Dahaka be mai Anina Bada?

Mai anina bada gauna ta ita abia neganai ita moale bada diba. To, unai be dahaka? Moni momo, a? Davana bada herahera gaudia mai hairai, a? Ladana bada bona dagi, a? Taunimanima momo ese unai gaudia idia laloa bada. Unai gaudia ese iseda mauri idia durua, mauri dekenai anina namona idia havaraia, eiava ladana bada ita abia bona ita kwalimu urana idia hagugurua diba. Unai gaudia ita abia totona ita hekwarahi, badina ita laloa unai gaudia ita abia neganai vaira negana totona ita tahua gaudia bona laloa gaudia idia henia, a?

NEGA momo, taunimanima idia laloa gau ta be mai anina bada, badina ia ese edia dabu gaudia eiava edia ura gaudia ia henia. Ita ese gau ta ita laloa bada, bema eda lalona ia hanamoa bona vaira negana namona ia gwauhamatalaia. Reana ita laloa gau haida be mai anina bada, badina heduru idia henia haraga, ita idia hagoadaia, eiava idia dainai ma haida edia lalo-namo ita abia. To, iseda ura gaudia bona lalona veria gaudia be dina ta ta ai idia idauidau dainai, idia hegeregerena ita laloa gau ta be mai anina bada be laloa namonamo karana lasi bona ia noho daudau namo ia havaraia lasi. Gau ta be mai anina bada, bema ita laloa unai gauna ita abia lasi neganai do ita hegeregere lasi.

Unai gauna be dahaka? Gau iboudiai be anina lasi, bema gau badana ta​​—⁠mauri​​—⁠be lasi. Bema mauri be lasi, do ita noho lasi. Idaunegai Israela ena King Solomona ia gwau: “Mase taudia be gau ta idia diba lasi. . . . Badina be mase taudia edia gabu, oi lao gabuna, dekenai be kara ta lasi, laloa ta lasi, diba bona aonega ta lasi.” (Hadibaia Tauna 9:​5, 10) Bema ita mase, ita abia gaudia ibounai do ita haboioa. Unai dainai, ita do ia hamauria gauna ta ita abia be gau badana. Dahaka ese unai do ia karaia?

Dahaka ese Ita do Ia Hamauria?

King Solomona ia gwau: “Moni ese oi ia gimaia noho diba.” (Hadibaia Tauna 7:12) Bema moni be hegeregere, ita ese aniani bona ruma namona ta ita hoia diba. Reana moni dainai gabu daudaudia dekenai do ita loaloa mai moale bada ida. Bema ita buruka o ita gorere dainai moni gaukara ita rakatania, moni amo eda dabu gaudia ita hoia diba. Moni ita abia ena namo be momo. To, moni ese ita ia hamauria lasi. Aposetolo Paulo ese Timoteo ia hagoadaia, ia gwau: “Inai tanobada mauri ena kohu momo taudia do oi hamaoroa, do idia hekokoroku lasi. Bona idia do oi hamaoroa danu inai tanobada ena kohu do idia abidadama henia lasi, to Dirava sibona do idia abidadama henia.” (1 Timoteo 6:17) Tanobada ena moni ibounai ese ita totona mauri ia hoia diba lasi.

Tau ta ladana Hitoshi ena sivarai mani oi laloa. Hitoshi ia tubu neganai ia ogogami, unai dainai ia ura bada taga tauna ai do ia lao. Ia ese moni ena siahu ia abidadama henia bada dainai, ia laloa taunimanima danu be moni amo ia veria diba. Bena tau ta be Hitoshi ena iduara dekenai ia mai bona ia nanadaia bema ia diba Iesu Keriso be ia totona ia mase. Unai henanadai ese Hitoshi ena lalona ia veria badina ia laloa taunimanima ta be ia bamona tauna totona do ia mase lasi. Ia ese Baibel idia herevalaia herevana ta kamonai totona ia lao bona ia hoa bada, badina inai hagoadaia herevana, “oiemu matana ia namo” noho, ia kamonai. Hereva henia tauna ia gwau, ia “namo” matana ese vaira negana ai do idia vara gaudia ia itaia diba bona lauma gaudia ia itaia namonamo. (Luka 11:34) Hari Hitoshi be moni totona ia hekwarahi lasi, to ena mauri lalonai lauma gaudia ia tahua guna matamaia.

Kohu bada ese ita ia durua bona hanamoa diba danu. Kohu momo dainai, dina ta ta lalonai ita lalo-hekwarahilaia gaudia be momo lasi. Gabu namona ta ai ruma namona ta ita haginia dainai reana moale ita davaria diba. Dabua mai edia sitaelo bona motuka namona ta ita abia dainai, ma haida ese ita idia laloa bada diba.

“Iseda gaukara ena anina ita moalelaia” be namo. (Hadibaia Tauna 3:13) Bona kohu momo dainai iseda lalokau taudia ita durua ‘do idia laga-ani, do idia aniani, do idia inuinu, bona do idia moale.’ To, kohu edia namo idia noho daudau lasi. Iesu Keriso ese mataganigani karana ia sisibalaia neganai, ia gwau: “Taunimanima edia mauri badina be kohu momo dekena amo lasi, lasi momokani.” (Luka 12:​15-21) Kohu, herevana ia momo eiava mai davana bada, to ia amo mauri ita abia diba lasi.

Hegeregere, Liz ena adavana be moni momo tauna. Ia gwau: “Ruma mai ena hairai bona motuka rua ai abia, bona emai moni momo dainai tanobada ai idia noho gaudia idauidau ai moalelaia diba . . . To, moni dainai lau do laloa momo.” Ia gwau: “Moni bada ai halusia diba. Toana be kohu momo oi abia neganai, do oi noho namo diba lasi.”

Momo idia laloa ladana bada bona dagi be mai anina bada, badina unai gaudia dainai ladana bada bona hemataurai idia abia. Inai tanobada dekenai gaukara ta karaia namonamo karana be kwalimu ena toana, to mama ia havaraia. Reana iseda diba ita habadaia dainai ladana bada do ita abia. Ma haida ese ita idia hanamoa, eda lalohadai do idia laloa bada, bona ita lalo-namo henidia totona do idia hekwarahi. Unai ibounai ese moale bona hemami namona ia havaraia diba. To, gabeai unai ibounai idia boio. Solomona be king ena hairai bona siahu ibounai ia abia, to ia gwau: “Aonega tauna bona kavakava tauna ruaosi, be taunimanima ese idia do idia laloatao daudau lasi. . . . Idia ibounai be taunimanima ese do idia laloaboio momokani.” (Hadibaia Tauna 2:16) Ladana bada bona dagi ese ita idia hamauria lasi.

Laulau koroa tauna ladana Celo ese ladana bada ena anina ia hereaia gauna ta ia davaria. Ena diba dainai, ena diba ia habadaia sikuli dekenai ia vareai diba. Gabeai, iena gaukara be nius halasia oreadia bona laulau koroa gaudia idia laloa namonamo taudia ese idia hanamoa. Ia koroa laulaudia momo herea be Europe ena siti badadia dekenai idia hahedinaraia. Celo ia gwau: “Lau gwau diba nega ta lalonai laulau koroa gaukarana be gau bada hereana lau dekenai. To, gabeai lau lalo-parara, egu gaukara lau habadaia noho ena anina be biaguna rua edia hesiai gaukara lau karaia toho. (Mataio 6:24) Lau abia dae Dirava ena Basileia ena sivarai namona do lau harorolaia be lau karaia diba gaukara badana. Unai dainai egu lalona lau hadaia, laulau koroa gaukarana do lau hadokoa.”

Dahaka be mai Anina Bada Momokani?

Gau ta be anina lasi bema mauri be lasi, unai dainai ita mauri noho totona dahaka ita abia be namo? Mauri ibounai be Iehova Dirava amo ia mai. (Salamo 36:⁠9) Momokani, “ia dainai ita mauri, ita marere bona ita noho.” (Kara 17:28) Ia lalokau henia taudia dekenai mauri hanaihanai be harihari gauna ta bamona ia henia. (Roma 6:23) Unai harihari gauna ita abia totona dahaka ita karaia be namo?

Bema ita ura inai harihari gauna, mauri hanaihanai, ita abia, namona be Iehova ida eda hetura karana ia namo momokani. Unai dainai, Iena lalo-namo be mai anina bada momokani, ma gau ta be unai bamona lasi. Unai gauna ita abia neganai, moale korikori do ita abia diba ela bona hanaihanai. To, bema Iehova ena lalo-namo ita abia lasi, do ita mase momokani. Unai dainai ia hedinarai goevagoeva, bema gau ta ese ita ia durua iseda hetura karana Iehova ida ia namo totona, unai gauna be mai anina bada herea.

Ita Karaia be Namo Gauna

Ita kwalimu totona diba ita abia be namo. Diba maoromaoro ita abia gabuna badana be Iehova ena Hereva, Baibel. Ia sibona ese ita ia hamaoroa Dirava ita hamoalea totona dahaka ita karaia be namo. Unai dainai, Baibel ita stadilaia namonamo be gau badana. Bema ita hekwarahi Iehova Dirava bona Iesu Keriso ita diba totona, “mauri hanaihanai” do ita abia. (Ioane 17:⁠3) Unai diba be dava bada gauna bona ita haboioa lasi be namo.​—⁠Aonega Herevadia 2:​1-5.

Dirava ena Hereva amo ita abia dibana ese ita ia durua ma kara ta ita karaia totona​​—⁠Iesu Keriso ita abidadama henia totona. Iehova ena oda herevana be, ia dekenai idia lao taudia ibounai edia dala be Iesu. (Ioane 14:⁠6) Momokani, “hamauria be Iesu sibona ese ia henia diba.” (Kara 4:12) Hahemauri abia dalana be ‘siliva o golo lasi,’ to “Keriso ena rarana.” (1 Petero 1:​18, 19) Namona be abidadama ita hahedinaraia totona Iesu ena hahediba herevadia ita abia dae bona ena haheitalai ita tohotohoa. (Heberu 12:​1-3; 1 Petero 2:21) Bona iena boubou gauna be mai anina bada! Ia havaraia namo be taunimanima ibounai edia vaira negana ena badina. Unai namo ibounai ita abia neganai, ita ese mai anina bada harihari gauna, mauri hanaihanai, ita abia unai.​—⁠Ioane 3:⁠16.

Iesu ia gwau: “Lohiabada oiemu Dirava dekenai do oi lalokau henia mai emu lalona ibounai, mai emu lauma ibounai, mai emu kudouna ibounai.” (Mataio 22:37) Iehova ita lalokau henia ena anina be “ena taravatu do ita badinaia.” (1 Ioane 5:⁠3) Iena taravatu ia gwau namona be inai tanobada amo do ita gini siri noho, kara maoromaoro do ita badinaia, bona iena Basileia ita badinaia momokani. Unai dala amo ita ese mase ita abia hidi lasi, to ‘mauri ita abia hidi.’ (Deuteronomi 30:19) Bema ‘Dirava dekenai ita raka kahirakahira lao, vadaeni ia be ita dekenai do ia raka kahirakahira mai.’​​—⁠Iamesi 4:⁠8.

Dirava ena lalo-namo ita abia ese tanobada ena dava bada gaudia ibounai ia hanaia momokani. Tanobada ai Dirava ena lalo-namo idia abia taudia be taga taudia korikoridia! Unai dainai namona be ita hekwarahi mai anina bada gauna​​—⁠Iehova ena lalo-namo​​—⁠ita abia totona. Momokani, namona be aposetolo Paulo ena hagoadaia herevana ita badinaia momokani, ia gwau: “Kara maoromaoro, Dirava badinaia kara, abidadama, lalokau, haheauka, laloa manau, inai gaudia do oi tahua be namo. . . . Vadaeni, mai oiemu goada ibounai danu abidadama ena heau helulu do oi heaulaia, bona kwalimu ahuna, mauri hanaihanai do oi davaria.”​—⁠1 Timoteo 6:​11, 12.

[Pictures on page 21]

Oi dekenai dahaka be mai anina bada? Moni, kohu, ladana bada eiava ma gau ta?

[Picture on page 23]

Namona be Baibel ita stadilaia namonamo