Matamata Taudia Idia Henanadai . . .

Dahaka Dainai Dirava Idia Herevalaia?

“Taunimanima ibounai be mai edia tomadiho. Namo lasi taunimanima oi doria emu Dirava idia tomadiho henia totona.”​—Lagani 14 merona ta, Racish, Guyana ai.

“Dirava lau herevalaia lasi badina lau do idia kirikirilaia ena hemarai lau abia garina.”​—Lagani 17 merona ta, Rohan, Guyana ai.

“Namona be Dirava ita kikilaia badina ia be iseda Havaraia Tauna dainai ita mauri noho.”​—Lagani 13 merona ta, Marco, Germany ai.

MATAMATA taudia edia herevahereva oi kamonai neganai, inai do oi itaia haraga: Nega momo Dirava idia herevalaia lasi. Spot gadara, dabua, muvini piksa, eiava ma kekeni o mero ena toana oi kikilaia neganai, vadaeni iboudiai idia ura kiki. Bema oi ura Dirava oi kikilaia, karaharaga herevahereva ia doko.

Matamata taudia haida ese Dirava idia abidadama henia lasi. Idia laloa ia idia itaia diba lasi dainai, ia noho lasi​—ia idia herevalaia lasi badina idia laloa unai be nega halusia kava karana. To, Dirava be lasi lalohadaina idia abia dae matamata taudia be momo lasi. Taunimanima momo idia nanadaia bona edia haere be George H. Gallup, Jr. ena buka lalonai, ia gwau, U.S. matamata taudia 100 100 amo 95 95 ese Dirava idia abidadama henia. Bona, Gallup ma ia gwau: “Matamata taudia momo idia laloa Dirava be siahu ta sibona lasi, to ia be tau ta bamona bona edia kara dainai do ia hanamodia eiava idia do ia panisia.” Dahaka dainai matamata taudia momo ese edia abidadama idia ura lasi idia herevalaia?

Dahaka Dainai Haida Idia Ura Lasi

Momo idia laloa abidadama bona tomadiho herevalaia be maoro lasi dainai, namo lasi ma ta ida idia kikilaia. Matamata taudia haida ese Dirava herevalaia karana idia lalohadailaia neganai, idia hemarai. Idia laloa, ‘Unai be matamata taudia edia kara lasi.’

Oiemu lagani tamona taudia edia lalohadai be herevana, to dahaka oi laloa? Bema oi be Iehova ena Witness kekeni o mero ta unai henanadai be mai anina. Dahaka dainai? Badina ma haida dekenai Dirava sivaraina gwauraia karana be iseda abidadama ena badina ta!​—Isaia 43:​9, 10; Mataio 24:14.

Ena be unai gaukara be mai anina bada, to Witness matamata taudia ese nega haida dagedage idia davaria dainai, haida idia ura lasi idia lao haroro​—eiava edia tama sina ese idia doria sibona neganai idia lao. Ma haida idia karaia to idia gari edia sikuli turadia ese do idia itaia. Sikuli lalonai, haida be edia tomadiho ese idia abia dae gaudia idia hunia. Nega momo sikuli taudia ese do idia kirikirilaia garina idia gari dainai idia hahedinaraia lasi. Tauhau ta, ladana Ryan ia gwau: “Dirava lau kikilaia neganai, egu turadia ese lau idia samania bona ladadia dikadia idia gaukaralaia dainai, lau gari bona egu hereva lau hadokoa.”

Haida ese Dirava idia kikilaia lasi badina be Baibel ena taravatu iboudiai do idia badinaia diba lasi garina idia gari. “Uhau edia lebulebu karadia” ese idia ia dibagania toho dainai, idia laloa namona be idia gwau lasi idia be Keristani taudia, badina idia moru garina.​—2 Timoteo 2:22.

Haida be Dirava idia herevalaia lasi badina idia laloa idia hegeregere lasi. Lagani 19 merona ta Wilton ese unai ia gwauraia, ia gwau: “Egu gaukara gabuna taudia dekenai Dirava lau herevalaia be auka badina lau laloa lau herevalaia gaudia lau hamomokania haraga diba lasi. Lau laloa bema egu abidadama idia samania, haere namona do lau henia diba lasi.”

Keristani Maduna Ta

Reana Dirava oi herevalaia momo lasi ena badina be ai gwauraia vadaeni gaudia hegeregerena dainai, a? Bema oibe, oi sibona lasi. Matamata taudia ma haida ese unai bamona lalohadai idia tuari henia danu. To, ena be Dirava herevalaia koua gaudia idia noho, to oi idia doria gaudia namodia idia noho danu. Badina haida be dahaka?

Marco, hamatamaia kahana ai ena hereva ai torea merona, ese badina namona ta ia kikilaia, ia gwau Dirava “be iseda Havaraia Tauna bona iseda mauri ia henia.” (Apokalupo 4:11) Oibe, mauri be mai anina bada harihari gauna ta. Salamo torea tauna ese Dirava ia herevalaia, ia gwau: “Oi be mauri ibounai ena badina.” (Salamo 36:9) Unai harihari gauna oi abia dainai, oi laloa oi tanikiu henia be maoro, a?

Iehova Dirava tanikiu henia dalana ta be ma haida vairanai ia ita hanamoa. Ia be dina, hua, medu, hodahoda, bona aniani edia Havaraia Tauna. (Kara 14:​15-17) Hahediba tauna Iamesi ia gwau: “Gau namodia ibounai, bona harihari gaudia namodia momokani ibounai, be Dirava dekena amo idia diho mai.” (Iamesi 1:17) Unai harihari gaudia dainai Dirava oi tanikiu henia, a? (Kolose 3:15) Tanikiu henia dalana hereadaena be Ia oi herevalaia, ani?​—Luka 6:45.

Momokani, Dirava be ita ia hagania Ia ita herevalaia totona. Iena Natuna, Iesu Keriso, ese Keristani taudia inai bamona ia oda henia: “Umui lao, bese ibounai be diba tahua taudia do umui halaoa.” (Mataio 28:​19, 20) Unai gaukara karaia maduna be matamata taudia edia danu. Salamo ia torea tauna ese ita ia hamaoroa: “Ulato bona uhau, buruka taudia, bona natuna maragidia danu, namona be idia ibounai ese, Lohiabada ena ladana do idia hanamoa bada! Iena ladana badana ese, taunimanima ibounai edia ladana badana ia hereaia noho. . . . ia ese tanobada bona guba ia hereaia noho.” (Salamo 148:​7, 12, 13) Namo lasi oi laloa unai maduna be maduna metauna ta. Momokani, ia be hahenamo ta​—Oi bona Dirava be “Dirava ena gaukara [umui] karaia hebou noho.”​—1 Korinto 3:9.

Bema oi laloa oi hegeregere lasi, dahaka oi karaia? Baibel negadia ai, peroveta tauna Ieremia be unai bamona ia laloa. Ia gwau: “Lohiabada Dirava e, lau be hereva dalana lau diba lasi, lau be mero sibona.” Iehova be dahaka ia gwau? “Do oi hereva lasi, ‘Lau be mero sibona,’ badina be lau ese taunimanima dekenai oi do lau siaia, bona oi be idia dekenai do oi lao. Bona oi dekenai lau henia hereva ibounai be idia dekenai do oi hamaoroa.” (Ieremia 1:​6, 7) Iehova ena heduru dainai, lagani 40 lalonai Ieremia ese ena gaukara ia karaia!

Hari inai nega ai idia noho Keristani taudia danu idia diba, ‘Dirava sibona ese aonega idia dekenai ia henia, vadaeni inai gaukara idia karaia diba.’ (2 Korinto 3:5) Bema oi be hereva momo lasi, bona hemarai haraga tauna ta, Dirava ese oi do ia durua oi hereva mai laloa-goada ida. Keristani kongregesen amo heduru oi abia bena ‘inai gaukara oi karaia diba,’ Dirava ena Hereva do oi hadibaia diba. Bema oi ura heduru oi abia, mani emu kongregesen lalonai ia noho elda tauna ta oi noia. Reana heduru gauna be auka lasi, sibona emu Baibel stadi sediual oi hanamoa, eiava lo tadikaka ta ida oi gaukara be namo.

Dahaka Oi Karaia Diba

Dirava herevalaia karana ese mamina namona ia havaraia diba. Gau ta be, oiemu lagani tamona taudia ese mauri ena hekwakwanai hanamoa gaudia idia tahua, idia ura dikadika heduru idia abia. Idia diba lasi edeseniai unai hanamoa gaudia idia noho bona nega vairai dahaka do ia vara. Edia henanadai haida be inai: ‘Dahaka dainai ita noho? Dahaka do ia vara ita dekenai? Dahaka dainai inai tanobada be hekwakwanai amo ia honudae?’ Oi be Keristani ta dainai, haere oi diba, bona emu lagani tamona taudia oi hadibaia diba. Oi idia diba vadaeni, bona do idia ura edia lagani tamona mero o kekeni ta idia hereva henia, taunimanima badadia dekenai ia auka sisina.

Momokani, nega haida oi do idia dadaraia. To idia haida be Baibel ena sivarai idia ura kamonai. Basi ta ai, Witness kekeni ta be ena Memero Kekeni edia Henanadai​—Haere Maorodia bukana ia duahia.a Ia badinaia ia helai mero ta ese iena buka ia itaia. Ia gwau: “Unai be buka namo hereana ta! Dirava ia herevalaia momo. Taunimanima momo be tomadiho idia laloa bada lasi.” Dala ia kehoa nega daudau lalonai Witness kekenina ese Dirava ena ladana ia herevalaia.

Momokani, oi hahedinaraia oi be Keristani ta neganai, oi diba namona be Keristani karana oi hahedinaraia. (1 Petero 2:12) Keristani karana ese oiemu sivarai do ia hamomokania. Tauhau Eric ena sivarai oi laloa. Iena sikuli lalonai idia noho Witness matamata taudia edia kara be namo. Unai ese ia ha-uraia Dirava ia dibaia totona. Baibel stadi idia hamatamaia, bona hari ia bapatiso vadaeni bona Iehova ena Witness taudia edia brens opesi badana New York lalonai ia gaukara.

Dirava herevalaia karana ese oi ia durua danu! Oi ia naria diba. Oi idia bamoa taudia idia diba oi be Iehova ena Witness tauna neganai, idia momo ese oi do idia matauraia. Idia diba taravatu namodia oi badinaia dainai, nega momo oi do idia doria lasi kara dika lalonai oi vareai totona, badina Baibel amo oi karaia lasi ena badina do oi hahedinaraia.

To, ita gwau lasi ena anina be emu uduna oi kehoa neganai hanaihanai Baibel siri ta sibona do oi kikilaia. Nega haida spot, dabua, eiava miusik do oi ura kikilaia. To laloaboio lasi: “Tau ena lalona ia honu momokani gaudia dekena amo iena uduna ia hereva.” (Mataio 12:34) Bema emu kudou dekenai Dirava oi lalokau henia momokani, Ia do oi ura herevalaia. Gabeai do ai halasia Noga! magasin ese Dirava herevalaia namonamo daladia haida do ia kikilaia.

[Footnotes]

[Picture on page 23]

Oi haroro noho lalonai emu sikuli turadia ese oi idia itaia neganai, oi hemarai, a?