Basileia Haroro Ripoti

Ibounai Dekenai Kingdom Hall Idia Kehoa

IESU KERISO ese iena hahediba taudia dekenai haroro gaukara ia hadibaia lalonai, idia ia hagoadaia ‘ruma ena ataiai dekena amo do idia haroro.’ (Mataio 10:27) Oibe, idia be taunimanima edia vairana ai edia Keristani hesiai gaukara do idia karaia. Unai hakaua herevana hegeregerena, Iehova ena Witnes taudia danu be taunimanima vairanai edia hesiai gaukara idia karaia. Unai bamona kara ese Witnes taudia ia durua dagedage idia hanaia totona bona taunimanima be idia dekenai idia moale danu.

Ena be Iehova ena Witnes taudia edia Keristani heboudia be taunimanima dekenai idia kehoa, idia mai totona, to inai henia kava karana ese haida ia koua dainai Kingdom Hall ai idia vareai lasi. Unai be momokani Finland dekenai. Taunimanima haida be idia hemarai gabu matamata dekenai idia lao totona. Kingdom Hall matamata idia haginia eiava hall gunana ta idia hanamoa neganai, dala idia karaia taunimanima idia mai bona idia itaia totona. Dala idia hegaegaelaia dekena taudia idia boiria Kingdom Hall idia itaia bona Iehova ena Witnes taudia edia gaukara idia diba totona.

Gabu ta dekenai, Witnes taudia ese taunimanima dekenai edia Kingdom Hall matamatana idia kehoa dinana ai, magasin hariharilaia gaukara badana ta idia hegaegaelaia. Witnes taudia rua ese tau burukana ta idia davaria, bona unai tau ia gwau Gima Kohorona bona Awake! magasin ia duahia karana ia moalelaia. Tadikaka ese Kingdom Hall matamata itaia ena hereva idia hadibaia bona idia gwau Kingdom Hall dekenai ia do idia hakaua lao. Unai tauna ia gwau mai moale ida idia do ia bamoa. Iena adavana be herevahereva ibounai ia kamonai vadaeni, bona ia boiboi, ia gwau: “Lau umui rakatania lasi!”

Unai tauna be Kingdom Hall ai ia vareai neganai, ia itaia loaloa bona ia gwau: “Inai be korema sibona lasi. Inai be namo herea bona ia diaridiari. Lau idia hamaoroa Kingdom Hall be korema!” Unai headava tau bona hahine be nega sisina idia noho bona idia itaia buka bona magasin haida idia noia.

Kongregesen ta ia ura niuspepa ta amo taunimanima idia hadibaia, edia Kingdom Hall idia hahelagaia negana ai taunimanima idia mai diba do idia itaia totona. Niuspepa ena edita hahine badana ese Kingdom Hall hahelagaia sivaraina ia kamonai neganai, ia hamaorodia sivarai ta idia torea be namo. Tadikaka ese idia abia dae, bona daudau lasi murinai, niuspepa ena rau ta ai unai sivarai ia hedinarai, unai gabu dekenai idia noho Iehova ena Witnes taudia edia kongregesen ese idia karaia gaudia bona gaukara ia herevalaia.

Unai sivarai idia halasia murinai, witnes hahine ta ese dekena hahine ta ia davaria, bona unai hahine be ia dekenai ia gwau: “Hari dina ena niuspepa dekenai Iehova ena Witnes taudia edia sivarai namona ta ia noho!” Taihu ese ia haroro henia bona murinai Jehovah’s Witnesses in the Twentieth Century buklet ia dekenai ia rakatania.

Kingdom Hall itaia totona bona hahelagaia ena program dekenai taunimanima idia boiria mai karana ese edia lalohadai kereredia Iehova ena Witnes taudia dekenai idia hamaoromaoroa sibona lasi, to unai ese pablisa taudia ia hagoadaia hebou dekenai taunimanima idia boiria mai totona. Oibe, tano momo dekenai, Finland dekenai danu, taunimanima idia diba vadaeni Iehova ena Witnes taudia edia Kingdom Hall be taunimanima ibounai dekenai ia kehoa.