Ma Haida Kara Namo Henia Ena Hakaua Herevana Hahediba Hereva Badana Ta

“Unai dainai, gau ibounai umui ura taunimanima ese do idia karaia umui dekenai, umui ese unai bamona do umui karaia idia dekenai.”​​—⁠Mataio 7:12.

KAHIRAKAHIRA lagani 2,000 gunanai Iesu Keriso ese unai hereva be ena Haroro Herevana Badana lalonai ia gwauraia. Lagani handred momo amo ema bona hari, taunimanima ese unai auka lasi herevana idia herevalaia bona torea momo. Hegeregere, idia gwauraia “Buka Helaga ena badina,” “Keristani tauna ena maduna ena dekena tauna dekenai ena hereva badana,” bona “kara namo ena hakaua herevana badana.” Momo ese idia diba namonamo herevana dainai, nega momo nao gado ai idia gwauraia Golden Rule.

Idia gwauraidia Keristani oreadia sibona lasi to ma haida danu ese unai hakaua herevana idia abia dae. Iuda tomadiho, Buddhist tomadiho, bona Greek lalohadai ese unai kara namo ena hakaua herevana be dala idauidau ai idia herevalaia. Asia taudia be Confucius ena hereva ta idia diba, ia be Asia ai idia matauraia aonega bona hadibaia tauna. Buka ladana The Analects, Confucian tomadiho ena Four Books edia buka ihatoina, dekenai unai hereva be nega toi ita davaria. Stiuden taudia ese idia nanadaia neganai, nega rua Confucius ia gwau: “Oi ura lasi ma haida ese oi dekenai idia karaia gauna be idia dekenai oi karaia lasi.” Ma nega ta, ena stiuden ta Zigong ia heagi, ia gwau: “Lau ura lasi haida ese lau dekenai idia karaia gauna, lau ura lasi idia dekenai lau karaia danu.” Tisa be inai bamona ia haere ia gwau, “Oibe, to hari oi do hegeregere lasi unai bamona oi karaia totona.”

Ta ese unai hereva ia duahia neganai, ia itaia Confucius ena hereva ia gwauraia dalana be Iesu ese gabeai ia gwauraia dalana amo ia idau. Idia idau dalana badana be Iesu ese ia gwauraia hakaua herevana ena anina be kara haida ita karaia ma haida kara namo henia totona. Bema taunimanima be Iesu ena hereva namona hegeregerena idia karaia, ma haida idia laloa bada bona dala idia tahua idia durua, bona dina ta ta iboudiai unai taravatu idia badinaia, oi laloa unai ese inai tanobada be gabu namona ai do ia halaoa, a? Oibe.

Herevana unai taravatu idia herevalaia dalana be idauidau, to gau badana be taunimanima ese nega idauidau bona gabu idauidau ai, bona edia mauri daladia idauidau lalodiai, unai hakaua herevana idia abia dae. Ia hedinarai, Iesu ese Haroro Herevana Badana lalonai ia gwauraia herevana be hahediba hereva badana, bona gabu ibounai dekenai idia noho mauri lagani idauidau taudia edia mauri ia haidaua.

Sibona oi nanadaia: ‘Lau ura ma haida ese lau idia kara henia mai edia hemataurai, kara maoromaoro, bona momokani ida, a? Lau ura lau idia inai henia kava lasi, taravatu utua lasi, bona tuari lasi tanobadana ai lau noho, a? Lau ura ma haida edia hemami bona namo idia laloa bada ruma besena ai lau noho, a? Daika ia gwau diba unai bamona noho daladia ia ura lasi?’ Momokani, haida sibona ese unai bamona noho dalana idia moalelaia. To taunimanima momo ese unai bamona noho daladia do idia davaria diba idia laloa be auka.

Unai Hakaua Herevana Idia Hadikaia

Taunimanima edia histori ibounai lalonai, taunimanima idia kara dika henia momo dainai, taunimanima edia maoro idia laloa lasi momokani. Unai kara haida be Africa amo igui hesiai taudia hoihoilaia, Nazi edia mase kamepadia, natuna idia doria gaukara idia karaia, bona gabu ta ta dekenai bese alaia ore karana. Unai bamona kara dika rohoroho ma haida idia noho danu.

Hari inai negai, iseda tanobada mai ena diba idauidau be sibona laloa bada tanobadana. Taunimanima haida sibona ese ma haida idia laloa bada bema heduru idia tahua eiava edia maoro idia matauraia lasi. (2 Timoteo 3:​1-5) Dahaka dainai momo be sibona edia namo idia tahua, idia dagedage, idia hebogahisi lasi, bona sibona idia laloa bada? Badina be ma haida kara namo henia ena hakaua herevana, taunimanima idia diba momo herevana unai, idia laloa lasi, idia gwau ia be anina lasi bona idaunegai kara namo taravatuna, a? Madi, idia gwau Dirava idia abia dae taudia momo danu be unai bamona idia laloa. Bona ita itaia gaudia amo ita diba taunimanima be edia namo sibona do idia laloa bada.

Unai dainai, namona be inai henanadai badadia ita laloa: Ma haida kara namo henia ena hakaua herevana ita badinaia ena anina be dahaka? Haida ese unai idia badinaia noho, a? Bona nega ta ai taunimanima ibounai be unai hakaua herevana hegeregerena do idia noho, a? Unai henanadai edia haere maorodia be hereva gabena ese do ia haerelaia?

[Picture on page 3]

Confucius bona ma haida ese dala idauidau ai ma haida kara namo henia ena hakaua herevana idia hadibaia