Sene Taudia Edia Lalohadai ese​​—Taunimanima Idia Biagua Dalana

EMU ruma oi rakatania gwauraia neganai, tau ta be emu vairanai ia raka hanai. Nadi ta ai emu aena oi bampaia. Hanuaboi ai manu idauna ta ia tai. Gau tamona oi nihilaia loulou. Taunimanima momo be unai bamona gaudia idia laloa bada lasi. To, West Africa taudia haida dekenai, unai be lauma taudia edia toa. Bona taunimanima idia hadibaia gau dikana ta do ia vara eiava gau namona ta do ia vara.

Tano haida ai danu, taunimanima be sene taudia edia lalohadai idia badinaia noho. China bona guna Soviet Union ena tano haida ai, ena be taunimanima be Dirava be lasi lalohadaina idia abia dae, to momo be sene taudia edia lalohadai idia do badinaia noho. Europe bona America ai, momo be hisiu idia stadilaia babalau taudia edia heduru idia tahua, Friday 13th idia garilaia, o pusikasi koremana dekenai idia gari. Alaska ai, haida be guba ai diari mai ena kala idauidau (aurora borealis) idia itaia neganai, idia gwau tuari o gorere do ia vara. India ai, motuka badadia taria taudia idia gwau, dina ia siahu neganai, sihari kava karana idia karaia be namo, unai amo edia tauanina do ia siahu lasi​​—to unai kara dainai, AIDS ia bada ia lao noho. Japan ai, trein ena dala karaia taudia idia gwau, bema ororo ai matu ta idia karaia bona hahine ta be unai matu lalonai ia vareai, anina be gau dikana ta do ia vara. Gadara taudia be sene taudia edia lalohadai idia badinaia danu. Hegeregere, volibol tauna ta ia gwau, sokisi kurokurodia ia karaia neganai ia lusi, to sokisi koremadia ia karaia neganai ia kwalimu. Momokani, unai bamona sene taudia edia lalohadai be momo herea.

Oi be edena bamona? Reana gau ta dekenai oi gari kava, a? Oi be gau ta oi abia dae o oi karaia, to ena badina oi lalopararalaia lasi, a? Emu haere ese do ia hahedinaraia, sene taudia edia lalohadai be oi idia biagua eiava lasi.

Bema eda mauri lalonai sene taudia edia lalohadai ita badinaia, anina be dala ita kehoa ita diba lasi gauna ta ese ita ia biagua totona. To, unai be aonega karana, a? Eda mauri ia hadikaia diba gauna ta ese ita ia biagua be namo, a? Sene taudia edia lalohadai be ita idia hanamoa eiava hadikaia diba, a?