Duahia Taudia Edia Henanadai

Edena negai Keristani hahinena ese tomadiho karadia lalonai ena kwarana ia koua be maoro?

Aposetolo Paulo ia gwau: “Hahine ta bema mai kwara gauna lasi ese Dirava ia guriguri henia, o Dirava ena hereva ia harorolaia neganai, ia be iena kwarana, ia hahemaraia.” Dahaka dainai? Badina Baibel ese ia gwauraia kwara dagina matauraia karana dainai: “Hahine edia kwarana be edia tau.” Keristani kongregesen lalonai tau ena maduna be guriguri ia henia eiava ia haroro. Unai dainai, Keristani hahinena ese tomadiho karadia, iena adavana eiava ia bapatiso tauna ta ese idia karaia gaukaradia ia naria neganai, namona be dabua amo ena kwarana ia koua.​—1 Korinto 11:​3-10.

Headava lalonai nega haida Keristani hahine ese ena kwarana ia koua be namo. Hegeregere, Baibel stadi eiava aniani totona idia helai hebou neganai, nega momo tau ese ruma bese ia hadibaia karana bona Dirava idia guriguri henia karana ia gunalaia. To, bema ia be abidadama lasi tauna, unai maduna be ena hahine ese ia karaia diba. Unai dainai, bema Keristani hahine ta ena adavana ia noho neganai, ia sibona eiava ma haida totona ia guriguri eiava ena natudia edia Baibel stadi ia karaia neganai, ena kwarana ia koua be maoro. Bema ena adavana ia noho lasi, hahine ese kwarana ia koua lasi badina Dirava ese siahu hahine dekenai ia henia danu, ena natudia ia hadibaia totona.​—Aonega Herevadia 1:8; 6:20.

To, edena bamona bema ruma bese lalonai natuna mero ta be Iehova Dirava dekenai ia gwauhamata bona ia bapatiso vadaeni? Natuna be Keristani kongregesen tauna ta dainai, ia ese tadikaka dekena amo hadibaia hereva ia abia be namo. (1 Timoteo 2:12) Bema ena tamana be abidadama tauna, tamana ese ena natuna ia hadibaia be namo. To, bema tamana ia noho lasi, bona sinana ese ena bapatiso merona bona ena natudia ma haida ida Baibel stadi ia karaia neganai, namona be ena kwarana ia koua. Ia bapatiso natuna merona ese stadi eiava aniani lalonai ia guriguri eiava lasi be sinana ese ia abia hidi. Reana ia laloa natuna be ia hegeregere lasi bona sinana sibona ese guriguri ia gwauraia. Bema unai bamona nega lalonai ia guriguri, namona be ena kwarana ia koua.

Kongregesen ena gaukara haida idia karaia lalonai, Keristani hahinedia ese edia kwarana idia koua be namo. Hegeregere, pura lalonai idia karaia haroro gaukara ena hebou lalonai, reana Keristani taihudia sibona idia noho, bona bapatiso tadikaka be lasi. Nega haida kongregesen heboudia dekenai bapatiso tadikaka idia noho lasi. Bema taihu ta be tadikaka ese idia naria heboudia, kongregesen ena hebou eiava haroro hebouna ia naria, namona be ena kwarana ia koua.

Keristani hahinedia be hereva ta idia hahanaia o taia kudima taudia totona Baibel herevadia idia hahanaia, eiava kongregesen dekenai idia stadilaia Baibel stadi bukana amo paragraf be ma haida vairanai idia duahia neganai, edia kwarana idia koua, a? Lasi. Unai gaukara idia karaia taihudia be gaukara idia naria taudia eiava hadibaia taudia lasi. Unai hegeregerena, taihu ese haheitalai, ekspiriens, eiava Tiokratik Haroro Sikuli lalonai kahana idia henia neganai, kwarana idia koua lasi.

Ena be kongregesen lalonai hadibaia gaukarana be bapatiso vadaeni tataudia ese idia naria, to tatau bona hahine be mai edia maduna kongregesen murimurinai haroro bona hadibaia gaukarana idia karaia totona. (Mataio 24:14; 28:​19, 20) Unai dainai Keristani hahinena ta ese Iehova ena Witnes tauna ta vairanai witnes lasi tauna dekenai Dirava ena Hereva ia herevalaia neganai, ena kwarana ia koua be anina lasi.

To, ruma dekenai idia karaia hanaihanai Baibel stadi lalonai ia gwauhamata bapatiso tauna ta ia noho be idau. Unai be idia hegaegaelaia vadaeni hadibaia gaukarana, bona stadi ia hakaua tauna be naria tauna bamona. Unai nega lalodiai stadi be kongregesen ai idia karaia heboudia hegeregerena. Bema bapatiso Witnes hahinena ta ese unai bamona stadi ia karaia lalonai bapatiso Witnes tauna ta ia noho, ena kwarana ia koua be maoro. To, namona be ia bapatiso tadikakana ese guriguri ia gwauraia. Taihu ta be ia bapatiso tadikakana vairanai ia guriguri lasi, to bema badina namona ta dainai, hegeregere, unai tadikaka ia hereva diba lasi, unai taihu do ia guriguri.

Nega haida, ia bapatiso lasi Basileia pablisa tauna ta ese Keristani taihuna ta be ena Baibel stadi dekenai ia bamoa. Bema taihu ia ura, ia ese unai pablisa ia nanadaia diba stadi ia naria totona. To, Iehova dekenai unai bapatiso taihuna totona do ia guriguri be maoro lasi dainai, stadi dekenai unai taihu do ia guriguri be namo. Unai taihu ese stadi ia naria bona unai bamona negadiai ia guriguri neganai, namona be ena kwarana ia koua. Ena be pablisa merona ia do bapatiso lasi, to iena haroro gaukara dainai, witnes lasi taudia ese ia be kongregesen tauna ta bamona idia laloa.

Aposetolo Paulo ia gwau: “Hahine ese iena kwarana do ia koua. Inai anina be hahine be tau henunai ia noho, bona inai be toa ta, aneru do idia itaia totona.” Oibe, Keristani taihudia be hahenamo idia abia, mai edia kamonai ida Iehova ena henunai idia noho aneru milioni momo dekenai haheitalai namona idia hahedinaraia. Namona be Dirava idia badinaia hahinedia ese edia kwarana idia koua be namo negadiai, unai idia laloa namonamo!

[Pictures on page 30]

Kwarana koua karana be kwara dagina matauraia karana