Mauri Sivaraina

Iehova Ena Dala Dekenai Ai Gaukara Noho amo Goada Bona Moale Ai Abia

LUIGGI D. VALENTINO ESE IA SIVARAILAIA

Iehova ia gwau: “Dala be inai, ia dekenai do umui raka lao.” (Isaia 30:21) Lagani 60 gunanai lau bapatiso negana amo unai hahegani lau badinaia be egu tahua gauna. Guna egu tama sina edia haheitalai lau itaia dainai, unai tahua gauna lau atoa, idia be lagani 1921 ai, Italy amo Cleveland, Ohio, U.S.A. dekenai idia lao. Unuseniai natudia toi idia ubua​—⁠egu kakana Mike, egu tadina kekeni, Lydia, bona lau.

EGU TAMA SINA be tomadiho idauidau dekenai idia lao, to mai lalohisihisi ida idia rakatanidia. Bena lagani 1932 ai, nega ta Tamagu be Italy gado reidio program ta ia kamonai noho. Unai be Iehova ena Witnes taudia edia program, bona Tamagu be ia kamonai gauna ia ura henia. Ma diba haida ia abia totona revareva ia torea, bona Brooklyn, New York, dekenai ia noho Iehova ena Witnes taudia edia hedikwota amo Italy Witnes tauna ta ia mai bona ai ia itaia. Herevahereva namona idia karaia ela bona daba rere, bena egu tama sina idia abia dae idia be tomadiho momokani idia davaria.

Tamagu bona Sinagu ese Keristani hebou idia lao henia matamaia bona loaloa naria taudia idia boiria edia ruma dekenai idia noho. Ena be lau be mero maragina sibona, to unai taudia idia ura idia lau bamoa haroro gaukara dekenai bona Iehova ena ful-taim hesiai gaukara lau laloa matamaia. Ia vadivadi tauna ta be Carey W. Barber, hari ia be Iehova ena Witnes taudia edia Hakaua Oreana tauna ta. Daudau lasi murinai, February 1941 ai, egu mauri lagani be 14 neganai lau bapatiso, bona lagani 1944 ai, Cleveland dekenai painia gaukara lau hamatamaia. Mike bona Lydia danu be Baibel ena hereva momokani ena dala dekenai idia raka matamaia. Mike be Iehova ia hesiai henia ela bona ena mase negana, bona Lydia be ena adavana, Harold Weidner, ida lagani 28 lalonai sekit gaukara idia karaia. Hari, idia be ful-taim spesel painia gaukara idia karaia.

Dibura ese Egu Gaukara Noho Urana Ia Habadaia

Lagani 1945 ena matamana kahanai, Ohio ena Chillicothe Federal Prison dekenai lau idia atoa, badina egu lalona ena mamina be Baibel amo lau hadibaia bona ia ese lau ia veria Isaia 2:4 ena hereva lau badinaia totona, unai siri ese tuari kaia be geia auri ai halaoa gaukarana ia herevalaia. Nega ta, dibura naria taudia idia gwau unai dibura dekenai idia noho Witnes taudia ese Iehova ena Witnes taudia idia halasia Baibel bukadia haida sibona idia abia diba. To, kahirakahira ia noho kongregesen ta ena Witnes taudia ese idia durua. Nega haida, dibura badinai ia noho uma gabudia dekenai magasin bona buka haida idia negea. Daba ai, dibura taudia be edia gaukara gabudia dekenai idia abia lao neganai, unai magasin bona buka idia tahudia bona dibura dekenai idia abidia vareai. Dibura dekenai lau vareai neganai, buka bona magasin sisina momo ai abia diba. To, Iehova ese ia henia lauma aniani laloa bada karana lau dibaia​—⁠nega ibounai Gima Kohorona eiava Noga! magasin matamatana lau abia neganai, unai lau dibaia gauna lau laloatao noho.

Ena be ai dekenai gwaumaoro idia henia dibura dekenai kongregesen hebou idauidau ai karaia totona, to Witnes lasi taudia idia vareai diba lasi. To, dibura naria taudia bona dibura taudia haida be hehuni ai idia mai, bona haida be hereva momokani idia abia dae. (Kara 16:​30-34) Tadikaka A. H. Macmillan ena vadivadi ese ai idia hagoadaia bada. Ai ia hamaoroa hanaihanai, dibura dekenai ai noho negana be ai negea kava negana lasi, badina ai ia hegaegaelaia gabeai do ai abia gaukara idauidau totona. Unai lalokau tadikaka burukana ese egu kudouna ia hamarerea bona Iehova ena dala dekenai lau raka noho urana ia habadaia.

Bamona ta Lau Abia

Tanobada Ibounai Tuarina Iharuana ia ore, dibura ena geiti idia kehoa, bona painia gaukara, ful-taim hesiai gaukarana, lau karaia lou. To lagani 1947 ai, egu tamana ia mase. Ruma bese durua totona moni gaukara lau karaia bona masolo gigia medikol gaukarana lau dibaia​—⁠unai gaukara be lagani 30 bamona murinai lau bona egu adavana ese ai davaria nega dikana lalonai lau ia durua. To madi egu sivarai ena kahana haida lau reaia. Mani oi dekenai egu adavana ena sivarai lau gwauraia guna.

Lagani 1949 ai, adorahi ta ai Kingdom Hall dekenai lau noho neganai, telefon ia ringi. Lau abia isi bona gado regena namo hereana ta lau kamonai, ia gwau: “Lauegu ladana be Christine Genchur. Lau be Iehova ena Witnes kekeni ta. Lau mai Cleveland dekenai gaukara lau tahua totona, bona lau ura kongregesen ta lau bamoa.” Emai kongregesen be ia noho gabuna amo ia daudau, to ena gado regena lau ura henia, unai dainai ia dekenai emai Kingdom Hall dekenai mai dalana lau hadibaia bona lau hagoadaia unai Sunday ai ia mai totona​—⁠unai dina ai pablik tok do lau henia. Sunday ai, lau be tau ginigunana Kingdom Hall dekenai, to lau diba lasi taihudia ta be lasi. Hereva lau henia noho negana ibounai lalonai, egu matana be vareai gabuna dekenai lau negea, to ta ia vareai mai lasi. Unai dina murinai ia lau ringi henia, bona lau ia hamaoroa ia be basi ena heau dalana ia do diba namonamo lasi. Unai dainai lau gwau ia do lau hedavari henia bona do lau hadibaia namonamo.

Ena tama sina edia sivarai lau dibaia, idia be Czechoslovakia amo idia mai, bona buklet ladana Where Are the Dead? idia duahia murinai, Bible Student taudia idia bamodia matamaia. Ena tama sina be lagani 1935 lalonai idia bapatiso. Lagani 1938 ai, Christine ena tamana be Iehova ena Witnes taudia edia kongregesen, Clymer, Pennsylvania, U.S.A. dekenai ia noho kongregesen ena naria tauna (kongregesen ena gunalaia tauna) ai ia lao, bona 1947 ai, Christine ena mauri lagani be 16 neganai ia bapatiso. Daudau lasi murinai unai lauma gaudia ia laloa bada taihu mai hairaina lau lalokau henia matamaia. June 24, 1950 dekenai, ai headava, bona unai nega amo Christine be egu bamona namona, ia ura Dirava ena Basileia ia atoa guna. Iehova lau tanikiu henia badina inai bamona namona be ena mauri be egu mauri danu ia hakapua dainai.​—⁠Aonega Herevadia 31:⁠10.

Hoa Gauna Badana Ta

November 1, 1951 lalonai, ai painia matamaia. Lagani rua murinai, Toledo, Ohio ai idia karaia hebouhebou dekenai Tadikaka Hugo Riemer bona Albert Schroeder ese misinari gaukara idia ura karaia painia taudia idia hereva henia. Ai be idia huanai. Ai idia hagoadaia Cleveland dekenai do ai painia noho, to hua ta murinai, hoa gauna badana ta ai abia​—⁠ai idia boiria Watchtower Bible School of Gilead ena klas namba 23 dekenai do ai lao, February 1954 ai do ia matamaia!

Motuka amo Gilead Sikuli dekenai, unai negai ia be South Lansing, New York dekenai, ai lao noho neganai, Christine ia gari dainai lau ia hamaoroa loulou, “Mani motuka ena sipidi oi hamaragia!” Lau gwau, “Christine, bema iseda motuka ena sipidi lau hamaragia lou, ita be iniseniai do ita noho.” To, sikuli gabuna dekenai ai ginidae murinai, emai mamina ia namo. Tadikaka Nathan Knorr ese stiuden taudia ia welkam henia bona ai ia abia loaloa gabu ai itaia totona. Ai dekenai ranu bona paoa naria dalana ia hahedinaraia danu, bona ia gwau Basileia gaukara naria lalonai moni naria namonamo karana be gau namona. Unai sisiba be emai lalona dekenai ia noho. Unai sisiba ai do badinaia noho.

Peleini amo Rio Dekenai Ai Lao

Nega sisina murinai sikuli ai haorea, bona December 10, 1954 ai, ia keru bada New York City ai peleini dekenai ai guia, emai gaukara gabuna matamatana, dina ia siahu gabuna Rio de Janeiro dekenai, do ai lao dainai ai moale dikadika. Misinari tau bona hahine, Peter bona Billie Carrbello, be ai ida idia lao. Hora 24 lalonai do ai lao, Puerto Rico, Venezuela, bona Brazil ena not kahana ai Belém dekenai do ai stopu danu. To, ensini ena hekwakwanai dainai, hora 36 idia ore murinai, henunai Rio de Janeiro ai itaia. To ena toana be namo herea! Siti lamepa edia diari be kapet koremana latanai daimon idia diaridiari bamona, bona hua ena siliva diarina be Guanabara Bay ena ranu latanai ia diari.

Betele famili taudia haida be peleini gabuna dekenai ai idia naria. Ai idia welkam henia murinai, ai idia abia lao brens opesi dekenai, bona 3 a.m. dabai, ai mahuta. Hora haida murinai, gaba ese ai ia hadibaia emai misinari gaukara ena dina ginigunana ia matamaia inai!

Ai Dibaia Gauna Ginigunana

Mai anina bada gauna ta ai dibaia haraga. Adorahi ta ai, Witnes ruma bese ta edia ruma dekenai ai noho. Brens dekenai ai raka giroa gwauraia neganai, ai ia boiria tauna ese ai ia koua, ia gwau, “lasi, umui lao diba lasi; medu ia diho noho,” bona ai ia noia unuseniai ai mahuta totona. Lau gwau, “emai gabu dekenai medu ia diho danu,” bona mai kiri ida ena hereva lau dadaraia. Bena ai lao.

Rio kahirakahira ai ororo be momo dainai, medu ranu ia haboua haraga bona siti lalonai ia heau diho, bena nega momo abata ia vara. Daudau lasi, ranu lalonai ai raka bena ena dobu be ela bona emai tuina. Brens badinai, dala be ia aru goadagoada sinavai bamona bona ranu ena dobu be ia daekau ela bona emai kemena. Betele dekenai ai ginidae neganai ai paripari dikadika. Unai dina murinai, Christine ena mamina be ia dika bona typhoid gorerena ia abia, unai ese nega daudau lalonai ena tauanina ia hamanokaia. Oibe, ai be misinari taudia matamatadia dainai, ai ese unai gabu idia diba Witnes taudia edia sisiba ai kamonai henia be namo.

Misinari Bona Loaloa Gaukarana Ai Matamaia

Emai gaukara ia matamaia namonamo lasi murinai, ai ura bada emai haroro gaukara ai hamatamaia. Ai hedavari henia taudia ibounai dekenai Portuguese gado ai haroro herevana ai duahia, bona toana be ai ruaosi emai hereva karana ena namo be hegeregere. Ruma tauna ta be Christine dekenai ia gwau, “emu hereva lau lalo-pararalaia, to iena lau lalo-pararalaia lasi,” bona imana ia duduia lau dekenai. Ruma tauna ma ta be lau ia hamaoroa, “oiemu hereva lau lalo-pararalaia to iena lasi.” To, unai wiki ginigunadia haida lalonai Gima Kohorona sabskripsen 100 ai abia dainai ai moale. Momokani, Brazil dekenai ai noho laganina ginigunana lalonai, emai Baibel stadi haida be bapatiso idia abia, bona unai ese ai dekenai ia hahedinaraia iniseniai misinari gaukara ai karaia lalonai anina namona do ia vara diba.

Lagani 1955 bamona lalonai, Brazil ena kongregesen momo dekenai sekit naria taudia be hanaihanai idia lao lasi, badina idia hegeregere tadikaka be momo lasi. Unai dainai lagani 1956 ai, ena be gado lau do dibaia noho bona Portuguese gado dekenai pablik tok lau do henia lasi, to lau idia siaia sekit gaukara be São Paulo ena taoni dekenai do lau karaia.

Ai vadivadi henia kongregesen ginigunana be lagani rua bamona lalonai sekit naria tauna ese ia vadivadi henia lasi dainai, idia ibounai idia ura bada pablik tok idia kamonai. Unai hereva lau hegaegaelaia totona, Portuguese gado ena Gima Kohorona edia hereva lau utua bona pepa dekenai lau atodia. Unai Sunday ai, Kingdom Hall be ia honu momokani. Taunimanima be platfom ai idia helai danu, bona ibounai be unai mai anina bada gauna idia naria. Unai hereva, eiava unai duahiduahi, ia matamaia. Nega ta ta ai, matana lau negea bona lau hoa badina ta ia marere lasi, natudia danu. Ibounai edia matana idia kehoa bona lau idia raraia. Lau laloa bona sibona dekenai lau gwau: ‘Valentino e, oiemu Portuguese gado be ia namo vadaeni! Inai taudia idia kamonai namonamo.’ Lagani haida murinai, unai kongregesen lau vadivadi henia lou neganai, egu vadivadi ginigunana lalonai ia noho tadikaka ta be ia gwau: “Guna oi henia pablik tok oi laloatao? Ai be ena hereva ta ai lalo-pararalaia lasi.” Lau gwauraia hedinarai lau danu be unai tok ena hereva momo lau lalo-pararalaia lasi.

Unai sekit gaukara ena lagani ginigunana lalonai, nega momo Sekaraia 4:6 lau duahia. Ena hereva, ‘goada dekena amo lasi, to egu lauma dekena amo,’ ese lau ia hadibaia Iehova ena lauma helaga sibona dainai inai Basileia gaukarana ia bada ia lao. Bona unai bamona ia bada ia lao, ena be gau haida dekenai ai hegeregere lasi.

Hekwakwanai Bona Hahenamo Idauidau

Sekit gaukara ena anina be tano ena kahana ibounai dekenai ai lao bona taipraita, buka bona magasin mauadia, emai sutkeisi, bona emai baege ai abia loaloa. Christine be mai aonega ida emai sutkeisi dekenai namba ia atoa, unai amo basi ta amo ma ta dekenai ai lao haraga neganai gau ta do ai laloaboio lasi. Nega momo dala dikadia dekenai hora 15 lalonai basi ai guia sibona murinai, ai lao gabuna dekenai ai ginidae. Nega haida, ai gari bona basi rua be nega tamona ia mareremarere nesehanai idia hanaia bona idia kahirakahira momokani dainai pepa ta sibona be idia huanai ia noho diba neganai, ai gari dikadika. Trein, bouti, bona hosi amo ai loaloa danu.

Lagani 1961 ai distrik gaukara ai hamatamaia, kongregesen ta amo kongregesen ta dekenai lasi to sekit ta amo sekit ta dekenai ai lao. Wiki ta ena adorahi haida lalonai, Iehova ena orea ese ia karaia muvini piksa ai hahedinaraia​—⁠dina ta ta gabu idauna ta dekenai. Nega momo ai karaharaga be namo, unai gaukara idia koua toho dubu gunalaia taudia idia kwalimu garina. Taoni ta dekenai, pris ese gabu ta ena biaguna ia hagaria dainai, ai ida ia karaia kontraka ia kokia. Dina haida lalonai gabu ai tahua murinai, gabu ma ta ai davaria, to ta ai hadibaia lasi bona guna ai abia gabuna dekenai taunimanima ai boiria noho. Program ia do matamaia lasi neganai, Christine ia lao gabu gunana dekenai bona unai muvini piksa idia ura itaia taudia be mai gado regena maragina ida gabu matamata dekenai ia hakaua. Unai adorahi ai, taunimanima 150 ese muvini piksa idia itaia, ia be mai ena sinado maorona, The New World Society in Action.

Ena be nega haida gabu daudau dekenai loaloa gaukara ai karaia be mai ena hekwarahi, to Iehova ai tanikiu henia badina unuseniai idia noho manau tadikakadia be emai vadivadi idia moalelaia bona edia heabidae karana dainai edia ruma maragidia dekenai idia ida ai noho diba dainai. Idia ai hetura henia karana be ai dekenai emai kudouna idia hamoalea hahenamodia ia mailaia. (Aonega Herevadia 19:17; Hagai 2:⁠7) Unai dainai ai lalohisihisi, badina lagani 21 lalonai Brazil dekenai emai hesiai gaukara ai karaia murinai, emai misinari dinadia idia ore!

Hekwakwanai Lalonai, Iehova ese Ai Dekenai Dala Ia Hahedinaraia

Lagani 1975 lalonai, Christine be opereisen ia abia. Loaloa gaukara ai karaia lou, to Christine ena gorere ia bada. Toana be United States dekenai ai giroa be namo, unai amo medikol heduru ia abia diba. April 1976 ai, Long Beach ai, California dekenai, ai ginidae bona egu sinana ida ai noho. Lagani 21 tano ma ta dekenai ai noho murinai, ai diba namonamo lasi edena bamona inai hekwakwanai do ai hamaoromaoroa. Lau ese masolo gigia gaukarana lau karaia, bona unai gaukara amo ai abia monina ese ai ia durua. California provinsi ese dala ia karaia bena Christine be hospital dekenai ia noho diba, to unuseniai ena gorere ia bada ia lao badina rara ia dadaraia dainai, doketa taudia idia ura lasi ia idia durua. Ai diba lasi dahaka do ai karaia be namo, unai dainai Iehova ai noia ai ia hakaua totona.

Adorahi ta ai haroro gaukara lau karaia noho lalonai, doketa ta ena opesi lau itaia, bona karaharaga lau vareai. Ena be unai doketa be ruma dekenai ia lao gwauraia, to lau ia boiria ena opesi dekenai, bona hora rua lalonai ai herevahereva. Bena ia gwau: “Misinari gaukara umui karaia dainai umui lau laloa bada, bona emu adavana do lau durua davana lasi bona rara do lau henia lasi.” Lau hoa dikadika ena hereva dainai.

Unai hebogahisi doketa, idia matauraia doketa namona, be Christine ia siaia lao ia gaukara hospital dekenai, bona ia naria lalonai, Christine ena gorere ia namo ia lao. Iehova ai tanikiu henia bada badina unai hekwakwanai negana lalonai ai dekenai dala ia hahedinaraia!

Gaukara Matamatadia

Christine ena tauanina ia goada lou neganai, painia gaukara ai karaia bona ai moale bada badina Long Beach dekenai taunimanima haida ai durua diba, Iehova tomadiho henia taudia ai idia lao totona. Lagani 1982 dekenai ai idia noia United States dekenai sekit gaukara ai karaia totona. Dina ibounai Iehova ai tanikiu henia badina ai ia gaukaralaia lou loaloa gaukarana ai karaia totona​—⁠unai be ai ura henia bada hesiai gaukarana. California dekenai ai gaukara bona gabeai New England dekenai, unai sekit lalonai be Portuguese gado idia herevalaia kongregesen haida idia noho danu. Gabeai Bermuda be unai sekit lalonai danu.

Lagani namodia hani murinai, gaukara ma ta ai abia. Ai idia boiria spesel painia gaukara do ai karaia ai ura henia gabuna dekenai. Ena be loaloa gaukara ai rakatania dainai ai lalohisihisi, to emai lalona ai hadaia inai gaukara matamata do ai karaia mai goada ida. To edena gabu dekenai? Loaloa gaukara dekenai, lau itaia Portuguese gado kongregesen New Bedford, Massachusetts dekenai, be heduru idia abia be namo​—⁠unai dainai New Bedford dekenai ai lao.

Ai ginidae neganai, kongregesen be ai totona welkam pati badana ta idia karaia. Unai kara dainai ai mamia emai heduru idia ura! Unai dainai mai moale ida ai tai. Tau matamata ta mai ena adavana bona natudia maragidia rua be mai hebogahisi ida ai idia boiria idia ida ai noho ela bona emai noho baguna do ai davaria. Ai laloa diba lasi dalana ai, Iehova ese unuseniai emai spesel painia gaukarana ia hanamoa momokani. Lagani 1986 amo ai ese unai taoni dekenai taunimanima idauidau 40 bamona ai durua Witnes taudia ai idia lao totona. Lauma dalanai idia be emai ruma bese. Danu, lau moale bada badina lau itaia tadikaka ima be lauma dalanai idia tubu bona mamoe naria taudia namodia ai idia lao. Unai be hegeregere huahua ia havaraia misinari gaukara gabuna dekenai hesiai gaukara ai karaia bamona.

Idia vara gaudia ai laloa neganai, ai moale badina emai matamata negana amo Iehova ai hesiai henia bona hereva momokani be emai mauri ena gau badana ai ia lao. Momokani, hari ai buruka bona gorere, to Iehova ena dala dekenai ai gaukara noho amo goada bona moale ai abia noho.

[Picture on page 26]

Rio de Janeiro dekenai ai ginidae neganai

[Picture on page 28]

Emai ruma bese lauma delanai, Bedford, Massachusetts dekenai