Matamata Taudia E—Iehova ese Emui Kara Namodia Do Ia Laloaboio Lasi!
“Dirava ena kara be gagevagageva lasi, ia be maoromaoro momokani. Unai dainai ia ese emui kara namodia do ia laloaboio lasi. Umui ese Dirava umui lalokau henia. Inai lalokau ese laloa namodia umui dekenai ia havaraia, vadaeni umui ese Dirava ena taudia umui durua vadaeni, bona do umui durua noho danu.”—HEBERU 6:10.
1. Baibel bukadia Heberu bona Malaki ese edena bamona idia hahedinaraia Iehova ese emu hesiai gaukara ia laloa bada?
NEGA ta emu turana ta oi kara namo henia to tanikiu herevana ta ia gwauraia lasi, a? Do oi lalo-hisihisi bada herea bema ta ese oi karaia kara namona ia laloa lasi, eiava ia laloaboio momokani. To, unai be idau momokani bema mai iseda kudouna ibounai ida Iehova ita hesiai henia! Baibel ia gwau: “Dirava ena kara be gagevagageva lasi, ia be maoromaoro momokani. Unai dainai ia ese emui kara namodia do ia laloaboio lasi. Umui ese Dirava umui lalokau henia. Inai lalokau ese laloa namodia umui dekenai ia havaraia, vadaeni umui ese Dirava ena taudia umui durua vadaeni, bona do umui durua noho danu.” (Heberu 6:10) Unai hereva ena anina mani oi laloa. Iehova do ia laloa ia ese kara dika ia karaia bema ia oi hesiai henia totona oi karaia vadaeni gaukarana bona oi do karaia noho gaukarana ia laloaboio. Ia be ma haida ia laloa bada Diravana!—Malaki 3:10.
2. Dahaka dainai Iehova hesiai henia karana be hahenamo hereadaena ta?
2 Oi be mai emu dala oi ia laloa bada Diravana oi tomadiho henia bona hesiai henia totona. Emu tadikaka oreana be milioni 6 mai kahana idia noho, bona tanobada hegegemadai idia noho taudia ibounai be bilioni 6, unai dainai taunimanima momo lasi ese oi karaia gaukarana idia karaia. Bona danu, oi ese sivarai namona oi kamonai henia bona badinaia, unai ese ia hahedinaraia Iehova be oi ia laloa. Iesu ia gwau: “Lauegu Tamana, lau ia siaia Diravana, ese do ia veria mai tauna sibona lau dekenai do ia mai diba.” (Ioane 6:44) Oibe, Iehova ese taunimanima ta ta ia durua, Keriso ena boubou amo idia vara hahenamo idauidau idia abia totona.
Oi Karaia Gaukara Hereadaena Dainai Oi Moale
3. Kora ena natudia ese Iehova hesiai henia ena hahenamo idia abia dainai, edena bamona edia moale idia hahedinaraia?
3 Stadi herevana ginigunana ese ia hahedinaraia bamona, oi dekenai dala ia noho Iehova ena kudouna oi hamoalea totona. (Aonega Herevadia 27:11) Namo lasi unai oi laloa maragi. Kora ena natudia memero edia ane ta salamo bukana lalonai, ese edia moale Iehova hesiai henia ena hahenamo dainai idia hahedinaraia. Ia gwau: “Lohiabada e, bema dina tamona sibona Dubu Helaga lalonai lau noho, unai dina ese, dina 1000 idau gabu dekenai ia hereaia noho. Momokani, lauegu Dirava ena Ruma ena iduara badinai, do lau gini be namo herea, to kara kerere taudia edia ruma lalonai lau noho be dika.”—Salamo 84:10.
4. (a) Dahaka dainai haida idia laloa Iehova tomadiho henia karana ese idia ia koua bamona? (b) Iehova be edena dala ai iena hesiai taudia ia itadia bona edia davana namona ia henia?
4 Oiemu guba Tamana oi hesiai henia ena hahenamo be unai bamona oi laloa, a? Momokani, nega haida toana be Iehova tomadiho henia karana ese oi ia koua bena gau haida oi karaia lasi. Momokani, Baibel ena hakaua herevadia oi badinaia totona, sibona emu ura gaudia haida oi dadaraia be namo. To, Iehova ia ura oi karaia gauna be emu namo totona. (Salamo 1:1-3) Ma danu, Iehova ese emu hekwarahi ia itaia bona emu kamonai karana dainai iena moale ia hahedinaraia. Paulo ia gwau “Dirava idia tahua taudia ibounai, be davana namona Dirava ese do ia henidia.” (Heberu 11:6) Iehova ese unai ia karaia totona dala ia tahua noho. Idaunegai Israela dekenai ia noho kara maoromaoro peroveta tauna ta ia gwau: “Lohiabada ena matana ese tanobada ena kahana ibounai idia itaia noho, ia ese ia dekenai idia badinaia momokani taudia do ia hagoadaia totona.”—2 Sivarai 16:9.
5. (a) Oi hahedinaraia Iehova oi badinaia momokani ena dala namona ta be dahaka? (b) Dahaka dainai reana toana be ma haida dekenai oiemu abidadama oi herevalaia be auka?
5 Oi hahedinaraia diba Iehova oi badinaia momokani ena dala namona ta be ma haida dekenai ia oi herevalaia. Emu sikuli turadia haida dekenai emu abidadama oi herevalaia vadaeni, a? Matamanai, reana unai bamona oi karaia totona do oi hekwarahi, bona do oi gari sisina danu. Reana oi henanadai: ‘Edena bamona bema lau dekenai idia kiri? Edena bamona bema idia laloa egu tomadiho be idau momokani?’ Iesu ia gwau taunimanima ibounai ese Basileia ena sivarai do idia kamonai henia lasi. (Ioane 15:20) To, unai ena anina be emu mauri ibounai lalonai taunimanima ese oi do idia kirikirilaia eiava dadaraia lasi. Witnes matamata taudia momo ese kamonai taudia idia davaria bona idia abia dae gaudia totona idia gini goada dainai, edia turadia ese idia matauraidia bada.
“Iehova ese Oi Do Ia Durua”
6, 7. (a) Mauri lagani 17 kekenina ta be edena bamona ena klas turadia dekenai ia haroro? (b) Jennifer ena ekspiriens amo dahaka oi dibaia?
6 To edena bamona mai gari lasi ida emu abidadama oi herevalaia diba? Taunimanima be oiemu tomadiho dainai idia henanadai neganai, haere momokanina bona maoromaorona oi henia be namo, ani? Jennifer ena ekspiriens mani oi laloa, iena mauri lagani be 17. Ia gwau: “Sikuli gabuna dekenai dina tubua aniani lau ania noho lalonai, egu teibolo dekenai idia helai kekenidia be tomadiho idia herevalaia, bona idia ta ia ura diba lau be edena tomadiho kekenina.” Oi laloa Jennifer ia gari unai henanadai ia haerelaia totona, a? Ia gwau: “Oibe, lau gari, badina lau diba lasi egu haere be edena bamona do idia laloa.” Unai dainai Jennifer be dahaka ia karaia? Ma ia gwau: “Idia lau hamaorodia lau be Iehova ena Witnes kekenina ta. Matamanai, idia hoa. Toana be guna idia laloa Iehova ena Witnes taudia be idau momokani. Unai dainai lau dekenai henanadai momo idia henia, bona unai dala amo edia lalohadai kereredia haida lau hamaoromaoroa diba. Unai dina murinai, nega ta ta ai unai kekeni haida idia mai bona lau dekenai henanadai idia henia.”
7 Jennifer be ia abia dae gaudia ia herevalaia dainai, oi laloa unai ia lalo-hisihisilaia, a? Lasi momokani! Ia gwau: “Dina tubua aniani ena nega ia ore neganai, lau moale bada. Hari unai kekenidia be Iehova ena Witnes taudia idia diba namonamo.” Jennifer ena sisiba be auka lasi oi badinaia totona, ia gwau: “Bema oi mamia emu klas turadia eiava tisa dekena oi haroro be auka, guriguri kwadogina oi gwauraia. Iehova ese oi do ia durua. Ia kehoa dalana oi gaukaralaia namonamo oi haroro totona dainai, do oi moale bada.”—1 Petero 3:15.
8. (a) Nehemia dekenai guna ia laloa lasi gauna ta ia vara neganai, guriguri karana ese edena bamona ia durua? (b) Sikuli dekenai edena bamona gaudia haida idia vara neganai, reana Iehova dekenai guriguri kwadogina oi gwauraia haraga be namo?
8 Jennifer ena hereva oi laloa, bema dala ia kehoa emu abidadama oi herevalaia totona, Iehova dekenai ‘guriguri kwadogina oi gwauraia.’ Nehemia be Parasa ena King Aratasaseta ena uaina kapusi naria tauna, guna ia laloa lasi gauna be ia dekenai ia vara neganai, unai bamona ia karaia. Nehemia ia lalo-hisihisi badina ia kamonai Iuda taudia ese metau idia huaia bona Ierusalema ena magu bona geiti idia dika. King ese Nehemia ena toana ia itaia ia lalo-hekwarahi, unai dainai Nehemia ia nanadaia dahaka dainai ena toana be unai bamona. Nehemia ia do haere lasi neganai, heduru totona Iehova ia guriguri henia. Bena mai gari lasi ida gwaumaoro ia noia Ierusalema dekenai do ia giroa lou, bona idia do ia durua ia moru hanuana idia haginia lou totona. Aratasaseta ia lalo-tamona Nehemia be unai bamona ia karaia totona. (Nehemia 2:1-8) Unai amo dahaka oi dibaia? Bema dala ia kehoa ma haida dekenai oiemu abidadama oi herevalaia totona to oi gari, lalona dekenai guriguri karana oi laloaboio lasi. Petero ia gwau: “[Iehova] ese umui ia naria noho. Unai dainai emui laloa hekwarahi gaudia ibounai be iena imana dekenai do umui atoa.”—1 Petero 5:7; Salamo 55:22.
“Do Umui Naria Hegaegae Noho, Idia Do Umui Haere Henia Totona”
9. Edena bamona Leah, mauri lagani 13 kekenina be Memero Kekeni Edia Henanadai bukadia ibounai 23 ia hariharilaia?
9 Ekspiriens ma ta mani oi laloa. Leah ena mauri lagani be 13, sikuli dekenai iena dina tubua laga-ani negana ai, Memero Kekeni Edia Henanadai—Haere Maorodiaa bukana ia duahia. Ia gwau: “Haida ese lau idia raraia, bona daudau lasi murinai hutuma bada be egu murina kahana dekenai idia gini. Lau idia nanadaia matamaia unai buka be dahaka ia herevalaia.” Unai dina ena dokona ai, kekeni 4 be Leah idia hamaoroa idia ura inai buka Memero Kekeni Edia Henanadai, ena kopi ta idia abia. Daudau lasi murinai unai kekenidia ese ma haida dekenai unai buka idia herevalaia, bona idia danu idia ura kopi ta idia abia. Wiki haida murinai, Leah ese ena klas turadia bona ena turadia ma haida dekenai Memero Kekeni Edia Henanadai buka ibounai 23 ia hariharilaia. Oi laloa nega ginigunana ai haida be Leah ia duahia bukana dainai idia henanadai neganai, ia hekwarahi lasi ia hereva totona, a? Lasi momokani! Ia gwau: “Matamanai lau gari, to lau guriguri, bona lau diba Iehova be lau danu ia noho.”
10, 11. Edena dala ai Israela kekeni matamatana ta ese Suria ena tuari biaguna badana ia durua Iehova ia diba totona, bona unai murinai ena lalona ia hadaia dahaka ia karaia totona?
10 Leah ena ekspiriens dainai reana oi ese Suria dekenai idia abia lao Israela kekenina ta dekenai ia vara gauna oi laloa. Suria ena tuari biaguna badana Namana, be mai ena lepera gorerena. Reana ena adavana ese ia gwauraia hereva ta ese unai kekeni maragina ia hagoadaia ena abidadama ia herevalaia totona. Ia gwau: “Bema lauegu biaguna ese Samaria dekenai ia noho peroveta tauna dekenai ia lao neganai, iena lepera gorere do ia ore.”—2 King Taudia 5:1-3.
11 Unai kekeni maragina ena gari lasi karana dainai, Namana ia diba “tanobada ibounai lalonai Dirava ta be lasi, to Israela ena Dirava sibona.” Namana ese ena lalona ia hadaia danu, ia gwau: “Harihari ia lao, lau ese boubou karadia do lau karaia neganai, dirava ta dekenai do lau henia lasi, to Lohiabada [“Iehova,” NW ] sibona dekenai do lau henia.” (2 King Taudia 5:15, 17) Iehova ese unai kekeni maragina ena gari lasi karana ia hanamoa momokani. Hari idia noho matamata taudia dekenai unai bamona do ia karaia danu. Leah ese ia davaria unai be momokani. Gabeai, iena sikuli turadia haida idia mai, bona ia idia hamaoroa Memero Kekeni Edia Henanadai bukana ese edia kara ia durua. Leah ia gwau: “Lau moale badina lau diba lau ese ma haida lau durua Iehova idia diba totona bona edia kara idia haidaua totona.”
12. Edena dala ai goada oi abia diba oiemu abidadama ia henanadailaia tauna oi haere henia totona?
12 Jennifer bona Leah ese idia davaria gauna be oi ese oi davaria diba. Petero ena hereva oi badinaia, ia gwau oi be Keristani tauna ta dainai “bema haida ese emui abidadama . . . totona umui idia nanadaia neganai, nega ibounai do umui naria hegaegae noho, idia do umui haere henia totona. To mai mataurai bona manau danu do umui haere.” (1 Petero 3:15) Edena bamona unai oi karaia diba? Aposetolo edia negai idia noho Keristani taudia edia kara oi tohotohoa, Iehova dekenai idia guriguri idia do ia durua mai “gari lasi” ida do idia haroro totona. (Kara 4:29) Unai dainai namona be haida dekenai oi abia dae gaudia oi herevalaia neganai, oi gari lasi. Reana idia vara gaudia dainai do oi hoa. Bona danu, Iehova ena kudouna do oi hamoalea.
Vidio Bona Sikuli Gaukara
13. Matamata taudia haida ese edena dala idia gaukaralaia haida dekenai idia haroro totona? (Rau 11 bona 12 dekenai idia noho maua itaia.)
13 Matamata taudia momo be edia sikuli turadia bona tisa taudia dekenai edia abidadama idia herevalaia totona vidio idia gaukaralaia. Nega haida, sikuli dekenai idia abia gaukara idia gaukaralaia Iehova ena ladana idia hanamoa totona. Hegeregere, memero rua edia mauri lagani be 15, idia be Iehova ena Witnes taudia, edia klas ta dekenai gaukara ta idia abia, bona taunimanima ese idia badinaia tomadihona ta ena ripoti ta do idia torea. Idia ruaosi idia gaukara hebou unai idia torea totona, bona Iehova ena Witnes taudia idia herevalaia, idia ese Jehovah’s Witnesses—Proclaimers of God’s Kingdom bukana idia gaukaralaia.b Bona danu, miniti 5 lalonai klas vairanai idia gini bona idia hereva. Gabeai, tisa bona stiuden taudia be mai edia henanadai momo bona unai memero rua be miniti ma 20 lalonai klas vairana idia gini. Unai murinai, edia klas turadia be Iehova ena Witnes taudia dainai henanadai momo idia do henia!
14, 15. (a) Dahaka dainai taunimanima gari henia karana be tarapu ta? (b) Dahaka dainai oi diba momokani haida dekenai oi abia dae gaudia oi herevalaia neganai do idia kamonai?
14 Ataiai idia noho ekspiriens ese idia hahedinaraia bamona, hahenamo badana oi abia diba bema Iehova ena Witnes tauna ta bamona oiemu abidadama be ma haida dekenai oi herevalaia. Namo lasi taunimanima gari henia karana ese emu gaukara namona ma haida oi durua Iehova idia diba totona amo ia vara moalena ia koua. Baibel ia gwau: “Taunimanima do oi gari henia neganai, dika do oi davaria, tarapu lalonai oi moru bamona. To bema Lohiabada oi abidadama henia neganai, mauri do oi davaria noho.”—Aonega Herevadia 29:25.
15 Laloaboio lasi, oi be Keristani matamata tauna ta bona oi abia gauna be emu turadia idia ura dikadika idia abia—noho namona hari bona vaira negana totona mauri hanaihanai gwauhamatana. (1 Timoteo 4:8) United States dekenai—reana oi laloa unai gabu dekenai taunimanima momo ese tomadiho idia laloa lasi eiava tanobada gaudia idia laloa bada—tahua gaukarana ta ese ia hahedinaraia matamata taudia 50 pesen bamona ese tomadiho idia laloa bada, bona ma haida idia gwau edia mauri dekenai tomadiho be “mai anina badana gauna.” Reana tanobada ena gabu ma haida dekenai be unai bamona danu. Unai dainai, emu sikuli turadia dekenai Baibel ena hereva oi herevalaia neganai do idia moale idia kamonai totona.
Emu Matamata Negana ai, Iehova Kahirakahira Oi Lao
16. Iehova oi hamoalea totona, ma haida dekenai ia oi herevalaia sibona lasi, to dahaka danu oi karaia?
16 Oibe, Iehova ena kudouna oi hamoalea totona ma haida dekenai ia oi herevalaia sibona lasi, to gau haida danu oi karaia. Namona be oiemu kara oi hanamoa bona do ia hegeregere iena taravatu danu. Aposetolo Ioane ia gwau: “Dirava ita lalokau henia ena anina be inai: Dirava ena taravatu do ita badinaia. Iena taravatu be metau lasi.” (1 Ioane 5:3) Do oi davaria unai hereva be momokani bema Iehova kahirakahira oi lao. Edena bamona unai do oi karaia?
17. Edena dala ai Iehova kahirakahira oi lao diba?
17 Nega oi atoa Baibel bona Baibel idia herevalaia buka bona magasin oi duahia totona. Iehova oi dibaia namonamo neganai, do oi hekwarahi lasi iena hereva oi kamonaia, bona ma haida dekenai ia oi herevalaia totona. Iesu ia gwau: “Tau namona ena lalona dekenai ia laloa gaudia be namo dainai, kara namodia do ia havaraia. . . . Taunimanima ese edia lalona dekenai idia honu gaudia, be do idia gwauraia, edia uduna dekenai.” (Luka 6:45) Unai dainai gau namodia amo emu lalona oi hahonua. Reana tahua gaudia haida oi atoa diba unai bamona oi karaia totona, ani? Reana vaira pura ena kongregesen hebou totona emu hegaegae karana oi hanamoa diba. Reana emu tahua gauna ta be hebou dekenai haere kwadogina oi henia, to mai emu kudouna ibounai ida oi karaia. Bona danu, gau badana be oi dibaia gaudia oi badinaia.—Filipi 4:9.
18. Ena be haida ese oi idia dagedage henia, to dahaka oi diba momokani?
18 Iehova tomadiho henia karana amo idia abia hahenamona be do ia noho nega daudau—oibe, hanaihanai. Momokani, oi be Iehova ena Witnes tauna ta dainai, nega haida taunimanima ese oi do idia dagedage henia eiava do idia kirikirilaia. To Mose oi laloa. Baibel ia gwau ia “be Dirava do ia henia davana namona ia laloa.” (Heberu 11:24-26) Iehova oi dibaia bona ia oi herevalaia totona oi hekwarahi dainai, ia ese emu hekwarahi ena davana namona do ia henia, bona unai oi daradaralaia lasi be namo. Momokani, “ia ese emui kara namodia do ia laloaboio lasi.”—Heberu 6:10.
[Footnotes]
a Iehova ena Witnes taudia ese idia karaia.
b Iehova ena Witnes taudia ese idia karaia.
Oi Laloatao, A?
• Dahaka dainai oi diba momokani Iehova ese emu hesiai gaukara ia laloa bada?
• Matamata taudia haida be sikuli dekenai idia haroro totona, edena dala haida idia gaukaralaia bona unai ese anina namona ia havaraia?
• Edena dala ai goada oi abia diba emu sikuli turadia dekenai oi haroro totona?
• Edena dala ai Iehova kahirakahira oi lao diba?
[Box/Pictures on page 12]
Idia Matamata Momokani Taudia Danu ese Iehova Idia Hanamoa!
Mauri lagani 13 idia do abia lasi matamata taudia be sikuli dekenai idia haroro danu. Inai ekspiriens haida mani oi laloa.
Amber ena mauri lagani be 10, bona ena greid 5 klas be, Tanobada Tuarina Iharuana lalonai Nazi taudia ese Iuda taudia idia dagedage henia karana, ia herevalaia bukana ta idia duahia. Amber be ena tisa totona Purple Triangles vidio ia mailaia. Tisa ia hoa badina Nazi taudia ese Iehova ena Witnes taudia idia dagedage henia danu. Tisa ese unai vidio be ena klas taudia dekenai ia hahedinaraia.
Alexa ena mauri lagani be 8 neganai, ena klas taudia dekenai revareva ta ia torea, bona krismas moalelaia karana lalonai ia vareai lasi ena badina ia hahedinaraia. Ena tisa ese unai revareva ia ura henia bada, ia ese Alexa ia hamaoroa unai revareva be iena klas turadia dekenai do ia duahia bona klas ma rua dekenai danu! Ena dokona kahana dekenai ia gwau: “Egu tama sina ese lau idia hadibaia ma haida idia abia dae herevadia, lauegu amo idia idau gaudia unai, lau matauraia totona, bona egu lalohadai krismas moalelaia karana lalonai lau vareai lasi be umui matauraia dainai, umui lau tanikiu henia.”
Eric be greid wan ia matamaia murinai, sikuli gabuna dekenai Lau Egu Bible Sivarai Buka ia abia lao bona tisa ia noia gwaumaoro ia henia ena klas turadia dekenai do ia hahedinaraia. Tisa ia gwau: “Lau laloa emu klas taudia dekenai sivarai ta oi duahia be namo.” Eric be unai bamona ia karaia. Gabeai, buka ena kopi ta idia ura abia matamata taudia ia nanadaia edia imana do idia abia isi. Taunimanima 18—tisa hahinena danu—be edia imana idia abia isi! Hari Eric ia laloa ia be mai ena haroro teritori.
Whitney ena mauri lagani be 9, bona ia moale badina ia be mai ena Sikuli Bona Iehova ena Witnes Taudiac buklet. Ia gwau: “Lagani ibounai egu sinana ese unai buklet be egu tisa taudia dekenai ia henia. To inai lagani ai lau sibona ese lau karaia. Unai buklet dainai egu tisa ese lau ia hanamoa bona ia gwau egu kara be namo herea.”
[Footnote]
c Ai gwauraia buka bona vidio ibounai be Iehova ena Witnes taudia ese idia karaia.
[Box/Pictures on page 11]
Haida ese Edia Abidadama Idia Herevalaia Totona Idia Gaukaralaia Daladia
Sikuli ena ripoti eiava gaukara ta idia henia neganai, haida ese hereva namona ta idia abia hidi unai amo idia haroro diba
Matamata taudia haida ese klas dekenai idia herevalaia gauna ia durua vidio eiava buka ta be edia tisa dekenai idia henia
Matamata taudia haida edia laga-ani negadia ai, Baibel eiava Baibel ia herevalaia bukana ta idia duahia neganai, matamata taudia ma haida be idia dekenai idia lao bona idia henanadai henidia
[Picture on page 10]
Edia gaukara idia karaia namonamo taudia ese matamata taudia idia durua diba, Iehova ena gaukara idia karaia totona