“Lohiabada Ena Hanamoa Sibona ese Kohu Momo Oi Dekenai Ia Henia Noho”

ITA ibounai ita ura hahenamo ita abia. Hahenamo ese moale, noho namona, o kohu ia havaraia. Iehova be “harihari gaudia namodia momokani ibounai” ia Henia Tauna dainai, idia noho hanaihanai hahenamo momokani ibounai be iseda lalokau Havaraia Tauna amo idia mai. (Iamesi 1:17) Taunimanima ibounai dekenai hahenamo ia henidia, ia idia diba lasi taudia dekenai danu. Iesu ese ena Tamana ia herevalaia, ia gwau: “Ia ese kara dika taudia bona kara namo taudia edia latanai dina ena diari ia henia noho. Medu danu kara maoro taudia bona kara kerere taudia edia latanai ia siaia diho.” (Mataio 5:45) To, Iehova ese ia idia lalokau henia taudia ia lalodia bada.​—⁠Deuteronomi 28:​1-14; Iobu 1:1; 42:⁠12.

Salamo torea tauna ia gwau: “Tau ta ese kara maoromaoro ia karaia neganai, Lohiabada ese gau namona ta unai tau dekena amo do ia koua lasi.” (Salamo 84:11) Oibe, Iehova idia hesiai henia taudia ese mauri mai anina bada idia abia. Idia diba ‘Lohiabada ena hanamoa ese kohu momo ia henia noho, bona hisihisi sisina ia henia lasi.’ Baibel ia gwau danu: “Lohiabada ese ia hanamoa taudia ese, tano dekenai do idia noho, mai noho namo danu.” (Aonega Herevadia 10:22; Salamo 37:​22, 29) Unai be hahenamo bada hereana!

Edena bamona Iehova ena hahenamo ita abia diba? Gau ta be, ia idia hamoalea kara namodia ita habadaia be namo. (Deuteronomi 30:​16, 19, 20; Mika 6:⁠8) Idaunegai Iehova ena hesiai taudia toi edia haheitalai amo unai ita itaia.

Iehova ese Ena Hesiai Taudia Ia Hanamoa

Noa be Dirava ena hesiai tauna namona ta. Genese 6:8 ai, ita duahia, ia gwau: “Noa dekenai Lohiabada ia moale.” Dahaka dainai? Badina Noa ese Dirava ia kamonai henia. Unai sivarai ia gwau: “Noa be Dirava momokanina ida ia raka.” Noa ese Iehova ena taravatu maorodia ia badinaia bona ena hahegani ia kamonai henidia. Tanobada be dagedage bona kara dikadia amo ia honu neganai, Noa ese “Dirava ena hereva ibounai” ia badinaia. (Genese 6:​9, 22; NW ) Unai dainai, Iehova ese Noa ia hamaoroa “lagatoi badana ia karaia. [ia], mai ena hahine, bona mai edia natudia danu ese lagatoi dekenai idia mauri noho” totona. (Heberu 11:⁠7) Unai dala amo, Noa bona ena ruma bese​—⁠bona idia amo ia vara tanobada bese ibounai​—⁠ese unai uru hadikaia ore karana amo idia roho mauri. Bona Noa be mai ena helaro namona ida ia mase, gabeai do ia toreisi lou bona tanobada paradaisona ai mauri hanaihanai do ia abia. Unai be hahenamo namo hereana!

Aberahamo danu be Iehova hamoalea kara namodia ia karaia. Idia amo abidadama be mai anina bada. (Heberu 11:​8-10) Aberahamo ese ena noho namona Uru dekenai bona gabeai Harana dekenai ia rakatania, badina ia be mai ena abidadama Iehova ena gwauhamata dekenai, ia abia dae momokani ena garana be do idia momo bona idia amo bese ibounai ese namo do idia abia. (Genese 12:​2, 3) Ena be lagani momo lalonai hahetoho ia abia, to ena abidadama dainai ena natuna Isako ia vara neganai hahenamo ia abia. Ia amo, Aberahamo be Dirava ena abia hidi besena, Israela besena, bona gabeai Mesia ena tubuna ai ia lao. (Roma 4:​19-21) Danu, ia be abidadama taudia ibounai edia tamana, bona ia idia gwauraia “Dirava ena turana.” (Roma 4:​11, NW; Iamesi 2:23; Galatia 3:​7, 29) Ena mauri be mai anina, bona hahenamo bada herea ia abia!

Abidadama tauna Mose danu, mani oi laloa. Iena kara namodia amo, lauma gaudia ia laloa bada. Mose ese Aigupito ena kohu bada ia dadaraia bona “ena lalona ia goada noho, ita itaia diba lasi Diravana, be Mose ese matana dekenai ia itaia bamona.” (Heberu 11:27) Midiana ai lagani 40 ia noho murinai, Aigupito dekenai ia giroa neganai ia buruka vadaeni bona Farao, unai nega ena siahu bada tauna, vairanai ia gini bona ena tadikaka ia ruhadia totona ia hereva henia. (Esodo 7:​1-7) Ia ese hisihisi 10, Davara Kakakaka ia parara, bona Farao ena tuari taudia hadikaia ore karana ia itaia. Iehova ese ia gaukaralaia ena Taravatu be Israela taudia dekenai ia henia totona bona Iena gwauhamata unai bese matamatana ida be Mose amo ia karaia. Lagani 40 bamona ai, Mose ese Israela besena be tano gagaena dekenai ia hakaua. Ena mauri be mai anina, bona Dirava ia hesiai henia gaukara namodia momo ia moalelaia.

Hari Inai Negai Ita Abia Hahenamodia

Unai sivarai ese idia hahedinaraia, Dirava idia hesiai henia taudia edia mauri be momokani mai ena anina. Iehova ena taunimanima ese kamonai karana, abidadama, bona lauma gaudia laloa bada karana idia hahedinaraia neganai, hahenamo bada idia abia.

Edena bamona hahenamo ita abia? Kerisendom taudia milioni momo be lauma dalanai idia hitolo bada dainai idia hisihisi noho neganai, ‘Dirava ena hanamoa dainai, iseda vairana idia diaridiari.’ (Ieremia 31:12) Iehova ese Iesu Keriso bona “hesiai tauna mai ena kamonai, bona mai ena kara maoromaoro amo,” lauma aniani momo herea ia henia bona ita ia durua, “mauri gabuna ia lao dalana” dekenai ita raka noho totona. (Mataio 7:​13, 14; 24:45; Ioane 17:⁠3) Iseda Keristani tadikaka oreana ida ita hebamo karana be hahenamo badana ma ta. Hebou ai bona nega idauidau ma haida ai, iseda tomadiho tamona tadikaka, lalokau idia hahedinaraia bona “mauri matamata” idia atoa totona idia hekwarahi tadikakadia, ita bamodia be moale bada abia dalana. (Kolose 3:​8-10; Salamo 133:⁠1) To, iseda hetura karana namona Iehova Dirava ida bona ena Natuna, Iesu Keriso, ena aena gabuna ita badinaia diba be iseda hahenamo hereadaena.​—⁠Roma 5:​1, 8; Filipi 3:⁠8.

Unai bamona hahenamodia ita laloa neganai, ita lalo-parara Dirava ita hesiai henia be dava bada gauna. Reana Iesu ena parabole, dava bada nadidia ia tahua loaloa hoihoi tauna ta ena parabolena, ita laloa. Iesu ese unai tau ia herevalaia, ia gwau: “Nadi namo herea ta ia davaria, vadaeni ia lao, iena gau ibounai ia hoia lao, unai nadi namo herea ia hoia.” (Mataio 13:46) Momokani ita ese iseda hetura karana Dirava ida, ia ita hesiai henia ena hahenamo, iseda Keristani hebamo, iseda Keristani helaro, bona iseda abidadama amo ita abia hahenamo iboudiai ma haida ita laloa neganai, iseda hemami be unai bamona danu. Unai be dava bada gaudia iseda mauri lalonai.

Iehova Dekenai Oi Henia Lou

Ita diba Iehova be harihari gaudia namodia ibounai ia Henia Tauna, bona unai ese iseda kudouna ia veria, ita abia hahenamodia dainai ia do ita tanikiu henia totona. Edena bamona unai ita karaia diba? Dala ta be, ma haida danu be unai hahenamo idia moalelaia totona idia ita durua. (Mataio 28:19) Tano 230 bona ma haida lalonai, Iehova ena Witnes taudia be idia bisi bada, badina edia dekena taudia idia durua unai bamona idia karaia totona. Unai bamona idia karaia neganai, sibodia edia gaudia​—⁠nega, goada, bona kohu​—⁠idia gaukaralaia, ma haida ese “hereva momokani do idia diba” totona.​—⁠1 Timoteo 2:⁠4.

Mani Glendale, California, U.S.A. dekenai idia noho painia taudia ita laloa. Saturday daba ibounai, kilomita 100 bamona idia lao dibura rumana ta idia vadivadi henia totona. Ena be dibura taudia idia vadivadi henia negadia ta ta lalonai hora haida sibona idia gaukaralaia diba, idia lalo-manoka lasi. Idia ta ia gwau: “Inai teritori idauna dekenai hesiai gaukara ai karaia be hahenamo badana. Mai emai moale bada ida unai ai karaia noho. Kamonai taudia be momo dainai idia ibounai ai durua be auka. Harihari, taunimanima ima danu ai stadi noho, bona ma hani idia ura Baibel stadi idia abia.”

Taunimanima hamauria gaukarana karaia totona, Keristani hesiai taudia goadadia be mai moale ida davana lasi heduru idia henia. Idia ese Iesu ena lalohadai idia hahedinaraia, ia gwau: “Gau momo umui abia vadaeni, davana lasi. Unai dainai gau momo do umui henia, davana lasi.” (Mataio 10:⁠8) Taunimanima milioni momo tanobada ena gabu ibounai dekenai be unai hegeregerena ma haida durua gaukarana idia karaia noho, bona unai dainai, kudou-maoro taudia momo herea be sivarai namona idia abia dae bona hahediba taudia ai idia lao noho. Idia hanaia lagani ima sibona lalodiai, kahirakahira taunimanima milioni 1.7 ese Iehova dekenai edia mauri idia gwauhamatalaia. Idia hutuma idia lao noho taudia naria totona Baibel, Baibel idia herevalaia bukadia idia karaia, bona Kingdom Hall matamatadia bona hebou gabudia ma haida idia haginia be namo. Unai heduru gaudia totona moni be edeseni amo ia mai? Taunimanima ese idia henia kontribusen monina sibona amo.

Tanobada ena kahana haida dekenai moni be hegeregere lasi dainai, momo idia hekwarahi bada edia ruma bese ena mauri durua gaudia sisina idia abia totona. New Scientist magasin lalonai ia gwau, taunimanima bilioni ta edia ruma bese monina amo 70 pesen be aniani dekenai ia lao. Iseda Keristani tadikaka bona taihu momo be unai bamona. Bema abidadama tamona taudia ese heduru idia henia lasi, do idia hegeregere lasi Keristani bukadia bona Kingdom Hall namodia idia abia.

Momokani, ita gwau lasi unai bamona taudia idia ura haida ese edia maduna idia huaia. Lasi. To heduru idia abia be namo. Mose ese Israela taudia ia hagoadaia edia hahenamo dainai Iehova idia tanikiu henia totona edia kohu be kontribusen bamona do idia henia be namo, bona ia gwau: “Tau ta ta ibounai ese harihari gauna ta Lohiabada dekenai do idia henia, edia goada, edia goada hegeregerena, Lohiabada emui Dirava ese idia dekenai ia henia hegeregerena.” (Deuteronomi 16:17) Unai dainai, Iesu ia itaia vabu hahinena ta be dubu lalonai “moni maragimaragi rua ia udaia” neganai, ena hahediba taudia dekenai unai vabu ia hanamoa. Ia karaia diba gauna ia karaia. (Luka 21:​2, 3) Unai hegeregerena, idia ogogami Keristani taudia be idia karaia diba gaudia idia karaia. Bona bema idia henia gauna ia hegeregere lasi, unai gauna be edia Keristani tadikaka, tauanina dalanai idia ogogami momokani lasi taudia, ese edia kontribusen amo idia karaia diba.​—⁠2 Korinto 8:​13-15.

Unai daladia ai Iehova dekenai ita henia lou neganai, ura maorona dainai ita henia be mai anina bada. (2 Korinto 8:12) Paulo ia gwau: “Umui ta ta, sibona emui laloa, emui laloa hegeregerena do umui henia, mai maumau danu henia lasi, bona oda dainai lasi. Badina be mai moale danu ia henia tauna be Dirava ese ia lalokau henia noho.” (2 Korinto 9:⁠7) Mai kudouna ibounai ida harihari bada ita hahedinaraia karana amo, ita ese hari ia bada ia lao noho tiokratik gaukarana ita durua, bona sibona eda moale ita habadaia.​—⁠Kara 20:⁠35.

Haroro gaukara ita karaia bona kontribusen ita henia karana be Iehova ese ita dekenai ia henia hahenamo dainai ia dekenai ita henia lou diba daladia rua. Bona ita diba Iehova ia ura hari ia idia do diba lasi lalo-momokani taudia momo dekenai ena hahenamo ia henia, be hagoadaia gauna! (2 Petero 3:⁠9) Unai dainai, namona be Dirava ena hesiai gaukara lalonai iseda kohu ita gaukaralaia noho, unai amo kudou-maoro taudia ita davaria bona durudia, kamonai karana, abidadama, bona laloa bada karana idia habadaia totona. Unai dala amo, ita ese moale ita abia badina idia ita durua dainai ‘do idia tohoa bona do idia diba momokani, Lohiabada be namo momokani.’​—⁠Salamo 34:⁠8.

[Box on page 28, 29]

Haida ese Henia Karana Idia Hahedinaraia Daladia

TANOBADA IBOUNAI GAUKARANA DURUA KONTRIBUSEN MONINA

Momo ese edia moni idia atoa hegaegae, maua ta ladana “Tanobada Ibounai Gaukarana Durua Monina​—⁠Mataio 24:14” lalonai do idia udaia totona.

Hua ta ta iboudiai, kongregesen ese unai moni be Iehova ena Witnes taudia edia hedikwota Brooklyn, New York dekenai, eiava ena brens opesi ta dekenai idia siaia. Taunimanima idia ura neganai kontribusen monina be International Bible Students Association of Papua New Guinea Inc., P.O. Box 636, Boroko, NCD 111 dekenai idia siaia diba. Mai dava bada herahera gaudia bona dava bada gaudia ma haida idia henia diba danu. Unai kontribusen gaudia ida revareva kwadogina idia siaia be namo, unai gaudia be harihari gaudia idia hahedinaraia totona.

KONTRIBUSEN MONINA MAI TARAVATUNA

Taunimanima ese moni idia henia diba, trust fund ai do ia noho totona, to bema nega ta henia tauna ia dabu bona ia ura ena moni ia abia lou, do idia henia lou. Bema oi ura ma hereva haida oi diba, namona be ai gwauraia vadaeni adres dekenai revareva oi torea.

PALANILAIA HENIA GAUDIA

Kontribusen monina bona kontribusen monina mai taravatuna sibona lasi, to dala ma haida idia noho tanobada hegegemadai Basileia ena gaukara oi durua totona. Idia haida be inai:

Insurens: Bema ta ese life insurance ia hoia o moni be retirement fund ta ai ia atoa, IBSA ena ladana ia torea diba, bena ia mase neganai eiava ia buruka neganai unai moni do idia abia.

Banika Akaun: Ta ena banika ena taravatu hegeregerena, dala ia karaia diba, ia do mauri lalonai IBSA ese ena moni ia gaukaralaia totona, eiava ia mase neganai IBSA ese do ia abia totona.

Share Monina: Ta ese ena share monina be IBSA dekenai harihari gauna bamona ia henia diba.

Tano Bona Ruma: Bema ta be mai ena ruma o tano, ia hoihoilaia diba gauna, IBSA dekenai ia henia diba harihari gauna bamona, eiava do ia noholaia diba ela bona ia mase bena IBSA ese do ia abia. Bema ta ia ura unai bamona ia karaia, namona be iena tano ena brens opesi ia hadibaia guna.

Will Bona Trust Gaudia: Bema ta ena ura be ia mase neganai IBSA ese ena tano, ruma, kohu, o moni do ia abia, loea dekenai ia lao be namo, will pepana, mase murinai kohu haria gwaumaoro pepana, dekenai ena ura do ia torea totona. Eiava bema ena moni be trust fund ai ia noho, ia ese IBSA ena ladana be trust agreement pepana ai ia torea diba, unai moni do idia abia totona. Tano haida ai, bema ta ese ena trust monina be tomadiho oreana ta dekenai ia henia, takisi moni haida do ia henia lasi.

Bema oi ura ataiai ia noho dala ta dekenai ma diba haida oi abia, namona be IBSA dekenai revareva oi siaia. Adres be International Bible Students Association of Papua New Guinea Inc., P.O. Box 636, Boroko, NCD 111. Telefon: 325 3011.