Iehova Ena Hesiai Gaukara Lalonai Emu Moale Oi Dogoatao
“Nega ibounai do umui moale, Lohiabada lalonai umui noho dainai. Ma lau gwau lou: Do umui moale.”—FILIPI 4:4.
1, 2. Ena be tadikaka ta bona ena ruma bese taudia be edia kohu ibounai idia haboioa, to edena dala ai edia moale idia dogoatao noho diba?
SIERRA LEONE dekenai ia noho Keristani tauna, James, be ena mauri ibounai lalonai ia gaukara goada. Ruma mai ena daiutu hani hoia totona ia haboua monina ia hegeregere neganai, ena moale mani oi laloa! James bona ena ruma bese be edia ruma dekenai idia noho matamaia, to nega sisina murinai, unai tano dekenai tano tamona taudia tuari heheni karana ia vara, bona edia ruma idia gabua ore. Edia ruma idia haboioa, to edia moale idia haboioa lasi. Dahaka dainai?
2 James bona ena ruma bese taudia be idia haboioa gaudia idia laloa momo lasi, to idia do noho gaudia idia laloa bada. James ia gwau: “Unai gari bada negana ai, hebou ai abia, Baibel ai duahia, ai guriguri hebou, bona ai dekenai idia noho gaudia be momo lasi, to ai haria. Iehova ida emai hetura karana ai laloa bada dainai emai moale ai dogoatao diba.” Idia abia hahenamo idauidau, badana ta be edia hetura karana Iehova ida, idia laloa dainai, unai abidadama Keristani taudia ‘idia moale noho’ diba. (2 Korinto 13:11) Momokani, unai hisihisi idauidau idia haheaukalaia be auka. To Iehova dainai idia moale noho.
3. Keristani taudia ginigunadia haida be edena dala ai edia moale idia dogoatao noho?
3 James bona ena ruma bese ese idia davaria hahetoho be Keristani ginigunadia ese idia davaria hahetoho bamona. To, aposetolo Paulo be Heberu Keristani taudia dekenai ia gwau: “Emui kohu be haida ese idia dadia neganai, edia kara umui haheaukalaia mai moale danu.” Bena Paulo ese edia moale ena badina ia gwauraia: “Badina be umui diba, umui dekenai ia noho kohu, davana namona, be do ia noho hanaihanai gauna.” (Heberu 10:34) Oibe, aposetolo edia negai Keristani taudia be mai edia helaro goadana. Ta ese ia henaoa diba lasi gauna idia naria—Dirava ena guba Basileiana lalonai, ia dika diba lasi “kwalimu ahuna, mauri” do idia abia. (Apokalupo 2:10) Hari inai negai, hisihisi ita davaria neganai, iseda Keristani helarona—herevana ia be guba eiava tanobada helarona—ese ita ia durua diba iseda moale ita dogoatao noho totona.
‘Naria Noho mai Moale Danu’
4, 5. (a) Dahaka dainai Paulo ese Roma taudia dekenai ia henia sisiba, edia helaro idia ‘naria noho mai moale danu,’ be nega korikori ai ia henia? (b) Reana edena bamona gaudia dainai Keristani tauna be ena helaro ia laloaboio diba?
4 Aposetolo Paulo be iena tadikaka Roma dekenai ia hagoadaia mauri hanaihanai ena helaro do idia ‘naria noho mai moale danu.’ (Roma 12:12) Roma taudia dekenai, unai sisiba be nega korikori ai ia henia. Paulo ese idia ia tore henia bena lagani 10 idia do ore lasi neganai, dagedage bada idia davaria bona Pavapava Nero ena oda dainai haida idia hahisia ela bona idia mase. Dirava ese kwalimu ahuna, mauri, do ia henia idia abidadama henia dainai, hisihisi negana lalonai unai ese idia ia durua bada. Hari inai negai ita be edena bamona?
5 Ita be Keristani taudia dainai, ita diba dagedage do ita davaria. (2 Timoteo 3:12) Danu, ita diba ita ibounai ese ‘nega dika ita davaria bona inai dika ia vara kava.’ (Hadibaia Tauna 9:11) Aksiden ta dainai ita lalokau henia tauna ta ia mase diba. Gorere dikana ta dainai, iseda tama o sina eiava turana ta ia mase diba. Bema Basileia helarona ita laloa noho lasi bona unai bamona hahetoho idia vara, lauma dalanai dika ita davaria diba. Unai dainai, namona be sibona ita henanadai, ‘Egu helaro lau “naria noho mai moale danu,” a? Nega momo nega lau atoa ia lau laloa loulou totona, a? Lau dekenai do ia mai Paradaisona be gau korikorina, a? Lau laloa unuseniai do lau noho, a? Guna, hereva momokani lau dibaia neganai, lau ura bada inai nega ena dokona ia mai, unai ura ia do bada noho, a?’ Henanadai ginigabena ita laloa namonamo be gau badana. Dahaka dainai? Badina bema harihari ita gorere lasi, moni gaukara namona ita karaia, bona ita noho tanona ai tuari be lasi, aniani ia hegeregere, bona ia vara kava dika ta be lasi, reana mai anina bada gauna, Dirava ena tanobada matamatana do ia mai be namo, ita laloaboio diba.
6. (a) Paulo bona Sila be hisihisi idia davaria neganai, dahaka idia laloa noho? (b) Edena dala ai Paulo bona Sila edia haheitalai ese ita ia hagoadaia diba hari?
6 Paulo ese Roma taudia dekenai sisiba ma haida ia henia, ia gwau “nega dika ia mai neganai do umui gini goada.” (Roma 12:12) Paulo be nega momo hisihisi ia davaria. Nega ta, matahanai ta lalonai tau ta ia itaia bona unai tauna ese ia boiria “Makedonia kahana dekenai” do ia lao, unuseniai idia noho taudia ia durua Iehova idia dibaia totona. (Kara 16:9) Unai dainai Paulo, Luka, Sila, bona Timoteo be bouti amo Europe dekenai idia lao. Unai gaukara goadagoada misinari taudia ese dahaka idia davaria? Hisihisi idia davaria! Makedonia ena siti ta, Filipi, dekenai idia haroro murinai, Paulo bona Sila idia dadabaia bona dibura dekenai idia negea. Ia hedinarai goevagoeva, Filipi taudia haida be Basileia sivaraina idia dadaraia sibona lasi—to idia dagedage henia bada danu. Idia vara gaudia dainai idia gaukara goada misinari taudia be edia moale idia haboioa, a? Lasi. Taunimanima ese idia botaia bona dibura rumana dekenai idia negea murinai, “hanuaboi momokani neganai, Paulo bona Sila idia guriguri noho bona ane dekenai Dirava idia hanamoa.” (Kara 16:25, 26) Momokani, Paulo bona Sila idia dadabadia dainai idia moale lasi, to unai misinari taudia rua be unai gaudia idia laloa momo lasi. Idia ese Iehova bona idia ia hanamoa daladia idia laloa noho. Paulo bona Sila be mai moale ida hisihisi idia haheaukalaia dainai, edia tadikaka Filipi ai bona gabu ma haida dekenai, haheitalai namona idia hahedinaraia.
7. Dahaka dainai iseda guriguri lalonai tanikiu herevadia ita gwauraia be namo?
7 Paulo ia gwau: “Guriguri do umui goadalaia nega ibounai.” (Roma 12:12) Gau ta oi lalo-hekwarahilaia neganai, oi guriguri, a? Dahaka oi gurigurilaia? Reana emu hekwakwanai oi gwauraia bona Iehova ena heduru oi noia. To emu guriguri lalonai oi abia hahenamo dainai Dirava oi tanikiu henia diba danu. Hekwakwanai idia vara neganai, bema Iehova ese ita totona ia karaia gau namodia ita laloa, unai ese ita do ia durua iseda helaro ita ‘naria noho mai moale danu’ totona. Davida ena mauri be hekwakwanai amo ia honu, ia gwau: “Lohiabada e, lauegu Dirava, oiemu durua karadia ai dekenai be momo herea. Tau ta be oiemu kara bamona ia karaia diba lasi. Lau ese oiemu kara, bona oiemu laloa, be taunimanima dekenai lau ura gwauraia, to lau be hegeregere lasi momokani. Badina oiemu kara bona laloa be momo herea, duahia diba lasi.” (Salamo 40:5) Bema Davida bamona, ita be Iehova ia henia hahenamo ita laloa loulou, do ita moale momokani.
Lalohadai Namona Oi Dogoatao
8. Keristani tauna be dagedage ia davaria lalonai, dahaka ese ia durua ia moale noho totona?
8 Iesu be ia murinai idia raka taudia ia hagoadaia, hahetoho idauidau idia davaria neganai, lalohadai namona idia dogoatao noho be namo. Ia gwau: “Bema egu murinai umui raka dainai idia hadikaia umui, bona idia hisihisi henia umui, bona hereva dika mai koikoi danu idia gwauraia loaloa umui totona lau dainai, umui danu namo.” (Mataio 5:11) Bema unai bamona ia vara, ita moale ena badina be dahaka? Dagedage lalonai ita gini goada karana amo ita hamomokania Iehova ena lauma ita abia. Aposetolo Petero be iena nega lalonai idia noho Keristani taudia dekenai ia gwau: “Umui be Keriso ena taudia dainai, do umui moale bema haida ese umui idia hereva dika henia. Badina inai anina be, Dirava ena Lauma, hairai Laumana, be umui dekenai ia noho vadaeni.” (1 Petero 4:13, 14) Iehova be ena lauma amo ita ia durua do ita haheauka totona, bona unai amo iseda moale do ita dogoatao diba.
9. Tadikaka haida be edia abidadama dainai dibura dekenai idia noho neganai, dahaka badina haida ese idia ia durua idia moale noho totona?
9 Ena be iseda noho dalana ia dika momokani, to badina haida dainai ita moale diba. Keristani tauna Adolf ia davaria unai be momokani. Lagani momo lalonai, ia noho tanona ai Iehova ena Witnes taudia edia gaukara idia taravatua. Adolf bona iena bamodia haida idia ura lasi Baibel amo idia abia dae herevadia idia dadaraia, unai dainai pulisi ese idia dogoatao bona idia gwau lagani momo lalonai dibura dekenai do idia noho. Dibura dekenai edia mauri be auka, to Paulo bona Sila bamona, Adolf bona ena bamodia be mai edia badina Dirava idia tanikiu henia totona. Idia gwau, dibura ese idia ia durua edia abidadama idia hagoadaia bona mai anina bada Keristani karadia, hegeregere harihari bada karana, ta ena hemami laloa karana, bona tadikaka lalokau henia karana idia habadaia. Haheitalai ta be, dibura tauna ta be ena ruma bese amo pasolo ia abia neganai, ia lalonai idia noho gaudia be ena tadikaka dekenai ia haridia, bona idia laloa idia be “gau namodia ibounai, bona harihari gaudia namodia momokani ibounai” ia Henia Tauna, Iehova, amo idia mai. Unai bamona hebogahisi karadia ese henia tauna bona idia abia taudia dekenai moale ia mailaia. Dibura dekenai idia atoa edia abidadama do idia hadikaia totona, to lauma dalanai idia ia hagoadaia!—Iamesi 1:17; Kara 20:35.
10, 11. Taihu ta idia henanadai henia loulou bena gabeai lagani momo lalodiai idia hadiburaia, to dahaka ia karaia?
10 Ella ia noho tanona dekenai danu, nega daudau lalonai Basileia gaukarana idia taravatua bona iena Keristani helarona be ma haida dekenai ia herevalaia dainai pulisi ese idia abia. Hua 8 lalonai idia henanadai henia loulou. Gabeai, kota dekenai ia lao, idia gwau lagani 10 lalonai dibura dekenai do ia noho, bona unuseniai Iehova tomadiho henia tauna ta be lasi. Unai neganai Ella ena mauri lagani be 24 sibona.
11 Momokani, Ella ia ura lasi ena matamata negana be dibura daiutuna lalonai ia haorea. To unai ia haidaua diba lasi dainai, ia laloa ena lalohadai do ia haidaua. Unai hegeregerena, ia laloa dibura be ena haroro teritori ai do ia halaoa. Ia gwau: “Haroro gaukara be bada herea dainai unai lagani idia ore haraga.” Lagani ima mai kahana idia ore murinai, Ella idia henanadai henia lou. Idia itaia dibura ese ena abidadama ia hadikaia lasi dainai, ia idia henanadai henia taudia idia gwau: “Oi ai ruhaia diba lasi; oiemu kara oi haidaua lasi.” Mai gari lasi ida Ella ia gwau: “To egu kara lau haidaua vadaeni! Matamanai, dibura dekenai lau vareai neganai lau lalohisihisi to hari egu hemami be namo, bona guna bamona lasi, hari egu abidadama ia goada momokani!” Bona ia gwau: “Bema oi ura lasi lau oi ruhaia, do lau noho ela bona Iehova ena nega korikori ai lau do ia ruhaia.” Lagani ima mai kahana ai idia hadiburaia, to Ella ena moale ia ore lasi! Ia dibaia gauna be, herevana ena noho dalana be edena bamona, to ia moale diba. Ena haheitalai amo gau ta oi dibaia diba, a?—Heberu 13:5.
12. Bema Keristani ta be hekwakwanai aukana ia davaria, lalo-maino abia dalana be dahaka?
12 Ita gwau lasi Ella dekenai siahu idauna ta ia noho dainai unai ese ia durua unai bamona hekwakwanai ia haheaukalaia totona. Ella be hua haida lalodiai dibura dekenai do ia noho negana ena lata ia do dibaia lasi bona ia idia henanadai henia loulou negana ia herevalaia, ia gwau: “Gari dainai lau heudeheude bona egu isena edia regerege lau laloatao, bona egu mamia be lau be ia gari bada manu maragina bamona.” To, Ella be Iehova abidadama henia karana goadana ia dibaia. (Aonega Herevadia 3:5-7) Unai dainai, hari ia dekenai Dirava be momokani. Ia gwau: “Henanadai henia daiutuna lau vareai negana ta ta ai, maino lau mamia. . . . Bema gari havaraia gaudia idia bada idia lao, lau mamia maino ia bada ia lao danu.” Iehova be unai maino ena badina. Aposetolo Paulo ia gwau: “Gau ta totona do umui laloa hekwarahi lasi. To umui dekenai hegeregere lasi gaudia do umui abia totona, Dirava do umui noia. Bona umui noia negadia ibounai, mai tanikiu danu do umui guriguri henia. Dirava ena maino ese taunimanima edia diba ia hanaia momokani. Keriso Iesu umui danu ia hakapua tamona dainai, inai maino ese emui laloa gaudia, bona emui kudouna idia mamia gaudia ibounai do ia gimaia namonamo.”—Filipi 4:6, 7.
13. Dahaka dainai ita diba bema hisihisi ita davaria do ita haheaukalaia diba?
13 Ella be dibura amo idia ruhaia, bona ena be ena mauri ia auka, to ena moale ia dogoatao noho. Unai ia karaia sibona ena goada amo lasi to Iehova ese ia henia goadana amo. Aposetolo Paulo dekenai unai be momokani, ia gwau: “Lauegu manoka do lau heagilaia mai moale danu, vadaeni Keriso ena siahu lau dekenai do ia noho. . . . Badina be lau manoka neganai, unai be Dirava ena goada lau abia.”—2 Korinto 12:9, 10.
14. Keristani tauna ese hekwakwanai ta dekenai edena bamona lalohadai namona ta ia abia diba bona reana unai amo dahaka ia vara oi herevalaia.
14 Reana hari oi davaria hekwarahi be ita herevalaia vadaeni gaudia hegeregerena lasi. Herevana idia be edena bamona, to ita haheaukalaidia be auka. Hegeregere, reana emu gaukara biaguna be emu gaukara ia maumauraia kava—to gaukara taudia ma haida, tomadiho oreadia ma haida amo, be unai bamona ia kara henia lasi. Reana gaukara ma haida oi tahua diba lasi. Edena dala ai emu moale oi dogoatao diba? Adolf bona ena bamodia mani oi laloa lou, dibura dekenai idia dibaia, mai anina bada karadia idia habadaia be namo. Bema oi ura momokani emu biaguna—‘biaguna dagedagena’ danu—oi hamoalea oi ese Keristani karadia, hegeregere haheauka do oi habadaia. (1 Petero 2:18) Ma danu, bema emu gaukara oi hanamoa noho, reana nega ta unai ese oi do ia durua oi moalelaia diba gaukarana ma ta oi davaria totona. Iehova ena hesiai gaukara lalonai moale dogoatao daladia ma haida ita herevalaia.
Anina Lasi Karadia Negea ese Moale Ia Havaraia
15-17. Ena be tau ta bona ena adavana idia diba edia lalo-hekwarahi ena badina idia kokia diba lasi, to edena metau hamaragia dalana idia dibaia?
15 Reana edena moni gaukara oi karaia eiava edeseniai oi gaukara oi abia hidi diba lasi, to emu mauri ena kahana ma haida oi biagua diba. Mani inai ekspiriens oi laloa.
16 Keristani tauna bona ena adavana ese elda ta idia boiria edia ruma dekenai aniani totona. Unai hanuaboi ai, tadikaka bona ena adavana ese elda tauna idia hamaoroa mauri ena hekwakwanai idauidau ese idia ia hametaua. Idia ruaosi idia karaia ful-taim moni gaukarana dekenai edia nega bona goada bada idia henia, to gaukara ma ta idia tahua diba lasi. Idia laloa unai idia haheaukalaia noho diba lasi.
17 Idia be elda tauna ena sisiba idia noia neganai ia gwau, “Anina lasi karadia negea.” Edena dala ai? Unai tau bona ena adavana be dina ta ta ai hora toi idia gaukaralaia edia gaukara gabuna dekenai idia lao bona giroa mai totona. Elda tauna be idia ia diba namonamo, bona iena sisiba be reana edia gaukara gabuna kahirakahira ai ruma ta idia abia, unai amo dina ta ta ai gaukara gabuna dekenai idia lao bona giroa mai negana do idia hakwadogia. Unai nega do idia gaukaralaia diba mai anina bada gaudia ma haida idia karaia—eiava idia laga-ani totona. Bema mauri ena hekwakwanai ese emu moale ia hamaragia, namona be oi tahua namonamo bema gau haida oi haidaua diba, ani?
18. Dahaka dainai gau ta ita do abia hidi lasi neganai, ita laloa namonamo guna be gau badana?
18 Lalo-hekwarahi hamaragia dalana ma ta be, gau ta oi do abia hidi lasi neganai, oi laloa namonamo guna. Hegeregere, Keristani tauna ta be ena lalona ia hadaia ruma ta do ia haginia. Ena be guna ruma ta ia haginia lasi, to ruma haginia palani aukana ia abia hidi. Hari ia lalo-parara, bema ruma ena palani ia do abia hidi lasi neganai “iena raka dalana ia laloa namonamo” guna, hekwakwanai momo ia reaia diba. (Aonega Herevadia 14:15) Keristani tauna ma ta be abitorehai ia abia tadikakana durua maduna ta ia abia dae. Gwauhamata herevana hegeregerena, bema moni ia abiatorehai tauna ia hegeregere lasi moni ia henia lou totona, durua tauna ese do ia henia. Matamanai, gau ibounai idia heau namonamo, to gabeai moni ia abiatorehai tauna be ena gwauhamata ia hagugurua lasi. Moni heniatorehai tauna ia badu bona durua tauna ia oda henia abiatorehai monina ibounai do ia henia. Unai ese durua tauna ia hametaua bada. Bema unai tauna ese abitorehai monina henia lou maduna ia do abia dae lasi neganai ena kahana ibounai ia laloa namonamo guna, reana unai hekwakwanai do ia davaria lasi, ani?—Aonega Herevadia 17:18.
19. Iseda mauri ena lalo-hekwarahi hamaragia daladia haida be dahaka?
19 Ita hesiku neganai namo lasi ita laloa iseda lalo-hekwarahi hamaragia bona moale davaria lou dalana be sibona eda Baibel stadi, haroro gaukara, bona hebou lao henia karana ita hamaragia. Unai mai anina bada karadia amo Iehova ena lauma helaga ita abia diba, bona ia havaraia gauna ta be moale. (Galatia 5:22) Keristani gaukara idauidau ese ita idia hagoadaia bona nega momo idia dainai ita hesiku bada lasi. (Mataio 11:28-30) Nega momo lauma gaudia lasi, to moni gaukara eiava moale karadia dainai hesiku mamina ia vara. Namona be hora namona ta ai ita mahuta, reana unai ese ita do ia durua iseda goada ita abia lou totona. Nega ma haida ita atoa ita laga-ani totona ese ita ia durua bada diba danu. N. H. Knorr, ia be Iehova ena Witnes taudia edia Hakaua Oreana tauna ta ela bona ia mase, be nega momo misinari taudia dekenai ia gwau: “Oi lalo-manoka neganai, gau ginigunana be oi laga-ani. Hanuaboi ena mahuta namona murinai, emu hemami be unai hekwakwanai oi hanai diba!”
20. (a) Iseda moale dogoatao noho daladia haida mani oi gwauraia. (b) Edena badina haida dainai oi moale diba? (Rau 17 dekenai ia noho mauana itaia.)
20 Keristani taudia be “moale Diravana” idia hesiai henia be hahenamo ta. (1 Timoteo 1:11, NW ) Ita itaia vadaeni, ena be hekwakwanai badadia ita davaria, to iseda moale ita dogoatao diba. Namona be Basileia helarona be ita vairanai ia noho, ia maoro neganai iseda lalohadai ita haidaua, bona iseda mauri lalonai gau momo ita tahua lasi. Bena, herevana iseda noho be edena bamona, aposetolo Paulo ena hereva hegeregerena do ita kara: “Nega ibounai do umui moale, Lohiabada lalonai umui noho dainai. Ma lau gwau lou: Do umui moale.”—Filipi 4:4.
Mani Inai Henanadai Oi Laloa Namonamo:
• Dahaka dainai Keristani taudia ese Basileia helarona idia laloa noho be namo?
• Nega aukadia lalonai, dahaka ese ita ia durua diba iseda moale ita dogoatao noho totona?
• Dahaka dainai iseda mauri lalonai anina lasi karadia ita negea be namo?
• Haida be edena dala idauidau ai edia mauri lalonai anina lasi karadia idia negea?
[Box/Pictures on page 17]
Oi Moale Diba Ena Badina Ma Haida
Ita be Keristani taudia dainai, ita moale ena badina be momo. Mani inai hereva oi laloa:
1. Iehova ita diba.
2. Dirava ena Hereva amo hereva momokani ita dibaia.
3. Iesu ena boubou abidadama henia karana amo iseda kara dika ia gwauatao diba.
4. Dirava ena Basileia ia lohia noho—kahirakahira tanobada matamana do ia vara!
5. Iehova ese lauma paradaiso lalonai ita ia hakaua vareai.
6. Keristani taudia ida hebamo namona ita moalelaia.
7. Iseda hahenamo ta be Basileia sivarai namona ita harorolaia.
8. Ita mauri noho, bona ita be mai iseda goada.
Oi moale ena badina ma haida oi gwauraia diba, a?
[Picture on page 13]
Paulo bona Sila be dibura dekenai idia moale danu
[Pictures on page 15]
Moale do ia havaraia gauna, Dirava ena tanobada matamatana, oi laloa noho, a?