Tauanina ai Dika Idauidau Do Idia Ore Dalana

MANI oi laloa matakepulu taudia ese gau idia itaia, taia kudima taudia ese regerege ibounai idia kamonaia, hereva diba lasi taudia be mai moale danu ane idia abia, bona aena dika taudia edia aena idia goada lou bona idia raka! Ita be medikol saiens ese idia havaraia gaudia ita herevalaia lasi, to Dirava ese taunimanima totona do ia karaia gaudia ita herevalaia. Baibel ia peroveta, ia gwau: “Matakepulu taudia ese do idia itaia diba, bona taia kudima taudia, be do idia kamonai diba. Edia aena idia dika taudia be do idia roho bona mavaru, bona hereva diba lasi taudia, be mai moale bada do idia boiboi.” (Isaia 35:​5, 6) To, edena bamona ita diba unai peroveta herevana idau hereana be do ia guguru?

Gau ginigunana be, Iesu Keriso be tanobada ai ia noho neganai, ia ese taunimanima edia gorere bona edia tauanina ai dika idauidau ia hanamodia. Danu, iena hoa karadia momo be taunimanima momo​​—ena inai taudia danu​​—ese idia itaia. Nega ta, Iesu idia abia dae lasi taudia be ena hanamoa karana ta idia tahua namonamo, ena hoa karadia idia hakoikoia toho totona. To idia lalohisihisi, badina Iesu ena hoa karana idia hamomokania gaudia sibona idia davaria. (Ioane 9:​1, 5-34) Iesu ese idia gorea diba lasi hoa karana ma ta ia karaia neganai, idia be mai badu danu idia gwau: “Edena bamona do ita karaia, badina be unai tau ese toa kara momo ia karaia?” (Ioane 11:47) To, ladana maragi taudia be Iesu ena hoa karadia idia laloa bada dainai, idia momo ese ia idia abidadama henia matamaia.​—Ioane 2:23; 10:​41, 42; 12:​9-11.

Iesu Ena Hoa Karadia​​—Tanobada ai Do ia Vara Hanamoa Karana Idia Laulaulaia

Iesu ena hoa karadia ese idia hamomokania Iesu be Mesia bona Dirava ena Natuna sibona lasi. To unai hoa karadia dainai Baibel ena gwauhamata, vaira negana ai Dirava badinaia taudia do ia hanamoa, ita abidadama henia diba. Unai gwauhamata herevadia haida be Isaia karoa 35 ena peroveta herevana ai, bona paragraf ginigunana dekenai ai gwauraia vadaeni. Isaia 33:24 be vaira negana ai Dirava gari henia taudia edia tauanina ena goada ia herevalaia, ia gwau: “Idia noho taudia ta ese do ia gwau lasi, ‘Lau be gorere.’ ” Unai hegeregerena, Apokalupo 21:4 ia gwauhamata: “[Dirava] ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia [hari idia vara hahetoho bona hisihisi] be idia ore vadaeni.”

Taunimanima be Iesu ia hahedinaraia gurigurina idia gwauraia loulou neganai, idia be unai peroveta herevadia idia guguru totona idia guriguri. Unai guriguri ena kahana ta ia gwau: “Oiemu Basileia do ia mai, oiemu ura gauna tanobada dekenai do ai karaia, guba dekenai idia karaia bamona.” (Mataio 6:10) Oibe, Dirava ena ura tanobada bona taunimanima totona be do ia karaia. Ena be badina ta dainai Dirava ese gorere bona tauanina ai dika idauidau ia koua lasi, to kahirakahira do idia ore; idia ese Dirava ena “aena atoa gauna” dekenai dika do idia havaraia ela bona hanaihanai lasi.​—Isaia 66:1.a

Ia Hanamodia Neganai Hisihisi be Lasi Bona Davana Lasi

Herevana taunimanima ese edena gorere idia abia, to Iesu ia naria lasi, ia hanamodia neganai hisihisi be lasi, bona davana lasi. Momokani, unai kara ena sivarai ia bada ia lao haraga, vadaeni “taunimanima momo ia dekenai idia lao. Aena idia dika taudia, matakepulu taudia, idia hereva diba lasi taudia, edia imana idia dika taudia, bona gorere idauidau taudia momo herea idia abia lao, Iesu ena aena badinai idia atoa. Vadaeni Iesu ese idia ia hanamoa.” Taunimanima be edena bamona idia kara? Mataio, unai ia itaia tauna, ma ia gwau: “Taunimanima momo idia hoa, badina be idia itaia, hereva diba lasi taudia idia hereva, imana dika taudia idia goada, aena dika taudia idia raka, matakepulu taudia idia itaia diba. Vadaeni Israela edia Dirava idia hanamoa.”​—Mataio 15:​30, 31.

Ita itaia Iesu be hutuma amo haida sibona ia abia hidi lasi bena ia hanamodia​​—koikoi taudia be unai dala ai taunimanima idia koia. To, varavara bona turadia momo herea ese gorere taudia be “Iesu ena aena badinai idia atoa. Vadaeni Iesu ese idia ia hanamoa.” Hari, namona be Iesu ese hoa dalanai ia hanamoa taudia edia haheitalai haida ita riviulaia.

Matakepulu Taudia: Iesu be Ierusalema ai ia noho neganai, ia ese “mai kepulu danu ia vara” tauna ta ia hanamoa. Hanua dekenai taunimanima idia diba ia be noinoi momo matakepulu tauna. Unai dainai taunimanima idia itaia unai tau ia raka bona ia itaia diba neganai, idia hoa dikadika bona mai moale ida idia boiboi be mani oi laloa! To, haida idia moale lasi. Guna, Iesu ese ladana bada bona siahu bada Iuda oreana, idia gwauraia Farisea taudia, edia dika ia hahedinaraia dainai, idia haida idia ura dikadika idia hamomokania Iesu be koikoi karana ia karaia. (Ioane 8:​13, 42-44; 9:​1, 6-31) Unai dainai, Iesu ese ia hanamoa tauna dekenai henanadai momo idia henia, bena iena tama sina idia nanadaia, bona ma unai tau idia nanadaia lou. To Farisea taudia be Iesu ena hoa karana idia hamomokania gaudia sibona idia davaria, bona unai ese idia ia habadua. Ena matana idia namo lou tauna be unai tomadiho gunalaia taudia koikoidia edia kara ia daradaralaia, bona ia gwau: “Tanobada ia hamatamaia dekena amo, tau ta ese mai matakepulu danu ia vara tauna ta ena matana ia kehoa ena sivarai, be ta ita do kamonaia lasi. Inai tau be Dirava dekena amo bema ia mai lasi, be ia ese gau ta do ia karaia diba lasi.” (Ioane 9:​32, 33) Unai tau ena abidadama be momokani bona aonega ia hahedinaraia dainai, Farisea taudia “ese idia lulua murimuri dekenai,” anina be guna ia matakepulu tauna be dubu amo idia atoa siri.​—Ioane 9:​22, 34.

Taia Kudima Taudia: Iesu be Decapolis, Ioridane Sinavaina ena ist hanuana, ai ia noho neganai, taunimanima “ese taia kudima bona hereva diba lasi tauna idia hakaua lao ia dekenai.” (Mareko 7:​31, 32) Iesu ese unai tauna ia hanamoa sibona lasi, to ia hahedinaraia taia kudima taudia edia hemami ia lalo-pararalaia momokani, reana hutuma huanai do idia hemarai. Baibel ia gwau Iesu ese hutuma dekena amo taia kudima tauna “ia hakaua siri idau gabu dekenai” bona ia hanamoa. Unai kara idia itaia taudia “idia hoa bada,” bena idia gwau: “Gau ibounai ia karaia namo herea, taia kudima tauna ena taiana ia kehoa, hereva diba lasi tauna ena malana ia hanamoa.”​—Mareko 7:​33-37.

Marere Diba Lasi Taudia: Iesu be Kaperanauma ai ia noho neganai, taunimanima ese Iesu dekenai ia marere diba lasi tauna ta be geda ai idia huaia lao. (Mataio 9:2) Siri 6 ia lao 8 ese ia vara gauna idia gwauraia. “[Iesu] ese gorere tauna ia hamaoroa, ia gwau, ‘Oi toreisi, oiemu geda oi lokua, oiemu ruma dekenai oi lao.’ Vadaeni ia toreisi, iena ruma dekenai ia lao. Taunimanima momo ese idia itaia, vadaeni idia hoa, bona Dirava idia hanamoa, ia ese siahu unai bamona taunimanima dekenai ia henia dainai.” Iesu ese unai hoa karana be iena hahediba taudia bona ena inai taudia vairanai ia karaia. Mani oi laloa, Iesu ena hahediba taudia, inai henia kava karana ese edia matana ia hakepulua lasi taudia, be idia itaia gaudia dainai “Dirava idia hanamoa.”

Gorere Taudia: “Lepera tauna ta ia mai Iesu dekenai, ia tui diho bona ia noia, ia gwau, ‘Bema oi ura, mani oi hanamoa lau, badina oiemu siahu be ia hegeregere.’ Iesu ese mai bogahisihisi danu, iena imana ia atoa lepera tauna ena kopina dekenai. Ia gwau, ‘Lau ura. Hari oi goeva.’ Nega tamona, lepera gorere ia ore, unai tau ia goeva vadaeni.” (Mareko 1:​40-42) Oi itaia Iesu be mai badu ida lasi, to mai hebogahisi korikorina ida unai lepera tauna ia hanamoa. Mani oi laloa oi be lepera tauna. Edena bamona do oi laloa bema gorere dikana ese emu tauanina ena toana ia hadikaia bona ia dainai taunimanima ese oi idia rakatania, to tau ta ese hisihisi lasi dalanai maoromaoro oi ia hanamoa? Oi lalo-parara diba dahaka dainai lepera tauna be unai hoa karana dainai ia namo neganai, “Iesu ena aena badinai iena kwarana ia atoa diho, ia hanamoa.”​—Luka 17:​12-16.

Bero Taudia: Iesu idia do dogoatao lasi bona hasatauroa lasi neganai, Iesu ese hanamoa karana ta ia karaia, unai be ena hoa karana ginigabena. Aposetolo Petero ia ura Iesu idia dogoatao gwauraia taudia dekenai kara ta ia karaia haraga, ia be “mai ena tuari kaia, vadaeni ia veria, bona Hahelagaia Tauna Badana ena hesiai tauna ia botaia, iena taiana idiba kahana ia utua oho.” (Ioane 18:​3-5, 10) Luka ese unai sivarai ia herevalaia, ia gwau “unai tau ena taiana dekenai Iesu ese iena imana ia atoa, ia hanamoa lou.” (Luka 22:​50, 51) Danu, Iesu ese unai hebogahisi karana be ena turadia bona ena inai taudia​​—unai negai, ia idia dogoatao taudia—vairanai ia karaia.

Oibe, Iesu ena hoa karadia ita tahua namonamo neganai, ita itaia diba idia be idia vara momokani karadia. (2 Timoteo 3:16) Bona guna ai herevalaia hegeregerena, unai bamona tahua karana ese iseda abidadama, Dirava ese ia idia kamonai henia taudia do ia hanamoa gwauhamatana dekenai, ia hagoadaia be namo. Baibel ia gwau Keristani abidadama ena anina be “ita daradara lasi, to ita diba momokani, Dirava ena davana namona ita naria kava lasi. Matana dekenai ita itaia lasi, to iseda lalona ia diba momokani, inai gauna do ita abia.” (Heberu 11:1) Ia hedinarai goevagoeva, Dirava ese ita ia hagoadaia iseda abidadama be ita abia dae kava gauna lasi eiava ura kava gauna sibona lasi, to hamomokania gaudia dainai iseda abidadama goadana ita haginia. (1 Ioane 4:1) Unai bamona abidadama ita abia neganai, lauma dalanai do ita goada, ita gorere lasi, bona ita moale.​—Mataio 5:3; Roma 10:17.

Lauma Dalanai Iseda Dika Ita Hanamoa Guna be Namo!

Edia tauanina ai dika ta idia davaria lasi taudia momo be idia moale lasi. Haida be sibona idia hamasea toho badina be vaira negana totona helaro idia abia lasi eiava hekwakwanai momo idia davaria. Idia be lauma dalanai idia raka diba lasi bamona​​—Dirava ena matana ai unai dika ese tauanina ai idia vara dika idauidau ia hanaia momokani. (Ioane 9:41) To, edia tauanina ena kahana ta ia dika taudia momo, hegeregere hereva ginigunana ai ita kikilaia taudia, Christian bona Junior, idia moale bona anina ia havaraia maurina idia abia. Dahaka dainai? Badina lauma dalanai idia goada bona Baibel amo idia abia helaro namona ese ia hagoadadia.

Iesu ese ita abia be namo gauna badana ia herevalaia, ia gwau: “Aniani sibona dekena amo taunimanima do idia mauri lasi, to Dirava ena uduna dekena amo idia mai hereva ibounai ese mauri ia henia.” (Mataio 4:4) Oibe, taunimanima ese tauanina durua aniani idia ania be hegeregere lasi, idia be animal amo idia idau. Ita be Dirava ena “toana hegeregerena” dainai lauma aniani​​—Dirava ita diba, iena ura ena anina ita dekenai,bona ena ura karaia dalana ena diba​​—ita abia be namo. (Genese 1:27; Ioane 4:34) Dirava ita diba ese iseda mauri dekenai anina namona bona lauma goadana ia henia. Danu unai ese dala ia kehoa tanobada paradaisona ai mauri hanaihanai ita abia totona. Iesu ia gwau: “Mauri hanaihanai be inai: Idia ese oi Dirava momokani tamona do idia diba, bona Iesu Keriso, oi ese oi siaia tauna danu do idia diba.”​—Ioane 17:3.

Mani inai oi laloa, Iesu ena negai idia noho taudia ese ia idia gwauraia lasi “Gorere Hanamoa Tauna,” to “Hadibaia Tauna.” (Luka 3:12; 7:40) Dahaka dainai? Badina Iesu ese taunimanima dekenai edia hekwakwanai do ia kokia momokani gauna​​—Dirava ena Basileia​​—ia hadibaia. (Luka 4:43; Ioane 6:​26, 27) Unai guba gavamanina, Iesu Keriso ese ia biagua gauna, ese tanobada ibounai do ia lohiaia bona Baibel ena gwauhamata iboudiai, kara maoromaoro taudia edia tauanina bona edia noho gabuna tanobada do ia hanamoa herevadia, do ia hagugurua. (Apokalupo 11:15) Unai dainai Iesu ese ia hahedinaraia gurigurina lalonai, Dirava ena Basileia do ia mai bona Dirava ena ura tanobada dekenai do ia karaia herevadia ia hakapua.​​—Mataio 6:10.

Edia tauanina ena kahana ta ia dika taudia momo ese unai helaro namona idia dibaia neganai, idia be lalo-hisihisi dainai idia tai lasi, to moale dainai idia tai. (Luka 6:21) Momokani, Dirava ese gorere bona tauanina ena dika idauidau do ia kokia sibona lasi; ia ese taunimanima edia hisihisi ena badina​​—kara dika​​—do ia haorea momokani. Oibe, guna ai torea siridia, Isaia 33:24 bona Mataio 9:​2-7, idia gwau iseda kara dika dainai gorere ia vara. (Roma 5:12) Unai dainai, kara dika ia ore neganai, taunimanima do idia moale badina “Dirava ena natudia edia ura kwalimu hereadaena do idia abia,” unai ura kwalimu ena anina ta be taunimanima edia lalona bona tauanina do idia goevadae momokani.​—Roma 8:​21, NW.

Nega ta ta sibona idia gorere taudia be unai idia laloa maragi haraga diba. To tauanina ai dika idia abia dainai idia hisihisi taudia be unai bamona lasi. Idia diba edia tauanina ena goada bona mauri be dava bada gaudia, bona karaharaga bona idia laloa lasi negana ai idia idau diba. (Hadibaia Tauna 9:11) Unai dainai, ai laloa inai magasin idia duahia taudia, idia haida be tauanina ena kahana ta ia dika taudia, ese Dirava ena gwauhamata namodia Baibel lalonai do idia laloa namonamo. Iesu ese ena mauri ia henia unai gwauhamata do idia guguru totona. Unai be gwauhamata hamomokania karana hereadaena, ani?​—Mataio 8:​16, 17; Ioane 3:16.

[Footnote]