Gima Kohorona INTANET LAIBRI
Gima Kohorona
INTANET LAIBRI
Hiri Motu
  • BAIBEL
  • PABLIKEISEN
  • HEBOUDIA
  • w88 7/1 rau 4-7
  • Tomadiho Momokanina ese Gari Edena Bamona Ia Kokia?

Oi abia hidi kahana ena vidio ia noho lasi.

Sori, hekwakwanai ia vara vidio ia loud totona.

  • Tomadiho Momokanina ese Gari Edena Bamona Ia Kokia?
  • 1988 Gima Kohorona Iehova Ena Basileia Ia Harorolaia
  • Sinado maragidia
  • Inai Bamona Atikol
  • Gari Kava ena Ramuna bona ena Rigidia
  • Mase Taudia Gari Henidia​—Ena Badina be Dahaka?
  • Gari ena Badina be Koikoi
  • ‘Dirava ena Ura Oi Karaia’ A?
  • Tomadiho bona Gari Kava be Gau Namodia o Gau Dikadia, A?
    1988 Gima Kohorona Iehova Ena Basileia Ia Harorolaia
  • Sene Taudia Edia Lalohadai be—Oi Idia Biagua, A?
    2008 Gima Kohorona Iehova Ena Basileia Ia Harorolaia
  • Lauma Dikadia ese Taunimanima Idia Koia Dalana Ta
    Mase Taudia Edia Lauma—Oi Idia Durua Diba Eiava Oi Idia Hadikaia Diba, A? Idia be Momokani Idia Noho, A?
  • Mase Murinai Maurina—Taunimanima ese Dahaka Idia Abia Dae?
    1999 Gima Kohorona Iehova Ena Basileia Ia Harorolaia
1988 Gima Kohorona Iehova Ena Basileia Ia Harorolaia
w88 7/1 rau 4-7

Tomadiho Momokanina ese Gari Edena Bamona Ia Kokia?

BRITAIN ena toretore taudia rua, Edwin bona Mona Radford idia daradara. Taunimanima ese idia garilaidia kava gaudia 2,000 mai kahana idia davaridia, to Scotland, India, Uganda, bona Central America dekenai idia noho taudia danu ese unai gaudia idia garilaidia kava. Idia laloa, ‘Dahaka dainai unai bamona ia vara?’ Toretore tauna ma ta, Robertson Davies, ia gwau: “Gari kava karadia be idau negai idia noho taudia edia hahediba herevadia amo idia vara, hari inai negai idia noho tomadiho oreadia amo lasi.” Unai dainai, gari kava karadia be edena “hahediba herevadia” amo idia vara?

Gari Kava ena Ramuna bona ena Rigidia

Bible ese Sinara tanona (Tigris bona Eufrate sinavaidia padadiai ia noho tanona, gabeai ladana Babulonia idia hatoa tanona) ia gwauraia tomadiho koikoi ena hahediba herevadia koikoidia bona gari kava karadia edia vara gabuna. Unuseniai, “labana tauna mai goada,” ladana Nimrod, ese mai ladana bada Babel ena Kohoro ia haginia matamaia. Unai kohoro be tomadiho koikoi totona do idia gaukaralaia. To, Iehova Dirava ese haginia taudia edia gado ia haidaua, unai amo edia gaukara ia hakererea. Sisina sisina edia haginia gaukarana idia hadokoa, bena idia karoho, gabu idauidau dekenai idia lao. (Genese 10:​8-10; 11:​2-9) Herevana edeseniai idia lao, to hahediba herevadia tamona, lalohadai tamona, bona gori tamona idia abidia lao. Ena be taunimanima idia karoho, to Babel be do tomadiho koikoi ena badina, bena gabeai ena gaukara ia habadaia, babalau, meamea, bona gari kava karadia, hegeregere hisiu edia toana tahua karana, ia durudia. (Isaia 47:​12, 13; Daniel 2:27; 4:7 itaia danu.) Buka ta, ladana Great Cities of the Ancient World, ia gwau: “Hisiu edia toana tahua karana be inai lalohadai rua Babulono amo idia abia: Guba gaudia be kahana 12 ai idia karoa, bona guba gaudia ta ta be dirava ta ta. . . . Babulono taudia idia gwau hisiu ta ta idauidau edia heduru be edia dirava edia heduru hegeregerena.”

Unai idau negai idia noho taudia edia lalohadai ese ita edena bamona idia kara henia? Bible bukana, Apokalupo ese ia hahedinaraia, tanobada hegegemadai tomadiho oreana koikoina be idau negai ia noho Babulono amo ia vara. Hari inai negai ia do noho, ena ladana idia hatoa “Babulono badana.” (Apokalupo 17:5) Momokani, unai Babulono ai idia vara lalohadaidia be hari idia idau sisina, nega bada ia ore vadaeni dainai bona gabu ta ta ai idia noho taudia ese sibodia edia lalohadai idia ida idia buloa dainai. Unai dainai hari inai nega lalonai, tomadiho karadia idauidau idia noho. Au idauidau be tano tamona lalonai idia tubu, unai hegeregerena tomadiho oreadia idauidau bona gari kava karadia idauidau edia ramudia be gabu tamona ai idia tubu​—Babulono unai. Unai ita hamomokania totona, do ita itaia edena bamona Babulono ena gari kava lalohadaidia be hari inai nega lalonai idia noho tomadiho oreadia kahirakahira iboudiai lalodiai idia vareai vadaeni.

Mase Taudia Gari Henidia​—Ena Badina be Dahaka?

Babulono taudia idia laloa, tau ta ia mase neganai, ena lauma ia roho mauri, bena ia ese idia mauri noho taudia ia hanamodia diba eiava ia hadikadia diba. Unai dainai tomadiho karadia idia karaia mase tauna ena laumana hamoalea totona, bena ena badu do idia davaria lasi. Hari inai negai, tano momo lalodiai, unai bamona idia do laloa noho. Hegeregere, Africa lalonai, unai lalohadai ese “taunimanima kahirakahira iboudiai edia mauri ibounai ia biagua.”​—African Religions​—Symbol, Ritual, and Community.

Unai tanodia ai idia noho sibodia idia gwauraia Keristen taudia danu ese unai lalohadai idia abia. Hegeregere, lagani 63 hahinena ta, ladana Henriette, ena tubuna be Africa tauna, ia gwau: “Ena be pura iboudiai Protestant dubu ta dekenai lau guriguri, to mase taudia edia ‘lauma’ garina lau gari. Aiemai noho gabuna be gara gabuna kahirakahira, unai dainai nega ibounai mase tauna guria totona aiemai ruma vairanai idia laohaia hanai neganai, lauegu natuna lau haoa, lau rosia ela bona idia ibounai idia hanai vadaeni. Idau mase tauna ena ‘lauma’ ese lauegu natuna be ia mahuta negana lalonai do ia boloa garina.”

Unai bamona gari kava lalohadaina be ia do noho, badina Kerisendom ena tomadiho oreadia idia gwau, tau ta ia mase neganai ena tauanina sibona ia mase, ena lauma be ia mauri noho. Idau negai sivaraidia ese idia hahedinaraia, Greek aonega tahua taudia, hegeregere Plato, ese Babulono ena lalohadai mase tauna ena laumana dekenai idia habadaia. Britain ena tomadiho hadibaia tauna badana, John Dunnett, ia gwau: “Tau ta ena tauanina sibona ia mase lalohadaina be Keristen Dubu lalonai ia vareai.” Babulono amo ia mai hahedibana unai, ese taunimanima milion momo be gari kava karadia dekenai ia guidia.

Vadaeni, tomadiho momokanina ese unai bamona gari ia kokia, badina be ena hahediba herevadia be Bible ena amo idia mai, Babulono amo idia mai lasi.

Gari ena Badina be Koikoi

Mase taudia garina gari kava karana oi kokia be auka. Dahaka dainai? Badina hoa gaudia idauidau idia vara dainai, hegeregere, Suriname dekenai, hahine badana ta be hanuaboi ai ia kamonai ta ese ena ladana ia boiria. Ia hakala henia lasi, bena ia itaia diba lasi “imadia” be ena tauanina idia daua toho, to unai kara ia ura lasi dainai, ia itaia diba lasi siahuna ese ena aiona ia gigia. Reana oi laloa, ‘Bema mase taudia edia “lauma” be idia mauri noho lasi, daika ese unai kara ia karaia?’ Vadaeni, Bible amo ia abia dibana ese gari kava lalohadaidia ia kokia diba.

Bible ia gwau, lauma siahudia dikadia, demoni unai, be idia noho. Unai demoni be mase taudia edia lauma lasi. Idia be Dirava ena aneru haida, Satana, “tanobada taudia ibounai ia koua noho gauna” ena kahanai idia hanai anerudia unai. (Apokalupo 12:9; Iakobo 2:19; Efeso 6:12; 2 Petro 2:4) Bible ese ia hahedinaraia demoni idia ura dikadika taunimanima idia hakaudia kerere, idia hagaridia, bona idia hadikadia. Luka 9:​37-43 lalonai ia noho sivaraina ia gwau, demoni ta ese mero ta “ia abia, vadaeni ia boiboi kava, bona ena tauanina ia auka masemase, vadaeni ena uduna dekena amo kanudi momo idia diho” bona nega momo demoni ese ia haberoa. Mero be Iesu dekenai idia laohaia neganai, “lauma dikana ese tano dekenai ia hamorua, vadaeni ena tauanina ia auka masemase. Iesu ese lauma dikana ia gwau henia bona mero ia hanamoa, vadaeni ena tamana dekenai ia henia lou.”

Hoa herevana be inai: Buka badana ta, ladana Cyclopedia of Biblical, Theological, and Ecclesiastical Literature, ia gwau gari kava karana be “dirava koikoidia tomadiho karana.” Unai dainai, bema gari kava karadia oi karaia, reana oi diba lasi, to “dirava koikoidia,” eiava lauma dikadia oi hamoaledia unai! Unai bamona tomadiho koikoi karana be dika rohoroho, Iehova Dirava ia ura lasi karana.​—1 Korinto 10:20 bona Deuteronomi 18:​10-12 oi itadia.

‘Dirava ena Ura Oi Karaia’ A?

Oi boga-auka diba bona unai lauma dikadia oi dadaraia totona gari kava karadia do oi negea a? Momokani, lauma dikadia be mai edia siahu bada. Aposetolo Paulo ia gwau namona be ita abia hidi daika ena ura do ita karaia, Iehova Dirava ena eiava lauma dikadia edia. Bena ia henanadai, ia gwau: “Be, iseda goada ese [Iehova ena] goada ia hanaia diba, a?” Lasi, to namona be ita laloatao Satana mai ena lauma dikadia danu edia goada ese Iehova ena goada ia hanaia lasi! To idau, lauma dikadia ese Iehova garina idia gari dainai “idia heudeheude noho.” (Iakobo 2:19) Vadaeni, Siahu Ibounai Diravana ia gwau bema iena heduru ita noia, do ia henia. Bible torea tauna Iakobo, ia gwau: “Dirava ena ura do umui karaia. Satani do umui tuari henia, vadaeni umui dekena amo do ia heau boio.” (Iakobo 4:7) Oiemu gari kava danu do ia heau boio.

Tanobada hegegemadai, taunimanima momo herea, guna idia be gari kava karadia edia hesiai taudia, ese unai idia hamomokania diba. Diabolo ese ia heautanidia! Mani oi laloa lou, gari kava ena inai gauna be diba. Profesa Rudolph Brasch, gari kava karadia edia badina ia diba momo tauna, ia gwau: “Edukeisini be gau badana​—mai edia edukeisini bada taudia ese gau momo idia garilaidia kava lasi.”

Unai dainai, ai herevalaia vadaeni hahinena, Henriette, be Iehova ena Witness taudia ida Bible ia stadilaia neganai, lauma dikadia edia koikoi ia lalo-pararalaia. Gari kava karadia edia siahu ia dekenai ia doko. Ia, bona ma taunimanima momo herea ese Heberu 2:15 ena hereva idia hamomokania. Unuseniai aposetolo Paulo ia gwau, Iesu ese “mase ena gari ese ia guidia taudia edia gari [do] ia haorea.” Dina ena siahu ese daba rere ena paripari ia haorea hegeregerena, Bible ena hereva momokani ese gari kava ia haorea diba.

Hari inai negai, gari kava taudia gunadia momo ese edia mea gaudia idia negedia. Sibodia edia bona edia natudia edia aiona bona edia imana dekenai idia kwatua touni idia negedia. Edia lalona ena mamina hari, be lagani 68 South Africa babalau tauna, Isaac, ena lalona ena mamina bamona. Iehova ena Witness taudia ida Bible ia stadilaia, bena ia gwau: “Lau moale bada herea bona hari lau be ura kwalimu tauna, badina lauma dikadia garidia garina ena hegui amo lau siri dainai.” Iesu ena hereva ia momokani; ia gwau: “Hereva momokani be do umui diba, bona hereva momokani ese umui do ia ruhaia!”​—Ioane 8:32.

Oibe, tomadiho momokanina ese gari ia kokia diba!

[Picture on page 5]

Gari kava lalohadaidia be Babulono amo idia lao tanobada hegegemadai

    Hiri Motu Pablikeisen (1987-2025)
    Log aut
    Login
    • Hiri Motu
    • Ta dekenai siaia
    • Preferens
    • Copyright © 2025 Watch Tower Bible and Tract Society of Pennsylvania
    • Gaukaralaia Taravatudia
    • Privacy Policy
    • Privacy Settings
    • JW.ORG
    • Login
    Ta dekenai siaia