‘Iehova Ena Hereva Ia Bada Daekau’
“Tanobada dekenai oda ia siaia lao, bona iena hereva gauna be idia karaia haraga noho.”—SALAMO 147:15.
1, 2. Iesu ese edena gaukara ia henia iena hahediba taudia dekenai, bona ena anina be dahaka?
KARA 1:8 ai, Baibel ena idau herea peroveta herevana ta ia noho. Iesu be kahirakahira guba dekenai do ia daekau neganai, ia murinai idia raka kamonai taudia ia hamaoroa: “Umui be dohore siahu umui abia, Lauma Helaga umui dekenai ia diho neganai, bona lauegu ladana do umui gwauraia hedinarai . . . tanobada ena kahana ibounai [dekenai].” Unai be gaukara bada hereana!
2 Hahediba taudia edia orea maragina be tanobada ibounai dekenai Dirava ena hereva do idia harorolaia gaukarana idia abia neganai, reana idia lalo-hekwarahilaia. Unai gaukara mani oi laloa. Taunimanima do idia durua Dirava ena Basileia ena sivarai namona do idia lalo-pararalaia totona. (Mataio 24:14) Iesu ena sivarai idia gwauraia hedinarai neganai, iena hadibaia herevadia mai siahu idia hadibaia ma haida dekenai, bona Iesu ena gaukara Iehova ena ura lalonai do idia gwauraia hedinarai danu. Hahediba taudia halaoa gaukarana do idia karaia bena idia do idia bapatisoa. Bona unai gaukara be tanobada hegegemadai do idia karaia!—Mataio 28:19, 20.
3. Iesu ese ia murinai idia raka taudia ia hamaoroa dahaka do idia abia, bona idia abia gaukara be edena bamona idia karaia?
3 To, Iesu ese ia murinai idia raka taudia ia hamaoroa, lauma helaga ese idia do ia durua ia henia gaukara do idia hagugurua totona. Unai dainai, ena be unai gaukara be bada herea bona edia gaukara do idia koua totona edia inai taudia ese do idia dagedage henidia loulou, to Iesu ena hahediba taudia ginigunadia be ia henia gaukara idia karaia mai kwalimu ida. Unai guna ia vara momokani sivaraina be ta ese ia gorea diba lasi.
4. Dirava ese haroro bona hadibaia gaukara karaia haheganina ia henia neganai, edena dala ai iena lalokau ia hahedinaraia?
4 Unai tanobada ibounai haroro bona hadibaia gaukarana amo, Dirava ese ia idia diba lasi taudia dekenai iena lalokau ia hahedinaraia. Idia dekenai dala ia kehoa Iehova kahirakahira dekenai do idia lao bena ia ese edia kara dika do ia gwauatao. (Kara 26:18) Unai haroro bona hadibaia gaukara karaia haheganina ese Dirava ena lalokau ena sivarai harorolaia taudia dekenai ia hahedinaraia danu, badina unai amo edia Iehova kamonai henia karana bona edia lalokau taunimanima ma haida totona idia hahedinaraia diba. (Mataio 22:37-39) Aposetolo Paulo ese Keristani haroro gaukara ia laloa bada dainai, ia gwau ia be dava bada gauna bamona.—2 Korinto 4:7, NW.
5. (a) Idaunegai Keristani taudia edia sivarai be edeseniai ita davaria, bona edena bamona tubu noho karana ia gwauraia? (b) Hari, dahaka dainai Kara bukana be mai anina bada Dirava ena hesiai taudia dekenai?
5 Kara bukana, Dirava ena lauma amo ia vara bona hahediba tauna Luka ese ia torea bukana lalonai, Keristani taudia ginigunadia edia haroro gaukara ena sivarai, ita abidadama henia diba sivaraina unai, ia noho. Unai sivarai ia hahedinaraia edia orea be taunimanima idia hoalaia dalanai ia tubu haraga. Dirava ena Hereva idia diba taudia edia namba ia bada negana ita laloa neganai, Salamo 147:15 ita laloa lou, ia gwau: “[Iehova ese] tanobada dekenai oda ia siaia lao, bona iena hereva gauna be idia karaia haraga noho.” Keristani taudia ginigunadia, lauma helaga ese ia hasiahua taudia, edia sivarai ese ita ia hamoalea bona hari ia be mai anina bada ita dekenai. Iehova ena Witnes taudia be unai haroro bona hahediba tauna halaoa gaukarana idia karaia danu, to dala badana ai idia karaia. Aposetolo taudia edia negai Keristani taudia ese idia davaria hekwakwanai be ita davaria hekwakwanai bamona. Iehova be Keristani taudia ginigunadia ia hanamoa bona idia ia hasiahua sivaraidia ita laloa neganai, unai ese iseda abidadama ia hagoadaia, ita diba Dirava ese ita do ia durua.
Hahediba Taudia Edia Namba Ia Bada Daekau
6. Kara bukana lalonai, edena herevadia be nega toi idia hedinarai, bona idia be dahaka?
6 Kara 1:8 ia guguru dalana ita tahua totona, namona be inai hereva ‘Iehova ena hereva ia tubu bona ia bada daekau’ ita laloa, badina Baibel lalonai unai bamona hereva be nega toi sibona idia hedinarai, bona idia ibounai be Kara bukana lalonai. (Kara 6:7; 12:24; 19:20) ‘Iehova ena hereva’ eiava “Dirava ena Hereva” unai siridia lalonai be sivarai namona—unai be Dirava ena hereva momokanina, ia mauri noho bona ia be mai ena siahu sivaraina, badina idia abia dae taudia edia mauri ia haidaua.—Heberu 4:12.
7. Kara 6:7 ai, Dirava ena hereva ia bada daekau karana be dahaka ida idia hakapua, bona Pentekoste 33 C.E. dinana ai dahaka ia vara?
7 Kara 6:7 ai, Dirava ena hereva ia bada daekau ia gwauraia herevana ginigunana ita davaria. Unuseniai ia gwau: “Bona Dirava ena hereva ia bada daekau, bona diba tahua taudia idia momo daekau Ierusalema dekenai, bona hahelagaia taudia momo danu ese Iesu ena dala idia abia dae.” Unuseniai, bada daekau karana be hahediba taudia edia namba ia bada daekau karana ida idia hakapua. Guna, Pentekoste 33 C.E. dinana ai, Dirava ena lauma helaga be atai daiutuna ta ai idia hebou hahediba taudia 120 bamona latanai ia bubua. Aposetolo Petero ese lalona ia hamarerea herevana ta ia henia, bona unai dina dekenai idia kamonai taudia amo, idia 3,000 be abidadama taudia ai idia lao. Reana regerege be bada herea badina taunimanima tausen haida be Ierusalema lalonai eiava kahirakahira idia noho ranu gabudia ai idia lao, Iesu ena ladana ai bapatiso idia abia totona. To dina 50 gunanai sibona, unai tauna idia hasatauroa, raskol tauna bamona!—Kara 2:41.
8. Pentekoste 33 C.E. murina laganidia ai, hahediba taudia edia namba be edena bamona ia bada daekau?
8 To momokani, unai be matamana negana sibona. Iuda tomadiho gunalaia taudia idia hekwarahi loulou unai haroro gaukara idia koua totona, to idia kwalimu lasi. Unai gunalaia taudia idia badu, badina “dina ibounai, Lohiabada ese mauri ia henia taudia, be abidadama taudia edia orea lalonai ia haboua.” (Kara 2:47) Kahirakahira, “abidadama taudia ibounai be 5000 bamona.” Unai murinai, “Lohiabada idia abidadama henia taudia momo herea, tatau bona hahine idia dekenai idia haboua lao.” (Kara 4:4; 5:14) Gabeai ia vara negana ia herevalaia, ia gwau: “Unai neganai Iudea tano ibounai, bona Galilea bona Samaria dekenai danu, ekalesia orea ibounai ese maino idia abia vadaeni, bona idia goada daekau, bona Lohiabada dekenai idia gari noho, bona Lauma Helaga ese laloa goada idia dekenai ia henia. Vadaeni ekalesia ia bada daekau.” (Kara 9:31) Lagani haida murinai, reana lagani 58 C.E. ai, idia gwau Iesu idia abidadama henia taudia be “momo herea.” (Kara 21:20) Unai neganai, abidadama Idau Bese taudia be momo danu.
9. Keristani taudia ginigunadia edia kara mani oi gwauraia.
9 Keristani taudia edia hahediba taudia halaoa gaukarana dainai, edia namba ia bada daekau. Unai tomadiho be matamata—to ena orea taudia idia gaukara goadagoada. Unai hahediba taudia be dubu dekenai idia lao sibona lasi, idia ese Iehova bona iena Hereva idia badinaia momokani, bona nega haida dagedage bada idia abia taudia amo hereva momokani idia dibaia. (Kara 16:23, 26-33) Keristani tomadiho idia abia dae taudia be unai idia karaia badina idia laloa namonamo guna, bena edia lalona idia hadaia unai be maoro. (Roma 12:1, NW ) Dirava ena dala idia dibaia, bona hereva momokani be edia lalona bona kudouna dekenai. (Heberu 8:10, 11) Edia lalona ia hegeregere, edia abidadama totona edia mauri do idia henia.—Kara 7:51-60.
10. Keristani taudia ginigunadia ese edena maduna idia abia dae, bona hari daidia be idia hegeregerena?
10 Keristani hahediba herevadia idia abia dae taudia idia diba, ma haida dekenai hereva momokani idia hadibaia be edia maduna. Unai kara ese edia namba ia habadaia noho. Baibel ia diba bada tauna ta ia gwau: “Edia lalohadai be goada taudia eiava idia gwauraia evanelia taudia sibodia idia haroro be namo lasi. Evanelia gaukara be Dubu taudia ta ta ibounai edia hahenamo bona edia maduna. . . . Matamanai, Keristani taudia ibounai be mai edia moale ida taunimanima ibounai idia haroro henia dainai, edia orea ia hagoadaia.” Ma ia gwau: “Keristani taudia ginigunadia dekenai evanelia gaukara be anina bada gauna.” Hari, unai be momokani Keristani taudia korikoridia dekenai danu.
Gabu Momo Dekenai Ia Lao
11. Kara 12:24 ese edena bamona bada daekau karana ia herevalaia, bona edena dala ai ia vara?
11 Dirava ena hereva ia bada daekau ia herevalaia sirina iharuana be Kara 12:24 ai, ia gwau: “To Dirava ena hereva ia tubu, bona ia bada daekau, gabu momo dekenai.” Unai hereva ia hahedinaraia Dirava ena hereva be gabu momo dekenai do ia lao. Herevana gavamani ese edia haroro gaukara idia dagedage henia, to edia gaukara idia habadaia noho. Lauma helaga be guna Ierusalema dekenai idia noho taudia latanai ia bubua diho, bena unai amo sivarai namona be gabu momo dekenai ia lao haraga. Ierusalema dekenai dagedage idia davaria dainai, hahediba taudia be Iudea bona Samaria tanodia edia gabu idauidau dekenai idia lao. Unai dainai dahaka ia vara? Idia “lulua taudia be gabu idauidau dekenai idia lao, Sivarai Namona idia harorolaia.” (Kara 8:1, 4) Dirava ese Filipo ia siaia tau ta dekenai do ia haroro henia totona, bona unai tauna ena bapatiso murinai ia be Etiopia dekenai sivarai namona ia laohaia. (Kara 8:26-28, 38, 39) Luda, Sarona ena tano palakana gabuna ai, bona Iopa ai, hereva momokani ia tubu haraga. (Kara 9:35, 42) Gabeai, aposetolo Paulo be davara bona tano dekenai kilomita tausen momo ia laolao, bona Meditereinien tanodia momo lalonai kongregesen ia haginia. Aposetolo Petero be Babulonia dekenai ia lao. (1 Petero 5:13) Pentekoste dekenai lauma helaga ia diho bena lagani 30 idia do ore lasi lalonai, Paulo ia gwau sivarai namona be “tanobada ibounai dekenai ai harorolaia vadaeni,” reana ena hereva ena anina be unai nega ai idia diba tanodia ai idia karaia.—Kolose 1:23.
12. Keristani tomadiho idia dagedage henia taudia be edena dala ai idia hahedinaraia idia diba Dirava ena hereva be gabu momo dekenai ia lao?
12 Keristani tomadiho idia dagedage henia taudia idia diba Dirava ena hereva be Roma Basileia ena gabu iboudiai lalonai ia noho. Hegeregere, Kara 17:6 ia gwau Tesalonika, Greece ena not kahana ai, idia noho dagedage taudia idia boiboi, idia gwau: “Inai taudia be gabu ibounai dekenai kerere idia havaraia, bona hari idia mai iniseni.” Lagani 100 C.E. murinai, Pliny Maragina be Bitunia amo Roma Pavapavana Trajan ia tore henia, bona Keristani tomadiho ia maumauraia. Ia gwau: “[Ia] be siti lalodiai sibona lasi, to iena hadikaia karana ia hanaia lao kahirakahira idia noho hanuadia bona tanodia dekenai.”
13. Dirava ena hereva be gabu momo dekenai ia lao, to dahaka dainai unai ese ena lalokau taunimanima dekenai ia hahedinaraia?
13 Hereva momokani be gabu momo dekenai ia lao ese Iehova ena lalokau badana ia hoia lou diba taudia dekenai ia hahedinaraia. Petero ese lauma helaga ena siahu be Idau Bese tauna Korenelio dekenai ia itaia neganai, ia gwau: “Hari lau diba momokani Dirava ese taunimanima edia toana ia laloa lasi. To bese ibounai lalonai, Dirava dekenai idia gari, bona kara maoromaoro idia karaia taudia, be Dirava ese do ia abia dae.” (Kara 10:34, 35) Oibe, guna bona hari, sivarai namona be taunimanima ibounai totona, bona Dirava ena hereva be gabu momo dekenai ia lao dainai, gabu idauidau taudia ese Dirava ena lalokau do idia abia dae diba. Hari, lagani 2000 murina negana ai, Dirava ena hereva be tanobada ena kahana ibounai dekenai ia lao vadaeni.
Ia Bada Daekau Noho mai Kwalimu Ida
14. Kara 19:20 ese edena bamona bada daekau karana ia herevalaia, bona Dirava ena hereva ia kwalimu to edena gaudia idia kwalimu lasi?
14 Dirava ena hereva ia bada daekau ia herevalaia sirina ihatoina be Kara 19:20 ai, ia gwau: “Inai bamona dala, mai siahu danu, Lohiabada ena hereva ia bada daekau bona ia kwalimu.” Greek gado herevana, idia hahanaia “kwalimu” ena lalohadai ta be “ia be mai ena siahu.” Unai siri idia gunalaia siridia idia gwau Efeso dekenai idia noho taudia momo be abidadama taudia ai idia lao, bona guna meamea karadia idia karaia taudia be taunimanima vairanai edia meamea bukadia idia gabua. Unai amo, Dirava ena hereva ia kwalimu bona tomadiho koikoi ena hahediba herevadia idia kwalimu lasi. Hekwakwanai ma haida, hegeregere dagedage karana, idia vara to sivarai namona ia kwalimu noho. Gau ta ese ia koua diba lasi. Hari inai negai, Keristani tomadiho momokanina be unai hegeregerena.
15. (a) Baibel histori torea tauna ta be Keristani taudia ginigunadia ia herevalaia neganai, dahaka ia gwau? (b) Hahediba taudia idia kwalimu dainai, daika idia hanamoa?
15 Aposetolo taudia bona Keristani taudia ginigunadia ma haida ese Dirava ena hereva idia harorolaia goadagoada. Baibel histori torea tauna ta ese idia ia herevalaia, ia gwau: “Taunimanima idia ura edia Lohiabada idia herevalaia neganai, dala idauidau momo do idia davaria unai idia karaia totona. Momokani, unai tatau bona hahine edia gaukara dalana ai laloa, to edia ura goadana ai hoalaia.” To, unai Keristani taudia ginigunadia idia diba edia haroro gaukara ia kwalimu edia hekwarahi sibona dainai lasi. Dirava ia henia gaukarana idia karaia, bona Dirava ese idia do ia durua do idia hagugurua totona. Dirava sibona be ta ia durua lauma dalanai do ia goada noho totona. Aposetolo Paulo ese Korinto kongregesen dekenai ia siaia revareva ta lalonai unai ia herevalaia. Ia gwau: “Lau ese uhe lau hadoa. Apolo ese ranu dekenai ia dairia. To Dirava ese unai hadoa gauna ia hatubua. Badina ai ruaosi be Dirava ena gaukara ai karaia hebou noho.”—1 Korinto 3:6, 9.
Lauma Helaga Ia Gaukara Noho
16. Dahaka ese ia hahedinaraia lauma helaga be hahediba taudia ia hasiahua bena mai gari lasi ida idia hereva diba?
16 Mani inai oi laloatao, Iesu ese iena hahediba taudia ia hamaoroa lauma helaga be Dirava ena hereva do ia durua ia bada daekau totona, bona hahediba taudia edia haroro gaukara lalonai, lauma helaga ese idia do ia hasiahua. (Kara 1:8) To edena dala ai unai ia vara? Pentekoste ai, hahediba taudia be lauma helaga idia abia bena daudau lasi murinai, Iuda Kaunsolo taudia ese Petero bona Ioane idia boiria unai tano ena kota badana vairanai do idia hereva totona. Iena diadi edia hahemaoro karana dainai Iesu Keriso idia hamasea. Aposetolo taudia idia gari, badina unai ladana badana dagedage taudia vairanai do idia hereva, a? Lasi vaitani! Lauma helaga ese Petero bona Ioane ia hasiahua bona idia hereva mai gari lasi ida dainai, edia inai taudia idia hoa, “bona idia diba vadaeni idia be Iesu ena bamona taudia.” (Kara 4:8, 13) Lauma helaga ese Stefano ia hagoadaia dainai, Kaunsolo taudia dekenai ia haroro mai gari lasi ida. (Kara 6:12; 7:55, 56) Guna, lauma helaga ese hahediba taudia ia hagoadaia idia haroro mai gari lasi ida totona. Luka ia gwau: “Edia guriguri ia ore neganai, idia haboua ruma be ia mareremarere, bona Lauma Helaga ese ibounai ia hahonua, bona Dirava ena hereva idia gwauraia, mai goada danu.”—Kara 4:31.
17. Edena dala ai lauma helaga be hahediba taudia ia durua edia haroro gaukara dekenai?
17 Iehova be ena lauma helaga goadana amo, bona ia toreisi lou tauna Iesu ida, haroro gaukara ibounai ia biagua. (Ioane 14:28; 15:26) Lauma helaga be Korenelio, iena varavara, bona iena turadia dekenai ia bubua diho neganai, aposetolo Petero ia diba kopina idia utua lasi Idau Bese taudia idia hegeregere Iesu Keriso ena ladana ai bapatiso idia abia. (Kara 10:24, 44-48) Unai murinai, Dirava ena lauma helaga ese Banaba bona Saulo (aposetolo Paulo) ia abia hidi, misinari gaukara do idia karaia totona, bona edena gabudia dekenai idia lao bona edena gabudia dekenai idia lao diba lasi, ia hakaua. (Kara 13:2, 4; 16:6, 7) Aposetolo taudia bona tau badadia ma haida ese gau ta idia abia hidi gwauraia neganai, idia ia hakaua. (Kara 15:23, 28, 29) Keristani kongregesen ena naria taudia idia abia hidi neganai, lauma helaga ese unai ia hakaua danu.—Kara 20:28.
18. Keristani taudia ginigunadia be edena dala ai edia lalokau idia hahedinaraia?
18 Lauma helaga be Keristani taudia dekenai ia hedinarai danu, Dirava ena kara idauidau, hegeregere lalokau, ia havaraia. (Galatia 5:22, 23) Lalokau dainai hahediba taudia ese edia kohu idia haria heheni. Hegeregere, Pentekoste 33 C.E. murinai, Ierusalema dekenai idia noho hahediba taudia be edia mauri durua gaudia idia abia diba totona, tadikaka ese moni idia haboua. Baibel ia gwau: “Idia huanai tau ta ia ogogami lasi. Badina be mai edia tano o ruma taudia ese edia gau idia hoia, bona edia davana moni idia abia lao, aposetolo taudia edia vairana dekenai idia atoa diho. Bona aposetolo taudia ese ta ta dekenai idia henidia, edia ogogami hegeregerena.” (Kara 4:34, 35) Unai lalokau be edia tomadiho tamona taudia dekenai idia hahedinaraia sibona lasi, to ma haida dekenai sivarai namona idia harorolaia bona hebogahisi karadia idia karaia danu. (Kara 28:8, 9) Iesu ia gwau sibodia edia ura dadaraia lalokauna amo, taunimanima do idia diba idia be Iesu murinai idia raka taudia. (Ioane 13:34, 35) Momokani, unai mai anina bada karana, lalokau, ese taunimanima ia veria lao Dirava dekenai bona aposetolo taudia edia negai bona hari danu, orea ia bada ia lao dalana ia durua.—Mataio 5:14, 16.
19. (a) Aposetolo taudia edia negai, edena dala toi ai Iehova ena hereva ia bada daekau? (b) Hereva gabena lalonai dahaka do ita tahua?
19 Kara bukana ginigunana idia torea Greek gado ai, bona Greek herevana ta, idia hahanaia “lauma helaga,” be nega 41 idia torea. Ia hedinarai goevagoeva, Keristani dalana ia bada daekau, lauma helaga ena siahu bona ena hakaua karana dainai. Hahediba taudia edia namba ia bada daekau, Dirava ena hereva be gabu momo dekenai ia lao, bona unai nega ai idia noho tomadiho daladia bona lalohadai idauidau ese idia koudia lasi to ia kwalimu noho. Aposetolo taudia edia negai ia vara bada daekau karana be hari Iehova ena Witnes taudia edia gaukara lalonai ita davaria danu. Hereva gabena lalonai, hari inai negai Dirava ena hereva ia bada daekau noho karana do ita tahua.
Oi Laloatao, A?
• Hahediba taudia ginigunadia edia namba be edena bamona ia bada daekau?
• Edena dala ai Dirava ena hereva be gabu idauidau dekenai ia lao?
• Aposetolo taudia edia negai, edena dala ai Dirava ena hereva ia kwalimu?
• Lauma helaga ese edena dala ai Dirava ena hereva ia bada daekau karana ia durua?
[Picture on page 12]
Filipi ese Etiopia tauna ia haroro henia, bena sivarai namona be gabu ma ta dekenai ia lao
[Picture on page 13]
Lauma helaga ese aposetolo taudia bona tau badadia Ierusalema dekenai ia hakaua
[Picture Credit Line on page 10]
Upper right corner: Reproduction of the City of Jerusalem at the time of the Second Temple - located on the grounds of the Holyland Hotel, Jerusalem