Dirava Ena Taravatu be Iseda Namo Totona
“Lohiabada e, oiemu taravatu lau ura henia.”—SALAMO 119:97.
1. Dirava ena taravatu kamonai henia karana dekenai taunimanima momo edia lalohadai be dahaka?
HARI inai negai, momo idia ura lasi Dirava ena taravatu idia badinaia. Momo idia laloa, ita itaia diba lasi siahu tauna ta kamonai henia be anina lasi. Taunimanima ibounai ese edia ura bona noho hegeregerena taravatu idia abia hidi negana lalonai ita noho, idia be maoro bona kerere edia toana idia diba namonamo lasi. (Aonega Herevadia 17:15; Isaia 5:20) Tahua gaukarana ta ese tomadiho edia siahu ia maragi besedia momo huanai ia bada lalohadaina ia hahedinaraia, ia gwau “America taudia momo idia ura sibodia totona idia abia hidi dahaka be maoro, namo bona mai anina.” “Ia kara auka lasi Diravana idia ura henia. Idia auka lasi taravatudia idia ura henia. Kara maoromaoro karaia totona eiava ura ma ta totona idia hereva goada biagudia idia ura henia lasi.” Taunimanima idia noho hebou dalana ia tahua tauna ta ia gwau, hari “taunimanima sibodia ese idia abia hidi dahaka be mauri dalana namona bona goevana.” Ma ia gwau: “Siahu tauna ese ena taravatu be taunimanima edia noho dalana hegeregerena ia haidaua be namo.”
2. Edena dala ai Baibel ese nega ginigunana taravatu ia gwauraia neganai Dirava ena hahenamo bona lalo-namo abia karana ida ia hakapua?
2 Taunimanima momo ese Iehova ena taravatu ena namo idia daradaralaia dainai, namona be ita abia dae momokani iena taravatu be iseda namo totona. Heberu gado Baibel ese nega ginigunana inai hereva taravatu ia gwauraia ena sivarai mani ita laloa. Genese 26:5 ai, Dirava ena hereva ia gwau: “Badina be Aberahamo ese . . . lauegu hereva, lauegu sisiba, lauegu taravatu, ibounai ia badinaia.” Iehova ese Aberahamo ena tubudia dekenai Mose ena Taravatu ia do henia lasi neganai, lagani handred momo gunanai unai hereva ia gwauraia. Aberahamo ese Dirava bona ena taravatu ia badinaia dainai, dahaka davana namona ia abia? Iehova Dirava ese ia gwauhamata henia: “Oiemu garana dainai tanobada besedia ibounai be sibodia do idia hanamoa.” (Genese 22:18, NW ) Unai dainai Dirava ena taravatu badinaia karana ese Iehova ena hahenamo bona lalo-namo ia mailaia.
3. (a) Salamo torea tauna ta ese dahaka hemami be Iehova ena taravatu dekenai ia hahedinaraia? (b) Dahaka henanadaidia ita tahua be namo?
3 Salamo torea tauna ta—toana be vaira negana ai Iuda do ia lohiaia king ta—be nega momo taravatu ida idia hakapua lasi hemami ia gwauraia. Dirava dekenai ia gwau: “Oiemu taravatu lau ura henia.” (Salamo 119:97) Unai be karaharaga ia abia hemami goadana ta sibona lasi. To unai be Dirava ena ura, iena taravatu lalonai ia gwauraia urana, ura henia karana ia hahedinaraia. Iesu Keriso, Dirava ena Natuna goevadaena danu ese unai bamona hemami ia hahedinaraia. Baibel ese Iesu ia perovetalaia neganai, ia gwau: “Lauegu Dirava e, lau ura dikadika oiemu ura do lau karaia. Oiemu taravatu be lauegu kudouna lalonai ia noho.” (Salamo 40:8; Heberu 10:9) Ita be edena bamona? Dirava ena ura ita karaia karana amo moale ita davaria, a? Iehova ena taravatu edia heduru bona namo ita diba momokani, a? Dirava ena taravatu badinaia karana ena anina iseda tomadiho karana lalonai, dina ta ta maurina lalonai, abia hidi karana ai, bona iseda hetura karadia lalonai be dahaka? Dirava ena taravatu ita ura henia totona, namona be ita lalo-parara dahaka dainai Ia be mai ena maoro taravatu ia karaia bona ita ia hagania ita badinaia totona.
Iehova—Taravatu Henia Tauna Maorona
4. Dahaka dainai Iehova be Taravatu Henia Tauna badana bona maorona?
4 Iehova be Havaraia Tauna dainai, ia be tanobada bona guba edia Taravatu Henia Tauna badana bona maorona. (Apokalupo 4:11) Peroveta tauna Isaia ia gwau, Iehova be iseda Taravatu Henia Tauna. (Isaia 33:22, NW ) Guba bona tanobada biagua taravatu ia atoa, Ia havaraia mauri gaudia bona mauri lasi gaudia biagua totona. (Iobu 38:4-38; 39:1-12; Salamo 104:5-19) Dirava ese taunimanima ia havaraia dainai, idia danu be unai taravatu henunai idia noho. Ena be taunimanima be mai edia ura kwalimu bona sibodia idia laloa diba, to do idia moale bema Dirava ena tomadiho bona kara maoromaoro taravatudia henunai idia noho.—Roma 12:1; 1 Korinto 2:14-16.
5. Edena dala ai Galatia 6:7 ai ia noho hakaua herevana be Dirava ena taravatu dekenai ia momokani?
5 Ita diba, Iehova ese guba bona tanobada biagua totona ia atoa taravatudia be ta ese ia utua diba lasi. (Ieremia 33:20, 21) Bema tau ta ese unai taravatu haida, hegeregere graviti taravatuna, ia utua neganai dika do ia davaria. Unai hegeregerena, Dirava ena kara maoromaoro taravatudia be ta ese ia haidaua diba lasi bona ia hanaia toho diba lasi eiava bema ia utua, panisi do ia abia. Idia be guba bona tanobada biagua totona ia atoa taravatudia hegeregerena, ena be edia anina ia vara haraga lasi. “Dirava ita koia diba lasi. Bema tau ta aniani uhena ia hadoa, vadaeni unai bamona aniani sibona be do ia abia.”—Galatia 6:7; 1 Timoteo 5:24.
Iehova Ena Taravatu be Kahana Idauidau Ia Koua
6. Dirava ena taravatu ese edena kahana idauidau ia koua?
6 Dirava ena taravatu ta be Mose ena Taravatu. (Roma 7:12) Gabeai, Iehova Dirava ese Mose ena Taravatu ena gabunai “Keriso ena taravatu”a ia atoa. (Galatia 6:2; 1 Korinto 9:21) Ita be Keristani taudia bona “taravatu namona bona goevagoeva momokani” henunai ita noho dainai, ita lalo-parara Dirava ese iena hakaua herevadia be iseda mauri ena kahana haida sibona, hegeregere hahediba herevadia eiava tomadiho karadia dekenai sibona ia atoa lasi. To iena taravatu be mauri ena kahana ibounai ia koua, hegeregere ruma bese maurina ai, bisinesi karadia ai, tau eiava hahine kara henia dalana ai, Keristani taudia laloa dalana ai, bona tomadiho momokani lalonai ita karaia karadia dekenai ia atoa.—Iamesi 1:25, 27.
7. Dirava ena mai anina bada taravatu haida mani oi gwauraia.
7 Hegeregere, Baibel ia gwau: “Lebulebu taudia, kaivakuku idia tomadiho henia taudia, heudahanai taudia, o lebulebu hahine edia kara bamona idia karaia tatau, o tatau ese tatau danu hemarai karadia idia karaia taudia. O henaoa taudia, mataganigani taudia, kekero taudia, edia hereva dekenai haida idia hadikaia taudia, o haida edia gau idia dadia taudia. Inai bamona taudia ta lasi be Dirava ena Basileia do ia davaria diba.” (1 Korinto 6:9, 10) Oibe, heudahanai bona sihari kava be “sihari” karadia sibona lasi. Tatau ese tatau idia sihari henia karana be “mauri dalana ma ta” sibona lasi. Unai be Iehova ena taravatu utua karadia. Henaohenao, koikoi, bona samani koikoi karadia be taravatu utua karadia danu. (Salamo 101:5; Kolose 3:9; 1 Petero 4:15) Iamesi ese hekokoroku karana ia gwauraia dika, bona Paulo ese ita ia sisiba henia lebulebu hereva bona hevaseha hereva mai miro ita dadaraia. (Efeso 5:4; Iamesi 4:16) Keristani taudia ibounai dekenai, unai kara maoro daladia ibounai be Dirava ena taravatu goevadaena ena kahana.—Salamo 19:7.
8. (a) Iehova ena taravatu be edena bamona? (b) Heberu gado herevana ta idia hahanaia “taravatu” ena anina be dahaka?
8 Iehova ena Hereva lalonai unai bamona mai anina bada taravatu ese idia hahedinaraia iena taravatu be taunimanima biagua auka taravatudia edia lista ta lasi. Unai taravatu ese mauri dalana maorona bona namona ena badina ia haginia, bona ta ena kara ibounai ia hanamoa. Dirava ena taravatu be ita ia hagoadaia, ia maoro bona namo, bona ita ia hadibaia. (Salamo 119:72) Salamo torea tauna ese ia gaukaralaia herevana, “taravatu,” be Heberu gado herevana toh·rahʹ amo idia hahanaia. Baibel ia diba bada tauna ta ia gwau: “Unai hereva ia havaraia herevana ena anina be dala hadibaia, hakaua, poinia, pidia maoromaoro. Iena . . . anina be kara maoro dalana.” Salamo torea tauna dekenai, taravatu be Dirava ena harihari gauna. Unai hegeregerena, unai taravatu ita matauraia bona iseda mauri dalana ia hanamoa be namo, ani?
9, 10. (a) Dahaka dainai hakaua dalana namona ita abia be namo? (b) Edena dala ai ita ese mauri namona mai anina ita moalelaia diba?
9 Taunimanima ibounai be hakaua dalana namona idia abia be namo. Iesu bona aneru ma haida, taunimanima idia hereaia taudia unai, ese hakaua dalana idia badinaia danu. (Salamo 8:5; Ioane 5:30; 6:38; Heberu 2:7; Apokalupo 22:8, 9) Bema unai goevadae taudia ese Dirava ena hakaua dalana amo namo idia abia diba, goevadae lasi taudia ese unai idia abia be mai anina bada! Taunimanima edia histori bona ita dekenai idia vara gaudia ese peroveta tauna Ieremia ia itaia gauna ia hamomokania: “Lohiabada e, lau diba taunimanima edia mauri dalana, be idia sibona ese idia naria lasi, bona taunimanima ta lasi ese iena mauri ia biagua noho.”—Ieremia 10:23.
10 Bema ita ura mauri namona mai anina ita moalelaia, namona be Dirava ena hakaua dalana ita tahua. King Solomona be ta sibona ena mauri lalonai Dirava ena hakaua dalana ia laloa lasi to sibona ena dala ia haginia ena dika ia diba, ia gwau: “Dala ta ia noho, sedira iena toana oi dekenai be maoro, to iena dokona be mase dekenai do ia lao.”—Aonega Herevadia 14:12.
Iehova Ena Taravatu Ura Henia Ena Badina Idauidau
11. Dahaka dainai ita ura Dirava ena taravatu ita lalo-pararalaia?
11 Ita ura dikadika Iehova ena taravatu ita lalo-pararalaia be namo. Salamo torea tauna ese unai bamona ura ia hahedinaraia, ia gwau: “Lauegu matana do oi kehoa, vadaeni oiemu taravatu dekenai hoa gaudia do lau itaia namonamo.” (Salamo 119:18) Iseda diba Dirava bona ena dala dekenai ita habadaia neganai, iseda lalo-parara Isaia ena hereva dekenai do ia bada: “Lau inai Lohiabada, emui Dirava. Emui namo habadaia dalana, be umui dekenai lau hadibaia noho. Emui raka dalana namona dekenai umui lau hakaua noho. Egu oda hereva bema umui kamonai henia neganai, emui noho be do ia namo.” (Isaia 48:17, 18) Iehova ia ura momokani ena taunimanima ese dika idia davaria lasi bona ena taravatu badinaia karana amo edia mauri idia moalelaia. Namona be Dirava ena taravatu ita ura henia ena badina badadia haida ita itaia.
12. Edena dala ai Iehova be ita ia diba namonamo dainai ia be Taravatu Henia Tauna namona?
12 Dirava ena taravatu be ita ia diba momo Tauna amo ia mai. Iehova be iseda Havaraia Tauna dainai, ita gwau diba ia ese taunimanima ia diba namonamo. (Salamo 139:1, 2; Kara 17:24-28) Iseda turadia, varavara, bona tama sina be ita idia diba goevagoeva lasi, Iehova ese ita ia dibaia hegeregerena. Ita danu be siboda ita diba namonamo lasi, to Dirava be ita ia diba goevagoeva! Ita ia Karaia Tauna be ia diba goevagoeva lauma dalanai, hemami dalanai, laloa dalanai, bona tauanina dalanai dahaka ita abia be namo. Ita ia laloa neganai, iseda mauri ibounai, iseda ura, bona tahua gaudia ia lalo-pararalaia goevagoeva. Iehova be iseda goada ena hetoana ia diba, to ia diba danu mai anina gaudia ita karaia diba. Salamo torea tauna ia gwau: “Dirava ia diba, ita be tanobada ena kahu dekena amo ita ia karaia. Bona ita dekenai ia laloa noho, ita be kahu sibona.” (Salamo 103:14) To bema dala ita karaia Dirava ena taravatu hegeregerena ita raka, bona mai eda ura ida ena taravatu henunai ita noho, lauma dalanai do ita noho namo.—Aonega Herevadia 3:19-26.
13. Dahaka dainai ita diba momokani Iehova ese iseda namo ia laloa bada?
13 Dirava ena taravatu be ita ia lalokau henia Tauna amo ia mai. Dirava ese namo do ita davaria ela bona hanaihanai ia laloa bada. Ia ese davana bada herea gauna, ena Natuna, ia henia, “taunimanima momo edia dika davana karaia totona.” (Mataio 20:28) Iehova ia gwauhamata, ‘ita do ia naria, bona iseda goada ia hanaia dibagani ese ita do ia pidia’ lasi, ani? (1 Korinto 10:13) Baibel ese ita ia hadibaia Dirava ese ‘ita ia naria noho,’ ani? (1 Petero 5:7) Iehova be mai ena lalokau bada ida taunimanima edia namo idia havaraia hakaua herevadia ia henia, ma ta be ia bamona lasi. Ia diba dahaka be namo ita totona bona dahaka ese ita dekenai moale ia mailaia eiava lalo-hisihisi ia mailaia diba. Ena be ita be goevadae lasi bona kerere ita karaia, to bema kara maoromaoro ita tahua, iena lalokau ita dekenai ese mauri bona hahenamo do ia mailaia.—Esekiela 33:11.
14. Edena mai anina bada dalana ai Dirava ena taravatu be taunimanima edia lalohadai amo ia idau?
14 Dirava ena taravatu ia haidaua diba lasi. Inai heiriheiri bada negana lalonai, Iehova be iseda nadi goadana, ia noho hanaihanai. (Salamo 90:2) Ia sibona be inai bamona ia gwauraia: “Lau be Lohiabada, bona lauegu kara lau haidaua lasi.” (Malaki 3:6) Dirava ena taravatu Baibel lalonai ita abidadama henia momokani diba, idia be taunimanima edia lalohadai, hanaihanai idia haidaua noho gaudia bamona lasi. (Iamesi 1:17) Hegeregere, lagani momo lalodiai psychology taudia idia gwau natudia koua lasi karana be namo, to gabeai haida ese edia lalohadai idia haidaua, bona idia gwau edia sisiba be kerere. Tanobada ena taravatu bona hakaua herevadia be lai bamona, ia hodaia lao bona hodaia mai. To Iehova ena Hereva ia marere diba lasi. Lagani handred momo lalonai Baibel dekenai, mai lalokau ida natudia naria ena sisiba ia noho. Aposetolo Paulo ia gwau: “Tamana bona sinana e, emui natudia do umui habadua lasi, to Lohiabada ena hadibaia hereva idia dekenai do umui hadibaia.” (Efeso 6:4) Iehova ena taravatu dekenai ita tabekau diba be hagoadaia gauna; iena taravatu do idia idau lasi!
Dirava Ena Taravatu Idia Badinaia Taudia Edia Hahenamo
15, 16. (a) Dahaka do ia vara bema Iehova ena taravatu ita badinaia? (b) Edena dala ai Dirava ena taravatu be headava hakaua gauna namona?
15 Dirava be ena peroveta tauna Isaia amo, ia gwau: “Lau ese lau gwauraia hereva, be anina do ia havaraia.” (Isaia 55:11) Unai hegeregerena, bema ita hekwarahi ena Hereva lalonai idia noho taravatudia ita badinaia, anina namona bona moale do ita davaria.
16 Dirava ena taravatu ese headava namona ia havaraia dalana mani ita laloa. Aposetolo Paulo ia gwau: “Headava kara be taunimanima ibounai ese do idia matauraia be namo. . . . Do ia miro lasi. Badina be Dirava ese heudahanai taudia bona headava hadikaia taudia edia kerere davana do ia henia momokani.” (Heberu 13:4) Headava taudia ese ta ta idia matauraia bona lalokau henia be namo: “Tau ese iena adavana do ia lalokau henia, ia sibona ia lalokau henia hegeregerena. Hahine danu ese iena adavana do ia matauraia.” (Efeso 5:33) Unai lalokau be 1 Korinto 13:4-8 ese ia herevalaia, ia gwau: “Lalokau be ia dekenai ia kara dika tauna davana ia laloa lasi. Lalokau be mai ena bogahisihisi. . . . Lalokau be kohu momo tauna ia mama henia lasi. Lalokau be ia heagi lasi, bona ia hekokoroku lasi. Lalokau be haida hadikaia ia ura lasi. Lalokau be sibona ena gau ia tahua lasi, ia badu haraga lasi. Haida ese idia kara dika henia, to lalokau ese edia dika ia laloatao noho lasi. Lalokau be taunimanima edia kara gagevagageva ia moalelaia lasi. To Dirava ena kara bona iena hereva momokani ia moalelaia. Lalokau be taunimanima durua kara dekenai ia hesiku lasi. Nega ibounai iena abidadama ia goada noho. Nega ibounai Dirava ena gwauhamata ia naria noho mai moale danu. Bona metau ibounai lalonai ia gini goada noho. Lalokau be do ia noho hanaihanai doko lasi.” Unai bamona lalokau idia hahedinaraia taudia edia headava do ia dika lasi.
17. Iehova ena taravatu inuinu kekero muramuradia gaukaralaia dalana dekenai ita badinaia ese dahaka namo ia mailaia?
17 Iehova ena taravatu be mai ena namo ia hamomokania gauna ta be, inuinu kekero karana ia gwauraia dika. “Inuinu momo” karana dekenai ia moale lasi danu. (1 Timoteo 3:3, 8; Roma 13:13) Unai kara dekenai Dirava ena taravatu idia dadaraia taudia momo ese gorere idia abia eiava inuinu bada karana ese ia havaraia gorere idia abia. Baibel ena sisiba kekero muramura sisina sibona inua karana dekenai idia dadaraia dainai, haida be “idia laga-ani totona” inuinu bada karana idia manadalaia. Inuinu kekero amo idia vara hekwakwanai be momo, idia haida be, hemataurai lasi karana, ruma bese mauri ia dika eiava idia parara, moni negea kava, bona gaukara idia haboioa. (Aonega Herevadia 23:19-21, 29-35) Iehova ena taravatu inuinu kekero muramuradia gaukaralaia dalana dekenai ese ita ia gimaia, ani?
18. Moni ena kahana ai, Dirava ena taravatu ese heduru ia henia, a? Mani oi gwauraia hedinarai.
18 Moni ena kahana dekenai, Dirava ena taravatu ese heduru ia henia danu. Baibel ese Keristani taudia ia hagoadaia idia kara momokani bona gaukara goada totona. (Luka 16:10; Efeso 4:28; Kolose 3:23) Keristani taudia momo ese unai sisiba idia badinaia dainai dagi namona idia abia eiava haida be gaukara amo idia hadokoa neganai, edia gaukara idia haboioa lasi. Moni dalanai, ta ese namo ia davaria danu bema Baibel ese ia gwauraia dika karadia hegeregere, laki gadara, bona kuku eiava drag ania karana ia dadaraia. Dirava ena taravatu badinaia karana ese moni dalanai namo ia havaraia ena haheitalai ma haida oi laloa diba.
19, 20. Dahaka dainai Dirava ena taravatu ita abia dae bona badinaia be aonega karana?
19 Goevadae lasi taudia ese Dirava ena taravatu amo idia raka oho be auka lasi. Sinai Ororona dekenai idia noho Israela taudia mani oi laloa. Dirava ese idia dekenai ia gwau: “Harihari bema lauegu hereva do umui kamonai henia, bona lauegu taravatu do umui badinaia neganai, umui be lauegu bese korikori do umui lao.” Idia gwau: “Ai be Lohiabada ena hereva ibounai do ai karaia.” To, dala idauna idia badinaia! (Esodo 19:5, 8; Salamo 106:12-43) Ita be idau, Dirava ena taravatu ita abia dae bona badinaia be namo.
20 Iehova ese ita ia hakaua totona ia henia taravatudia ita badinaia namonamo be aonega karana bona moale ia havaraia. (Salamo 19:7-11) Unai ita karaia namonamo totona, namona be Dirava ena hakaua herevadia ita lalo-pararalaia bona laloa bada danu. Hereva gabena ese unai do ia herevalaia.
[Footnote]
a “Keriso ena taravatu” dekenai hereva ma haida oi diba totona, September 1, 1996, Gima Kohorona, rau 14-24 itaia.
Oi Laloatao, A?
• Dahaka dainai ita abia dae momokani Dirava ena taravatu be iseda namo totona?
• Dahaka badina idauidau dainai Iehova ena taravatu ita laloa bada be namo?
• Edena dala idauidau ai Dirava ena taravatu ese namo ia havaraia?
[Picture on page 3]
Aberahamo ese Iehova ena taravatu ia kamonai henia dainai, hahenamo bada ia abia
[Pictures on page 5]
Hari inai nega ena bisi bada maurina ena lalo-hekwarahi ese Dirava ena taravatu amo momo ia veria siri
[Picture on page 7]
Nadi gabunai ia gini lighthouse bamona, Dirava ena taravatu ia marere lasi bona ia idau diba lasi