“Taunimanima Idia Gwau Lau be Daika?”

KRISMAS negana ma ia abia lou. Tanobada ibounai lalonai taunimanima be idia ura vara dinana ta idia moalelaia. Daika ena vara dinana? Dirava ena Natuna ena eiava kahirakahira lagani 2,000 gunanai ena gabu dekenai ia noho tomadiho ia hanamoa toho lalo-goada Iuda tauna ta ena, a? Unai be ogogami taudia ia durua tauna, Roma Basileiana ia ura hadikaia dainai idia hamasea gwau-edeede tauna ta, eiava reana ia ura diba bona aonega bada ia herevalaia aonega tauna ta ena vara dinana, a? Unai dainai inai bamona oi henanadai be maoro, ‘Iesu Keriso be daika?’

Iesu sibona be taunimanima edia haere unai henanadai dekenai ia laloa bada. Nega ta ena hahediba taudia ia nanadaia ia gwau: “Taunimanima idia gwau lau be daika?” (Mareko 8:27) Dahaka dainai ia henanadai? Ia murinai idia raka taudia momo ese ia idia rakatania vadaeni. Ma haida idia daradara bona idia lalohisihisi badina king ai idia halaoa gwauraia neganai ia ura lasi. Danu, ena inai taudia ese idia tohoa neganai, Iesu ese guba amo toa ta ia henidia lasi, ia be daika ia hahedinaraia totona. Unai henanadai haerelaia totona, ena aposetolo taudia ese ia be edena bamona idia gwauraia? Idia ese taunimanima edia lalohadai haida idia gwauraia, idia gwau: “Haida be Ioane Bapatiso idia gwau, haida be Elia, haida be Ieremia, ma haida idia gwau oi be peroveta tauna ta.” (Mataio 16:​13, 14) Palestine dekenai Iesu idia gwauraia dika herevadia​​—⁠hegeregere, Dirava hadikaia tauna, koikoi tauna, peroveta koikoi tauna, bona kavakava tauna​—⁠be idia gwauraia lasi.

Iesu Idia Laloa Daladia Idauidau

Hari inai negai bema Iesu be unai henanadai tamona ia henia, reana inai bamona do ia henanadai: “Diba bada taudia idia gwau lau be daika?” Unai neganai danu, reana edia haere amo inai do ia hedinarai: Taunimanima be mai edia lalohadai idauidau. University of Chicago ena diba bada tauna ta, David Tracy, ia gwau, “Iesu be hosi ta bamona, taunimanima idauidau be ia latanai idia guia bona dala idaudia ai idia lao.” Lagani 100 idia hanaia lalonai, diba bada taudia ese taunimanima huanai idia vara gaudia, bona taunimanima stadilaia karana, bona stadi bukadia idauidau momo idia gaukaralaia inai henanadai Iesu be daika idia haerelaia totona. Unai dala idia gaukaralaia murinai, idia gwau Iesu be daika?

Diba bada taudia haida idia gwau guna ia noho tauna Iesu be taunimanima dekenai helalo-kerehai herevana ia harorolaia goadagoada Iuda peroveta tauna ta. To, idia ese ia idia gwauraia lasi Dirava ena Natuna, Mesia, bona Mauri Hoia Lou Tauna. Diba bada taudia momo be Baibel lalonai Iesu ena matamaia guba dekenai bona ena toreisi lou sivaraidia idia daradaralaia. Haida dekenai Iesu be taunimanima ta sibona, noho dalana maorona ia haheitalaia bona ena hahediba karana dainai tomadiho haida ia haginia bona idia be gabeai Keristani Tomadiho ai idia lao. Bona Theology Today ai idia torea hegeregerena, haida idia laloa Iesu be “kerere ia tahua, bona loaloa aonega tauna ta, eiava ogogami tauna ta; orea gunalaia tauna ta, taunimanima ese idia havaraia noho daladia ia maumauraia, eiava Palestine ena hanua maragidia dekenai idia noho taudia dekenai ena lalohadai ia gwauraia tauna ta.”

To lalohadai idaudia momo idia noho. Iesu koremana ena laulau be rap miusiki, idia torea laulaudia, bona mavaru ai ia hedinarai.a Haida idia hereva kava idia gwau Iesu be hahine ta. Lagani 1993 ena siahu negana ai, Orange County Fair, California ai idia vadivadi taudia ese nadi amo idia karaia “Christie” ena laulau, kopina kavakava, “Keriso” hahinena ta be korosi ai idia tauadae. Unai nega tamona ai New York siti dekenai, “Christa”​​—⁠idia hasatauroa “Iesu” hahinena ta​​—⁠idia hahedinaraia. Unai nadi amo idia karaia laulau rua ese hepapahuahu ia havaraia. Bona lagani 1999 ena matamana ai, hoihoi taudia ese “Mero Iesu bona ena sisia, ladana Aneru, edia huanai idia hahedinaraia lalokauna” ena sivarai bukana ta idia hoia diba. Unai buka ia gwau edia hetura karana be “lauma dalanai lalona ia veria bona kudouna ia hamarerea bona mero bona sisia idia hegaegae ta ta totona edia mauri idia henia.”

Iesu be Daika Ita Diba be Gau Badana, A?

Dahaka dainai guna bona hari Iesu be daika oi diba be namo? Badina ta be, Napoleon ia gwau bamona, “Ena be Iesu be Iena tauanina ai ia hedinarai lasi Ia lohiadia taudia dekenai, to ia be mai ena siahu idia dekena bona ia biagudia.” Iesu ena hahediba herevadia mai siahudia dainai bona iena mauri dalana dainai, lagani 2,000 bamona lalodiai ia be mai ena siahu bada taunimanima bilioni momo edia mauri lalodiai. Toretore tauna ta ia gwau: “Matamana negana amo ema bona hari, tuari oreadia iboudiai, bona palamen iboudiai, bona king iboudiai edia anina tanobada taudia edia mauri dekenai be maragi, iena anina edia mauri dekenai be bada.”

Danu, namona be guna bona hari Iesu be daika oi diba be namo badina emu vaira negana totona ia be mai anina bada. Oi be mai emu dala ia gini vadaeni guba gavamanina​—⁠Dirava ena Basileia, Iesu ese ia gunalaia gauna​​—⁠henunai oi noho totona. Ita noholaia tanobada dikana be Iesu ese ena oromana do ia hanamoa bona mauri gaudia idauidau be edia gabu korikori dekenai do ia atodia. Baibel ena peroveta herevadia ese ita idia hadibaia Iesu ena Basileia ese hitolo taudia do ia ubua, ogogami taudia do ia naria, gorere taudia do ia hanamoa, bona mase taudia do ia hamauria lou.

Oi ura momokani unai gavamani do ia gunalaia tauna oi diba. Hereva gabena ese oi do ia durua Iesu korikorina oi diba namonamo totona.

[Footnote]