Abidadama Momokanina Oi Abia Diba

Sarah Jayne ena mauri lagani be 19 neganai, ia idia hadibaia kensa gorerena ia abia. Opereisen murinai, iena mamina ia namo bona ia laloa vaira negana do ia namo. Oibe, ia laloa ia namo momokani dainai, ena mauri lagani be 20 neganai, ia maoheni bona ena headava totona palani ia karaia matamaia. Unai lagani lalonai, kensa gorerena ia vara lou, bona ia idia hadibaia pura haida sibona do ia mauri noho. Sarah Jayne be June 2000 ai, ena mauri lagani be do 21 lasi neganai, ia mase.

HOSPITAL ai Sarah Jayne idia vadivadi henia taudia idia laloa bada gauna be ena lalohadai namona vaira negana dekenai, bona ena abidadama goadana Dirava bona ena Hereva, Baibel, dekenai. Ena be dika bada ia davaria, to iena toreisi lou helarona ia goada​—⁠ia diba momokani ena turadia ibounai do ia itaia lou. (Ioane 5:​28, 29) Ia gwau: “Dirava ena tanobada matamatana lalonai umui ibounai do lau itaia.”

Haida idia laloa unai bamona abidadama be sibona koia karana. Ludovic Kennedy ia henanadai: “Mauri gabena be idia gari taudia idia abia dae lalohadaina sibona, idia laloa kibi regena ginigabena ai idia totona keke bona bia idia noho, reana caviar idia abia bona idia dainai kibi idia hiriria danu, idia laloa Eden bamona gabu namona ta dekenai guna idia mase taudia bona reana gabeai do idia mai taudia ida moale negana do idia abia, ani?” Unai henanadai dainai, ma henanadai ta ita gwauraia be namo. Edena lalohadai ita abia dae be haraga​—⁠Kennedy ena lalohadai, ia gwau “inai mauri sibona ita abia, unai dainai ita gaukaralaia namonamo,” eiava Dirava ena gwauhamata toreisi lou dekenai? Sarah Jayne ese toreisi lou ia abidadama henia. Edena dala ai unai bamona abidadama ia abia?

‘Dirava Oi Tahua Neganai Do Oi Davaria’

Ta oi abidadama henia totona, namona be ia oi diba bona ena laloa dalana bona kara oi dibaia. Unai ia vara totona kudouna bona lalona be mai anina bada. Abidadama momokanina Dirava dekenai ita abia be unai bamona. Namona be ia do oi diba, iena kara bona ena hemami oi dibaia, namona be oi diba ia gwauraia bona ia karaia gaudia amo ia hahedinaraia vadaeni ena gwauhamata do ia hagugurua momokani.​—⁠Salamo 9:10; 145:​1-21.

Haida idia laloa unai ita karaia diba lasi. Idia gwau, bema Dirava be momokani ia noho, ita amo ia be daudau herea, ia ita lalo-pararalaia diba lasi. Baibel daradaralaia tauna ia henanadai, “Bema Sarah Jayne bamona Keristani taudia ese idia abia dae Diravana be momokani ia noho, dahaka dainai ita ibounai dekenai ia sibona ia hahedinaraia lasi?” To momokani Dirava be daudau ia noho bona ia ita lalo-pararalaia diba lasi, a? Aposetolo Paulo ese Atena dekenai aonega bona diba bada taudia ia hereva henia, ia gwau “tanobada bona ena lalonai noho gaudia ibounai ia karaia Diravana” ese gau iboudiai ia henia, taunimanima be ia “idia tahua . . . neganai do idia davaria” diba totona. Momokani, Paulo ia gwau: “Dirava be daudau lasi ita ta ta dekenai.”​—⁠Kara 17:​24-27.

To, edena dala ai ‘Dirava oi tahua neganai do oi davaria’ diba? Haida be unai idia karaia totona guba bona tanobada ai idia noho gaudia idia tahua. Momo ese unai gaudia sibona dainai idia abia dae diba, Havaraia Tauna be momokani ia noho.a (Salamo 19:1; Isaia 40:26; Kara 14:​16, 17) Aposetolo Paulo bamona idia laloa, “Dirava ese tanobada ia karaia negana ia mai bona harihari, taunimanima idia kamonai diba Dirava ena siahu be ia doko diba lasi, bona danu idia diba ia sibona be Dirava momokani. Inai bamona idia diba, badina be edia matana dekenai Dirava ese ia karaia gaudia ibounai idia itaia vadaeni.”​—⁠Roma 1:20; Salamo 104:⁠24.

Baibel Oi Abia be Gau Badana

To, Havaraia Tauna dekenai abidadama momokanina oi abia totona ia henia gauna ma ta oi abia be gau badana danu. Unai be dahaka? Ia be Baibel​—⁠Dirava ena lauma amo ia havaraia Herevana, ia lalonai iena ura bona palani ia hahedinaraia. (2 Timoteo 3:​16, 17) To haida do idia gwau: “Naria sisina, taunimanima momo idia gwau Baibel idia badinaia to idia ese kara dikadia idia karaia, unai oi itaia neganai, edena bamona Baibel ena hereva oi abidadama henia diba?” Momokani, Kerisendom lalonai koikoi karadia, dagedage karadia, bona matabodaga karadia momo idia vara. To laloa maoromaoro taudia ibounai be idia itaia diba, ena be Kerisendom taudia idia gwau Baibel ena hakaua herevadia idia badinaia, to unai be hereva koikoi sibona.​—⁠Mataio 15:⁠8.

Baibel ese ia hahedinaraia taunimanima momo do idia gwau Dirava idia tomadiho henia, to, “edia Lohiabada, ia ese idia ia hamauria vadaeni, to idia ese do idia negea.” Aposetolo Petero ia gwau: “Unai bamona idia karaia dainai, haida ese hereva momokani ena dala do idia gwauraia dika.” (2 Petero 2:​1, 2) Iesu Keriso ia gwau unai bamona taudia be “dika karaia taudia” bona idia karaia karadia amo taunimanima ese idia do idia diba. (Mataio 7:​15-23) Kerisendom edia kara dainai Dirava ena Hereva ita dadaraia be hegeregere ita abidadama henia turana namona amo ita abia revarevana ita negea, badina kara dika tauna ta ese ia mailaia.

Bema Dirava ena Hereva ita abia lasi, abidadama momokanina ita abia diba lasi. Baibel sibona amo Iehova ese ena lalohadai ia hahedinaraia. Ia ese hisihisi ia do haorea lasi ena badina bona do ia karaia gauna be Baibel lalonai ia hahedinaraia. (Salamo 119:105; Roma 15:⁠4) Sarah Jayne ese ia abia dae Baibel be lauma helaga amo ia vara Dirava ena Hereva. (1 Tesalonika 2:13; 2 Petero 1:​19-21) Edena bamona? Ena tama sina edia hereva sibona dainai lasi, to badina nega ia atoa, Baibel be Dirava amo ia mai herevana idia hamomokania gaudia ibounai ia tahua totona. (Roma 12:⁠2) Hegeregere, Baibel ena hakaua herevadia idia badinaia taudia edia mauri lalonai idia vara gau namodia ia itaia. Bona buka haida, hegeregere Baibel​—⁠Dirava Ena Hereva Eiava Taunimanima Edia?b bukana, edia heduru ida Baibel ena hereva haida ia tahua, idia hamomokania Baibel be Dirava ena lauma amo ia vara.

‘Abidadama be Sivarai Namona Kamonai amo Ia Vara’

To, Baibel oi abia bona Dirava ena lauma amo ia vara oi abia dae sibona be hegeregere lasi. Aposetolo Paulo ia gwau, ‘abidadama be sivarai namona kamonai karana amo ia vara.’ (Roma 10:17) Baibel oi abia sibona lasi, to Baibel ena hereva oi kamonai karana ese abidadama ia havaraia. Dirava ena Hereva oi duahia bona oi stadilaia karana amo ia oi “kamonai.” Matamata taudia ese unai idia karaia diba danu. Paulo ia gwau Timoteo ia “mero maragi” negana amo ena sinana bona tubuna hahine ese “Buka Helagadia” ia dekenai idia hadibaia. Anina be ena lalona idia doria auka, a? Lasi! Timoteo idia veria eiava idia hakaua kerere lasi. Ia kamonai bona duahia gaudia ese ‘ena lalona idia veria bona idia ia abia dae.’​—⁠2 Timoteo 1:5; 3:​14, 15; NW.

Unai bamona be Sarah Jayne dekenai ia vara danu. Aposetolo edia negai idia noho Berea taudia bamona, ia ese ena tama sina bona hadibaia taudia ma haida amo ‘hereva ia kamonai bona ia ura henia.’ Ita daradara lasi, ia maragi neganai iena tama sina ese ia dekenai idia hadibaia gaudia ia abia dae sibona. Gabeai, ia bada ia lao neganai, ma haida ese ia dekenai idia hadibaia gaudia ia abia dae kava lasi. ‘Dina ibounai Buka Helaga ia tahua, unai hereva ia momokani eiava lasi.’​—⁠Kara 17:⁠11.

Abidadama Momokanina Oi Abia Diba

Oi danu ese abidadama momokanina​—⁠aposetolo Paulo ese Heberu Keristani taudia ia tore henia neganai ia herevalaia abidadama​—⁠oi abia diba. Ia gwau, unai bamona abidadama dainai “ita daradara lasi, to ita diba momokani, Dirava ena davana namona ita naria kava lasi. Matana dekenai ita itaia lasi, to iseda lalona ia diba momokani, inai gauna do ita abia.” (Heberu 11:⁠1) Unai bamona abidadama oi abia neganai, do oi diba momokani oiemu helaro bona oi naria gaudia ibounai, Dirava ia gwauhamatalaia toreisi lou danu, be do idia vara momokani. Do oi diba unai bamona helaro oi ura henia dikadika dainai ia vara lasi, to hamomokania gaudia dainai ia vara. Do oi diba Iehova ese hanaihanai ena gwauhamata ia hagugurua. (Iosua 21:45; 23:14; Isaia 55:​10, 11; Heberu 6:18) Dirava ia gwauhamatalaia tanobada matamatana do oi laloa neganai, mamina oi abia ia vara vadaeni. (2 Petero 3:13) Bona abidadama ena matana amo do oi itaia goevagoeva Iehova Dirava, Iesu Keriso, bona Dirava ena Basileia be lalohadai koikoi lasi to idia be momokani idia noho.

Abidadama momokanina abia totona oi sibona oi gaukara lasi. Iehova ese mai moale ida ena Hereva sibona lasi, to tanobada ibounai Keristani kongregesen ia henia danu, bona unai kongregesen ena gaukara badana be kudou-maoro taudia idia durua Dirava idia abidadama henia totona. (Ioane 17:20; Roma 10:​14, 15) Iehova ese unai orea amo ia henia heduru ibounai oi abia dae be namo. (Kara 8:​30, 31) Bona abidadama be Dirava ena lauma helaga ese ia havaraia dainai, namona be hanaihanai oi guriguri unai lauma ese oi do ia durua, abidadama momokanina oi abia totona.​—⁠Galatia 5:⁠22.

Namo lasi Baibel daradaralaia taudia ese Dirava bona ena Hereva idia abidadama henia taudia idia kirikirilaia karana ese oi ia koua. (1 Korinto 1:​18-21; 2 Petero 3:​3, 4) Bona abidadama momokanina ese oi ia durua bada, unai bamona karadia vairanai oi gini goada totona. (Efeso 6:16) Sarah Jayne ese ia davaria unai be momokani, bona hospital dekenai ia idia vadivadi henia taudia ia hagoadaia hanaihanai, edia abidadama idia hagoadaia totona. Ia gwau: “Hereva momokani umui abia dae momokani. Dirava ena Hereva umui stadilaia. Dirava ena orea kahirakahira umui noho. Hanaihanai umui guriguri. Iehova ena hesiai gaukara umui goadalaia.”​—⁠Iamesi 2:​17, 26.

Hospital ena sista ta ese Sarah Jayne ena abidadama Dirava bona toreisi lou dekenai ia itaia neganai, ia gwau: “Oi ese unai oi abidadama henia momokani, ani.” Sarah Jayne idia nanadaia dahaka dainai ena lalona ia namo ena be hahetoho badadia ia davaria neganai, ia gwau: “Badina Iehova lau abidadama henia. Ia be lauegu turana momokanina, bona lau lalokau henia bada.”

[Footnotes]

[Picture on page 6]

Timoteo be “mero maragi” negana amo iena sinana bona tubuna hahine ese ia dekenai “Buka Helagadia” idia hadibaia

[Picture on page 6]

Berea taudia idia gwauraia namo badina dina ta ta ai Buka Helaga idia stadilaia

[Credit Line]

Lagani 1914 ai idia karaia “Photo-Drama of Creation” amo

[Pictures on page 7]

Baibel ta abia karana lasi, to Baibel ena hereva kamonai bona kamonai henia karana ese abidadama ia havaraia

[Picture on page 7]

“Dirava ena tanobada matamatana lalonai umui ibounai do lau itaia”