“Lau Dekenai Umui Mai, Lau ese Laga-ani Do Lau Henia Umui Dekenai”
‘Sivarai Namona Harorolaia’ Karana ese Goada Ia Henia
IA BE mai anina bada gaukarana ia karaia tau goevadaena ta. Iena hadibaia dalana be namo herea dainai “taunimanima ese iena hadibaia hereva dekenai idia hoa bada.” (Mataio 7:28) Ia be hesiku lasi haroro tauna ta danu. Iena nega, goada, bona kohu be Dirava ena Basileia harorolaia gaukarana dekenai ia gaukaralaia. Momokani, Iesu Keriso be haroro bona hadibaia tauna hereadaena, bona ena tano ena kahana ibounai dekenai ia laolao.—Mataio 9:35.
Iesu ena mai anina bada gaukarana be ena nega ai idia noho taudia dekenai “Basileia ena Sivarai Namona” do ia harorolaia bona ena hahediba taudia do ia hadibaia, unai gaukara tamona be tanobada ibounai dekenai do idia karaia. (Mataio 4:23; 24:14; 28:19, 20) Haroro gaukara be maduna metauna bona ia be karaharaga gaukarana badana dainai, unai ese Iesu murinai idia raka taudia, goevadae lasi bona edia goada be mai edia hetoa taudia unai, edia gaukara do ia koua momokani, a?
Lasi momokani! Iesu be ena hahediba taudia ia hadibaia “Uma ena biaguna,” Iehova Dirava, do idia noia gaukara taudia ma haida do ia henia, bona unai murinai Iesu ese ia siaidia taunimanima idia hadibaia totona. (Mataio 9:38; 10:1) Bena inai hagoadaia herevana ia henia, ia gwau ia murinai idia raka taudia idia huaia maduna—haroro gaukara danu—ese laga-ani bona goada do ia henia idia dekenai. Iesu ia gwau: “Lau dekenai umui mai, lau ese laga-ani do lau henia umui dekenai.”—Mataio 11:28.
Moale Ena Badina Ta
Unai boiboi herevana namona be hebogahisi bona lalokau ia hahedinaraia! Unai ese Iesu ena hebogahisi ia murinai idia raka taudia dekenai ia hahedinaraia. Iena hahediba taudia be edia maduna, Dirava ena Basileia ena ‘sivarai namona’ harorolaia gaukarana, idia hagugurua neganai laga-ani idia abia. Unai ese idia dekenai moale korikorina bona noho namona ia havaraia.—Ioane 4:36.
Iesu be tanobada dekenai ia do mai lasi neganai, Baibel ese ia hahedinaraia moale be Dirava ena hesiai gaukara helagana ena kahana ta. Salamo torea tauna be inai ane ia abia neganai, unai ia hahedinaraia goevagoeva: “Tanobada taudia ibounai e, umui ese Lohiabada hanamoa totona ane do umui abia! Lohiabada do umui tomadiho henia, mai emui moale danu. Lohiabada ena vairana dekenai umui mai, mai moale anedia danu.” (Salamo 100:1, 2) Hari inai negai, bese idauidau taudia be Iehova idia moalelaia, bona edia hanamoa hereva be ia kwalimu tuari orea ena kwalimu boiboina hegeregerena. Dirava idia badinaia momokani taudia be “mai moale anedia danu” Dirava ena vairana dekenai idia mai. Momokani, unai hereva be maoro, badina Iehova be “moale Diravana,” ia ura ena hesiai taudia be edia gwauhamata ia dekenai idia hagugurua neganai, moale idia davaria danu.—1 Timoteo 1:11, NW.
Laga-Ani Idia Abia Hesiai Taudia
Edena dala ai haroro gaukara lalonai ita gaukara goadagoada, to ita hesiku lasi, bona laga-ani ita abia? Iesu dekenai Iehova ena gaukara be goada ia henia aniani bamona. Ia gwau: “Egu aniani be inai: Lau ia siaia Diravana ena ura do lau karaia, iena gaukara do lau karaia haorea momokani.”—Ioane 4:34.
Unai hegeregerena, hari inai negai Keristani haroro taudia be ‘Sivarai Namona idia harorolaia’ goadagoada neganai, moale idia davaria. (2 Timoteo 4:2) Ena mauri lagani be 50 bamona Keristani hahinena, Connie, be hua ta ta lalonai hora 70 mai kahana haroro gaukara ai ia haorea, bona ia gwau: “Haroro gaukara lau karaia murinai, moale mamina lau abia bona egu lalona ena hemami ia namo, herevana unai dina ena dokonai lau hesiku.”
Bema taunimanima be Basileia sivaraina idia abia dae lasi be edena bamona? Connie ia gwau: “Herevana idia abia dae lasi, to nega ta lasi haroro gaukara lalonai lau lalohisihisi. Lau diba lau karaia gaukarana be Iehova ia hamoalea sibona lasi, to lau laloa hereva momokani herevalaia karana be namo badina unai bamona lau karaia neganai, Baibel ena helaro namona be egu kudouna lalonai ia goada.”
Ma haida be taunimanima idia durua Dirava ena diba maorona idia abia totona, bona idia davaria sibona edia mauri dekenai anina ia henia. Hahine matamatana ta, ladana Meloney, be hua ta ta ai ena haroro gaukara lalonai hora 50 mai kahana ia haorea, bona ia gwau: “Haroro gaukara be lau ia hagoadaia badina egu mauri ia hakaua bona ia dekenai anina ia henia. Haroro gaukara lau karaia neganai, egu hekwakwanai bona dina ta ta ena lalo-hekwarahi lau laloa momo lasi.”
Millicent, ia be haroro gaukara ia karaia goadagoada Iehova ena Witnes hahinena ma ta, ia gwau: “Haroro gaukara lalonai bema haida dekenai Dirava ena ura taunimanima totona bona tanobada dekenai Paradaiso do ia havaraia lou dalana lau herevalaia neganai, dina ta ta ai anina ia henia. Dina ta ta ai, lau ia hadibaia Iehova be momokani ia noho bona lau dekenai maino ia henia bona gau ma haida amo do lau davaria diba lasi moalena ia henia.”
Kamonai Taudia Dekenai Laga-Ani Ia Henia
Keristani hesiai gaukara ese Basileia harorolaia taudia ia hagoadaia, bona unai mauri henia sivaraina idia abia dae taudia ia durua bada. Portugal dekenai, ena be Katolik sista bona pris taudia ese sikuli ena tisa ta idia hadibaia, to iena hemami be lauma dalanai ia idia durua lasi. Ena Baibel henanadai edia haere ia davaria lasi. Hanaihanai Iehova ena Witnes hahine ta ida Baibel ia stadilaia karana amo, ena lalo-parara Baibel dekenai ia habadaia. Unai sikuli tisa be ia moale bada. Ia gwau, “Wednesday ibounai lau be mai egu ura ida egu stadi lau naria, badina egu henanadai ta ta be Baibel ena hereva momokani ese ia haerelaia.” Hari, unai hahine be Iehova ena gwauhamata hesiai hahinena ta, bona ia danu be Baibel ena hereva momokani amo ma haida ia hagoadaia.
Ia hedinarai goevagoeva, Iehova ena Witnes taudia be edia haroro gaukara ena anina badana eiava edia tanobada ibounai teritori ena bada dainai idia lalo-manoka lasi. Idia kamonai lasi taudia eiava dagedage karana ese idia ia hamanokaia lasi. Mai goada ida sibona idia henia edia Basileia harorolaia gaukarana idia hagugurua totona. Idia be gabu idauidau ai idia davaria taudia dekenai sivarai namona idia herevalaia—hegeregere motuka idia stopu gabuna United States dekenai (1), Korea ena peleini gabuna ai (2), Andes dekenai (3), eiava London ena maketi ta ai (4). Hari inai negai, Iesu murinai idia raka taudia be mai moale ida tanobada ibounai lalonai unai gaukara namona idia karaia noho. Bona ena gwauhamata ia hamomokania, laga-ani ia henia idia dekenai bona ia gaukaralaidia taunimanima ma haida dekenai laga-ani idia henia totona.—Apokalupo 22:17.