“Do Umui Gari Lasi, Bona Do Umui Laloa Manoka Lasi”
“Do umui gari lasi, bona do umui laloa manoka lasi, . . . Lohiabada be umui danu do ia noho.”—2 SIVARAI 20:17.
1. Terorist karana be taunimanima dekenai dahaka ia havaraia, bona dahaka dainai edia gari ita lalo-pararalaia?
TERORIST KARANA! Unai hereva ese gari, daradara bona heduru be lasi mamina, lalo-hisihisi, bona badu ia havaraia. Bona momo idia laloa unai hereva ese lagani momo lalonai taunimanima dekenai gari do ia havaraia noho. Momokani, lagani momo lalonai, tano haida idia hekwarahi terorist karadia idauidau idia hadokoa totona, to unai kara idia kokia momokani lasi dainai, taunimanima idia gari.
2. Iehova ena Witnes taudia be edena bamona idia laloa terorist karana dekenai, unai dainai dahaka henanadai idia vara?
2 To, helaro momokanina ia noho. Iehova ena Witnes taudia be tanobada ena tano bona gabu 234 dekenai idia haroro goadagoada, bona idia diba vaira negana do ia namo. Terorist karana do ia doko diba lasi dainai idia gari lasi, to idia diba momokani kahirakahira do ia ore. Edia lalohadai oi abia dae be namo, a? Daika ia hegeregere terorist karana ia kokia totona, bona edena bamona do ia vara? Reana ita ibounai ese dagedage karana ta ita mamia vadaeni dainai, namona be vaira neganai namo do ia vara lalohadaina ena badina ita tahua.
3. Dahaka badina haida dainai taunimanima idia gari, bona iseda nega totona Paulo be dahaka ia perovetalaia?
3 Hari inai negai, badina idauidau dainai taunimanima idia gari bona idia lalo-manoka. Idia buruka dainai sibodia idia naria diba lasi taudia, do idia hanamoa diba lasi gorere idauidau ese idia hamanokaia taudia, bona tauanina gaudia abia totona moni dalanai idia hekwarahi ruma besedia momo herea mani oi laloa. Momokani, ita diba lasi iseda mauri dekenai dahaka do ia vara! Aksiden dainai do ita mase haraga eiava dika badana ta ia mai noho, ita laloa bada gaudia hadikaia ore totona. Unai bamona gari bona lalo-hekwarahi, bona ita dekenai idia vara hepapahuahu bona lalo-hisihisi danu, be aposetolo Paulo ese ia gwauraia negana hegeregerena, ia gwau: “Namona be oi diba, nega ena dokona dekenai, metau dikadia momo do idia vara. Badina taunimanima ese idia edia ura sibona do idia tahua. . . . Idia be lalokau do idia diba lasi, do idia bogahisihisi lasi, haida edia ladana do idia hadikaia kava, do idia lebulebu, do idia dagedage, kara namodia do idia ura henia lasi.”—2 Timoteo 3:1-3.
4. Timoteo Iharuana 3:1-3 ese ia herevalaia gaudia ese edena lalohadai namona ia henia?
4 Ena be unai siri ese metau dikadia ia herevalaia, to helaro ia henia. Unai metau dikadia be Satani ena tanobada dikana ena “nega ena dokona” sibona lalonai do idia vara. Unai ena anina be ena dokona be kahirakahira bona kahirakahira inai tanobada dikana ena gabu be Dirava ena Basileia goevadaena ese do ia abia, Iesu ese iena murinai idia raka taudia ia hadibaia unai Basileia totona do idia guriguri. (Mataio 6:9, 10) Unai Basileia be Dirava ena guba gavamanina, peroveta tauna Daniela ia gwau ta ese do ia “hadikaia diba lasi” to “unai basileia ese basileia ibounai do ia hamakohia, bona haorea momokani, bona ia sibona do ia noho ela bona hanaihanai.”—Daniela 2:44.
Keristani Gini Siri Karana Bona Terorist Karana
5. Terorist karana hadokoa herevana dekenai bese idauidau be dahaka idia karaia?
5 Lagani momo lalonai, terorist karana dainai taunimanima tausen momo idia mase. September 11, 2001 ai, New York City bona Washington, D.C. ai terorist karana ia vara murinai, tanobada ibounai ese unai kara ia havaraia dika idia lalo-pararalaia matamaia. Tanobada hegegemadai terorist karana ia bada dainai, bese idauidau idia hebou haraga unai idia hadokoa totona. Hegeregere, December 4, 2001 ai, nius halasia oreadia edia ripoti ta ia gwau, “Europe, North America bona Central Asia tano amo idia mai minista ibounai 55 be mai lalo-tamona ida palani ta idia karaia” idia gaukara hebou totona. U.S. ena dagi bada tauna ta ese unai kara ia hanamoa bona ia gwau unai ese “goada matamata ia henia” terorist karana idia koua totona. Haraga herea taunimanima milioni momo be The New York Times Magazine ese ia gwauraia “tuari badana” lalonai idia vareai. Edia hekwarahi ena anina do ia vara eiava lasi be gabeai do ita itaia. To, unai bamona terorist karadia koua totona idia karaia tuarina ese taunimanima momo dekenai gari bona lalo-hekwarahi mamina ia havaraia, to Dirava idia abidadama henia taudia be unai bamona lasi.
6. (a) Dahaka dainai nega haida taunimanima haida ese Iehova ena Witnes taudia edia Keristani gini siri karana idia abia dae be auka? (b) Iesu be politikol karadia dekenai dahaka haheitalai namona ia hahedinaraia ia murinai idia raka taudia totona?
6 Taunimanima momo idia diba Iehova ena Witnes taudia be politikol karadia amo idia gini siri. Maino negana ai reana taunimanima momo ese edia gini siri karana be mai edia ura ida idia abia dae, to edia noho dalana dekenai gau idauna ta ia vara neganai, edia lalohadai idia haidaua. Nega momo, tuari ese ia havaraia gari bona daradara ese taunimanima dekenai lalohadai goadana ia henia, edia bese idia abia isi totona. Unai dainai momo idia lalo-parara lasi dahaka dainai haida idia ura lasi bese abia isi karana idia durua. To, Keristani taudia momokanidia idia diba Iesu ena hahegani, idia “be tanobada ena lasi,” idia badinaia be namo. (Ioane 15:19; 17:14-16; 18:36; Iamesi 4:4) Unai ena anina be politikol bona taunimanima ese idia karaia kara idauidau amo idia gini siri. Iesu sibona ese haheitalai maorona ia hahedinaraia. Iena aonega goevadaena bona iena diba bada herea ita laloa neganai, unai nega dekenai taunimanima edia kara idauidau ia hanamoa diba. To, politikol karadia lalonai ia vareai lasi. Ena haroro gaukara ia hamatamaia neganai, Satani ese ia dekenai tanobada ena basileia ibounai ia lohiaia siahuna ia henia toho, to ia dadaraia momokani. Gabeai, politikol dagi totona idia ura abia hidi neganai, mai goada ida ia dadaraia.—Mataio 4:8-10; Ioane 6:14, 15.
7, 8. (a) Iehova ena Witnes taudia be politikol karadia amo idia gini siri karana be edena bamona ita laloa kerere lasi, bona dahaka dainai? (b) Edena dala ai Roma 13:1, 2 ese gavamani dagedage henia karadia lalonai vareai karana ia koua?
7 Namo lasi Iehova ena Witnes taudia edia gini siri karana ita laloa kerere, unai amo ita laloa idia ese dagedage karadia idia durua eiava idia abia dae. Bema unai bamona idia karaia, idia sibodia be “lalokau bona maino ena Dirava” ena hesiai taudia idia gwauraia diba lasi. (2 Korinto 13:11) Iehova ena hemami dagedage karadia dekenai idia diba. Salamo torea tauna ia gwau: “Iehova ese kara maoromaoro tauna bona kara dika tauna ruaosi edia kara ia tahua, Bona Ena souli ese dagedage ia ura henia tauna ia inai henia momokani.” (Salamo 11:5, NW ) Iesu be aposetolo Petero dekenai ia gwauraia herevana idia diba danu, ia gwau: “Emu tuari kaia be ena gabu dekenai oi atoa lou, badina be tuari kaia idia iusilaia taudia ibounai, be tuari kaia dekenai do idia mase.”—Mataio 26:52.
8 Ena be histori ese ia hahedinaraia goevagoeva Keristani taudia koikoidia be nega momo “tuari kaia” idia gaukaralaia, to Iehova ena Witnes taudia dekenai unai be momokani lasi. Unai bamona karadia ibounai lalonai idia vareai lasi. Witnes taudia ese Roma 13:1, 2 ena hahegani idia badinaia, ia gwau: “Taunimanima ibounai ese gavamani do idia kamonai henia. Badina be gavamani ta ia noho diba lasi bema Dirava ia ura lasi neganai. Gavamani ena siahu be Dirava ese ia henia. Unai dainai, gavamani ena hereva idia kamonai henia lasi taudia be Dirava danu idia kamonai henia lasi. Edia kerere davana do idia abia.”
9. Edena dala rua amo Iehova ena Witnes taudia ese terorist karana idia dadaraia?
9 To, terorist karana be ia dika momokani dainai, Iehova ena Witnes taudia be gau ta idia karaia diba unai kara idia dadaraia totona, a? Oibe, gau ta idia karaia be namo, bona idia karaia noho. Gau ginigunana be, idia sibodia be unai bamona kara lalonai idia vareai lasi. Gau iharuana be, taunimanima dekenai Keristani hakaua herevadia idia hadibaia bona unai idia badinaia neganai, dagedage karadia idauidau idia karaia lasi.a Lagani gunanai, Witnes taudia ese hora 1,202,381,302 idia gaukaralaia, taunimanima idia durua unai Keristani mauri dalana idia dibaia totona. Edia nega idia haorea kava lasi, unai gaukara idia karaia dainai, taunimanima 265,469 ese bapatiso idia abia bona Iehova ena Witnes taudia ai idia lao, unai amo idia hahedinaraia dagedage karadia idia dadaraia momokani.
10. Hari inai tanobada ai, dagedage karadia kokia dalana ia noho, a?
10 Bona danu, Iehova ena Witnes taudia idia diba idia sibona edia siahu amo tanobada ena dika idia kokia diba lasi. Unai dainai edia abidadama ibounai be unai ia karaia diba tauna—Iehova Dirava—dekenai idia atoa. (Salamo 83:18) Ena be mai momokani ida taunimanima idia hekwarahi, to dagedage karadia idia haorea diba lasi. Dirava ena lauma amo Baibel ia torea tauna be iseda nega, “nega ena dokona,” totona ita ia sisiba henia, bona ia gwau: “Kara dika taudia bona koikoi taudia ese edia kara dika bona edia koikoi do idia habadaia. Idia ese tau haida do idia koia, bona ma tau haida ese idia danu do idia koia.” (2 Timoteo 3:1, 13) Unai amo ita itaia diba, taunimanima idia hekwarahi dika idia haorea totona, to do idia kwalimu diba lasi. To, Iehova dekenai ita tabekau diba, ia ese dagedage karadia do ia haorea momokani.—Salamo 37:1, 2, 9-11; Aonega Herevadia 24:19, 20; Isaia 60:18.
Idia Dagedage Henia Gwauraia Neganai Idia Gari Lasi
11. Iehova be dahaka ia karaia vadaeni dagedage karadia ia kokia totona?
11 Maino Diravana be dagedage karadia ia ura henia lasi dainai, ita lalo-parara diba dahaka dainai ia ura dagedage karadia ia havaraia tauna, Satani Diabolo, ia hadikaia. Momokani, Dirava ese aneru badana Mikaela—Ia ese ia abia hidi King, Keriso Iesu—amo Satani be hemarai dalana ai ia halusia vadaeni. Baibel ese unai ia herevalaia, ia gwau: “Guba dekenai tuari ia vara. Mikaela mai ena aneru momo danu ese huala idia tuari henia. Huala mai ena aneru momo danu ese Mikaela idia tuari henia. To huala ena goada hegeregere lasi dainai ia kwalimu lasi. Unai dainai huala mai ena aneru be dala lasi guba dekenai do idia noho. Vadaeni unai huala badana, be Dirava ena aneru ese idia negea diho. Ia be unai idaunegai gaigaina, bona iena ladana be Diabolo bona Satani. Ia be tanobada taudia ibounai ia koia noho gauna. Oibe, ia, mai ena aneru ibounai danu, be idia ese tanobada dekenai idia negea diho.”—Apokalupo 12:7-9.
12, 13. (a) Lagani 1914 ai dahaka ia vara? (b) Esekiela ena peroveta herevana lalonai Dirava ena Basileia idia durua taudia dekenai dahaka do ia vara?
12 Baibel ena nega duahia dalana bona tanobada dekenai idia vara gaudia ese idia hahedinaraia lagani 1914 ai guba dekenai unai tuari ia vara. Unai nega amo ema bona hari, tanobada dekenai idia vara gaudia idia dika momokani. Apokalupo 12:12 ese unai ia vara ena badina ia hahedinaraia, ia gwau: “Guba e, bona guba lalonai noho taudia e! Unai kara dainai do umui moale bada! To tanobada bona davara, madi o, nega dika bada do umui davaria! Badina be Satani ese umui dekenai ia lao vadaeni, mai ena badu dikadika. Ia badu, badina ia diba iena nega be ia kwadogi sibona.”
13 Ita lalo-parara diba, Diabolo ena badu be Dirava idia tomadiho henia horoa taudia bona edia bamodia, “mamoe idaudia” dekenai ia hahedinaraia. (Ioane 10:16; Apokalupo 12:17) Diabolo ese Dirava ia haginia Basileia idia durua bona idia abidadama henia taudia do ia dagedage henidia bada neganai, ena dokona do ia ginidae. Unai dagedage karana be Esekiela karoa 38 ese ia herevalaia “Goga, Magoga tauna” ese do ia karaia tuarina.
14. Guna Iehova ena Witnes taudia be edena gima karana idia moalelaia, bona unai gima karana do idia moalelaia noho, a?
14 Satani be guba amo idia negea diho dainai, nega haida Dirava ena taunimanima be Satani ena dagedage karadia amo politikol oredia haida ese idia gimaia, Apokalupo 12:15, 16 ese unai be laulau dalanai ia herevalaia. To, Baibel ia gwau Satani ena dagedage karana ginigabena lalonai, taunimanima edia orea ta ese Iehova idia abidadama henia taudia do idia gimaia lasi. Unai kara dainai Keristani taudia do idia gari eiava lalo-manoka, a? Lasi momokani!
15, 16. (a) Iehosapata ena nega ai, Iehova ena hagoadaia herevana ena taunimanima dekenai be hari idia noho Keristani taudia dekenai dahaka ia hadibaia? (b) Hari idia noho Iehova ena hesiai taudia dekenai, Iehosapata bona ena negai idia noho taunimanima ese edena dala idia hahedinaraia?
15 Dirava ese iena taunimanima do ia durudia, King Iehosapata ena nega ai Israela besena ia durudia hegeregerena. Baibel ia gwau: “King Iehosapata bona Iuda bona Ierusalema taudia ibounai e, Lohiabada ese inai bamona ia hereva: ‘Do umui gari lasi, bona emui kudoudia do idia manoka lasi inai tuari orea taudia momo herea dainai, badina tuari be emui tuari lasi, to Dirava ena. . . . Iuda bona Ierusalema taudia e, inai tuari dekenai be do umui tuari lasi. To emui gabu dekenai do umui gini, bona naria noho sibona, vadaeni Lohiabada ena kwalimu umui dainai do umui itaia. Do umui gari lasi, bona do umui laloa manoka lasi, kerukeru be idia tuari henia totona do umui lao, bona Lohiabada be umui danu do ia noho.’ ”—2 Sivarai 20:15-17.
16 Iehova ese Iuda taudia ia hagoadaia tuari totona do idia lao lasi. Unai hegeregerena, Goga, Magoga tauna ese Dirava ena taunimanima ia dagedage henidia neganai, sibodia idia gimaia totona tuari gaudia do idia gaukaralaia lasi. To, do idia “gini, bona naria noho sibona, vadaeni Lohiabada ena kwalimu” idia dainai do idia itaia. Oibe, namo lasi ita laloa ita gini bona naria noho karana ena anina be gau ta ita karaia lasi, lasi, to namona be ita gaukara, Iehosapata ena negai Dirava ena taunimanima idia gaukara bamona. Baibel ia gwau: “Vadaeni Iehosapata ese ia tui diho, bona iena vairana be tano dekenai ia atoa diho. Bona Iuda bona Ierusalema taudia ibounai danu Lohiabada ena vairanai edia vairadia be tano dekenai idia atoa, idia tomadiho henia. . . . Iehosapata be unai taunimanima danu idia herevahereva, vadaeni ia ese Lohiabada hanamoa ane do idia abia taudia ia abia hidi. Vadaeni idia ese dabua helagadia idia atoa, bona idia be Iuda tuari orea ena vairanai idia raka lao, idia gwau, ‘Lohiabada do ita hanamoa, badina iena bogahisihisi kara do ia noho hanaihanai.’ ” (2 Sivarai 20:18-21) Oibe, ena be edia inai taudia ese idia dagedage henidia, to idia ese Iehova idia hanamoa noho. Unai ese Iehova ena Witnes taudia dekenai dala ia hahedinaraia Goga be idia ia dagedage henia neganai, unai bamona do idia karaia.
17, 18. (a) Hari Iehova ena Witnes taudia ese edena lalohadai namona, Goga ena dagedage karadia dekenai idia abia? (b) Keristani matamata taudia be vanegai sibona edena hadibaia herevana idia abia?
17 Ela bona unai nega ia ginidae—bona Goga ena dagedage karadia ia matamaia negana murinai danu—Iehova ena Witnes taudia be Dirava ena Basileia do idia durua noho. Tanobada hegegemadai idia noho kongregesen 94,600 mai kahana ida idia hebamo dainai, goada bona namo do idia davaria noho. (Isaia 26:20) Hari be nega namo hereana mai gari lasi ida Iehova ita hanamoa totona! Momokani, idia diba kahirakahira Goga ese idia do ia dagedage henidia bada, to unai dainai idia gari lasi. To, idia ia hagoadaia edia mauri dinadia lalonai hanamoa herevadia namodia gwauraia karana idia habadaia.—Salamo 146:2.
18 Tanobada ibounai dekenai ful-taim hesiai gaukarana idia karaia matamata taudia tausen momo, ese unai lalohadai namona idia hahedinaraia namo herea. Unai bamona mauri dalana oi abia hidi ena namo hahedinaraia totona, lagani 2002 ena distrik hebouhebou dekenai inai pepapepa ladana Matamata Taudia e—Emui Mauri be Edena Bamona Do Oi Gaukaralaia? idia halasia. Keristani taudia, matamata bona buruka taudia, be nega korikori ai idia abia hadibaia herevadia dainai idia moale.—Salamo 119:14, 24, 99, 119, 129, 146.
19, 20. (a) Dahaka dainai Keristani taudia idia gari eiava lalo-manoka be badina lasi? (b) Stadi hereva gabena ese dahaka do ia karaia?
19 Ena be tanobada ai dika ia bada ia lao, to Keristani taudia idia gari eiava lalo-manoka lasi be namo. Idia diba Iehova ena Basileia ese kahirakahira dagedage karadia idauidau ibounai do ia haorea momokani. Bona dagedage karadia dekenai edia mauri idia haboioa taudia ibounai do ia hatoreisia lou, unai ese edia lalona ia hagoadaia danu. Idia toreisi lou taudia haida dekenai unai ese dala do ia kehoa Iehova idia dibaia totona, bona ma haida do ia durua edia hesiai gaukara ia dekenai idia karaia noho totona.—Kara 24:15.
20 Ita be Keristani taudia korikoridia dainai, Keristani gini siri karana ita lalo-pararalaia be namo bona iseda lalona ita hadaia unai bamona ita karaia totona. Ita ura ‘eda gabu dekenai do ita gini, bona naria noho sibona, vadaeni Iehova ena kwalimu do ita itaia,’ unai helaro namona do ita dogoatao noho. Hereva gabena ese iseda abidadama do ia hagoadaia, ita do ia hadibaia hari idia vara gaudia ese ita dekenai Baibel ena peroveta herevadia idia guguru karana dekenai, diba ma haida ia henia.
[Footnote]
a Witnes taudia ai idia lao totona dagedage maurina idia rakatania taudia edia sivarai be, Noga! April, 1990, rau 17; Awake! August 8, 1991, rau 18; bona Gima Kohorona January 1, 1996, rau 5; August 1, 1998, rau 5 itaia.
Anina Oi Gwauraia Diba, A?
• Dahaka dainai taunimanima momo idia laloa gau namona ta do ia vara lasi?
• Dahaka dainai Iehova ena Witnes taudia idia laloa vaira negana do ia namo?
• Iehova ese dahaka ia karaia vadaeni dagedage karadia ia havaraia tauna dekenai?
• Dahaka dainai Goga ena dagedage karadia dainai ita gari lasi be namo?
[Picture on page 17]
Keristani gini siri karana dekenai Iesu ese haheitalai namona ia hahedinaraia
[Pictures on page 20]
Witnes matamata taudia tausen momo be mai moale ida ful-taim hesiai gaukara idia karaia
[Picture Credit Line on page 16]
UN PHOTO 186226/M. Grafman