“Momokani, Lohiabada be Ia Toreisi Vadaeni!”

Iesu ena hahediba taudia edia Lohiabada be taunimanima ese idia alaia mase neganai, edia lalohisihisi ena bada mani oi laloa. Arimatea tauna Iosepa ese gara gabuna lalonai ena tauanina ia atoa neganai, toana be edia helaro be ia mase bamona danu. Iesu ese Roma gavamani ena metau amo Iuda taudia do ia ruhaia helarona ia ore danu.

BEMA unai sibona ia vara, reana Iesu ena hahediba taudia be Mesia koikoi taudia murinai idia raka taudia momo bamona do idia boio. To Iesu be ia mauri noho! Buka Helaga ia gwau ia mase bena nega sisina murinai, ia murinai idia raka taudia dekenai nega haida ia hedinarai. Unai dainai, idia haida idia gwau: “Momokani, Lohiabada be ia toreisi vadaeni!”​​—⁠Luka 24:⁠34.

Hahediba taudia idia abia dae Iesu be Mesia, to taunimanima ese unai idia hepapahuahulaia neganai, idia hamomokania be namo. Unai bamona idia karaia neganai, idia hahedinaraia mase amo ia toreisi lou be iena Mesia dagina ia hamomokania. Momokani, “aposetolo taudia ese mai siahu bada danu Lohiabada Iesu ena toreisi lou idia harorolaia.”​​—⁠Kara 4:​33.

Bema ta ese ia hamomokania diba unai toreisi lou be koikoi​​—⁠reana hahediba tauna ta ia abia bena ia gwau unai ia vara lasi eiava ia hahedinaraia Iesu ena tauanina be gara gabuna lalonai ia do noho​​—⁠Keristani tomadihona do ia matamaia lasi. To, unai bamona ia vara lasi. Iesu murinai idia raka taudia idia diba Keriso ia mauri noho, unai dainai gabu ibounai dekenai iena toreisi lou sivaraina idia harorolaia, bona taunimanima momo ese ia toreisi lou tauna Keriso idia abia dae.

Dahaka dainai Iesu ena toreisi lou oi abia dae diba danu? Dahaka ese ia hamomokania unai kara be ia vara momokani?

Hamomokania Gaudia Ita Laloa Ena Badina be Dahaka?

Evanelia bukadia haniosi be Iesu ena toreisi lou sivaraina idia herevalaia. (Mataio 28:​1-​10; Mareko 16:​1-8; Luka 24:​1-​12; Ioane 20:​1-​29)a Keristani Greek Revarevadia ena kahana ma haida idia gwau Keriso be mase amo ia toreisi lou.

Unai dainai ita hoa lasi Iesu murinai idia raka taudia be iena toreisi lou sivaraina idia harorolaia! Bema Dirava ese ia hamauria momokani, unai be taunimanima ese idia kamonaia sivaraina idau hereana. Ena anina be Dirava ia noho. Danu, ena anina be Iesu be hari ia mauri noho.

Unai ena anina ita dekenai be dahaka? Iesu ia guriguri, ia gwau: “Mauri hanaihanai be inai: Idia ese oi Dirava momokani tamona do idia diba, bona Iesu Keriso, oi ese oi siaia tauna danu do idia diba.” (Ioane 17:⁠3) Oibe, Iesu bona iena Tamana dekenai mauri ia havaraia dibana ita abia diba. Unai diba ita badinaia neganai, ena be ita mase, to do ita toreisi lou, badina Iesu ia toreisi lou. (Ioane 5:​28, 29) Dirava ena guba Basileia, hairai ia abia Natuna, Iesu Keriso,“king ibounai edia King,” henunai, iseda helaro be tanobada paradaisona dekenai mauri hanaihanai do ita abia.​​—⁠Isaia 9:​6, 7; Luka 23:43; Apokalupo 17:⁠14.

Unai dainai, Iesu be mase amo ia toreisi lou momokani eiava lasi henanadai be mai anina bada gauna. Hari bona nega vaira ai, iseda mauri do ia haidaua diba. Unai dainai oi ai noia Iesu ia mase bona ia toreisi lou idia hamomokania gaudia hani do oi tahua namonamo.

Iesu be Satauro Dekenai Ia Mase Momokani

Baibel idia abia dae lasi taudia haida idia gwau, ena be Iesu idia hasatauroa, to ia be satauro dekenai ia mase momokani lasi. Idia gwau ia be kahirakahira ia mase gwauraia bena gara gabuna ena keru ese ia hanogaia. To, idia noho sivaraidia ibounai ese idia hamomokania Iesu ena mauri lasi tauanina be gara gabuna dekenai idia atoa.

Iesu be taunimanima vairanai idia hamasea dainai, taunimanima momo ese idia itaia bona idia hamomokania diba ia be satauro dekenai ia mase momokani. Hamasea karana ia naria Roma ami opesa tauna ese ena mase ia hamomokania. Unai ami opesa ena gaukara ta be ia itaia idia hamasea tauna be momokani ia mase. Danu, Roma Gavana Pontio Pilato ese Iesu ena mase ia hamomokania guna, bena unai murinai Iesu ena tauanina be Arimatea tauna Iosepa dekenai ia henia, do ia guria totona.​​—⁠Mareko 15:​39-​46.

Gara Gabuna Lalonai Tauanina Ia Noho Lasi

Hahediba taudia dekenai, gara gabuna ai mase tauanina ia noho lasi be Iesu ena toreisi lou ia hamomokania gauna ginigunana bona unai hamomokania gauna be ta ese ia gorea lasi. Iesu be gara matamatana ai idia atoa, idia do gaukaralaia lasi gabuna unai. Ia be idia hasatauroa gabuna kahirakahira dekenai ia noho bona unai neganai idia davaria haraga diba gabuna. (Ioane 19:​41, 42) Evanelia Bukadia ibounai idia gwau Iesu ia mase bena daba iharuana ai, iena turadia be gara gabuna dekenai idia lao neganai, iena tauanina be lasi.​​—⁠Mataio 28:​1-7; Mareko 16:​1-7; Luka 24:​1-3; Ioane 20:​1-​10.

Gara gabuna ai mase tauanina ia noho lasi neganai, Iesu ena inai taudia be ena turadia hegeregerena idia hoa. Ena inai taudia be nega daudau lalonai idia gaukara goadagoada iena mase bona guria karana idia itaia totona. Edia tahua gauna idia davaria neganai, gara gabuna vairanai gimaia tauna ta idia atoa bona ia idia koua auka masemase. To, pura ena dina ginigunana ena daba ai, Iesu ena tauanina be gara gabuna lalonai ia noho lasi.

Iesu ena turadia ese iena tauanina be gara gabuna amo idia abia oho, a? Lasi, badina Evanelia Bukadia idia hahedinaraia taunimanima ese Iesu idia alaia mase murinai, idia lalo-metau bada herea. Danu, bema iena hahediba taudia idia diba unai be sivarai koikoina, ia totona hisihisi do idia abia bona do idia mase be anina lasi.

Daika ese gara gabuna amo mase tauanina ia kokia? Iesu ena inai henia taudia be idia ura lasi iena tauanina idia kokia. Ena be reana unai idia karaia diba, to gabeai tauanina do idia hahedinaraia, hahediba taudia edia hereva, Iesu be mase amo ia toreisi lou bona ia mauri noho herevana, do idia hakoikoia totona. To, unai ia vara lasi, badina be Dirava ese ia kokia.

Pura haida murinai, Petero ia hereva neganai, Iesu idia inai henia taudia ese ena hereva idia hakoikoia toho lasi. Petero ia gwau: “Israela taudia e, inai hereva dekenai umui kamonai: Iesu, Nasareta tauna, Dirava ese umui dekenai ia siaia hedinaraia, bona siahu kara bona hoa kara bona toa kara umui emui huanai Dirava ese ia karaia iena imana dekenai, umui danu diba. Inai Iesu, be Dirava ese iena ura bona ena diba hegeregerena ia laloa guna, umui emui imana dekenai do ia atoa. Vadaeni umui ese taravatu laloa lasi taudia edia imana dekena amo Iesu umui hasatauroa, bona umui hamasea. To Dirava ese ia hatorea isi lou, mase ena hisihisi dekena amo ia ruhaia, badina mase ese Iesu ia dogoatao diba lasi. Badina Davida be inai bamona Iesu ia herevalaia, ia gwau: ‘Lohiabada be nega ibounai egu vairana dekenai lau itaia. . . . Lau be taunimanima sibona, to Dirava ese ia gwauhamata gau namodia, be lau naria noho. Badina be mase taudia edia gabu dekenai, lauegu lauma do oi rakatania lasi. Bona oiemu Helaga Tauna be bodaga do ia abia lasi, oiemu ura dainai.’ ”​​—⁠Kara 2:​22-​27.

Iesu Ia Toreisi Lou Murinai, Momo ese Idia Itaia

Kara bukana ai, Evanelia torea tauna Luka ia gwau: “Hisihisi ia abia murinai, [aposetolo taudia] dekenai Iesu ia hedinarai mai mauri danu, toa momokani momo dekena amo. Dina 40 lalonai Iesu idia itaia nega momo, bona Dirava ena Basileia gaudia ia hadibaia idia dekenai.” (Kara 1:​2, 3) Hahediba taudia haida ese ia toreisi lou tauna Iesu be nega idauidau ai​​—⁠uma ta lalonai, dala dekenai, nega ta idia aniani lalonai, bona Tiberia Gohuna ai​​—⁠idia itaia.​​—⁠Mataio 28:​8-​10; Luka 24:​13-​43; Ioane 21:​1-​23.

Baibel idia hakoikoia toho taudia ese unai gabu idauidau dekenai Iesu ia hedinarai karana ena momokani idia henanadailaia. Idia gwau unai be toretore taudia ese idia havaraia sivaraidia, eiava idia dekenai hereva haida be ma hereva haida ida idia hegeregere lasi. To, Evanelia Bukadia edia sivarai edia hereva ta ta idia hegeregere lasi ese ia hamomokania torea taudia ese dahaka do idia torea idia palanilaia hebou lasi. Bema toretore tauna ta ese Keriso ena tanobada maurina sivaraina ia herevalaia bona buka ma haida lalonai idia gwauraia lasi gau maragidia ia herevalaia, unai ese iseda diba Iesu dekenai ia habadaia.

Iesu ia toreisi lou murinai, ia hedinarai neganai unai be matahanai ta sibona, a? Unai kara idia hepapahuahulaia taudia be edia hereva idia hamomokania diba lasi, badina taunimanima momo herea ese idia itaia. Idia huanai be haoda taudia, hahine, dagi bada tauna ta, bona ia daradara aposetolo tauna Toma. Ia be mase amo ia toreisi lou tauna Iesu ia abia dae lasi ela bona sibona ena matana amo ia hamomokania diba. (Ioane 20:​24-​29) Nega haida, Iesu ena hahediba taudia be edia Lohiabada, mase amo ia toreisi lou tauna, idia itaia to matamanai idia diba lasi ia be Iesu. Nega ta, taunimanima 500 mai kahana ese ia idia itaia, bona idia momo be idia mauri noho lalonai, aposetolo tauna Paulo ese unai nega ia gaukaralaia toreisi lou ia hamomokania totona.​​—⁠1 Korinto 15:⁠6.

Mauri Tauna Iesu ese Taunimanima Edia Mauri Ia Haidaua

Iesu ena toreisi lou herevana be ita hoalaia kava eiava ita hepapahuahulaia gauna lasi. To, ia mauri noho dainai, dala namona ai gabu ibounai dekenai taunimanima edia mauri ia haidaua. Aposetolo taudia edia nega amo, taunimanima momo be guna Keristani tomadiho idia dadaraia eiava idia dagedage henia, to hari idia diba ia be tomadiho momokanina. Dahaka ese edia kara ia haidaua? Baibel idia stadilaia neganai, ia hamomokania Dirava ese Iesu ia hatorea isi lou bona guba ai lauma mai hairaina ai ia lao. (Filipi 2:​8-​11) Idia be Iesu bona Iehova Dirava ese Keriso ena mauri davalaia boubouna amo ia havaraia hahemauri dalana idia abidadama henia. (Roma 5:⁠8) Unai bamona taudia ta ta be Dirava ena ura idia karaia bona Iesu ena hahediba herevadia hegeregerena idia noho dainai moale korikori idia davaria.

Aposetolo taudia edia negai, Keristani ta ai ia lao tauna mani oi laloa. Ia be ladana badana, siahu, eiava taga ia abia lasi. Edia tomadiho dainai, Keristani taudia ginigunadia momo ‘edia kohu be haida ese idia dadia, to idia haheaukalaia mai moale danu.’ (Heberu 10:34) Keristani taudia be sibodia edia namo tahua dalana idia rakatania, dagedage idia haheaukalaia, bona idia momo be edia abidadama dainai dala dikana amo idia mase.

Keriso murinai idia do raka matamaia lasi neganai, taunimanima haida be mai edia kwalimu daladia, hegeregere ladana badana bona taga idia abia diba. Taso tauna Saulo be Taravatu hadibaia tauna badana Gamaliela ese ia hadibaia bona Iuda taudia vairanai ladana badana ia abia matamaia. (Kara 9:​1, 2; 22:3; Galatia 1:​14) To, Saulo be aposetolo tauna Paulo ai ia lao. Ia bona taunimanima momo be inai tanobada ese ia henia diba ladana badana bona siahu idia dadaraia. Dahaka dainai? Idia ese Dirava ena gwauhamata lalonai ia gwauraia helaro korikorina bona Iesu Keriso be mase amo ia toreisi lou sivaraina idia harorolaia totona. (Kolose 1:​28) Edia lalona idia hegeregere, unai sivarai dainai hisihisi do idia ania, badina be idia diba ia be sivarai momokanina.

Hari, taunimanima milioni momo dekenai unai be momokani. Idia be tanobada hegegemadai Iehova ena Witnes taudia edia kongregesen dekenai oi davaridia diba. Witnes taudia ese lagani ta ta ai idia karaia Keriso ena mase laloatao hebouna dekenai oi idia boiria oi mai totona, unai be Sunday, April 8, 2001, dina ia diho murinai do idia karaia. Do idia moale bema unai nega ai bona edia Kingdom Hall dekenai idia karaia Baibel stadi heboudia iboudiai dekenai do oi noho.

Iesu ena mase bona toreisi lou oi dibaia sibona lasi, to iena mauri bona hahediba herevadia oi dibaia danu be namo, ani? Ia ese ita ia boiria ia dekenai do ita lao. (Mataio 11:​28-​30) Hari, Iehova Dirava bona Iesu Keriso dekenai diba maoromaoro oi abia be namo. Unai bamona oi karaia ena anina be Dirava ena Basileia, ena Natuna ena imana dekenai ia rakatania gauna, amo mauri hanaihanai do oi abia.

[Footnote]

[Pictures on page 7]

Taunimanima milioni momo be Iesu Keriso murinai idia raka neganai, moale korikorina idia davaria

[Picture Credit Line on page 6]

From the Self-Pronouncing Edition of the Holy Bible, containing the King James and the Revised versions