Iehova Ena Hahenamo Do Oi Davaria, A?
“Lohiabada, emui Dirava umui kamonai henia neganai, inai hanamoa ibounai do umui davaria.”—DEUTERONOMI 28:2.
1. Dahaka dainai Israela taudia ese hahenamo eiava dika idauidau do idia davaria?
ISRAELA taudia be taunimanima idia noho lasi gabuna dekenai idia loaloa laganidia 40 idia ore gwauraia neganai, Moaba ena taora dekenai edia kamepa idia haginia. Gwauhamata Tanona be edia vairanai ia noho. Unai nega ai, Mose ese Deuteronomi bukana ia torea, ia ese hahenamo bona dika idauidau ia herevalaia. Bema Israela taudia ese Iehova idia “kamonai henia,” hahenamo idauidau do idia “davaria.” Iehova ese idia ia lalokau henia “iena bese korikori” bamona, bona ia ura idia totona ena goada ia hahedinaraia. To bema ia idia kamonai henia lasi, dika idauidau do idia davaria momokani.—Deuteronomi 8:10-14; 26:18; 28:2, 15.
2. Heberu herevadia, Deuteronomi 28:2 ai idia hahanaia “kamonai henia” bona “davaria,” edia anina be dahaka?
2 Heberu herevana, Deuteronomi 28:2 ai idia hahanaia “kamonai henia,” ese kara ta karaia noho lalohadaina ia hahedinaraia. Namo lasi Iehova ena taunimanima ese nega haida sibona ia idia kamonai henia; namona be edia mauri ibounai lalonai ia idia kamonai henia noho. Unai negana sibona ai Dirava ena hahenamo do idia davaria. Heberu herevana idia hahanaia “davaria” ena anina be labana lalonai idia gaukaralaia hereva “lulua bona dogoatao” eiava “abia” hegeregerena.
3. Edena dala ai Iosua bamona ita kara diba, bona dahaka dainai unai be mai anina bada?
3 Israela taudia ia hakaua tauna Iosua ese Iehova kamonai henia dalana ia abia hidi bona unai dainai hahenamo ia davaridia. Iosua ia gwau: “Hari dina do umui abia hidi be namo. Edena dirava ena hesiai gaukara do umui karaia? . . . To lau, bona lauegu famili taudia, ai ese Lohiabada sibona ena hesiai gaukara do ai karaia.” Israela taudia idia haere, idia gwau: “Ai ese Lohiabada do ai rakatania lasi, dirava idauna be do ai tomadiho henia lasi, lasi momokani.” (Iosua 24:15, 16) Iosua ena lalohadai namona dainai, Gwauhamata Tanona dekenai ia vareai diba, iena uru taudia haida sibona ese unai hahenamo idia abia. Hari, ita ese Gwauhamata Tanona hereadaena dekenai ita vareai gwauraia—paradaiso tanobadana lalonai Dirava ena lalo-namo idia abia taudia ibounai be do idia abia hahenamo ese Iosua ena negai idia abia hahenamo idia hereaia. Oi ese unai bamona hahenamo do oi davaridia, a? Do oi davaridia, bema Iehova oi kamonai henia noho. Unai oi karaia totona emu lalona oi hagoadaia diba, bema idaunegai Israela ena sivarai bona edia haheitalai amo diba oi abia Israela taudia ta ta edia sivarai oi laloa.—Roma 15:4.
Hahenamo Eiava Dika?
4. Dirava ese Solomona ena guriguri ia haerelaia neganai, dahaka ia henia, bona unai bamona hahenamo be edena bamona ita laloa be namo?
4 King Solomona ena lohia negana kahirakahira ibounai lalonai, Israela taudia ese Iehova amo hahenamo badadia idia abia. Noho namo bona gau namodia momo idia moalelaia. (1 King Taudia 4:25) Solomona ena kohu be bada herea, ena be Dirava dekena amo unai kohu ia noia lasi. To, ia do matamata bona gau momo ia do diba lasi neganai, ia guriguri kamonai kudouna ia abia totona—Iehova ese unai noinoi ia haerelaia bona Solomona dekenai aonega bona lalo-parara ia henia. Unai dainai Solomona ia hegeregere taunimanima ia hahemaoro henia namonamo totona, bona namo bona dika edia idau ia itaia namonamo. Ena be Dirava ese ia dekenai kohu bada bona hairai ia henia danu, to Solomona ia tau matamata neganai, lauma dalanai ia abia kohu ena namo ia laloa bada. (1 King Taudia 3:9-13) Herevana tauanina dalanai iseda kohu ia bada eiava lasi, to bema Iehova ena hahenamo bona lauma dalanai kohu bada ita abia, namona be ita moale bada!
5. Israela bona Iuda taudia ese Iehova idia kamonai henia noho lasi neganai dahaka ia vara?
5 Israela taudia ese Iehova ena hahenamo idia laloa bada lasi. Ia idia kamonai henia noho lasi dainai, guna ia gwauraia dika idauidau idia davaria. Edia inai taudia ese idia halusidia bona Israela bona Iuda taudia be idia abia mauri. (Deuteronomi 28:36; 2 King Taudia 17:22, 23; 2 Sivarai 36:17-20) Dirava ena taunimanima be unai hisihisi amo idia diba, Iehova idia kamonai henia noho taudia sibona ese Dirava ena hahenamo idia davaria, a? Lagani 537 B.C.E. ai, edia tano dekenai idia giroa Iuda orena taudia ese idia hahedinaraia diba, bema “aonega” idia abia vadaeni bona idia lalo-parara Dirava idia kamonai henia noho be mai anina bada.—Salamo 90:12.
6. (a) Dahaka dainai Iehova ese Hagai bona Sekaraia ia siaia iena taunimanima dekenai idia peroveta totona? (b) Iehova be Hagai amo ia siaia herevana ese dahaka hakaua herevana ia hahedinaraia?
6 Edia tano dekenai idia giroa Iuda taudia ese boubou patana ta idia haginia bona Ierusalema ena dubu idia haginia matamaia. To edia gaukara dainai dagedage bada idia davaria neganai, edia ura ia maragi bona haginia gaukarana idia hadokoa. (Esera 3:1-3, 10; 4:1-4, 23, 24) Danu, idia ese sibona edia mauri hanamoa gaudia idia tahua matamaia. Unai dainai, Dirava ese peroveta taudia Hagai bona Sekaraia ia siaia, tomadiho momokanina dekenai ena taunimanima edia ura idia habadaia totona. Iehova be Hagai amo ia gwau: “Egu bese taudia e, badina dahaka umui be ruma namo herea edia lalonai umui noho, to egu Dubu Helaga be ia do dika noho? . . . Emui mauri dalana do umui laloa. Umui ese uhe momo umui hadoa noho, to anina momo lasi sibona umui haboua noho. Umui aniani noho, to emui bogadia be idia kunu lasi. . . . Bona moni gaukara ia karaia noho tauna ese moni hegeregere lasi ia abia noho.” (Hagai 1:4-6) Tauanina dalanai kohu tahua totona lauma gaudia ia rakatania tauna ese Iehova ena hahenamo ia davaria lasi.—Luka 12:15-21.
7. Dahaka dainai Iehova ese Iuda taudia ia hagoadaia ‘idia vara gaudia edia badina’ do idia laloa?
7 Iuda taudia ese dina ta ta gaudia idia laloa bada neganai idia laloaboio, Dirava ese idia ia hanamoa bona medu bona uma ena anina bada ia henia dalana tamona be dagedage lalonai danu Dirava idia kamonai henia noho. (Hagai 1:9-11) Unai dainai ia maoro idia ia hagoadaia ‘idia vara gaudia edia badina’ do idia laloa! (Hagai 1:7) Anina be Iehova ese idia ia hamaoroa: ‘Umui laloa! Namona be umui itaia, uma dekenai umui hekwarahi kava badina egu tomadiho rumana be ia dika noho.’ Iehova ena peroveta taudia be lauma helaga ena hakaua henunai idia gwauraia herevadia ese kamonai taudia edia kudouna idia hamarerea, idia ese dubu idia haginia matamaia lou, bona lagani 515 B.C.E. ai gaukara idia haorea.
8. Malaki ena negai Iehova ese Iuda taudia ia hagoadaia dahaka idia karaia totona, bona dahaka dainai?
8 Gabeai, peroveta tauna Malaki ena negai, Iuda taudia be lauma dalanai idia manoka lou, Dirava ia abia dae diba lasi boubou gaudia idia henia danu. (Malaki 1:6-8) Unai dainai, Iehova ese idia ia hagoadaia edia kohu ena kahana 10 amo kahana ta be ena dubu dekenai do idia mailaia bona ia do idia tohoa, bena do idia itaia ia ese guba ena uindo do ia kehoa bona idia dekenai hahenamo bada herea do ia henia. (Malaki 3:10) Iuda taudia idia hekwarahi kava gau idauidau idia abia totona be kavakava karana, badina bema Dirava idia kamonai henia noho, ia ese unai gaudia momo herea idia dekenai do ia henia!—2 Sivarai 31:10.
9. Baibel amo edena taudia toi edia mauri sivaraidia do ita tahua?
9 Baibel ese Israela besena ena sivarai sibona lasi, to Iehova idia kamonai henia noho bona idia kamonai henia noho lasi taudia, edia kara hegeregerena Dirava amo hahenamo eiava dika idauidau idia davaria taudia, edia sivarai ia hahedinaraia danu. Unai bamona taudia toi—Boasi, Nabala, bona Hana—amo ita dibaia diba gaudia mani ita itaia. Unai totona, reana oi ura Ruta bukana bona 1 Samuela 1:1–2:21 bona 1 Samuela 25:2-42 oi duahia.
Boasi ese Dirava Ia Kamonai Henia
10. Edena daladia ai Boasi bona Nabala idia hegeregere?
10 Ena be Boasi bona Nabala be nega tamona lalonai idia noho lasi, to dala haida ai idia hegeregere. Unai tatau ruaosi be Iuda tanona dekenai idia noho. Idia ruaosi be tano biagudia mai edia kohu bada, bona idia ruaosi dekenai dala ia kehoa, dabu tauna ta dekenai hebogahisi mai lalokauna idia hahedinaraia totona. To unai daladia sibona dekenai idia hegeregere.
11. Edena dala ai Boasi ese ia hahedinaraia Iehova ia kamonai henia noho?
11 Boasi be Israela ai hahemaoro taudia edia negai ia noho. Ia ese ma haida dekenai hemataurai ia hahedinaraia, bona ena uma anina gogoa taudia ese ia idia laloa bada. (Ruta 2:4) Boasi ese Taravatu ia badinaia dainai, ia hamomokania iena uma ai aniani oredia idia rakatania, hisihisi bona ogogami taudia totona. (Levitiko 19:9, 10) Boasi ese Ruta bona Naomi edia sivarai ia kamonai bona Ruta be ena ravana hahine burukana naria totona ia gaukara goada ia itaia neganai, dahaka ia karaia? Ruta ia hebogahisi henia bona ena gaukara taudia ia hagania Ruta ese ena uma ai aniani oredia ia gogoa karana idia koua lasi. Boasi ena hereva bona ena kara amo ia hahedinaraia ia be lauma gaudia ia laloa bada bona Iehova ia kamonai henia tauna. Unai dainai ia ese Dirava ena lalo-namo bona hahenamo ia abia.—Levitiko 19:18; Ruta 2:5-16.
12, 13. (a) Edena dala ai Boasi ese ia hahedinaraia Iehova ia atoa hoia lou taravatuna ia laloa bada? (b) Boasi ese Dirava amo dahaka hahenamo ia davaridia?
12 Boasi ese Iehova ia kamonai henia noho ia hamomokania gauna badana be sibona ena namo tahua lasi dalanai Dirava ia atoa hoia lou taravatuna ia badinaia. Boasi ese ia karaia diba gaudia ibounai ia karaia, iena varavara—Naomi ena adavana, ia mase vadaeni tauna Elimeleka—ena ahuna be Elimeleka ena bese dekenai ia noho totona. ‘Nakimi adavaia’ taravatuna hegeregerena, ia mase tauna ena vabu ese ena tau ena varavara do ia adavaia, idia dekenai ia vara natuna mero ese unai mase tauna ena ahuna do ia abia totona. (Deuteronomi 25:5-10; Levitiko 25:47-49) Naomi ia buruka bona natuna ia havaraia diba lasi dainai, Ruta ese Naomi ena gabu ia abia bona sibona ia henia. Elimeleka ena varavara ma ta ia ura lasi Naomi ia durua dainai, Boasi ese Ruta ia adavaia. Edia natuna Obeda idia gwauraia Naomi ena natuna, bona taravatu hegeregerena Elimeleka ena ahuna ia abia diba.—Ruta 2:19, 20; 4:1, 6, 9, 13-16.
13 Boasi ese sibona ena namo tahua lasi dalanai Dirava ena taravatu ia badinaia dainai, hahenamo badadia ia davaria. Ia bona Ruta ese edia natuna Obeda amo hahenamo idia abia, badina Iesu Keriso ena tubudia ai idia lao. (Ruta 2:12; 4:13, 21, 22; Mataio 1:1, 5, 6) Boasi ese sibona ena namo ia tahua lasi karana amo ita diba, ma haida dekenai lalokau idia hahedinaraia bona Dirava ena taravatu idia badinaia taudia ese hahenamo idia davaridia.
Nabala Ia Kamonai Lasi
14. Nabala be edena bamona tauna?
14 Nabala be Boasi amo ia idau, Iehova ia kamonai henia lasi. Ia ese Dirava ena taravatu ia utua, unai taravatu ia gwau: “Emui badibadinai tauna do umui lalokau henia, umui sibona umui lalokau henia hegeregerena.” (Levitiko 19:18) Nabala be lauma gaudia ia laloa bada tauna lasi; ia be “mai ena dagedage, bona kara dika tauna.” Sibona ena hesiai taudia danu, idia gwau “ia dagedage dainai, aiemai hereva ia kamonai lasi.” Ena ladana idia gwauraia Nabala be maoro, badina ena anina be ‘kavakava.’ (1 Samuela 25:3, 17, 25) Vadaeni, Nabala ese dabu tauna—Iehova ese ia horoa tauna Davida—dekenai kara namo ia karaia totona dala ia kehoa neganai, dahaka ia karaia?—1 Samuela 16:13.
15. Edena dala ai Nabala ese Davida ia kara henia, bona Abigaila ena kara be ena adavana ena kara amo edena bamona ia idau?
15 Davida bona ena tatau be Nabala ena mamoe serina kahirakahira dekenai edia kamepa idia atoa neganai, raskol oreadia amo iena mamoe bona mamoe idia naria taudia idia gimaia, davana lasi. Nabala ena mamoe naria tauna ta ia gwau: “Idia be magu bamona ai dekenai. Dina bona hanuaboi dekenai idia ese ai idia naria bona gimaia.” To, Davida ese ia siaia taudia be aniani haida totona idia noinoi neganai, “Nabala ese idia dekenai ia hereva dika henia,” bona ia siaidia lao imana kavakava. (1 Samuela 25:2-16) Karaharaga Nabala ena adavana, Abigaila, ese Davida dekenai aniani gaudia ia abia lao. Davida ia badu dikadika dainai, Nabala bona ena tatau ia alaia ore gwauraia. To Abigaila ese ena kara dainai momo ia hamauria bona rara bubua kererena be Davida latanai ia noho lasi. To Nabala ena mataganigani bona kara auka be bada herea dainai, dina 10 bamona murinai, “Lohiabada ese Nabala ia alaia, ia mase.”—1 Samuela 25:18-38.
16. Edena dala ai Boasi ena kara ita tohotohoa diba bona Nabala ena kara ita dadaraia?
16 Boasi bona Nabala edia kara idia idau momokani! Namona be Nabala ena kara auka bona sibona ena namo tahua karana ita dadaraia, to Boasi ena kara namo bona sibona ena namo tahua lasi karana ita tohotohoa be namo. (Heberu 13:16) Unai ita karaia diba bema aposetolo Paulo ena sisiba ita badinaia, ia gwau: “Dala ita davaria neganai, taunimanima ibounai dekenai kara namodia do ita karaia. To Keriso ena abidadama henia taudia do ita durua bada herea be namo.” (Galatia 6:10) Hari, Iesu ena “mamoe idaudia” taudia, tanobada helarona idia abia Keristani taudia, be mai edia dala Iehova ena horoa taudia, guba dekenai mase diba lasi maurina do idia abia orena taudia 144,000, dekenai kara namo idia karaia. (Ioane 10:16; 1 Korinto 15:50-53; Apokalupo 14:1, 4) Iesu ese unai bamona lalokau karadia ia laloa hegeregere ia dekenai idia karaia, bona unai kara namodia idia karaia amo Iehova ena hahenamo bada do idia davaria.—Mataio 25:34-40; 1 Ioane 3:18.
Hana Ena Hahetoho Bona Ena Hahenamo
17. Hana ese dahaka hahetoho ia davaridia, bona ena kara be edena bamona?
17 Dirava ia badinaia hahinena Hana ese Iehova ena hahenamo ia davaria danu. Eparaima ena ororo gabudia dekenai ena adavana, Levi tauna Elikana, ida ia noho. Taravatu ese gwaumaoro ia henia bamona, Elikana be mai ena adavana ma ta danu—Penina. Hana be natuna ta lasi, bona Israela hahinena dekenai unai be hemarai gauna, to Penina be mai natudia momo. (1 Samuela 1:1-3; 1 Sivarai 6:16, 33, 34) Penina ese Hana ia hagoadaia lasi, to lalokau lasi dalanai ia kara henia ela bona Hana ia taitai bona ia aniani diba lasi. “Lagani ibounai,” unai ruma bese be Iehova ena dubu Silo dekenai idia lao neganai, unai bamona ia vara. (1 Samuela 1:4-8) Penina ese Hana ia hebogahisi henia lasi, bona Hana dekenai unai be hahetoho badana! To, Hana ese Iehova ia gwauraia dika lasi; bona ena adavana be Silo dekenai ia lao neganai ruma dekenai ia noho lasi. Unai dainai, gabeai hahenamo badana ia davaria.
18. Hana ese dahaka haheitalai ia hahedinaraia?
18 Hari inai negai Iehova ena taunimanima dekenai Hana ena kara be haheitalai namona, bona ma haida edia hereva dainai idia lalohisihisi taudia ese ena kara idia laloa namonamo be namo. Unai bamona ia vara neganai, ta be sibona ia noho be heduru gauna lasi. (Aonega Herevadia 18:1) Unai hahetoho dainai Hana ena ura, Dirava ena Hereva idia hadibaia bona iena taunimanima be tomadiho totona idia hebou gabuna dekenai ia lao urana, ia maragi lasi. Unai dainai lauma dalanai ia goada noho. Iena guriguri namona be 1 Samuela 2:1-10 ai ia noho, bona ia hahedinaraia lauma gaudia ia laloa bada momokani.a
19. Edena dala ai ita hahedinaraia lauma gaudia ita laloa bada?
19 Ita, hari inai negai Iehova ena hesiai taudia, ese palai dubu dekenai ita tomadiho lasi. To, ita hahedinaraia diba lauma gaudia ita laloa bada, Hana ia karaia bamona. Hegeregere, hanaihanai Keristani heboudia bona sekit bona distrik hebouhebou dekenai ita lao karana amo ita hahedinaraia diba lauma dalanai ita abia kohu ita laloa bada. Namona be unai negadiai ita ta ta ita hagoadaia heheni, Iehova dekenai tomadiho momokanina ita henia totona, badina ia ese ita dekenai ia henia hahenamo be “iena hesiai gaukara do ita karaia, bona do ita gari lasi. Mai helaga danu, bona mai maoromaoro danu.”—Luka 1:74, 75; Heberu 10:24, 25.
20, 21. Hana ese Dirava ia badinaia dainai, dahaka hahenamo ia davaria?
20 Iehova ese Hana ena kara, Dirava ia badinaia karana, ia itaia bona hahenamo momo ia henia. Lagani ta ai, unai ruma bese be Silo dekenai ia lao neganai, Hana ia tai, mai momokani ida Dirava ia guriguri henia, bona ia gwauhamata: “Siahu Ibounai Lohiabada e, lau, oiemu hesiai hahine, lauegu hisihisi bada mani do oi itaia, lau do oi laloa, lau do oi laloaboio lasi, to lau dekenai natuna mero do oi henia. Bema lau dekenai oi henia neganai, lau ese oi Lohiabada dekenai do lau henia lou.” (1 Samuela 1:9-11) Dirava ese Hana ena noinoi ia kamonai bona ia hanamoa, Hana ese natuna ia abia bona ena ladana ia gwauraia Samuela. Mero ese rata ia rakatania murinai, Hana ese Silo dekenai ia abia lao, palai dubu dekenai hesiai gaukara ia karaia totona.—1 Samuela 1:20, 24-28.
21 Hana ia hahedinaraia Dirava ia lalokau henia bona Samuela abia totona ia karaia gwauhamata ia hagugurua. Bona Hana bona Elikana edia lalokau natuna mero be palai dubuna ai Iehova ia hesiai henia dainai, idia abia hahenamo mani oi laloa! Keristani tama sina momo ese unai bamona moale bona hahenamo idia davaria danu, badina edia memero bona kekeni ese ful-taim painia gaukara idia karaia, Betele lalonai idia gaukara, eiava dala haida amo Iehova idia hanamoa.
Iehova Oi Kamonai Henia Noho!
22, 23. (a) Bema Iehova ita kamonai henia noho, dahaka ita diba momokani? (b) Hereva gabena ese dahaka do ia herevalaia?
22 Bema Iehova ita kamonai henia noho, dahaka ita diba momokani? Lauma dalanai kohu do ita abia, bema mai iseda goada ibounai ida ita hahedinaraia Dirava ita lalokau henia bona ia dekenai iseda gwauhamata ita hagugurua. Ena be unai dala ita badinaia dainai hahetoho badadia ita davaria, to Iehova ena hahenamo do ita davaria danu—nega momo ita laloa diba lasi dalana ai ia henidia.—Salamo 37:4; Heberu 6:10.
23 Vaira negana ai, Dirava ena taunimanima ese hahenamo momo do idia davaria. ‘Hutuma bada herea’ taudia ese Iehova idia kamonai henia noho dainai, ‘hisihisi badana’ amo do idia roho mauri bona Dirava ena tanobada matamatana lalonai mauri do idia moalelaia. (Apokalupo 7:9-14; 2 Petero 3:13) Unuseniai Iehova ese ena taunimanima edia kara maoromaoro uradia ibounai do ia hagugurua. (Salamo 145:16) To, hereva gabena ese ia hahedinaraia hegeregerena, hari danu, Iehova idia kamonai henia noho taudia ese “gau namodia ibounai, bona harihari gaudia namodia momokani ibounai” idia abia.—Iamesi 1:17.
[Footnote]
a Hana ena hereva be rami-hebou kekenina Maria ena hereva bamona, ia kamonai Mesia ena sinana ai do ia lao neganai ia gwauraia.—Luka 1:46-55.
Oi Laloatao, A?
• Israela ena sivarai amo Dirava ena hahenamo dekenai dahaka ita dibaia diba?
• Edena dala ai Boasi be Nabala amo ia idau?
• Edena dala ai Hana ita tohotohoa diba?
• Dahaka dainai Iehova ita kamonai henia noho be namo?
[Picture on page 10]
King Solomona ia guriguri kamonai kudouna do ia abia totona, bona Iehova ese ia hanamoa bona aonega ia henia
[Picture on page 12]
Boasi ese ma haida dekenai hemataurai bona kara namo ia hahedinaraia
[Picture on page 15]
Hana ese Iehova dekenai ia tabekau dainai, hahenamo badana ia abia