Moale Tanobadana Do Ia Havaraia Gauna

TIME magasin ia gwau: “Siahu bada herea tauna​—⁠idia hanaia lagani 2000 lalonai sibona lasi to taunimanima edia histori ibounai lalonai​​—⁠be Nasareta tauna Iesu.” Tanobada dekenai ia noho neganai, kudou-maoro taudia tausen momo be iena siahu sibona lasi, to ma haida ia laloa karana idia itaia goevagoeva. Unai dainai, idia ura king ai do idia halaoa be ita hoalaia lasi. (Ioane 6:​10, 14, 15) To, sivarai gunana ese ia gwauraia bamona, Iesu be politikol karadia ia dadaraia.

IESU be badina badadia toi dainai unai bamona ia karaia: iena Tamana ena lalohadai taunimanima be sibona idia ura biagua karana dekenai, taunimanima edia lohia dalana danu; Iesu ia diba herevana taunimanima idia hekwarahi idia lohia namonamo totona, to idia hehuni siahu badadia be idia gaukara goadagoada unai idia hadikaia totona; bona Dirava ena ura be guba gavamani do ia haginia tanobada ibounai ia lohiaia totona. Inai hereva badadia toi ita tahua namonamo neganai, taunimanima idia hegeregere lasi tanobada be gabu namona ta ai do idia halaoa ena badina do ita itaia. Anina namona havaraia dalana do ita itaia danu.

Taunimanima be Sibodia Do Idia Naria Diba, A?

Dirava ese taunimanima ia havaraia neganai, idia dekenai siahu ia henia animal ibounai idia naria totona. (Genese 1:26) To taunimanima be Dirava ena lohia siahu henunai idia noho. Tau bona hahine ginigunadia be mai kamonai ida au ta ena huahua, “kara namo bona kara dika hadibaia au ena huahua,” do idia ania lasi amo idia hamomokania idia be Dirava ena lohia siahu henunai idia noho. (Genese 2:17) Madi, Adamu bona Heva ese edia ura kwalimu idia gaukaralaia kerere bona Dirava idia gwau-edeede henia. Dirava ese ia taravatua au huahua idia abia be henaohenao karana sibona lasi. Ena anina be Dirava ena lohia siahuna idia dadaraia. The New Jerusalem Bible lalonai Genese 2:17 ena futnout ta ia gwau Adamu bona Heva idia ura “idia sibona ese edia kara idia abia hidi, unai amo taunimanima be edia gabu korikori, Dirava ese idia ia havaraia unai, idia dadaraia . . . Kara dika ginigunana be Dirava ena lohia siahuna dadaraia karana.”

Unai gwau-edeede karana badana ia vara dainai, Dirava ese Adamu bona Heva bona edia bese taudia ia rakatanidia idia sibodia edia mauri dalana do idia abia hidi totona, bona idia sibona edia taravatu maoro bona kerere dekenai idia karaia. (Salamo 147:​19, 20; Roma 2:14) Unai neganai, taunimanima sibodia ese edia dala idia abia hidi karana ia matamaia. Idia kwalimu, a? Lagani tausen momo lalonai idia vara gaudia dainai ita gwau diba, lasi! Hadibaia Tauna 8:9 ia gwau: “Taunimanima haida ese ma haida idia biagua noho, bona idia hisihisi henidia noho.” Taunimanima sibodia idia lohiaia ena sivarai dikana ese Ieremia 10:23 ena hereva ia hamomokania, ia gwau: “Lohiabada e, lau diba taunimanima edia mauri dalana, be idia sibona ese idia naria lasi, bona taunimanima ta lasi ese iena mauri ia biagua noho.” Histori ese ia hamomokania taunimanima edia diba be hegeregere lasi edia Havaraia Tauna idia dadaraia bena idia sibona idia lohiaia namonamo totona.

Iesu ese unai hereva ia abia dae. Dirava ena siahu dadaraia karana ia dekenai be gau dika hereana. Ia gwau: “Kara ta danu lau sibona lau karaia lasi” bona “[Dirava ena] ura be nega ibounai lau karaia.” (Ioane 4:34; 8:​28, 29) Unai hegeregerena, Dirava ese gwaumaoro ia henia lasi Iesu be taunimanima amo king siahuna do ia abia, unai dainai unai ia abia dae lasi. To, ita gwau lasi ia ura lasi taunimanima ia durudia. Lasi, ia ese kara idauidau ia karaia taunimanima ia durudia, hari bona vaira neganai moale bada idia davaria totona. Taunimanima totona ena mauri ia henia danu. (Mataio 5:​3-11; 7:​24-27; Ioane 3:16) To Iesu ia diba “idia vara gaudia ibounai be mai edia nega korikori,” Dirava ena lohia siahuna taunimanima biagua totona do ia hahedinaraia negana danu. (Hadibaia Tauna 3:1; Mataio 24:​14, 21, 22, 36-39) To, Eden uma lalonai iseda tamana bona sinana ginigunadia be gaigai amo ia hereva aneru dikana ena ura idia abia dae. Unai gauna dainai Iesu ese politikol karadia ia dadaraia ena badina iharuana mani ita laloa.

Tanobada Ena Lohia Hehunina

Baibel ese ita ia hamaoroa, Satani ese Iesu ia hamaoroa “tanobada edia basileia ibounai mai edia hairaina danu” do ia henia bema ia dekenai tomadiho kara tamona ia karaia. (Mataio 4:​8-10) Anina be Iesu dekenai tanobada lohiaia siahuna ia henia​​—⁠to Satani ena ura hegeregerena. Iesu be unai hedibagani lalonai ia moru lasi. To, unai be hedibagani momokanina, a? Satani ese unai bamona gau bada hereana ia henia diba, a? Oibe, Iesu sibona ese Satani ia gwauraia “tanobada ena lohia,” bona aposetolo Paulo ese ia gwauraia “inai tanobada ena dirava.”​​—⁠Ioane 14:30; 2 Korinto 4:4; Efeso 6:​12.

Momokani, Iesu ia diba Satani be taunimanima edia namo ia laloa lasi. Ia ese Satani ia gwauraia “ala-ala tauna” bona “koikoi bona idia momokani lasi gaudia ibounai edia tamana.” (Ioane 8:​44, The Amplified Bible) Momokani, unai bamona lauma dikana ese ia “gunalaia noho” tanobadana dekenai moale momokani ia noho diba lasi. (1 Ioane 5:19) To Satani ese unai siahu do ia dogoatao hanaihanai lasi. Hari Iesu be lauma goadana ta, bona kahirakahira Satani bona ena lalona veria karadia ibounai do ia kokia momokani.​​—⁠Heberu 2:14; Apokalupo 20:​1-3.

Satani ia diba tanobada ia lohiaia negana be kahirakahira do ia ore. Unai dainai, ia hekwarahi bada herea taunimanima edia laloa dalana do ia hadikaia momokani totona, Noa ena negai abata ia do vara lasi neganai ia karaia bamona. (Genese 6:​1-5; Iuda 6) Apokalupo 12:12 ia gwau: “Tanobada bona davara, madi o, nega dika bada do umui davaria! Badina be Satani ese umui dekenai ia lao vadaeni, mai ena badu dikadika. Ia badu, badina ia diba iena nega be ia kwadogi sibona.” Baibel ena peroveta herevadia bona tanobada dekenai idia vara gaudia ese idia hahedinaraia ita be unai ‘nega kwadogina’ ena dokona ai ita noho. (2 Timoteo 3:​1-5) Heduru be hari ia kahirakahira.

Moale Do Ia Havaraia Gavamanina

Iesu ese politikol karadia ia dadaraia ena badina ihatoina be ia diba gabeai Dirava ese ia makaia negana ai guba gavamanina ta do ia haginia tanobada ia lohiaia totona. Baibel ese unai gavamani ia gwauraia, Dirava ena Basileia, bona unai be Iesu ena hahediba hereva badana. (Luka 4:43; Apokalupo 11:15) Iesu ese ena hahediba taudia ia hadibadia unai Basileia ia mai totona do idia guriguri, badina be unai lohia dalana tamona henunai ‘Dirava ena ura gauna be tanobada dekenai do idia karaia, guba dekenai idia karaia bamona.’ (Mataio 6:​9, 10) Reana oi henanadai, ‘Bema inai Basileia ese tanobada ibounai do ia lohiaia, taunimanima ese idia haginia gavamanidia dekenai dahaka do ia vara?’

Haere be Daniela 2:44 dekenai ita davaria, ia gwau: “Unai basileia namba 4 ena nega [hari inai tanobada dokona ai idia lohia taudia edia nega] lalonai, guba ena Dirava ese basileia ta do ia haginia, inai basileia be do idia hadikaia diba lasi ela bona hanaihanai. Unai basileia be Dirava ese do ia naria, vadaeni bese ta ese do ia halusia diba lasi. Bona unai basileia ese [taunimanima idia haginia] basileia ibounai do ia hamakohia, bona haorea momokani, bona ia sibona do ia noho ela bona hanaihanai.” Dahaka dainai Dirava ena Basileia ese tanobada dekenai lohia daladia ibounai do ia “hamakohia”? Badina idia ese sibona biagua karana, Dirava gwau-edeede henia toana ia hahedinaraia karana unai, idia goadalaia, bona unai kara be Satani ese Eden umana dekenai ia havaraia. Unai kara idia goadalaia taudia be taunimanima edia namo idia laloa bada lasi, bona idia be Havaraia Tauna tuari henia karana ta idia badinaia noho danu. (Salamo 2:​6-12; Apokalupo 16:​14, 16) Unai dainai, namona be sibona ita henanadai, ‘Ita be Dirava ena lohia dalana ita ura henia eiava lasi?’

Daika Ena Lohia Siahuna Do Oi Abia Hidi?

Taunimanima be diba idia abia bena abia hidi maorona lohia dalana dekenai idia karaia totona, Iesu ese ena hahediba taudia dekenai oda ia henidia, nega dokona ia do gini lasi neganai, “Basileia ena Sivarai Namona be tanobada ibounai dekenai do idia harorolaia.” (Mataio 24:14) Hari inai negai, daidia be tanobada ibounai lalonai Dirava ena Basileia idia harorolaia? Iehova ena Witnes taudia. Momokani, inai magasin ena vairana kahana dekenai idia atoa herevana be, “Iehova Ena Basileia Ia Harorolaia.” Hari, Witnes taudia milioni 6 mai kahana be tano 230 mai kahana dekenai, taunimanima idia durua Basileia idia dibaia totona.a

Basileia ese Do Ia Lohiaia Taudia Edia Hahenamo

Iesu be hanaihanai Dirava ena dala ia badinaia. Unai dainai, sibona ena dala ia abia hidi lasi bona politikol dalana amo tanobada ena oromana do ia durua eiava ia hanamoa toho lasi, to ia gaukara goada Dirava ena Basileia, tanobada ena hekwakwanai do ia hanamoa gauna tamona, ena gaukara ia habadaia. Iena badinaia karana dainai guba dekenai terona mai hairaina ia abia, unai Basileia ena King ai ia lao. Dirava ia kamonai henia dainai ahuna namo hereana ia abia!​​—⁠Daniela 7:​13, 14.

Hari inai negai, Iesu idia tohotohoa dainai Basileia idia atoa guna bona Dirava ena ura idia badinaia taudia milioni momo ese harihari gauna namo hereana do idia moalelaia danu​​—⁠tanobada ai Dirava ena Basileia henunai do idia noho. (Mataio 6:33) Ena lalokau lohiana henunai, taunimanima goevadaedia ai do idia lao, bona do idia mauri hanaihanai. (Apokalupo 21:​3, 4) Ioane Ginigunana 2:​17 ia gwau: “Tanobada, mai ena gau dikadia, taunimanima idia ura dikadika gaudia, be kahirakahira do idia ore. To Dirava ena ura ia karaia noho tauna be do ia noho ela bona hanaihanai.” Satani bona ena murinai idia raka taudia do idia haorea bona tanobada ibounai be paradaiso ai do ia lao, bona bese abia isi dainai idia parara karana, kara koikoi bisinesi daladia, bona tomadiho koikoi be lasi, unuseniai moale be do ia noho hanaihanai!​​—⁠Salamo 37:29; 72:⁠16.

Oibe, Dirava ena Basileia sibona ese moale momokani tanobadana do ia havaraia, bona ena sivarai idia gwauraia sivarai namona be maoro momokani. Bema unai sivarai oi do kamonai lasi, Iehova ena Witnes taudia be emu ruma dekenai idia vadivadi neganai, mani unai sivarai namona oi kamonai.

[Footnote]

[Pictures on page 5]

Histori ese ia hamomokania taunimanima ese Dirava idia dadaraia bona sibona idia lohiaia be hegeregere lasi

[Picture on page 5]

Satani ese inai “tanobada” ia lohiaia dainai, ia ese “tanobada edia basileia ibounai” be Iesu dekenai do ia henia diba

[Pictures on page 7]

Iesu ese ita ia hadibaia Dirava ena Basileia henunai, tanobada be gabu namo hereana ta ai do ia lao