Duahia Taudia Edia Henanadai
Heberu 4:9-11 ese ia gwauraia “laga-ani” be dahaka, bona edena dala ai ta be ‘unai laga-ani do ia vareai’?
Aposetolo Paulo be Heberu Keristani taudia ginigunadia dekenai ia gwau: “Dirava ena taudia edia laga-ani be ia do noho. . . . Badina be Dirava ena laga-ani dekenai ia vareai tauna ese iena gaukara dekena amo ia laga-ani noho. Ia laga-ani, Dirava ese iena gaukara dekena amo ia laga-ani bamona. Unai dainai, mai iseda goada ibounai, Dirava ena laga-ani do ita vareai toho.”—Heberu 4:9-11.
Paulo ese Dirava be ena gaukara amo Ia laga-ani ia herevalaia neganai, toana be ia ese Genese 2:2 ena hereva ia laloa, unai siri ia gwau: “Dina namba 7 dekenai, Dirava ia itaia, iena gaukara ibounai be idia ore, vadaeni unai dina namba 7 lalonai ia laga-ani sibona, iena gaukara ia rakatania.” Dahaka dainai Iehova be “dina namba 7 lalonai ia laga-ani”? Ita diba ia karaia “gaukara ibounai” dainai ia hesiku lasi. To, siri gabena ese badina ta ia hahedinaraia, ia gwau: “Dirava ese dina namba 7 ia hanamoa, bona dina helaga ia halaoa, badina be unai dina dekenai Dirava ese iena gau ibounai karaia gaukara ia rakatania, ia laga-ani.”—Genese 2:3; Isaia 40:26, 28.
Idia ore vadaeni dinadia 6 amo “dina namba 7” ia idau, badina Dirava ese unai dina ia hanamoa bona dina helagana ia halaoa, anina be badina ta totona ia atoa siri, eiava ia henia. Unai badina be dahaka? Guna, Dirava ese ena ura taunimanima bona tanobada totona ia hahedinaraia. Dirava be tau bona hahine ginigunadia dekenai ia gwau: “Emui bese do umui havaraia, do umui momo herea. Tanobada ena gabu ibounai dekenai do umui noho, bona unai tano do umui biagua. Davara ena gwarume bona ataiai manudia, bona mauri gaudia, tanobada dekenai idia marere gaudia ibounai do umui biagua.” (Genese 1:28) Ena be Dirava ese taunimanima bona tanobada ia havaraia neganai idia goevadae, to Dirava ena ura hegeregerena tanobada ibounai do idia biagua bona goevadae taudia ese idia hahonua paradaisona ai idia halaoa totona nega idia abia be namo. Unai dainai, “dina namba 7” ai, Dirava ia laga-ani bona nega ia henia, tanobada dekenai ia havaraia vadaeni gaudia be iena ura hegeregerena do idia guguru totona. Unai “dina” ena dokona ai, Dirava ena ura gaudia ibounai do idia guguru momokani. Unai laga-ani ena lata be edena bamona?
Paulo ena hereva Heberu taudia dekenai ita laloa lou neganai, ita itaia ia gwau “Dirava ena taudia edia laga-ani be ia do noho,” bona ena Keristani tadikakadia ia hagoadaia ‘mai edia goada ibounai, unai laga-ani do idia vareai toho.’ Unai ese ia hahedinaraia Paulo ese unai hereva ia torea neganai, Dirava ena laga-ani dinana, lagani 4,000 bamona gunanai ia matamaia “dina namba 7,” be ia do noho. Do ia ore lasi ela bona Dirava ena ura taunimanima bona tanobada totona be Iesu Keriso, “Sabati ena biaguna,” ena Lagani 1000 Lohia Negana ena dokona ai do ia guguru momokani.—Mataio 12:8; Apokalupo 20:1-6; 21:1-4.
Paulo ese unai vaira negana namona ia laloa bona ia hahedinaraia edena dala ai ta be Dirava ena laga-ani lalonai ia vareai diba. Ia gwau: “Dirava ena laga-ani dekenai ia vareai tauna ese iena gaukara dekena amo ia laga-ani noho.” Unai ese ita ia hadibaia, ena be taunimanima edia matamana be goevadae, idia ibounai be Dirava ena laga-ani lalonai idia vareai lasi. Unai ena badina be Adamu bona Heva ese nega daudau Dirava ena ura idia totona idia badinaia lasi bona “dina namba 7” ai iena laga-ani idia hanamoa lasi. To, idia gwau-edeede bona idia ura lasi Dirava idia badinaia. Momokani, Dirava ese mai lalokau ida idia ia hakaua dalana idia dadaraia bona Satani ena ura idia badinaia. (Genese 2:15-17) Unai dainai, paradaiso tanobadana dekenai mauri hanaihanai helarona idia haboioa. Unai nega amo, taunimanima ibounai be kara dika bona mase edia siahu henunai idia noho.—Roma 5:12, 14.
Taunimanima edia gwau-edeede ese Dirava ena ura ia haidaua lasi. Iena laga-ani dinana ia do noho. To, Iehova ese ena lalokau dainai, iena Natuna, Iesu Keriso, amo kara ta ia karaia—mauri davalaia boubouna ia henia—bona abidadama dainai unai boubou idia abia dae taudia ibounai be kara dika bona mase edia siahu amo do ia ruhaia bona laga-ani do idia abia. (Roma 6:23) Unai dainai Paulo ese ena Keristani tadikaka ia hagoadaia ‘edia gaukara amo idia laga-ani’ totona. Namona be Dirava ese hahemauri totona ia karaia gauna idia abia dae, to sibona edia dala ai edia vaira negana ena palani idia karaia lasi, Adamu bona Heva ese idia karaia bamona. Danu, namona be sibona edia maoro idia hamomokania totona idia karaia karadia idia rakatania.
Ta ese Dirava ena ura ia karaia totona sibona ena namo tahua eiava anina lasi karadia ia rakatania karana ese unai tau ia hagoadaia, ia laga-ani bamona. Iesu ese inai boiboi herevana ia gwauraia: “Tauanina manokamanoka bona gaukara metau taudia ibounai, lau dekenai umui mai, lau ese laga-ani do lau henia umui dekenai. Egu huaia auna be emui pagana dekenai do umui atoa, lau dekenai diba do umui tahua, badina lau be dagedage lasi bona manau tauna. Vadaeni emui laumana be do idia laga-ani. Badina be lauegu huaia auna be ia metau lasi, bona huaia neganai danu hekwarahi lasi.”—Mataio 11:28-30.
Paulo ese Dirava ena laga-ani bona ta be ia lalonai ia vareai dalana ia herevalaia karana ese Ierusalema dekenai idia noho Heberu Keristani taudia ia hagoadaia, badina idia be edia abidadama dainai dagedage bona hereva dika momo idia davaria. (Kara 8:1; 12:1-5) Unai hegeregerena, Paulo ena hereva ese hari inai negai Keristani taudia ia hagoadaia diba danu. Ita lalo-parara Dirava ena gwauhamata, iena kara maoromaoro Basileiana ese do ia lohiaia paradaiso tanobadana, be kahirakahira do ia guguru dainai, namona be ita danu be eda gaukara amo ita laga-ani bona ita hekwarahi bada unai laga-ani lalonai ita vareai totona.—Mataio 6:10, 33; 2 Petero 3:13.
[Pictures on page 31]
Dirava ena gwauhamata, tanobada paradaisona, be iena laga-ani dinana ena dokona ai do ia guguru