Duahia Taudia Edia Henanadai

Iehova ese Aberahamo ida ena gwauhamata be Uru dekenai ia karaia eiava Harana dekenai ia karaia?

Iehova ese Aberahamo ida ia karaia gwauhamatana ena sivarai ginigunana be Genese 12:​1-3 dekenai ita davaria, ia gwau: “Lohiabada ese Aberamo dekenai ia hereva, ia gwau, ‘Oiemu tano bona oiemu varavara bona oiemu tamana ena ruma oi rakatania, bona oi dohore lau hadibaia tano dekenai do oi lao. Lau be oi dekenai tubuna momo do lau henia, dohore idia be bese bada herea . . . Tanobada ena bese ibounai, be oi dainai namo bada do idia davaria.’ ”a Reana Aberahamo be Uru dekenai ia noho neganai Iehova ese ia ida unai gwauhamata ia karaia, bona gabeai Harana dekenai ia noho neganai ia gwauraia lou.

Aposetolo taudia edia nega ai, Stefano ese Iehova ena hahegani Aberahamo dekenai, Kanana dekenai ia lao totona, ia herevalaia. Sanhedrin taudia ia hereva henia neganai, ia gwau: “Iseda sene tauna Aberahamo ia noho Mesopotamia neganai, Harana dekenai ia noho lasi neganai, Hairai Diravana ese ia dekenai ia hedinarai. Ia gwau, ‘Oiemu tano bona oiemu varavara oi rakatania, bona tano dohore lau hadibaia oi, unai tano dekenai do oi lao.’ ” (Kara 7:​2, 3) Aberahamo be Uru hanuana amo, bona Stefano ese ia hahedinaraia bamona, unai gabu ai Iehova ese nega ginigunana ia hagania, Kanana dekenai ia lao totona. (Genese 15:7; Nehemia 9:⁠7) Stefano be Dirava ena gwauhamata Aberahamo ida ia gwauraia lasi, to Genese 12:​1-3 dekenai, unai gwauhamata be Kanana dekenai ia lao totona ia henia hahegani ida ia hakapua. Unai dainai ita abia dae diba Iehova ese Uru dekenai Aberahamo ida unai gwauhamata ia karaia.

To, Genese lalonai idia noho sivarai duahia namonamo karana ese ia hahedinaraia, Iehova ese Harana ai unai gwauhamata be Aberahamo dekenai ia gwauraia lou, bona Kanana ai nega idauidau ai unai ia herevalaia lou bona ena anina ia gwauraia badabada danu. (Genese 15:5; 17:​1-5; 18:18; 22:​16-18) Genese 11:​31, 32 ena hereva hegeregerena, Aberahamo ena tamana, Tera, be Uru hanua ia rakatania Kanana dekenai ia lao totona, bona Aberahamo, Sara, bona Lota be ia ida idia lao. Idia mai Harana dekenai bona unuseniai idia noho ela bona Tera ia mase. Aberahamo be Harana dekenai ia noho negana ena daudau be hegeregere, kohu momo ia haboua totona. (Genese 12:⁠5) Bona gabeai, Aberahamo ena kakana, Nahoro, ia lao unuseniai danu.

Baibel ese Tera ena mase ia herevalaia murinai, Iehova ese Aberahamo ia hereva henia herevana ia gwauraia bona ia gwau: “Vadaeni Aberamo ia lao, Dirava ena oda hegeregere.” (Genese 12:⁠4) Unai dainai, Genese 11:31–12:4 ese ia hahedinaraia Iehova ese Genese 12:​1-3 dekenai ia gwauraia herevana be Tera ia mase murinai ia gwauraia. Bema unai be momokani, Aberahamo be hari ia kamonai hahegani bona lagani haida gunanai Uru hanua dekenai ia kamonai hahegani dainai Harana ia rakatania bona Iehova ese ia gwauraia tanona dekenai ia lao.

Genese 12:1 ena hereva hegeregerena, Iehova ese Aberahamo ia hagania, ia gwau: “Oiemu tano bona oiemu varavara bona oiemu tamana ena ruma oi rakatania.” Nega ta ai Aberahamo ena hanua be Uru, bona ena tamana ena “ruma” be unuseni. To, Aberahamo ena tamana ese ena ruma bese ia abia lao Harana dekenai, bona Aberahamo be unai gabu ia gwauraia ena tano. Bena, lagani momo Kanana dekenai ia noho murinai, Isako ena adavana davaria totona, ena hesiai tauna be ‘ena tano bona ena varavara’ dekenai ia siaia neganai, unai hesiai tauna ia lao “hanua ta ladana Nahoro dekenai” (Harana eiava ia kahirakahira ai). (Genese 24:​4, 10) Unuseniai hesiai tauna ese Aberahamo ena varavara, Nahoro ena ruma bese badana, ena huanai Rebeka ia davaria.​—⁠Genese 22:​20-24; 24:​15, 24, 29; 27:​42, 43.

Stefano ese Sanhedrin taudia ia hereva henia neganai, Aberahamo ia herevalaia, ia gwau: “Iena tamana ia mase murinai, unai gabu dekena amo Dirava ese ia hakaua mai inai tano dekenai, hari umui noho gabuna.” (Kara 7:⁠4) Unai ese ia hahedinaraia Iehova ese Harana dekenai Aberahamo ia hereva henia. Unai dainai ita abia dae diba Genese 12:​1-3 ese ia hahedinaraia bamona Iehova ese unai nega ai ena gwauhamata ia gwauraia lou, badina Aberahamo be Kanana dekenai ia lao neganai unai gwauhamata ia gaukara matamaia. Unai dainai, hamomokania gaudia ibounai ita laloa neganai, ita laloa diba reana Iehova ese ena gwauhamata Aberahamo ida be Uru dekenai ia karaia bona Harana dekenai ia gwauraia lou.

[Footnote]