Diba Maoromaoro Dirava Dekenai ese Lalo-Maino Ia Havaraia

TAUNIMANIMA haida dekenai, Baibel ena hereva Dirava ena lalokau bona hebogahisi dainai idia vara henanadai idia laloa momo. Idia henanadai: Bema Dirava ia ura dika ia kokia, karaia dalana ia diba, bona ia be mai ena siahu unai ia karaia totona, dahaka dainai dika idia vara noho? Idia dekenai inai gau toi idia gaukara hebou diba lasi: (1) Dirava be siahu bada tauna; (2) Dirava be lalokau bona ena kara be namo; bona (3) gau dikadia idia do vara noho. Idia gwau gau ihatoina be ia momokani dainai, unai gau ma rua amo ta be ia momokani lasi. Idia laloa Dirava be dika ia koua diba lasi eiava taunimanima ia laloa lasi.

New York ai World Trade Center idia hadikaia bena dina haida murinai, ladana bada tomadiho gunalaia tauna ta United States dekenai ia gwau: “Egu mauri lalonai nega handred momo . . . lau idia nanadaia dahaka dainai Dirava ese dika badadia bona hisihisi ia koua lasi. Lau gwauraia hedinarai be namo ena haere lau diba lasi momokani, ena be lau ura danu edia haere lau diba.”

Unai dubu gunalaia tauna ena hereva dainai, tomadiho ia stadilaia profesa ta ia gwau, unai tauna ia gwauraia “tomadiho hereva namodia” ese ena lalona idia hamarerea. Ia ese diba bada tauna ta ena lalohadai ia abia dae danu, ia gwau: “Hisihisi idia vara ena badina ita lalo-pararalaia lasi, bona unai hegeregerena Dirava ita lalo-pararalaia lasi danu.” To Dirava ese dika ia koua lasi ena badina do ita lalo-pararalaia diba lasi, a?

Dika Ia Matamaia Dalana

Herevana tomadiho gunalaia taudia be dahaka idia gwau, to Baibel ia gwau lasi Dirava ese dika ia koua lasi ena badina be do ita lalo-pararalaia diba lasi. Dika idauidau dainai ia vara henanadai ita lalo-pararalaia totona, namona be ita diba Iehova ese tanobada dikana ia karaia lasi. Ia ese taunimanima ginigunadia ruaosi ia karaia neganai idia goevadae momokani, kara dika ta lasi. Iehova be ia karaia gaudia ibounai ia itaia bona ia davaria idia ibounai be “namo herea.” (Genese 1:​26, 31) Ia ura Adamu bona Heva ese Eden Paradaisona do idia habadaia tanobada ibounai dekenai bona ena lalokau lohia siahuna henunai moale taudia amo do idia hahonua.​​—⁠Isaia 45:⁠18.

Dika be guna Dirava ia badinaia lauma tauna ta amo ia matamaia, ia ura taunimanima ese ia do idia tomadiho henia. (Iamesi 1:​14, 15) Taunimanima ginigunadia ruaosi ia veridia ia ida Dirava idia inai henia neganai, ena gwau-edeede karana be tanobada dekenai ia hedinarai. Dirava ese Adamu bona Heva ia hadibadia goevagoeva, kara namo bona kara dika hadibaia auna do idia ania eiava dogoatao lasi, to idia badinaia lasi, haida idia abia bona idia ania. (Genese 3:​1-6) Unai amo, Dirava idia gwau-edeede henia sibona lasi, to idia hahedinaraia idia ura sibodia idia lohia.

Hepapahuahu Herevana ta Ia Vara

Eden lalonai ia vara gwau-edeede karana ese tanobada bona guba dekenai mai anina bada hepapahuahu herevana ta ia havaraia. Iehova ese ia havaraia taudia be dala maorona ai ia lohiadia eiava lasi, be unai gwau-edeede taudia ese idia henanadailaia. Havaraia Tauna be mai ena maoro taunimanima ia hamaoroa ia do idia kamonai henia totona, a? Sedira taunimanima edia noho be do ia namo herea bema sibodia edia raka dalana idia biagua, a?

Iehova ena lohia siahuna idia hepapahuahulaia neganai, unai ia kara henia dalana amo ena lalokau, hahemaoro maoromaoro, aonega, bona siahu ia hahedinaraia. Iena siahu ia gaukaralaia diba unai gwau-edeede karana be maoromaoro ia haorea totona. Reana toana be unai be hahemaoro maorona, badina unai ia karaia totona ia be mai ena maoro. To unai bamona ia karaia ese idia vara henanadai do ia haerelaia lasi. Eiava reana Dirava ese edia dika ia laloaboio diba. Bona reana hari taunimanima haida do idia laloa unai be lalokau karana. To, unai danu ese Satani ena hereva, ia gwau taunimanima be sibodia idia naria be namo do ia haerelaia lasi. Ma danu, unai bamona kara ese ma haida do ia hagoadaia Iehova ena dala idia rakatania totona, a? Unai ena davana be doko diba lasi hisihisina.

Iehova ena aonega dainai, ia ese maoro ia henia taunimanima dekenai nega sisina lalonai sibodia idia biagua totona. Ena be nega sisina lalonai Dirava ese kara dika ia koua lasi, to taunimanima dekenai dala ia kehoa unai amo idia hahedinaraia sibodia idia naria diba bona sibodia edia taravatu, dahaka be namo bona dahaka be dika dekenai idia badinaia diba eiava lasi. Unai amo dahaka ia vara? Taunimanima edia histori be tuari, kara gageva, dagedage, bona hisihisi amo idia honu. Iehova idia gwau-edeede henia to idia kwalimu lasi ese Eden lalonai ia vara henanadaidia do ia haerelaia.

Unai ia vara lalonai, Dirava ese ena lalokau ia hahedinaraia dalana be ena Natuna, Iesu Keriso, ese ena mauri ia henia mauri davalaia boubouna bamona. Unai ese kamonai taudia ia durua Adamu amo ia vara kara dika bona mase amo do ia ruhadia. Unai boubou gauna ese Iesu idia abidadama henia taudia ibounai totona mauri hanaihanai dalana ia kehoa.​​—⁠Ioane 3:⁠16.

Iehova ena hereva amo ita ia hagoadaia taunimanima edia hisihisi be do ia noho daudau lasi. Salamo torea tauna ia gwau: “Nega daudau lasi lalonai kara dika taudia do idia ore. Edia gabu do umui tahua, to do umui davaria lasi. To manau taudia ese noho gabuna tano do idia abia, do idia helai namonamo, mai moale bona mai maino danu.”​​—⁠Salamo 37:​10, 11.

Vaira Negana ai Do Idia Noho Namo Bona Moale Negana

Baibel ena peroveta herevadia idia guguru ese idia hahedinaraia kahirakahira Dirava ese gorere, lalohisihisi, bona mase do ia haorea. Aposetolo Ioane ese matahanai ta lalonai vaira negana ai do idia vara gau namodia ia itaia. Ia gwau: “Vadaeni guba matamatana bona tanobada matamatana lau itaia. Badina be guba gunana bona tanobada gunana be idia lao ore vadaeni. Davara danu be ia ore vadaeni. . . . Dirava be [taunimanima] danu do ia noho. Ia ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.” Hereva ta ese ia hahedinaraia unai gwauhamata be momokani, helai gabuna badana latanai ia helai tauna be Ioane ia hamaoroa: “Inai hereva do oi torea, badina ia be maoromaoro bona momokani.”​​—⁠Apokalupo 21:​1-5.

Eden umana dekenai gwau-edeede karana ia vara negana amo ema bona hari idia mase kerere lasi taudia bilioni momo be edena bamona? Iehova ena gwauhamata be mase dekenai idia mahuta taudia ibounai do ia hamauridia lou. Aposetolo Paulo ia gwau: “Lau be mai egu abidadama Dirava dekenai, . . . mase taudia dohore idia toreisi lou, kara maoromaoro taudia, bona kara maoromaoro lasi taudia danu.” (Kara 24:15) Unai taudia be “kara maoromaoro sibona do ia noho” tanobadana dekenai do idia noho.​​—⁠2 Petero 3:⁠13.

Doketa taudia ese natuna ta ena tauanina idia ivaia neganai hisihisi bada do ia abia, to lalokau tamana ta ese unai kara do ia koua lasi, bema ia diba unai ese noho daudau hahenamodia do ia mailaia, unai hegeregerena Iehova ese nega sisina lalonai taunimanima idia mamia hisihisina ia koua lasi. To, Dirava ena ura idia karaia noho taudia ese hahenamo momo do idia abia. Paulo ia gwau: “Badina Dirava ese unai ia karadia gaudia be mauri anina lasi idia davaria, sibodia edia ura dainai lasi, to Dirava ena ura dainai. To dala namona ta Dirava ese ia laloa: Dirava ese dina ta ia karadia gaudia be do ia ruhaia, dika ena bodaga dekena amo, vadaeni Dirava ena natuna edia hairaina bamona do idia abia, ma Dirava ese edia dala do ia kehoa, vadaeni kwalimu momokani do idia abia.”​​—⁠Roma 8:​20, 21.

Momokani, unai be sivarai namona​​—⁠televisen dekenai ita raraia eiava niuspepa dekenai ita duahia sivaraidia bamona lasi. To ia be sivarai hereadaena “durua ibounai ia henia” bona ita ia laloa bada Diravana amo ia mai gauna.​​—⁠2 Korinto 1:⁠3.

[Pictures on page 6]

Nega daudau lalonai idia vara gaudia ese idia hahedinaraia taunimanima be sibodia idia naria karana amo idia kwalimu diba lasi

[Credit Lines]

Somalian family: UN PHOTO 159849/M. GRANT; atom bomb: USAF photo; concentration camp: U.S. National Archives photo