Moale Diravana ida Oi Moale
“Lauegu varavara e, do umui moale . . . bona lalokau bona maino ena Dirava ese umui danu do ia noho.”—2 KORINTO 13:11.
1, 2. (a) Dahaka dainai taunimanima momo be edia mauri lalonai moale idia davaria lasi? (b) Moale ena anina be dahaka, bona edena bamona ita habadaia diba?
INAI nega dikana lalonai, taunimanima momo idia moale momokani lasi. Idia eiava edia lalokau tauna ta be dika idia davaria neganai, reana edia hemami be idaunegai tauna Iobu ena bamona, ia gwau: “Ita ibounai, hahine edia bogana, dekena amo ita vara taudia, iseda mauri dinadia be momo lasi, bona iseda hekwarahi be bada herea.” (Iobu 14:1) Keristani taudia be ‘nega dokona ena metau dikadia momo’ dainai hekwarahi bona metau idauidau idia davaria danu bona ita hoa lasi nega haida Iehova ena abidadama hesiai taudia idia lalo-manoka.—2 Timoteo 3:1.
2 Ena be Keristani taudia ese hahetoho idia davaria, to idia moale diba. (Kara 5:40, 41) Edena bamona unai ita lalo-pararalaia totona, moale ena anina do ita laloa guna. Moale ena anina be “ta ese ia abia hemami namona, hari ia abia eiava ia laloa gabeai do ia abia gau namodia dainai.”a Unai dainai, bema nega ita atoa hari ita abia hahenamo bona Dirava ena tanobada matamata lalonai do ita abia gaudia ita lalohadailaia totona, do ita moale.
3. Dahaka dainai ita gwau diba taunimanima ibounai be badina haida dainai idia moale diba?
3 Taunimanima ibounai be edia mauri lalonai hahenamo haida idia abia dainai idia moale diba. Reana ruma bese kwarana ese ena moni gaukara ia haboioa. Vaia, unai do ia laloa momo. Ia ura ena lalokau taudia ia naria noho. To, bema ena tauanina ia goada bona ia gorere lasi, unai gaudia dainai ia moale diba. Bema moni gaukara ia davaria, do ia gaukara goada diba. To, reana Keristani hahinena ta ese tauanina hamanokaia gorerena ia abia. Ena lalokau turadia bona ruma bese taudia ia tanikiu henia, badina edia heduru dainai mai goada bona boga auka ida ena gorere ia haheaukalaia diba. Keristani taudia momokanidia ibounai, herevana edia noho dalana be edena bamona, be idia moale diba badina Iehova, “moale Diravana,” bona Iesu Keriso, moale Pavapavana, idia diba. (1 Timoteo 1:11, NW; 6:15, NW ) Oibe, Iehova Dirava bona Iesu Keriso idia moale bada herea. Ena be hari tanobada ai idia vara gaudia be Iehova ena ura ginigunana amo idia idau momokani, to edia moale idia dogoatao noho. Edia haheitalai namona ese ita ia hadibaia diba iseda moale do ita dogoatao noho totona.
Edia Moale Idia Haboioa Lasi
4, 5. (a) Taunimanima ginigunadia idia gwau-edeede neganai, Iehova ese dahaka ia karaia? (b) Edena dala ai Iehova ese taunimanima dekenai lalohadai namona ia abia noho?
4 Eden umana lalonai, Adamu bona Heva be gorere lasi maurina idia moalelaia bona edia lalona idia goevadae. Noho gabuna namo hereana lalonai, anina namona havaraia gaukarana idia karaia diba. To gau namo hereana be inai, hanaihanai Iehova ida idia herevahereva diba. Dirava ena ura be vaira negana namona do idia moalelaia. To iseda tama sina ginigunadia dekenai unai harihari gaudia namodia be hegeregere lasi; idia ese taravatu auna, “kara namo bona kara dika hadibaia” auna, ena huahua idia henaoa. Hari inai negai, ita, edia tubudia, ita mamia noho lalohisihisi ibounai ena badina be unai gwau-edeede karana dainai.—Genese 2:15-17; 3:6; Roma 5:12.
5 To, Adamu bona Heva edia tanikiu lasi karana ese Iehova ena moale ia kokia lasi. Ia diba edia natudia haida edia kudoudia ese idia do idia hamarerea ia do idia hesiai henia totona. Unai ia diba momokani dainai, Adamu bona Heva ese edia natuna ginigunana idia do havaraia lasi neganai, ia gwau ena ura be edia kamonai bese taudia do ia hoia lou! (Genese 1:31; 3:15) Bena unai murinai, idia hanaia lagani momo herea lalodiai, kahirakahira taunimanima ibounai be Adamu bona Heva murinai idia raka, bona gabu momo dekenai gwau-edeede karana ia vara, to Iehova ese unai kara dainai taunimanima ia dadaraia lasi. Ia ese ena kudouna idia hamoalea tatau bona hahine, ia idia lalokau henia dainai idia hekwarahi ia idia hamoalea totona taudia, ia laloa.—Aonega Herevadia 27:11; Heberu 6:10.
6, 7. Dahaka gaudia ese Iesu idia durua ia moale noho totona?
6 Iesu be edena bamona—edena dala ai ena moale ia dogoatao noho? Iesu be guba dekenai ia noho bona ia be goada laumana ta neganai, ia ese tanobada dekenai idia noho tatau bona hahine edia kara ia itaia. Iesu ese edia kerere ia itaia goevagoeva, to ia lalokau henidia. (Aonega Herevadia 8:31) Gabeai, tanobada dekenai ia mai bona taunimanima “huanai ia noho” neganai, ena lalohadai taunimanima dekenai ia haidaua lasi. (Ioane 1:14) Dahaka ese Dirava ena Natuna goevadaena ia durua goevadae lasi taudia dekenai lalohadai namona ia abia noho totona?
7 Gau ginigunana be, Iesu be ia bona ma haida amo gau momo ia tahua lasi to ia henia bona idia henia diba gaudia sibona. Ia diba tanobada taudia ibounai do idia helalo-kerehai lasi. (Mataio 10:32-39) Unai dainai lalo-momokani tauna ta be Basileia ena sivarai ia abia dae neganai, ia moale. Ena be nega haida Iesu ese ena hahediba taudia edia kara bona lalohadai ia moalelaia lasi, to ia diba idia ura momokani Dirava ena ura idia karaia, unai dainai ia lalokau henidia. (Luka 9:46; 22:24, 28-32, 60-62) Mai anina bada gauna be, Iesu be ena guba Tamana ia guriguri henia neganai, ena hahediba taudia edia kara namona ta ia herevalaia, ia gwau: “Oiemu hereva idia badinaia vadaeni.”—Ioane 17:6.
8. Iseda moale dogoatao noho karana dekenai, Iehova bona Iesu ita tohotohoa diba daladia haida mani oi gwauraia.
8 Ita daradara lasi, bema Iehova Dirava bona Iesu Keriso idia hahedinaraia haheitalai namona ita laloa namonamo, ita ibounai ese namo do ita davaria diba. Iseda ura hegeregerena gau ta ia vara lasi neganai, Iehova ita tohotohoa momokani diba bona ita lalo-hekwarahilaia bada lasi, a? Iesu ena aena gabudia dekenai ita raka namonamo totona, iseda noho dalana dekenai lalohadai namona ita dogoatao bona ita bona ma haida amo gau momo ita tahua lasi, a? Namona be ita itaia edena dala ai lalo-goada Keristani taudia ibounai idia laloa bada haroro gaukarana dekenai unai hakaua herevadia haida ita badinaia diba.
Haroro Gaukara Dekenai Lalohadai Namona Oi Abia Noho
9. Edena dala ai Ieremia be ena moale ia davaria lou, bona edena bamona iena haheitalai ese ita ia durua diba?
9 Iehova ia ura iena hesiai gaukara lalonai ita moale. Iseda moale be iseda gaukara ia havaraia anina amo ia vara lasi. (Luka 10:17, 20) Peroveta tauna Ieremia be lagani momo lalonai anina ia havaraia lasi teritori dekenai ia haroro. Taunimanima edia kamonai lasi karana ia laloa neganai, ena moale ia haboioa. (Ieremia 20:8) To sivarai namona ena namo ia lalohadailaia neganai, iena moale ia davaria lou. Ieremia be Iehova dekenai ia gwau: “Oi ese oiemu hereva lau dekenai oi henia, bona lau abia dae, aniani lau abia dae bamona. Bona inai oiemu hereva ese lau ia hamoalea momokani, badina be, Lohiabada, Siahu Ibounai Diravana, lau be oiemu.” (Ieremia 15:16) Oibe, Ieremia ia moale ia abia hahenamo dainai, Dirava ena hereva ia harorolaia. Ita danu ita moale diba.
10. Ena be iseda teritori be hari anina ia havaraia lasi, to haroro gaukara lalonai edena dala ai iseda moale ita dogoatao noho diba?
10 Ena be taunimanima momo be sivarai namona idia abia dae lasi, to haroro gaukara ita karaia neganai badina namodia momo dainai ita moale diba. Namona be ita laloatao, Iehova ia diba goevagoeva taunimanima haida ese ia do idia hesiai henia. Iehova hegeregerena, namona be inai helaro ita dogoatao noho, gabeai haida ese guba bona tanobada lohiaia siahuna ena hepapahuahu do idia lalo-pararalaia bona Basileia ena sivarai do idia abia dae. Namona be ita laloaboio lasi, taunimanima edia noho dalana ia haidaua diba. Idia laloa bada gaudia idia haboioa eiava gau dikana ta be idia dekenai ia vara neganai, sibona ena kara dekenai ena lalona ia hegeregere tauna danu be ena mauri ena anina ia laloa matamaia diba. Unai bamona tauna be “lauma gaudia” ia tahua matamaia neganai, do oi noho heduru henia totona, a? (Mataio 5:3, NW ) Reana emu teritori dekenai tauna ta be sivarai namona ia kamonai henia totona ia naria noho, bona ia oi vadivadi henia neganai do ia abia dae!
11, 12. Taoni ta dekenai dahaka ia vara, bona unai amo dahaka ita dibaia?
11 Iseda teritori dekenai idia noho taudia ese edia kara idia haidaua diba. Inai haheitalai mani oi laloa. Taoni maragina ta dekenai, idia tura heheni headava matamata taudia mai edia natudia idia noho. Iehova ena Witnes taudia idia vadivadi henia neganai, iduara ta ta ai inai hereva tamona idia kamonai, “Ai ura lasi!” Bema ta be Basileia ena sivarai ia kamonai henia matamaia, karaharaga dekena taudia ese ena lalona idia hamanokaia, Witnes taudia do ia hereva henia lou lasi totona. Ia hedinarai goevagoeva, unuseniai haroro gaukara karaia be mai hekwarahi. To, Witnes taudia idia hesiku lasi; idia haroro noho. Unai dainai dahaka ia vara?
12 Gabeai, unai taoni ena natudia momo be idia bada, idia headava, bona sibodia edia ruma dekenai idia noho. Idia lalo-parara edia mauri dalana amo moale korikori idia davaria lasi, unai dainai unai matamata taudia haida ese hereva momokani idia tahua matamaia. Witnes taudia idia harorolaia sivarai namona idia abia dae neganai, hereva momokani idia davaria. Unai dainai lagani momo murinai, unai kongregesen maragina ia tubu matamaia. Idia hesiku lasi to Basileia idia harorolaia noho taudia edia moale mani oi laloa! Namona be mai haheauka ida Basileia sivarai harorolaia karana ese ita dekenai moale ia mailaia danu!
Tadikaka ese Oi Do Idia Durua
13. Ita lalo-manoka neganai, daika dekenai ita lao diba?
13 Hekwakwanai idauidau eiava dika ta oi davaria neganai, edeseniai oi lao diba heduru abia totona? Iehova ena gwauhamata hesiai taudia milioni momo be guriguri amo Iehova dekenai idia lao guna, bena gabeai edia tadikaka bona taihu dekenai idia lao. Iesu be tanobada ai ia noho neganai, ena hahediba taudia idia henia heduru ia laloa bada. Ia do mase lasi hanuaboina ginigabena ai, ena hahediba taudia ia herevalaia, ia gwau hahetoho negadia ai ia ‘idia badinaia noho, ia idia rakatania lasi.’ (Luka 22:28) Momokani, iena hahediba taudia idia goevadae lasi, to edia badinaia karana ese Dirava ena Natuna ia hagoadaia. Ita danu be iseda tadikaka amo goada ita abia diba.
14, 15. Dahaka ese tau ta bona ena adavana ia durua edia natuna merona ena mase idia haheaukalaia totona, bona edia sivarai amo dahaka oi dibaia?
14 Keristani tauna Michel bona ena adavana Diane idia diba edia tadikaka bona taihu edia heduru be mai anina bada gauna. Edia mauri lagani 20 natuna merona, Jonathan, be Keristani merona mai ena goada bona toana be vaira negana namona do ia abia, bena doketa idia gwau iena harana lalonai tiuma ia abia. Doketa taudia idia gaukara goadagoada ia idia hanamoa totona, to Jonathan ia manoka ia lao ela bona adorahi ta ai mase lalonai ia mahuta. Michel bona Diane idia lalohisihisi bada herea. Idia diba unai adorahi ai idia karaia Hesiai Hebou be kahirakahira do ia ore. To, idia ura bada heduru idia abia dainai, idia ida ia noho elda tauna idia noia Kingdom Hall dekenai idia do ia bamoa lao. Kongregesen idia hamaoroa Jonathan ia mase bona unai neganai idia ginidae. Hebou murinai, tadikaka bona taihu ese idia do tai noho tama sina dekenai idia lao bona idia rosidia bona hagoadaia herevadia idia henia. Diane ia gwau: “Kingdom Hall dekenai ai lao neganai ai goada lasi, to tadikaka ese ai idia durua bada—ai idia hagoadaia momokani! Ena be aiemai hisihisi idia kokia diba lasi, to ai idia durua unai hekwakwanai negana lalonai ai gini goada totona!”—Roma 1:11, 12; 1 Korinto 12:21-26.
15 Unai hekwakwanai dainai, Michel bona Diane be edia tadikaka kahirakahira dekenai idia lao. Danu, unai ese edia lalokau heheni karana ia habadaia. Michel ia gwau: “Hari lau diba egu adavana lau lalokau henia bada be namo. Ai lalo-manoka neganai, Baibel ena hereva momokanina bona Iehova ese ai ia durua dalana ai herevalaia hebou.” Diane ia gwau: “Hari Basileia helarona be mai anina bada ai dekenai.”
16. Bema ita ura heduru ita abia, dahaka dainai iseda tadikaka ita hamaoroa be gau badana?
16 Oibe, mauri ena hekwarahi bada negadia lalonai, iseda Keristani tadikaka bona taihu ese ita idia “durua bada” bona unai amo iseda moale ita dogoatao noho diba. (Kolose 4:11) Momokani, ita laloa gaudia idia diba lasi. Unai dainai, bema ita ura heduru ita abia, namona be idia ita hamaoroa. Bena iseda tadikaka ese idia henia diba heduru dainai idia ita tanikiu henia be namo, bona ita laloa unai heduru be Iehova amo ia mai.—Aonega Herevadia 12:25; 17:17.
Oiemu Kongregesen Oi Itaia
17. Adavana lasi sinana ta ese dahaka hekwakwanai idauidau ia davaria, bona ia bamona taudia be edena bamona ita laloa?
17 Emu tadikaka oi dibaia namonamo neganai, idia do oi laloa bada bona edia hebamo amo moale do oi davaria. Oiemu kongregesen oi itaia. Dahaka oi itaia? Adavana lasi sinana ta ia hekwarahi ena natudia dekenai hereva momokani ia hadibaia, a? Ia hahedinaraia haheitalai namona oi laloa bada, a? Ia davaria hekwakwanai haida mani oi laloa. Adavana lasi sinana ta, ladana Jeanine, ese unai hekwakwanai haida ia gwauraia: sibona ia noho ia lalohisihisilaia, gaukara tatau ese idia doria goeva lasi karana ia karaia totona, bona ena moni ia bada lasi. To ia gwau unai hekwakwanai ibounai ia hanaia gauna badana be inai, hemami dalanai ena natudia ia naria namonamo be auka, badina natudia ta ta be idauidau. Jeanine be ma hekwakwanai ta ia gwauraia: “Adavana ta be lasi dainai emu natuna merona be ruma bese ena kwarana ai oi halaoa urana oi dadaraia be mai ena hekwarahi. Lau be mai egu natuna kekeni, bona lau ura lasi ia dekenai egu hekwakwanai ibounai lau gwauraia badina lau ura lasi ia lau hametaua, to nega haida unai lau badinaia be auka.” Dirava idia gari henia adavana lasi tama o sina tausen momo hegeregerena, Jeanine be ful-taim moni gaukara ia karaia bona ena ruma bese ia naria. Danu, ena natudia ida Baibel ia stadilaia, haroro gaukara dekenai idia ia hadibaia, bona kongregesen heboudia dekenai idia ia hakaua lao. (Efeso 6:4) Iehova ia moale bada herea badina ia itaia unai ruma bese be dina ta ta ai idia hekwarahi ia idia badinaia noho totona! Unai bamona taudia be ita huanai idia noho dainai ita moale, a? Oibe.
18, 19. Oi hahedinaraia edena dala ai kongregesen taudia laloa bada karana ita habadaia diba.
18 Mani emu kongregesen oi itaia lou. Reana abidadama vabu eiava dogae oi itadia, hebou ta idia reaia lasi. (Luka 2:37) Sibodia idia noho dainai nega haida idia lalohisihisi, a? Oibe. Idia haboioa adavadia idia laloa noho! To Iehova ena hesiai gaukara idia goadalaia bona ma haida idia laloa bada. Edia lalohadai namona ese kongregesen ena moale ia habadaia! Lagani 30 mai kahana lalonai ful-taim hesiai gaukara ia karaia Keristani hahinena ta ia gwau: “Lau moalelaia bada gauna ta be, tadikaka bona taihu burukadia lau itaia, idia be hahetoho momo idia abia vadaeni to mai edia abidadama ida Iehova idia do hesiai henia noho!” Oibe, ita huanai idia noho Keristani taudia burukadia be matamata taudia idia hagoadaia bada.
19 Vanegai sibona kongregesen ena hebou lao henia karana idia matamaia taudia be edena bamona? Hebou dekenai edia abidadama idia gwauraia hedinarai bona unai ese ita ia hagoadaia, ani? Baibel idia stadilaia matamaia negana amo, lauma dalanai idia goada idia lao karana mani oi laloa. Iehova be idia dekenai ia moale bada. Ita danu ita moale bada, a? Iseda lalo-namo ita hahedinaraia, edia hekwarahi dainai idia ita hanamoa, a?
20. Dahaka dainai ita gwau diba kongregesen taudia ta ta ibounai be kongregesen lalonai mai anina bada gaukara idia karaia?
20 Oi headava vadaeni, oi headava lasi, eiava oi be adavana lasi tama o sina ta, a? Oi be tamana lasi (eiava sinana lasi) merona o kekeni ta, eiava oi be vabu ta o dogae ta, a? Lagani momo lalonai kongregesen oi bamoa eiava oi be matamata tauna bona vanegai sibona hebou oi lao henia? Namona be oi diba oiemu abidadama ena haheitalai ese ita ibounai ia hagoadaia bada. Bona Basileia anena oi abia, haere oi henia, eiava Tiokratik Haroro Sikuli ai kahana ta oi karaia neganai, kongregesen ena moale oi habadaia. To mai anina bada gauna be inai, Iehova ena kudouna oi hamoalea.
21. Badina momo idia noho dahaka ita karaia totona, to edena henanadai idia vara?
21 Oibe, inai nega aukadia lalonai, mai moale ida iseda moale Diravana ita tomadiho henia diba. Badina momo dainai, Paulo ena hagoadaia herevana ita badinaia diba: “Do umui moale, . . . bona lalokau bona maino ena Dirava ese umui danu do ia noho.” (2 Korinto 13:11) To, dahaka do ia vara bema ia vara kava dika ta, dagedage, eiava moni dalanai hekwakwanai dikana ita davaria? Unai bamona gaudia idia vara lalonai iseda moale do ita dogoatao diba eiava? Hereva gabena oi laloa namonamo, bona sibona emu lalona oi hadaia.
[Footnote]
a Iehova ena Witnes taudia ese idia halasia bukana, Insight on the Scriptures, Volium 2, rau 119 itaia.
Oi Haere Diba, A?
• Moale ena anina be dahaka?
• Bema lalohadai namona ita dogoatao, edena bamona ita ia durua ita moale noho totona?
• Dahaka ese ita ia durua iseda kongregesen teritori dekenai lalohadai namona ita abia totona?
• Edena dala idauidau ai emu kongregesen lalonai idia noho tadikaka bona taihu oi laloa bada?
[Pictures on page 10]
Iseda teritori dekenai idia noho taudia idia haidaua diba
[Picture on page 12]
Emu kongregesen lalonai idia noho taudia ese dahaka hekwakwanai idia davaria?