Henanadai Mauana

◼ Nega haida taihu (ia bapatiso o lasi) be iduara ai Baibel stadi ia karaia. Unai taihu ese ena kwarana ia koua be namo bema tadikaka (ia bapatiso o lasi) ese ia bamoa, a?

Bema taihu (ia bapatiso o lasi) be hanaihanai Baibel stadi ia karaia, namona be kwarana ia koua bema tadikaka (ia bapatiso o lasi) ese ia bamoa. (1 Kor. 11:3-10) July 15, 2002, Gima Kohorona, rau 27, ia gwau: “Unai be idia hegaegaelaia vadaeni hadibaia gaukarana, bona stadi ia hakaua tauna be naria tauna bamona. Unai nega lalodiai stadi be kongrigeisen ai idia karaia heboudia hegeregerena. Bema bapatiso Witnes hahinena ta ese unai bamona stadi ia karaia lalonai bapatiso Witnes tauna ta ia noho, kwarana ia koua be maoro.” Momokani, herevana taihu ese ruma ai, iduara ai o gabu ma ta ai Baibel stadi ia karaia, to kwarana do ia koua bema tadikaka ese ia bamoa.

To, bema taihu be lou henia ia karaia, bena iduara ai Baibel stadi dalana o iseda stadi pablikeisen ta ia herevalaia, taihu ese kwarana do ia koua lasi, herevana tadikaka ese ia bamoa. To, taihu be iduara ai lou henia ia karaia loulou ela bona Baibel stadi ia hamatamaia, bona hanaihanai unai stadi ia karaia, namona be kwarana ia koua bema tadikaka ese ia bamoa.