Mata-Galasi Karaia Tauna ese Uhe Ia Hadoa

Ena be Ukraine ena taoni Lviv bona Israel ena taoni Haifa huanai be kilomita 2,000 bamona bona tano haida idia noho, to edena dala ai Haifa dekenai Iehova ena Witnes taudia edia Russia gado kongregesen ta idia haginia gaukarana lalonai, Lviv dekenai ia noho mata-galasi karaia tauna ena gaukara be mai anina? Inai sivarai ese ia hahedinaraia Baibel ena hereva Hadibaia Tauna 11:6 lalonai be momokani, ia gwau: “Daba neganai, bona adorahi neganai danu, uhe do oi hadoa. Badina be oi diba lasi, do ia tubu namonamo o lasi.”

ISEDA sivarai be lagani 1990 ai ia matamaia, unai nega ai Ella, hahine matamata Iuda besena amo, be Lviv dekenai ia noho. Ella bona ena ruma bese be Israel dekenai idia lao gwauraia, do idia noho totona. Kahirakahira do idia lao gwauraia neganai, Ella be mata-galasi karaia tauna ta dekenai ia lao bona unai tauna be Iehova ena Witnes ta. Unai neganai, Ukraine dekenai Iehova ena Witnes taudia edia gaukara idia taravatua. To, unai mata-galasi karaia tauna ese Ella dekenai ia abia dae Baibel herevadia ia hahedinaraia matamaia. Ella ia hoa badina unai tau ia gwau Dirava be mai ena ladana. Unai ese Ella ena lalona ia veria, bona Baibel idia herevalaia namonamo.

Ella ese unai herevahereva ia moalelaia bada dainai ia noia bema pura vairai bena unai murinai purana ai do idia hereva lou diba. Ena ura ia bada ia lao, to hekwakwanai ta ia noho. Nega be ia mai kahirakahira, Ella bona ena ruma bese be Israel dekenai idia lao totona. To Ella ese gau momo ia do diba lasi! Ia do noho negana ia gaukaralaia namonamo totona, ia noia bema Baibel stadi be dina ta ta ai do idia karaia diba ela bona do ia lao. Ena be Ella be Israel dekenai ia ginidae murinai, maoromaoro stadi ia hamatamaia lou lasi, to hereva momokani ena uhe be ena kudouna dekenai ramuna ia havaraia vadaeni. Lagani ia do ore lasi lalonai, mai ena ura ida Baibel stadi ia matamaia lou.

Persian Gulf dekenai tuari ia vara, bona Iraq taudia ese Israel dekenai bomu idia negea. Taunimanima ese unai idia herevalaia momo. Dina ta sitoa badana dekenai, Ella ia kamonai vanegai sibona Israel dekenai idia mai ruma bese be Russia gado ai idia herevahereva. Ena be Ella be Baibel stadi ia abia noho, to unai ruma bese dekenai ia lao bona maino tanobada ena gwauhamata Baibel amo ia herevalaia. Unai dainai, tubuna hahine Galina; sinana Natasha; natuna mero Sasha (Ariel); bona natuna kekeni Ilana, be Ella ena Baibel stadi lalonai idia vareai.

Unai ruma bese taudia amo bapatiso ia abia tauna ginigunana be Sasha​—⁠ena be hahetoho momo ia davaria. Ena be ia be stiuden namona, to sikuli amo idia atoa siri badina ena Keristani lalona ena mamina dainai ia ura lasi ami karadia ia dibaia, bona sikuli ai unai be stiuden ibounai idia karaia kosi ta. (Isaia 2:​2-4) Sasha ena hekwakwanai be Israel ena Kota Badana Ierusalem dekenai idia herevalaia, bona edia oda namona be sikuli ese Sasha do idia abia dae lou, ena sikuli negana ia haorea diba totona. Tano ibounai lalonai unai idia herevalaia. Unai dainai, Israel taudia momo be Iehova ena Witness taudia ese idia abia dae hadibaia herevadia idia diba.a

Sasha ese haisikuli ia haorea murinai, Iehova ena Witnes taudia edia ful-taim hesiai gaukara ia karaia matamaia. Hari ia be spesel painia bona kongregesen ena elda ta. Iena taihuna maragina, Ilana, ese ful-taim hesiai gaukara ia karaia danu. Edia sinana bona edia tubuna hahine be bapatiso Witnes taudia. Unai mata-galasi karaia tauna ese ia hadoa uhena be anina ia havaraia noho!

Unai ibounai ia vara lalonai, Ella be lauma dalanai ia goada ia lao bona nega sisina murinai ruma ta ruma ta dekenai ia haroro. Ia lao henia ruma ginigunana ai, Ella ese Faina ia davaria, ia be vanegai sibona Ukraine amo ia mai. Faina ia daradoko. Gabeai Ella ia dibaia, Faina ena iduara dekenai ia do pidipidi lasi neganai, unai daradoko hahine ese Dirava ia guriguri henia, ia noinoi: “Lau diba lasi oi be daika, to bema lau oi kamonai, mani lau oi durua.” Ia bona Ella be idia herevahereva namo herea. Faina ese henanadai momo ia henia bona ia abia haere ia lalodia namonamo. Gabeai, ia diba momokani Iehova ena Witnes taudia ese Baibel ena hereva momokani idia hadibaia. Ia karaia kosi iunivesiti dekenai edia nega ia haidaua, kongregesen bona haroro gaukara dekenai nega sisina bada ia atoa diba totona. May 1994 ai, Faina ia bapatiso. Ia danu ese painia gaukara ia hamatamaia, bona pat-taim kompiuta gaukara amo ena mauri durua gaudia ia abia.

November 1994 ai, haroro gaukara lalonai, Ella ese manoka mamina ia abia. Ia be hospital dekenai ia lao bona unuseniai idia karaia gorere tahua karana ese ia hahedinaraia ena bogarau lalonai ia noho toto amo rara ia diho noho. Hanuaboi ai, Ella ena rara ena hemoglobin be ia diho 7.2 dekenai. Ella ena kongregesen ena elda ta, unai gabu ena Hospital Liaison Committee (HLC) ena seamani, ese doketa taudia dekenai rara lasi medikol daladia momo ia hahedinaraia.b Opereisen idia karaia, rara idia gaukaralaia lasi, bona gabeai Ella ia namo lou.​—⁠Kara 15:​28, 29.

Ella ena doketa ta, hahine edia gorere ia stadilaia doketa, Karl, Germany dekenai ia vara Iuda tauna, be unai ia laloa bada. Bena ia laloatao iena tama sina, Holocaust amo idia roho mauri taudia, ese dibura kamepadia dekenai Iehova ena Witnes taudia idia diba. Karl ese henanadai momo ia henia. Ena be ena medikol gaukarana dekenai ia bisi bada, to Karl ese nega ia atoa Baibel stadi ia abia hanaihanai totona. Murina laganina ai, pura ta ta ai idia karaia Keristani heboudia dekenai ia lao.

Unai mata-galasi karaia tauna ese ia hadoa uhena amo dahaka ia vara? Ita itaia vadaeni dahaka ia vara Sasha bona iena ruma bese dekenai. Bona Ella be spesel painia gaukara ia karaia. Iena natuna kekeni, Eina, vanegai sibona haisikuli ia haorea, be painia gaukara ia hamatamaia danu. Faina danu be spesel painia ta. Bona Karl, Ella ena doketa ta, be hari bapatiso Witnes tauna bona kongregesen ena hesiai tauna ta, bona hanamoa hereva momokani Baibel amo be iena heduru idia tahua gorere taudia bona ma haida dekenai ia hadibaia.

Guna, idau tano amo idia mai bona Russia gado idia hereva taudia edia grup maragina be Haifa Hebrew Kongregesen lalonai idia noho, to hari Russia gado kongregesen goadana ai idia lao, bona ena Basileia pablisa taudia edia namba ese 120 ia hanaia vadaeni. Edia namba ia bada ia lao ena badina ta be dala ia kehoa neganai, Lviv dekenai mata-galasi karaia tauna ta ese uhe ia hadoa!

[Footnotes]

[Map on page 29]

(For fully formatted text, see publication)

UKRAINE

ISRAEL

[Credit Line]

Mountain High Maps® Copyright © 1997 Digital Wisdom, Inc.

[Pictures on page 30]

Ella bona ena natuna kekeni Eina

[Picture on page 31]

Haifa dekenai, Russia gado Witnes taudia edia grup be moale taudia. Laurina kahana amo ia lao idibana kahanai: Sasha, Ilana, Natasha, Galina, Faina, Ella, Eina, bona Karl