Ma Haida Kara Namo Henia Ena Hakaua Herevana Ita Badinaia Noho Diba

Taunimanima momo idia laloa ma haida kara namo henia ena hakaua hereva be Iesu ese ia hamatamaia kara namo hadibaia herevana, to ia sibona ia gwau: “Lauegu hadibaia herevadia be lauegu lasi, to lau ia siaia Diravana ena.”​​—⁠Ioane 7:⁠16.

OIBE, Iesu ia siaia Havaraia Tauna, Iehova Dirava, be Iesu ia hadibaia herevana, bona ma haida kara namo henia ena hakaua herevana, ia Hamatamaia Tauna.

Dirava ena ura be taunimanima ibounai be ta ta dekenai idia kara namo, idia ura ma haida ese idia dekenai do idia karaia bamona. Haheitalai namona ia hahedinaraia, badina be taunimanima ia karaia dalana amo ia hahedinaraia haida edia namo ia laloa bada: “Vadaeni Dirava ese taunimanima ia karaia, ia sibona ena laulau bamona, Dirava ena toana hegeregerena ia karaia. Tau bona hahine ia karaia.” (Genese 1:27) Anina be Dirava be mai ena lalokau ida taunimanima edia lalona dekenai ena kara badadia ia atodia, unai amo mauri mai mainona, moalena, bona namona do idia moalelaia​—⁠ela bona hanaihanai. Bema Dirava ese idia dekenai ia henia lalona ena mamina idia hadibaia namonamo, unai ese idia do ia hakaua ma haida do idia kara namo henia, idia ura ma haida ese idia dekenai do idia karaia bamona.

Sibona Edia Namo Laloa Bada Karana Ia Bada

Taunimanima edia noho maurina ia matamaia namonamo, to dahaka ia vara? Ita gwau diba, sibona edia namo idia tahua matamaia. Momo be Baibel ai headava taudia ginigunadia idia karaia gauna ena sivarai Genese karoa 3 ai idia diba. Satani, Dirava ia haginia taravatu ibounai dadaraia tauna, ese Adamu bona Heva ia haganidia, sibona edia namo idia tahua dainai Dirava ena lohia dalana idia dadaraia, bona sibona idia lohiaia bona sibona edia ura idia biagua. Sibona edia namo idia tahua bona idia gwau-edeede dainai, idia sibona lasi to edia natudia ibounai dekenai dika bada idia havaraia. Unai ia vara ena badina be idia ese ma haida kara namo henia ena hahediba herevana idia dadaraia. Unai dainai, “tau tamona dekena amo kara dika ia vareai mai tanobada dekenai, bona iena kara dika ese mase ia mailaia. Unai dainai mase be taunimanima ibounai ese idia abia, badina ibounai be mai edia kara dika.”​—⁠Roma 5:⁠12.

Ena be taunimanima ese Iehova Dirava ena lalokau dalana idia dadaraia, to ia ese idia ia rakatania lasi. Hegeregere, Iehova ese Israela taudia dekenai Taravatu ia henidia idia ia hakaua totona. Unai ese ia hadibadia namona be ma haida do idia kara namo henia, idia ura ma haida ese idia dekenai do idia karaia bamona. Taravatu lalonai hesiai taudia, tamana lasi memerodia, bona vabu kara henidia herevadia idia noho. Heatu, taunimanima henaoa, bona kohu henaoa karana ia vara neganai, do idia karaia karadia ia herevalaia. Tauanina naria taravatudia ese idia hahedinaraia haida edia namo do idia laloa bada. Mahuta hebou taravatudia idia noho danu. Iehova ese taunimanima dekenai iena Taravatu ibounai ena anina be inai hereva amo ia gwauraia: “Oiemu badibadinai tauna dekenai oi lalokau henia, oi sibona oi lalokau henia bamona,” gabeai Iesu ese ia gwauraia lou herevana unai. (Levitiko 19:18; Mataio 22:​39, 40) Taravatu lalonai Israela taudia ese edia huanai idau bese taudia idia kara namo henia dalana ia herevalaia danu. Taravatu ia gwau: “Bema idau tauna umui emui huana dekenai ia noho, do umui hisihisi henia lasi. Umui be idau tauna ena mamina umui abia, badina be guna Aigupito dekenai umui noho, idau taudia bamona.” Anina be Israela taudia ese dabu taudia dekenai hebogahisi karana do idia hahedinaraia be namo.​—⁠Esodo 23:9; Levitiko 19:34; Deuteronomi 10:⁠19.

Bema Israela taudia ese Taravatu idia badinaia momokani, Iehova ese unai bese do ia hanamoa. Davida bona Solomona edia lohia negana lalonai, unai bese ena namo ia bada, bona taunimanima idia moale bona noho namonamo. Baibel ia gwau: “Iuda taudia bona Israela taudia be momo herea, kone ena miri bamona, idia aniani, idia inuinu, bona idia moale noho. Solomona ena mauri dinadia ibounai lalonai Iuda bona Israela taudia be mai maino danu idia noho. Edia bese ta ta ibounai be mai edia vain audia, bona mai edia fig audia.”​—⁠1 King Taudia 4:​20, 25.

Madi, unai bese ena maino bona noho namona ia noho daudau lasi. Ena be Israela taudia ese Dirava ena Taravatu idia abia, to idia badinaia lasi; sibona edia namo idia tahua dainai ma haida edia namo idia laloa bada lasi. Unai kara bona tomadiho momokani negea karana dainai idia ta ta bona unai bese ibounai ese dika idia davaria. Gabeai, lagani 607 B.C.E. ai, Iehova be dala ia kehoa Babulonia ese Iuda Basileiana, Ierusalema hanuana, bona unuseniai dubu namo hereana idia hadikaia. Dahaka dainai? “Egu hereva umui kamonai henia lasi dainai, lau ese mirigini kahana bese taudia ibounai, bona egu hesiai tauna Nebukanesa, Babulonia ena king danu do lau boiria, inai tano, bona ena taudia, bona inai tano idia hagegea basileia ibounai hadikaia totona do lau mailaidia. Lau Lohiabada ese inai Iuda bese, bona iena badibadinai noho basileia ibounai do lau hadikaia ore momokani, hoa mai gari bada hanaihanai gabudia do lau halaodia.” (Ieremia 25:​8, 9) Iehova ena tomadiho maoromaorona dadaraia karana ena davana unai!

Ita Tohotohoa Haheitalai Ta

To, Iesu Keriso be ma haida kara namo henia ena hakaua herevana ia hadibaia sibona lasi to ia badinaia amo haheitalai namona ia hahedinaraia. Ia ese haida edia namo ia laloa bada. (Mataio 9:36; 14:14; Luka 5:​12, 13) Nega ta, Naina hanua dekenai, Iesu ese ia lalo-metau bada vabuna ta ia itaia, iena natuna tamona ena mase ia taitailaia. Baibel ia gwau: “Lohiabada ese vabu ia itaia, vadaeni ia bogahisihisi henia.” (Luka 7:​11-15) Vine’s Expository Dictionary of Old and New Testament Words ia gwau, inai hereva “ia bogahisihisi henia” ena anina be “ta ena lalona ia hamarerea.” Ia ese unai hahine ena lalohisihisi ia mamia, bona unai ese iena lalona ia veria unai vabu ena lalohisihisi ia haorea totona. Iesu ese unai mero ia hatorea-isi bona “iena sinana dekenai ia henia neganai,” unai vabu ena moale be bada herea!

Gabeai, Iehova ena ura hegeregerena, Iesu be mai ena ura bada ida hisihisi ia abia bona iena mauri ia henia taunimanima ibounai totona, unai amo taunimanima be kara dika bona mase ena igui hesiai amo ia ruhadia. Unai be ma haida kara namo henia ena hakaua herevana badinaia karana ena haheitalai namo herea.​—⁠Mataio 20:28; Ioane 15:13; Heberu 4:⁠15.

Ma Haida Kara Namo Henia Ena Hakaua Herevana Idia Badinaia Taudia

Iseda nega lalonai, taunimanima haida ese ma haida kara namo henia ena hakaua herevana idia badinaia momokani noho, a? Oibe, bona ia auka negadiai danu idia badinaia. Hegeregere, Tanobada Tuarina Iharuana lalonai, Nazi Germany ai Iehova ena Witnes taudia ese Dirava idia abidadama henia bona edia dekena tauna idia lalokau henia bona ma haida kara namo henia ena hakaua herevana idia dadaraia lasi. Gavamani ese taunimanima idia doria Iuda taudia ibounai idia inai henia bona idia dadaraia be namo, to Witnes taudia be ma haida kara namo henia ena hakaua hereva idia badinaia. Herevana dibura kamepadia dekenai idia noho, to haida idia laloa bada dainai ena be aniani be bada lasi, to idia hitolo bada Iuda taudia bona Iuda lasi taudia idia ania hebou. Danu, ena be Gavamani ese idia haganidia ala-ala kohudia amo ma haida do idia alaia, to idia ura lasi idia karaia, ma haida ese idia do idia hamasea karana idia ura henia lasi hegeregerena. Idia sibona idia lalokau henia bamona do idia lalokau henidia taudia be edena bamona do idia alaia mase? Idia ura lasi ma haida idia alaia dainai, momo be dibura kamepadia dekenai idia siaidia lao, bona idia hamasedia.​—⁠Mataio 5:​43-48.

Inai magasin oi duahia neganai, oi be ma haida kara namo henia ena haheitalai ta amo namo oi abia noho. Iehova ena Witnes taudia idia lalo-parara hari taunimanima momo be hisihisi idia davaria bona heduru idia ura. Unai dainai, Witnes taudia ese heduru daladia namodia amo ma haida idia durua, Baibel dekenai helaro namona bona hahekau herevadia do idia davaria. Hari tanobada ibounai dekenai idia karaia Baibel hadibaia gaukarana ta amo unai idia karaia. Unai gaukara ese dahaka ia havaraia? Isaia 2:​2-4 ena peroveta herevana hegeregerena, Iehova ese “taunimanima,” tanobada hegegemadai hari idia be milioni 6 idia hanaia vadaeni, ‘dekenai iena kara do ia hadibaia, bona idia ese unai Dirava ena dala dekenai do idia raka.’ Laulau dalanai, ‘idia ese edia tuari kaia be hama dekenai do idia makohia, bona unai makohia auri dekena amo, tano geia auri idia karaia bona idia edia io ena auri danu idia botaia palaka, au rigi utua kaia idia halaoa.’ Inai dagedage tanobada dekenai idia ese maino bona noho namona idia davaria.

Oi be Edena Bamona?

Satani Diabolo ese Eden umana dekenai gwau-edeede karana ia havaraia negana amo ema bona hari, ma haida kara namo henia ena hakaua herevana laloa lasi karana dainai idia vara hisihisi idauidau mani oi laloa. Iehova ena ura be kahirakahira unai ibounai do ia haorea. Edena dala ai? “Dirava ena Natuna ia hedinarai ena badina korikori be inai: Satani ena kara dika do ia haorea momokani totona.” (1 Ioane 3:⁠8) Unai be Dirava ena Basileia do ia lohia negana ai do ia vara, ma haida kara namo henia ena hakaua herevana ia hadibaia bona ia badinaia aonega tauna bona ia hegeregere tauna, Iesu Keriso, ese do ia karaia.​—⁠Salamo 37:​9-11; Daniela 2:⁠44.

Idaunegai Israela taudia edia King Davida ia gwau: “Gunaguna lau be mero, harihari lau be buruka, to nega ta kara maoromaoro tauna ta be Dirava ese ia rakatania, a? Lasi momokani, nega ta lau itaia lasi. Bona tau namona ena natuna be nega ta idia hitolo, a? O iena natuna ese aniani totona taunimanima idia noia, a? Lasi, nega ta lau itaia lasi. Lasi momokani. Kara maoromaoro taudia ese, nega ibounai haida dekenai idia bogahisihisi, bona idia heniatorehai, bona edia natudia ese Dirava ena hanamoa idia davaria.” (Salamo 37:​25, 26) Oi abia dae diba hari taunimanima momo be kohu momo idia abia bona idia mataganigani, bona “haida dekenai idia bogahisihisi” lasi, ani? Ia hedinarai goevagoeva, ma haida kara namo henia ena hakaua herevana ita badinaia neganai, maino momokani bona noho namona do ia vara, badina unai ese ta ia durua hari bona vaira negana ai Dirava ena Basileia henunai hahenamo ia abia totona. Dirava ena Basileia ese tanobada amo ta sibona ena namo ita laloa bada karana bona gwau-edeede karadia do ia kokia vaitani bona kara gageva taudia ese idia lohiaia tanobadana ena gabu ai Dirava ese tanobada oromana namona do ia havaraia. Unai negai, taunimanima ibounai be mai edia moale ida ma haida kara namo henia ena hakaua herevana do idia badinaia.​—⁠Salamo 29:11; 2 Petero 3:⁠13.

[Pictures on page 4, 5]

Iesu be ma haida kara namo henia ena hakaua herevana ia hadibaia sibona lasi, to ia badinaia karana amo haheitalai namona ia hahedinaraia danu

[Pictures on page 7]

Ma haida kara namo henia ena hakaua herevana badinaia karana ese maino momokani bona noho namona do ia havaraia