“Emu Laloa Namonamo Karana Dainai, Namona be Dirava ese Oi Ia Hanamoa!”

ATAI ia noho hanamoa herevana be Davida ese hahine ta dekenai ia gwauraia. Iena ladana be Abigaila. Dahaka dainai Davida ese Abigaila ia hanamoa, bona ena kara amo dahaka ita dibaia?

Davida be King Saulo amo ia heau neganai, unai headava hahinena ia hedavari henia. Abigaila ena adavana be Nabala, ia be kohu momo tauna bona iena mamoe serina be Iuda ena saut kahanai ia noho ororo dekenai idia naria. Gabeai Davida ese Nabala dekenai gwaukau taudia ia siaia, bona Nabala idia noia ‘ia dekenai ia noho gauna,’ hegeregere aniani, be idia dekenai do ia henia. (1 Sam. 25:8, 15, 16) Davida ese aniani ia noia be maoro, badina ia bona ena tatau ese Nabala ena kohu idia gimaia.

Nabala ena ladana ena anina be “kavakava,” bona ia be unai hegeregerena ia kara. Ia be mai badu ida ia hereva bona Davida ia noia gauna ia henia lasi. Nabala ia laloa maoromaoro lasi bona ia hereva dainai, Davida ia ura Nabala ia panisia. Oibe, Nabala ena kavakava karana dainai ia bona ena ruma bese be panisi do idia abia.​—⁠1 Sam. 25:2-13, 21, 22.

Abigaila be Davida ia ura karaia gauna ena sivarai ia kamonai neganai, ia be mai gari lasi ida Davida dekenai ia lao. Mai hemataurai ida Davida ia noia iena hetura karana Iehova ida do ia laloa. Bona Davida, king dagina do ia abia tauna, bona ena tatau dekenai aniani haida ia henia. Gabeai, Davida ia abia dae Iehova ese Abigaila ia gaukaralaia ia koua totona, unai amo ia be Dirava vairanai do ia kerere lasi. Davida be Abigaila dekenai ia gwau: “Emu laloa namonamo karana dainai, namona be Dirava ese oi ia hanamoa! Bona hari dina oi ese lau oi koua dainai, rara dekenai lau kerere lasi.”​—⁠1 Sam. 25:18, 19, 23-35, NWT.

Momokani, ita ura lasi Nabala hegeregerena ita kara, ia be ma haida ese ia totona idia karaia kara namodia ia laloa bada lasi. Ma danu, bema ita itaia ta be kara kererena ia ura karaia, namona be dala maorona ita tahua ia ita koua totona. Oibe, salamo torea tauna ese Dirava dekenai ia gwauraia herevana hegeregerena, do ita gwau: “Aonega bona lalona kehoa be lau dekenai do oi hadibaia.”​—⁠Sal. 119:66.

Ita karaia karana amo ma haida ese iseda aonega bona laloa namonamo karana do idia itaia. Herevana ita dekenai unai do idia gwauraia lasi, to Davida hegeregerena do idia gwau: “Emu laloa namonamo karana dainai, namona be Dirava ese oi ia hanamoa!