Iehova Dekenai Harihari Gaudia Ita Henia

BEMA ta be oi dekenai kara namona ta ia karaia, edena dala ai oi hahedinaraia iena kara namona oi laloa bada? Israela taudia edia sivarai mani ita laloa. Guna idia ese Peoro ena dirava Bala idia tomadiho henia bona Iehova be idia dekenai ia badu. To, gabeai Israela taudia be Midiana taudia idia tuari henia neganai, Dirava ese ia durudia dainai, Israela taudia idia kwalimu bona idia abia kohu be tuari taudia 12,000 bona hanua taudia huanai idia haria. Iehova ena hahegani hegeregerena, tuari taudia ese edia kohu ena kahana ta be hahelagaia taudia idia henia bona hanua taudia ese edia kohu ena kahana ta be Levi taudia idia henia.​—⁠Num. 31:​1-5, 25-30.

To, tuari biagudia idia ura harihari gaudia ma haida do idia henia. Mose dekenai idia gwau: “Lohia e, ai ese ai biagua noho tuari taudia ai duahia vadaeni, bona idia ta ia boio lasi.” Unai dainai idia ura Iehova dekenai golo bona dava bada gaudia ma haida idia henia. Idia henia golo ibounai edia metau be kilogram 190 bamona.​—⁠Num. 31:​49-54.

Hari inai negai, taunimanima momo idia ura Iehova idia tanikiu henia badina idia dekenai kara namo ia hahedinaraia. To, Dirava ena hesiai taudia sibona ese unai idia karaia lasi. Hegeregere, basi draiva ta ena sivarai mani ita laloa. Ia be lagani 2009 ai Bologna, Italy dekenai idia karaia intenesenel hebouhebou dekenai idia lao tadikaka taihu edia basi ia taria. Ia be manau tauna bona basi ia taria namonamo dainai, tadikaka taihu ese kadi ta ai edia tanikiu herevana idia torea, bona moni bona Baibel be Dahaka Ia Hadibaia? bukana ta idia henia. Edia harihari gaudia ia abia neganai, ia gwau: “Mai moale ida emui kadi bona buka lau abia dae. To, inai moni do lau henia lou badina lau ura emui gaukara lau durua. Ena be lau be Iehova ena Witnes tauna lasi, to lau ura inai kontribusen lau henia badina lau itaia emui gaukara be mai lalokau ida umui karaia.”

Iehova ese oi dekenai kara namodia ia hahedinaraia dainai, Iehova ena Witnes taudia edia tanobada hegegemadai gaukarana durua totona kontribusen moni oi henia karana amo oi hahedinaraia iena kara namo oi laloa bada. (Mat. 24:14) Henunai ia noho maua ese ia gwauraia dala haida amo kontribusen moni oi henia diba.

[Box on page 20, 21]

HAIDA ESE HENIA KARANA IDIA HAHEDINARAIA DALADIA

TANOBADA IBOUNAI GAUKARANA DURUA KONTRIBUSEN MONINA

Momo ese edia moni idia atoa hegaegae, maua ta ladana “Tanobada Ibounai Gaukarana Durua Monina” lalonai do idia udaia totona.

Hua ta ta iboudiai, kongrigeisen ese unai moni be Iehova ena Witnes taudia edia hedikwota Brooklyn, New York dekenai, eiava ena brens opesi ta dekenai idia siaia. Taunimanima idia ura neganai kontribusen monina be International Bible Students Association of Papua New Guinea Inc., PO Box 636, Boroko, NCD 111 dekenai idia siaia diba. Mai dava bada herahera gaudia bona dava bada gaudia ma haida idia henia diba danu. Unai kontribusen gaudia ida revareva kwadogina idia siaia be namo, unai gaudia be harihari gaudia idia hahedinaraia totona.

KONTRIBUSEN MONINA MAI TARAVATUNA

Taunimanima ese moni idia henia diba, trust fund ai do ia noho totona. To bema nega ta henia tauna ia dabu bona ia ura ena moni ia abia lou, do idia henia lou. Bema oi ura ma hereva haida oi diba, namona be ai gwauraia vadaeni adres dekenai revareva oi torea.

PALANILAIA HENIA GAUDIA

Kontribusen monina bona kontribusen monina mai taravatuna sibona lasi, to dala ma haida idia noho tanobada hegegemadai Basileia ena gaukara oi durua totona. Idia haida be inai:

Insurens: Bema ta ese life insurance ia hoia o moni be retirement fund ta ai ia atoa, IBSA ena ladana ia torea diba, bena ia mase neganai eiava ia buruka neganai unai moni do idia abia.

Banika Akaun: Ta ena banika ena taravatu hegeregerena, dala ia karaia diba, ia do mauri lalonai IBSA ese ena moni ia gaukaralaia totona, eiava ia mase neganai IBSA ese do ia abia totona.

Share Monina: Ta ese ena share monina be IBSA dekenai harihari gauna bamona ia henia diba.

Tano Bona Ruma: Bema ta be mai ena ruma o tano, ia hoihoilaia diba gauna, IBSA dekenai ia henia diba harihari gauna bamona, eiava do ia noholaia diba ela bona ia mase bena IBSA ese do ia abia. Bema ta ia ura unai bamona ia karaia, namona be iena tano ena brens opesi ia hadibaia guna.

Will Bona Trust Gaudia: Bema ta ena ura be ia mase neganai IBSA ese tano, ruma, kohu, o moni do ia abia, loea dekenai ia lao be namo, will pepana, mase murinai kohu haria gwaumaoro pepana, dekenai ena ura do ia torea totona. Eiava bema ena moni be trust fund ai ia noho, ia ese IBSA ena ladana be trust agreement pepana ai ia torea diba, unai moni do idia abia totona.

Bema oi ura ataiai ia noho dala ta dekenai ma diba haida oi abia, namona be IBSA dekenai revareva oi siaia. Adres be International Bible Students Association of Papua New Guinea Inc., PO Box 636, Boroko, NCD 111. Telefon 325 3011.