Dokona Ia Mai Kahirakahira Lalonai Kamonai Karana Oi Habadaia

‘Bese ibounai ese Silo do idia kamonai henia.’​—⁠GENESE 49:⁠10.

1. (a) Idaunegai, Iehova kamonai henia ena anina be dahaka? (b) Kamonai karana dekenai Iakobo ese edena peroveta herevana ia gwauraia?

IDAUNEGAI, nega momo Iehova kamonai henia karana ena anina be taunimanima ese iena ladana ai idia hereva taudia idia kamonai henia. Idia haida be aneru, bese kwarana taudia, hahemaoro taudia, hahelaga taudia, peroveta taudia, bona king taudia. Israela taudia edia king ena terona be Iehova ena terona idia gwauraia danu. (1 Sivarai 29:23) To madi, Israela idia lohiaia taudia momo ese Dirava idia kamonai henia lasi, unai dainai idia sibodia bona idia lohiaia taudia latanai dika idia mailaia. To Iehova ese ia idia badinaia taudia be helaro lasi taudia bamona ia rakatanidia lasi; ia ese gwauhamata ta amo idia ia hagoadaia, idia dekenai mase diba lasi King ta do ia henia bona kara maoromaoro taudia ese mai moale ida ia do idia kamonai henia. (Isaia 9:​6, 7) Ia mase gwauraia bese kwarana tauna Iakobo ese unai vaira negana ai do ia lohiaia tauna ia herevalaia, ia gwau: “Kepata, lohia ena toana, be Iuda ese do ia dogoatao, bona [“gunalaia tauna ena itotohi,” NW ] haida ese do idia kokia lasi. Iena king siahu do ia dogoatao noho, ela bona siahu momokani ena biaguna, Silo, do ia mai. Vadaeni ia dekenai bese ibounai ese, dohore idia kamonai henia.”​—⁠Genese 49:⁠10.

2. “Silo” ena anina be dahaka, bona daidia do ia lohiaia?

² “Silo” be Heberu hereva ta bona ena anina be “Unai Gauna Ena Biaguna.” Oibe, Silo be lohia siahuna ena maoro, kepata ese ia laulaulaia gauna, do ia abia momokani, bona taunimanima oda henia ena siahu, gunalaia tauna ena itotohi ese ia laulaulaia gauna, do ia abia. Ma danu, Iakobo ena bese taudia sibona lasi to “bese ibounai” do ia lohiaia. Unai be Iehova ena gwauhamata Aberahamo dekenai ia gwauraia hegeregerena: “Oiemu garana ese ena inai taudia edia ikoukou do ia abia. Bona oiemu garana dainai tanobada besedia ibounai be sibodia do idia hanamoa.” (Genese 22:​17, 18, NW ) Lagani 29 C.E. ai, Iehova ese Nasareta tauna Iesu be lauma helaga amo ia horoa neganai, unai “garana” ia hedinarai.​—⁠Luka 3:​21-23, 34; Galatia 3:⁠16.

Iesu Ena Basileia Ginigunana

3. Iesu be guba dekenai ia daekau neganai, dahaka lohia siahuna ia abia?

³ Iesu be guba dekenai ia daekau neganai, maoromaoro tanobada taudia ibounai ia lohiaia ena siahu ia abia lasi. (Salamo 110:⁠1) To ia ese “Basileia” ta mai ena kamonai taudia ida ia abia. Aposetolo Paulo ese unai basileia ia hahedinaraia ia gwau: “Dirava ese dibura ena siahu dekena amo ita [lauma amo ia horoa Keristani taudia] ia hamauria vadaeni, bona iena Natuna, iena lalokau, ena Basileia lalonai ita ia abia vareai vadaeni.” (Kolose 1:13) Iesu ena murinai idia raka kamonai taudia ese Pentekoste 33 C.E. ai lauma helaga idia abia neganai, unai hahemauri karana ia matamaia.​—⁠Kara 2:​1-4; 1 Petero 2:⁠9.

4. Edena dala idauidau ai Iesu ena hahediba taudia ginigunadia ese kamonai karana idia hahedinaraia, bona Iesu ese edena bamona ia hahedinaraia idia be orea ta?

⁴ Dirava ena lauma amo ia horoa hahediba taudia be “Keriso ena hereva gwauraia hedinarai taudia” dainai, mai edia kamonai ida unai lauma basileiana lalonai do idia noho “hanua tamona taudia” ma haida idia gogoa matamaia. (2 Korinto 5:20; Efeso 2:19; Kara 1:⁠8) Idia danu be edia King Iesu Keriso ena lalo-namo idia abia totona, ‘hereva tamona do idia gwauraia, bona do idia gaukara hebou mai lalona tamona danu.’ (1 Korinto 1:10) Idia be orea ta, “hesiai tauna mai ena kamonai, bona mai ena kara maoromaoro” eiava kohu naria tauna mai ena kamonai oreana.​—⁠Mataio 24:45; Luka 12:⁠42.

Hahenamo Idia Abia Dirava Ena “Kohu Naria Tauna” Idia Kamonai Henia Dainai

5. Idaunegai, Iehova ese edena dala ai ena taunimanima ia hadibadia?

⁵ Iehova ese hanaihanai iena taunimanima totona hadibaia taudia ia henia. Hegeregere, Iuda taudia be Babulonia amo idia giroa lou neganai, Esera bona idia hegeregere tatau haida be Dirava ena Taravatu idia duahia sibona lasi, to taravatu “ena anina idia hedinaraia namonamo” bona taunimanima idia durudia Dirava ena Hereva idia lalo-pararalaia totona.​—⁠Nehemia 8:⁠8.

6, 7. Hesiai tauna oreana ese edena dala ai lauma aniani be Hakaua Oreana amo idia henia, bona dahaka dainai unai hesiai tauna oreana ita kamonai henia be maoro?

⁶ Aposetolo taudia edia negai, lagani 49 C.E. ai, kopina utua karana idia hepapahuahulaia neganai, unai negai ia noho hesiai tauna ena hakaua oreana ese mai guriguri ida unai hekwakwanai idia laloa bona Baibel amo lalohadai maorona idia davaria. Revareva ta amo edia lalohadai idia gwauraia neganai, kongregesen taudia ese unai idia abia dae bona Dirava amo hahenamo momo idia moalelaia. (Kara 15:​6-15, 22-29; 16:​4, 5) Unai hegeregerena hari inai negai, hesiai tauna mai ena kamonai oreana be ena Hakaua Oreana amo mai anina bada gaudia hegeregere Keristani gini siri karana, rara ena helaga matauraia, bona drag bona kuku gaukaralaia karana dekenai gau momo idia gwauraia hedinarai namonamo. (Isaia 2:4; Kara 21:25; 2 Korinto 7:⁠1) Iehova ese ena taunimanima ia hanamodia badina iena Hereva bona hesiai tauna mai ena kamonai oreana idia kamonai henia.

⁷ Dirava ena taunimanima ese hesiai tauna oreana idia kamonai henia amo idia hahedinaraia, idia ese edia Biaguna, Iesu Keriso, idia kamonai henia danu. Unai bamona kamonai karana be mai anina bada hari inai negai badina, Iakobo ena mase ia kahirakahira neganai ia gwauraia peroveta herevana bamona, Iesu ena siahu be hari ia bada.

Silo be Tanobada Ia Lohiaia Tauna Maorona

8. Edena dala ai bona edena nega ai Keriso ena siahu ia bada?

⁸ Iakobo ena peroveta hereva ia hahedinaraia ‘bese ibounai ese Silo do idia kamonai henia.’ Ia hedinarai goevagoeva, Keriso ese lauma Israela taudia sibona do ia lohiaia lasi. Daidia do ia lohiaia danu? Apokalupo 11:15 ese haere ia henia, ia gwau: “Tanobada ena basileia be iseda Lohiabada bona iena Keriso edia basileia ai ia lao, bona ia be king ai do ia lao, do ia lohia ela bona hanaihanai.” Baibel ia hahedinaraia Iesu be peroveta dalanai “lagani 7”​—⁠‘idau bese taudia edia nega’ unai​—⁠ena dokona, lagani 1914 ai, unai siahu ia abia.a (Daniela 4:​16, 17; Luka 21:24) Unai lagani ai, ita itaia diba lasi tauna Keriso be King ai ia lao, bona unai negai ia be ‘ena inai taudia bogaragidiai ia lohia’ matamaia.​—⁠Mataio 24:3; Salamo 110:⁠2.

9. Iesu ese iena Basileia ia abia neganai dahaka ia karaia, bona unai ese taunimanima ibounai bona iena hahediba taudia dekenai dahaka ia havaraia?

⁹ Iesu ese king siahuna ia abia murinai, ia karaia gauna ginigunana be kamonai lasi tauna korikorina​—⁠Satani​—⁠bona iena demoni be “tanobada dekenai” ia negea diho. Unai nega amo ema bona hari, unai lauma dikadia ese taunimanima dekenai dika bada herea idia havaraia, bona idia ese Iehova kamonai henia karana idia ha-aukaia. (Apokalupo 12:​7-12; 2 Timoteo 3:​1-5) Momokani, Satani ena lauma tuarina ai ia ese Iehova ena horoa taudia, ‘Dirava ena taravatu idia badinaia momokani bona Iesu ena hereva momokani idia gwauraia hedinarai’ taudia, bona edia bamodia, mamoe idaudia taudia unai, ia dagedage henidia bada.​—⁠Apokalupo 12:17; Ioane 10:⁠16.

10. Edena peroveta hereva Baibel lalonai ia guguru ese ia hamomokania, Satani ena tuari Keristani taudia momokanidia dekenai do ia kwalimu lasi?

¹⁰ To Satani be do ia kwalimu lasi, badina inai be “Lohiabada ena Dina,” bona gau ta ese Iesu ena “kwalimu” karana do ia koua lasi. (Apokalupo 1:10; 6:⁠2) Hegeregere, Iesu ia itaia namona be lauma Israela taudia 144,000 makaia gaukarana orena do ia guguru momokani. Ia ese “hutuma bada herea, tau ta ese ia duahidia diba lasi, bese idauidau bona iduhu idauidau bona kopina idauidau bona gado idauidau amo,” do ia naridia danu. (Apokalupo 7:​1-4, 9, 14-16; NW ) To, inai taudia be edia horoa bamodia amo idia idau, idia be Iesu idia kamonai henia tanobada taudia. (Daniela 7:​13, 14) Hari tanobada ai unai taudia idia noho vadaeni ese ia hamomokania, Silo be “tanobada ena basileia” ena Lohia tauna korikorina.​—⁠Apokalupo 11:​15, NW.

Hari be Nega Namona “Sivarai Namona” Kamonai Henia Totona

11, 12. (a) Daidia sibodia be inai tanobada dikana ena dokona amo do idia roho mauri? (b) “Tanobada ena lauma” idia abia taudia ese edena kara idia hahedinaraia?

¹¹ Mauri hanaihanai idia ura abia taudia ibounai ese kamonai karana idia dibaia be namo, badina Baibel ese ia hahedinaraia goevagoeva, “Lohiabada Iesu ena Sivarai Namona idia abia dae lasi taudia dekenai davana metau do ia henidia.” (2 Tesalonika 1:⁠8) To, hari inai tanobada dikana bona Baibel ena taravatu bona hakaua herevadia gwau-edeede henia urana ese sivarai namona kamonai henia karana idia ha-aukaia.

¹² Baibel ese unai Dirava gwau-edeede henia urana ia gwauraia “inai tanobada ena lauma.” (1 Korinto 2:12) Aposetolo Paulo ese unai lauma ena dika taunimanima dekenai ia herevalaia neganai, Keristani taudia ginigunadia Efeso dekenai ia hamaorodia, ia gwau: “Inai tanobada ena kara dika dalana umui raka. Umui ese lauma dikadia edia biaguna umui kamonai henia. Inai lauma dika ese Dirava idia kamonai henia lasi taudia edia lalona dekenai harihari ia gaukara noho. Guna ita ibounai be idia bamona ita karaia. Iseda tauanina edia ura dikadia, bona iseda lalona edia ura kava sibona ita karaia. Vadaeni unai bamona ita noho dainai, iseda dika davana korikori be Dirava ena badu, taunimanima oredia ibounai hegeregerena.”​—⁠Efeso 2:​2, 3.

13. Keristani taudia ese edena dala ai inai tanobada ena lauma idia dadaraia diba, bona unai amo dahaka namo do idia abia?

¹³ Moale gauna be, Efeso Keristani taudia be unai kamonai lasi urana ena hesiai taudia bamona idia noho lasi. To, lauma helaga idia kamonai henia bona edia mauri lalonai unai lauma ena huahua namodia idia havaraia karana amo, idia be Dirava ena kamonai natudia ai idia lao. (Galatia 5:​22, 23) Unai hegeregerena hari inai nega lalonai, Dirava ena lauma​—⁠guba bona tanobada ai ia goada herea siahuna unai​—⁠ese taunimanima milioni momo herea ia durua Iehova kamonai henia taudia ai idia lao totona, unai amo ‘idia naria noho davana namona, mauri hanaihanai, do idia abia momokani.’​—⁠Heberu 6:11; Sekaraia 4:⁠6.

14. Edena dala ai Iesu ese nega dokona lalonai idia noho Keristani taudia dekenai edia kamonai karana idia tohoa gaudia ia gwauraia?

¹⁴ Namona be ita laloatao danu, Silo ese ita do ia durua bada, ia bona ena Tamana ese iseda inai taudia​—⁠demoni eiava taunimanima​—⁠do idia rakatania lasi ita hanaia diba lasi hahetoho amo iseda kamonai karana do idia tohoa totona. (1 Korinto 10:13) Momokani, Iesu ese iseda lauma tuarina lalonai ita ia durua totona, inai nega dokona lalonai do ita davaria hekwakwanai haida ia gwauraia. Revareva 7 amo unai ia gwauraidia, bona matahanai ta lalonai aposetolo Ioane dekenai ia hahedinaraia. (Apokalupo 1:​10, 11) Idia lalonai be mai anina bada sisiba herevadia, unai negai idia noho Keristani taudia totona, to “Lohiabada ena Dina” lalonai, lagani 1914 amo ema bona hari, unai hereva be mai anina bada. Unai dainai, unai hereva ita kamonai henia namonamo be namo!b

Lalo-Hesiku, Matabodaga, Bona Kohu Momo Tahua Karana Dadaraia

15. Dahaka dainai Efeso kongregesen ia hadikaia hekwakwanai dekenai ita naria namonamo be namo, bona edena bamona unai ita karaia diba? (2 Petero 1:​5-8)

¹⁵ Iesu ena revareva ginigunana be Efeso kongregesen taudia totona. Iesu ese unai kongregesen ena haheauka karana dainai idia ia hanamoa murinai, ia gwau: “To inai gau tamona dekenai oi be kerere: Guna be lau oi lalokau henia bada, to hari be lasi.” (Apokalupo 2:​1-4) Hari inai negai, Keristani taudia goadadia haida ese guna Dirava totona idia hahedinaraia lalokau goadana be idia haboioa vadaeni. Unai bamona kara ese ta ena hetura karana Dirava ida ia hamanokaia diba bona unai dainai ia hanamoa haraga be namo. Edena dala ai unai bamona lalokau ia hagoadaia lou diba? Baibel stadilaia, hebou lao henia, guriguri, bona laloa dobu hanaihanai karadia amo. (1 Ioane 5:⁠3) Momokani, unai ‘do idia karaia’ goada be namo, to unai hekwarahi ese anina namona ia havaraia. (2 Petero 1:​5-8) Bema mai momokani ida sibona emu kara oi tahua bona bema oi davaria emu lalokau ia keru vadaeni, namona be Iesu ena hereva oi kamonai henia bona unai kara oi hanamoa haraga, ia gwau: “Unai kara namodia dalana do oi laloa lou, bona oiemu lalona do oi giroa, ma oiemu kara gunadia do oi karaia lou.”​—⁠Apokalupo 2:⁠5.

16. Lauma dalanai dahaka dika idia havaraia gaudia be Peregamo bona Tuatira kongregesen lalonai idia noho, bona dahaka dainai Iesu ena hereva idia dekenai be maoro hari inai negai?

¹⁶ Peregamo bona Tuatira kongregesen taudia edia abidadama, haheauka, bona ura bada dainai hanamoa hereva idia abia. (Apokalupo 2:​12, 13, 18, 19) To, idia be Balama bona Iesebele, matabodaga bona Bala tomadiho karadia amo idaunegai Israela taudia idia hadikaia taudia, edia kara dikadia idia hahedinaraia taudia haida ese idia veria. (Numera 31:16; 1 King Taudia 16:​30, 31; Apokalupo 2:​14, 16, 20-23) To iseda nega​—⁠“Lohiabada ena Dina”​—⁠be edena bamona? Unai bamona kara be hari idia hedinarai danu, a? Oibe, Dirava ena taunimanima huanai, momo be orea amo idia atoa siri ena badina badana be matabodaga karana dainai. Unai dainai iseda kara maoromaoro idia hadikaia taudia​—⁠kongregesen lalonai bona murimurinai​—⁠edia hebamo ita dadaraia be gau badana! (1 Korinto 5:​9-11; 15:33) Unai dainai, idia ura Silo ena lohia henunai idia noho kamonai taudia ese moale karadia kereredia bona buka eiava magasin lalonai bona Internet ai idia hahedinaraia matabodaga laulaudia idia dadaraia.​—⁠Amosa 5:15; Mataio 5:​28, 29.

17. Edena dala ai Sadi bona Laodikea taudia edia lalohadai bona Iesu ena lalohadai edia noho lauma dalanai dekenai be idia idau?

¹⁷ Sadi kongregesen dekenai haida sibona idia namo, to kongregesen be hanamoa hereva ta ia abia lasi. Iena toana be ia mauri, eiava unai bamona “idia herevalaia,” to lauma dalanai lalo-hesiku ia noho dainai, Iesu dekenai ia be ia “mase” vadaeni. Sivarai namona kamonai henia karana be idia karaia kava sibona. Samania hereva aukana unai! (Apokalupo 3:​1-3) Laodikea kongregesen danu be unai bamona. Ena taga bada ia hekokorokulaia, ia gwau: “Lau be mai egu moni,” to Iesu dekenai ia be “bogahisihisi gauna, ogogami, matakepulu, bona kopina kavakava.”​—⁠Apokalupo 3:​14-17.

18. Ta be edena bamona Dirava ena matanai, lauma dalanai ia siahu lasi karana ia koua diba?

¹⁸ Hari inai negai, guna edia abidadama dekenai idia goada Keristani taudia haida ese unai bamona kamonai lasi karana idia hahedinaraia. Reana dala idia kehoa bena inai tanobada ena lauma ese edia karaharaga lalohadaina ia kokia, unai dainai lauma dalanai idia siahu lasi, bona edia Baibel stadi karana, guriguri, Keristani heboudia, bona haroro gaukara idia laloa bada lasi. (2 Petero 3:​3, 4, 11, 12) Gau badana be unai bamona taudia ese Keriso idia kamonai henia bona lauma kohu namodia idia hoia​—⁠oibe, ‘Keriso dekena amo golo do idia hoia, lahi ese ia hagoevaia vadaeni gauna’! (Apokalupo 3:18) Unai bamona taga korikorina be “kara namodia dekenai idia taga, idia hariharibada, idia ura bada edia gau idia hariharilaia.” Unai dava bada kohudia ita hoia karana amo ‘badina namona ita abia hegaegae, vaira dinadia totona, unai amo mauri korikori do ita abia momokani.’​—⁠1 Timoteo 6:​17-19; NW.

Edia Kamonai Dainai Ia Hanamoa

19. Iesu ese dahaka hanamoa bona hagoadaia herevana be Semurana bona Piladelepia Keristani taudia dekenai ia henia?

¹⁹ Semurana bona Piladelepia kongregesen be kamonai karana dekenai haheitalai namona idia hahedinaraia, badina Iesu ese idia ia tore henia neganai sisiba aukana ta ia gwauraia lasi. Semurana taudia dekenai, ia gwau: “Oiemu hisihisi bona metau lau diba. Lau diba oi be ogogami, to momokani oi be kohu momo tauna.” (Apokalupo 2:⁠9) Idia be Laodikea taudia amo idia idau, badina Laodikea taudia ese edia taga idia heagilaia to idia ogogami momokani! Oibe, Keriso dekenai ta ia abidadama bona kamonai neganai, Diabolo ia moale lasi. Unai dainai, Iesu ia gwau: “Hisihisi do oi abia, to do oi gari henia lasi. Kamonai! Satani ese umui haida dibura ruma dekenai do ia koua, umui do ia dibagania, bona dina 10 lalonai do umui hisihisi. Do umui gini goada noho, bona lau do umui badinaia noho ela bona mase, vadaeni lau ese umui emui kwalimu ahuna, mauri, umui dekenai do lau henia.” (Apokalupo 2:10) Unai hegeregerena, Iesu ese Piladelepia taudia ia hanamodia, ia gwau: “Egu hadibaia hereva be oi badinaia vadaeni, bona egu ladana be oi hunia lasi. Nega daudau lasi lalonai, oi dekenai do lau mai. Vadaeni oi dekenai ia noho gauna do oi dogoatao namonamo noho, tau ta ese mauri, oiemu kwalimu ahuna, do ia dadia garina.”​—⁠Apokalupo 3:​8, 11.

20. Edena dala ai taunimanima milioni momo ese Iesu ena hereva idia badinaia, bona edena bamona noho daladia ai unai idia hahedinaraia?

²⁰ “Lohiabada ena Dina” lalonai, lagani 1914 ai ia matamaia, abidadama orena taudia bona edia bamodia mamoe idaudia, hari idia be milioni momo, be edia haroro goadagoada bona kara maoromaoro badinaia karana amo Iesu ena hereva idia badinaia danu. Edia Keristani tadikaka ginigunadia bamona, Keriso idia kamonai henia dainai, idia haida be hisihisi idia davaria, dibura bona dibura kamepadia dekenai danu idia atodia. To idia ma haida be edia “matana ia namo” karana amo Iesu ena hereva idia badinaia, herevana idia noho gabudia ai taga bona mataganigani karadia be bada. (Mataio 6:​22, 23) Oibe, noho gabudia bona daladia ibounai dekenai, Keristani taudia momokanidia ese edia kamonai karana amo Iehova ena kudouna idia hamoalea noho.​—⁠Aonega Herevadia 27:⁠11.

21. (a) Hesiai tauna oreana be lauma dalanai dahaka maduna do idia hagugurua noho? (b) Edena dala amo ita hahedinaraia diba ita ura momokani Silo ita kamonai henia?

²¹ Hisihisi badana ita lao henia lalonai, “hesiai tauna mai ena kamonai, bona mai ena kara maoromaoro” ese edia lalona idia hadaia edia Biaguna, Keriso, dekenai edia kamonai karana do idia rakatania lasi. Unai ena anina be nega korikori ai Dirava ena ruma bese taudia totona lauma aniani idia hegaegaelaia. Unai dainai, namona be ita ese Iehova ena tiokratik oreana namona bona ia henia noho gaudia ita moalelaia bada. Unai dala amo do ita hahedinaraia ita ese Silo, kamonai taudia dekenai mauri hanaihanai do ia henia tauna, ita kamonai henia.​—⁠Mataio 24:​45-47; 25:40; Ioane 5:​22-24.

[Footnotes]

Oi Laloatao, A?

• Iakobo ia mase gwauraia neganai, dahaka gaukara Iesu ese do ia karaia be ia perovetalaia?

• Edena bamona ita hahedinaraia Iesu be Silo, bona edena kara ita dadaraia be namo?

• Dahaka sisiba namodia iseda nega totona be Apokalupo ese ia gwauraia kongregesen 7 dekenai idia siaia revareva 7 lalonai idia noho?

• Edena dala ai ita ese idaunega Semurana bona Piladelepia kongregesen taudia ita tohotohoa diba?

[Pictures on page 26]

Iehova ese ena taunimanima ia hanamodia badina “kohu naria tauna” mai ena abidadama idia kamonai henia

[Picture on page 27]

Satani ena lalona veria karadia ese Dirava kamonai henia karana ia ha-aukaia

[Pictures on page 29]

Hetura karana goadana Iehova ida ese ita ia durua ia ita kamonai henia totona