rara dekenai reana dahaka do idia karaia diba. Bena iena lalona ena mamina hegeregerena do ia abia hidi. (Maua itaia.)
Keristani taudia be edia gwauhamata Dirava dekenai bona ia do ‘idia lalokau henia mai edia kudouna ibounai, mai edia lauma ibounai, mai edia goada ibounai, bona mai edia lalona ibounai’ ena maduna idia laloatao be gau badana. (Luka 10:27) Iehova ena Witnes taudia be edia hetura karana namona Dirava ida idia laloa bada momokani, to tanobada ai taunimanima momo be unai bamona lasi. Mauri Henia Tauna ese taunimanima ibounai ia hamaoroa Iesu ena rara, ia bubua gauna, do idia abidadama henia. Baibel dekenai ia gwau: “Keriso ese iena mase dekena amo ita ia hoia lou vadaeni, iena rarana dainai. Iseda dika danu ia ese ia gwauatao vadaeni.”—Efeso 1:7.
[Footnotes]
a Profesa Frank H. Gorman ia gwau: “Rara bubua diho be kara helagana ta, unai animal ena mauri matauraia karana ia hahedinaraia bona, unai amo, unai mauri ia havaraia bona ia naria noho Diravana matauraia karana ia hahedinaraia.”
b The Watchtower, July 1, 1951 gauna, ese unai kara dekenai henanadai badadia ia haerelaia, bona ia hahedinaraia dahaka dainai ma ta ese ia henia rarana idia henia hanai be maoro lasi.
[Box/Pictures on page 31]
SIBONA OI HENIA HENANADAI
Bema egu rara haida be egu tauanina murimurina ai idia haheaua lao bona ena heau be reana nega sisina lalonai idia koua, egu lalona ena mamina do ia dika lasi badina lau laloa unai rara be egu tauanina ai ia do noho, bona unai dainai ‘tano dekenai do idia bubua’ lasi be hegeregere, a?
Bema tohoa karana ta eiava gorere hanamoa karana ta lalonai lauegu rara haida do idia abia, unai rara dekenai gau ta idia karaia, bena egu tauanina lalonai (eiava dekenai) idia atoa lou, Baibel amo lau hadibaia lalona ena mamina do ia dika lasi, a?