Inai Oi Laloatao, A?

Vanegai idia halasia Gima Kohorona oi duahia neganai oi moalelaia, a? Mani ita itaia bema oi hegeregere inai henanadai oi haerelaia totona:

• Edena dala ai Haroro Hereva Badana oi gaukaralaia diba lalo-hekwarahi hamaragia totona?

Dina ta ta ai, Iesu ena hadibaia hereva badana ta unai hereva lalonai eiava Evanelia Bukadia edia kahana ma haida lalonai oi duahia diba. Bema unai hadibaia herevana ta oi laloa namonamo bona emu mauri lalonai oi badinaia toho, unai ese emu moale do ia habadaia bona emu lalo-hekwarahi do ia hamaragia.​––12/15, rau 12-​14.

• Edena badina namodia toi dainai kongregesen ena elda taudia ese hesiai taudia idia hadibaia maduna ma haida idia huaia totona be namo?

Iehova ena Witnes taudia edia namba ia bada daekau dainai, maduna idia huaia diba taudia idia noho be namo, bapatiso matamata taudia idia durua do idia goada idia lao totona. Lagani momo lalonai elda gaukara idia karaia taudia haida be buruka o gorere dainai kongregesen lalonai gaukara haida idia karaia noho diba lasi. Bona idia goada elda taudia haida be Society amo maduna ma haida idia abia, unai dainai guna kongregesen dekenai idia karaia gaukara ibounai be hari idia karaia diba lasi.​––1/1, rau 29.

• Taunimanima ese dirava koikoidia be edena bamona idia abidadama henia?

Momo ese edia tomadiho ena dirava idia tomadiho henia, to idia be mauri lasi diravadia, bona idia be ta idia durua lasi, Elia ena negai ia noho Bala hegeregerena. (1 King Taudia 18:​26, 29; Salamo 135:​15-​17) Ma haida ese moale karadia idia hahedinaraia taudia o spot gadara taudia idia abia isi, to edia ura gaudia vaira negana totona idia henia diba lasi. To, Iehova be momokani ia noho bona iena ura do ia hagugurua.​––1/15, rau 3-5.

• Dirava ese Kaino ia sisiba henia murinai, Kaino ena kara amo dahaka ita dibaia?

Dirava be ita dekenai ura kwalimu ia henia, bona ita ibounai be do ita badinaia dalana ita abia hidi diba, to kara namo karaia urana ita dadaraia lasi, Kaino ia karaia bamona. Unai Baibel sivaraina ia hahedinaraia danu, Iehova ese helalo-kerehai lasi taudia do ia hahemaoro henia.​––1/15, rau 22-​3.

• Hari, dahaka dainai goeva karana be mai anina bada?

Taunimanima edia mauri dala be hanaihanai idia haidaua dainai, taunimanima momo be nega idia atoa lasi edia ruma idia hagoevaia namonamo totona. Bema iseda aniani bona ranu idia goeva lasi, unai ese iseda tauanina ia hagorerea diba. Tauanina dalanai ita goeva sibona lasi, to Baibel ia hahedinaraia namona be lauma dalanai, kara maoro badinaia dalanai, bona laloa dalanai ita goeva danu be namo.​––2/1, rau 3-6.

• Paulo ese Keriso ia do vara lasi neganai idia mauri witnes taudia ia herevalaia, ia gwau: “Ita be lasi neganai idia be do idia goevadae lasi.” Edena dala ai? (Heberu 11:​40, NW )

Lagani 1,000 Lohia Negana ai, guba dekenai, Keriso bona ena horoa tadikakadia ese king bona hahelaga gaukara do idia karaia bona Keriso ena mauri davalaia boubouna ia havaraia namo be idia toreisi lou taudia dekenai do idia henia. Unai neganai, unai bamona abidadama taudia, Heberu karoa 11 ese ia gwauraia taudia, be “do idia goevadae.”​––2/1, rau 23.

• Paulo be Heberu taudia dekenai ia gwau, “emui tuari lalonai, emui rarana be ia do bubua lasi” neganai, ena hereva ena anina be dahaka? (Heberu 12:⁠4)

Ena anina be do idia tuari noho ela bona idia mase. Dirava ena kamonai hesiai taudia momo edia sivarai ita diba, edia abidadama idia dogoatao ela bona idia mase. To Paulo ese ia tore henia Heberu taudia be unai bamona hahetoho badadia idia do davaria lasi, to lauma dalanai goada idia abia be namo, bona edia abidadama idia hagoadaia, idia vara gaudia ibounai do idia haheaukalaia diba totona.​––2/15, rau 29.

• Ia namo bema Keristani tauna ese ena lalokau tauna ena mase tauanina dekenai embalm karana ia karaia, a?

Embalm karana be mase tauanina ia bodaga lasi totona idia hegaegaelaia karana. Idaunegai taudia haida ese tomadiho lalohadai ta dainai idia karaia. To tomadiho momokani taudia ese unai badina dainai idia karaia lasi. (Hadibaia Tauna 9:5; Kara 24:15) Embalm karana dainai reana mase tauanina ia bodaga haraga lasi, to do ia bodaga bona tano dekenai do ia giroa lou. (Genese 3:​19) Vadaeni, bema gavamani ena taravatu dainai, ruma bese taudia idia ura dainai, eiava idia guria haraga lasi haida be gabu daudau amo idia mai dainai embalm karana idia karaia, ita laloa momo lasi be namo.​––3/15, rau 29-​31.

• Baibel lalonai edena haheitalai ese ita idia hadibaia Dirava ese bese idauidau taudia ibounai ia abia dae?

Iehova ese peroveta tauna Iona ia siaia Nineva taudia sisiba henia totona, bona Dirava ese Iona ia hagoadaia edia helalo-kerehai karana do ia abia dae. Iesu be ena hereva bona haheitalai amo, Samaria taudia dekenai ena lalokau ia hahedinaraia. Aposetolo Petero bona aposetolo Paulo be Iuda lasi taudia dekenai sivarai namona harorolaia gaukarana idia karaia. Unai bamona haheitalai amo ita itaia, namona be noho dalana idauidau taudia ibounai ita durua.​––4/1, rau 21-4.