Umui Naria Noho Bona Iehova Ena Kwalimu Do Umui Itaia!
“Emui gabu dekenai do umui gini, bona naria noho sibona, vadaeni Lohiabada ena kwalimu umui dainai do umui itaia.”—2 SIVARAI 20:17.
1, 2. Dahaka dainai “Goga, Magoga tano tauna,” ena dagedage karadia ese tanobada hegegemadai dekenai ia vara terorist karana ia hereaia?
HAIDA idia gwau terorist karana be tanobada taudia ibounai dagedage henia karana, iseda mauri dalana ia hadikaia danu. Ita lalo-parara diba, unai bamona hagaria karana ita laloa namonamo be namo. To, dagedage karana ma ta ita laloa bada be namo, tanobada taudia ese unai idia laloa bada lasi. Ia be dahaka?
2 Ia be Baibel ese Esekiela karoa 38 dekenai ia herevalaia dagedage karana, “Goga, Magoga tano tauna,” ese do ia havaraia gauna. Bema ita gwau unai dagedage karana ese tanobada hegegemadai dekenai ia vara terorist karana ia hereaia, unai be hereva koikoina, a? Lasi momokani, badina Goga ena dagedage karana be taunimanima edia gavamani hadikaia karana sibona lasi. To Dirava ena guba gavamani ia dagedage henia! Taunimanima be idia hegeregere lasi edia gavamani dekenai ia vara dika idia haheaukalaia, to Havaraia Tauna be ia hegeregere momokani Goga ena dagedage bada karadia ia haheaukalaia totona.
Dirava Ena Gavamani Ia Dagedage Henia
3. Lagani 1914 amo tanobada ena lohia taudia be dahaka boiboi herevana idia abia, bona edena bamona idia kara?
3 Lagani 1914 ai, Dirava ena Basileia be guba dekenai idia haginia neganai, Dirava ena lohia noho Pavapavana bona Satani ena tanobada dikana huanai tuari ia vara matamaia. Unai nega ai, taunimanima edia lohia taudia idia hadibaia Dirava ese ia abia hidi Lohia Tauna do idia abia dae. To idia ura lasi unai bamona idia karaia, Baibel ese ia perovetalaia bamona: “Edia king taudia be tuari totona idia toreisi, bona edia lohia taudia ese idia haboua noho. Idia ura be, Lohiabada bona ia ese ia Abia Hidi Tauna, do idia dagedage henia. Idia gwau, ‘Ita ura lasi Lohiabada, bona iena King henunai do ita noho, Idia ese ita idia guia vadaeni, be ita ese unai guia varodia do ita negea.’ ” (Salamo 2:1-3) Goga, Magoga tauna ena dagedage karana ia matamaia neganai, Basileia ena lohia siahuna abia dae lasi karana do ia bada ia lao.
4, 5. Edena dala ai taunimanima ese Dirava ena guba gavamanina, idia itaia diba lasi gauna idia tuari henia diba?
4 Reana ita laloa taunimanima be edena bamona idia itaia diba lasi guba gavamanina idia heatu henia diba. Baibel ese ia hahedinaraia unai gavamani lalonai ‘taunimanima 144,000, Dirava ese tanobada dekena amo ia hamauria’ taudia unai, bona “Mamoe Natuna” Keriso Iesu, idia noho. (Apokalupo 14:1, 3; Ioane 1:29) Unai gavamani matamata be guba dekenai ia noho dainai, Baibel ese ia be “guba matamata,” ia gwauraia bona ia henunai idia noho taudia ia gwauraia, “tanobada matamata.” (Isaia 65:17; 2 Petero 3:13) Keriso ida do idia lohia taudia 144,000 taudia momo, be mai edia kamonai ida edia tanobada maurina idia haorea vadaeni. Idia hamomokania idia be idia hegeregere momokani guba dekenai edia hesiai gaukara matamatana idia karaia totona.
5 To, 144,000 edia orea maragina be tanobada dekenai idia do noho. Lagani 2002 ai, Lohiabada ena Anibou hebouna dekenai idia lao taudia 15,000,000 mai kahana amo, 8,760 sibona ese paraoa idia ania bona uaina idia inua karana amo, edia helaro idia hahedinaraia. Basileia ena lohia oreana ai do idia lao taudia oredia idia dagedage henia taudia be momokani Dirava ena Basileia idia dagedage henia noho.—Apokalupo 12:17.
King Ia Kwalimu
6. Iehova bona Keriso edia lalohadai Dirava ena taunimanima dagedage henia karana dekenai be dahaka?
6 Iehova ena hemami ia haginia Basileia dagedage henia karana dekenai be Baibel ese ia perovetalaia: “Guba dekenai ia noho Dirava ese, idia dekenai do ia kiri. Ia ese edia laloa dekenai do ia hevaseha. Ia ese idia do ia gwau henia, mai badu danu. Iena badu mai siahu bada ese do ia hagaridia. Do ia gwau, ‘Siona Ororo ena ataiai dekenai, lauegu ororo helagana dekenai, lauegu King do lau atoa.’ ” (Salamo 2:4-6) Keriso totona nega ia ginidae vadaeni, Iehova ena hakaua siahuna henunai, “do ia kwalimu totona.” (Apokalupo 6:2) Kwalimu negana ai, taunimanima ese Iehova ena bese taudia do idia dagedage henia karana dekenai ena lalohadai be dahaka? Unai be hegeregere Ia bona iena lohia Pavapavana idia dagedage henia bamona. Iehova ia gwau: “Umui ia daua tao tauna ese egu matana nadinadina ia daua tao.” (Sekaraia 2:8, NW ) Bona Iesu be mai goada ida ia gwau, iena horoa tadikaka dekenai taunimanima idia karaia eiava idia karaia lasi gaudia be hegeregere ia dekenai idia karaia eiava idia karaia lasi bamona.—Mataio 25:40, 45.
7. Dahaka badina idauidau dainai Apokalupo 7:9 ese ia gwauraia “hutuma bada herea” taudia be Goga ena dagedage karadia idia mamia?
7 Momokani, horoa orena taudia idia durua taudia ese Goga ena badu do idia mamia danu. Dirava ena “tanobada matamata” ai do idia noho taudia be “hutuma bada herea,” idia be “bese idauidau, iduhu idauidau, kopina idauidau, bona gado idauidau” amo idia mai taudia. (Apokalupo 7:9, NW ) Idia be “helai gabuna badana ena vairanai bona Mamoe ena Natuna ena vairanai idia gini. Edia dabua be kurokuro.” Dirava bona Keriso Iesu ese idia lalo-namo henidia. “Edia imana dekenai pama au rauraudia” idia dogoatao, Iehova idia hanamoa idia gwau ia be guba bona tanobada ena Lohia Badana maorona, iena lohia siahuna be ia lohia noho King, Iena “Mamoe Natuna,” Iesu Keriso, amo ia hahedinaraia.—Ioane 1:29, 36.
8. Goga ena dagedage karana dainai Keriso be dahaka do ia karaia, bona dahaka do ia vara?
8 Goga ena dagedage karana dainai Dirava ena King ese kara ta do ia karaia bona Aramagedono tuari lalonai unai do ia karaia. (Apokalupo 16:14, 16) Dirava ena lohia siahuna idia dadaraia taudia be dika bada do idia davaria. To, Dirava ena Basileia idia badinaia dainai hisihisi idia haheaukalaia taudia edia hisihisi be Dirava ese do ia kokia momokani. Aposetolo Paulo ese unai ia herevalaia, ia gwau: “Oibe, inai umui karaia noho kara namodia ese idia hedinaraia, Dirava ena kota be maoromaoro momokani. Bona iena Basileia totona inai hisihisi umui abia noho dainai, Dirava ese davana namona umui dekenai do ia henia iena Basileia lalonai. Dirava ese kara maoromaoro do ia karaia. Hisihisi umui dekenai idia henia taudia dekenai, be ia ese hisihisi do ia henidia. Dirava ese umui bona ai, hisihisi ita abia noho taudia dekenai iena mauri namona do ia henia. Inai be do ia vara, Lohiabada Iesu bona iena aneru mai siahu bada danu guba dekena amo do idia mai neganai. Mai lahi siahu bada danu, Dirava ese ia idia ura lasi taudia, bona Lohiabada Iesu ena Sivarai Namona idia abia dae lasi taudia dekenai davana metau do ia henidia.”—2 Tesalonika 1:5-8.
9, 10. (a) Edena dala ai Iehova ese Iuda besena dekenai kwalimu ia henia? (b) Hari Keristani taudia ese dahaka idia karaia noho be namo?
9 Ia mai noho hisihisi badana be do ia bada ia lao ela bona Aramagedono do ia vara, Keriso ese dika ibounai do ia haorea. To iena murinai idia raka taudia be do idia tuari lasi, lagani 2,900 gunanai Iuda ena iduhu rua basileiana idia karaia bamona. Tuari be Iehova ena, bona ia ese idia dekenai kwalimu do ia henia. Baibel ia gwau: “Lohiabada ese Amono bona Moaba bona Edoma taudia, Iuda dekenai idia tuari henia noho taudia, ia hagaridia dikadika, vadaeni ia halusidia. Badina be Amono bona Moaba taudia ese Edoma taudia idia tuari henia, bona idia hadikadia ore momokani. Bona Edoma taudia idia aladia ore murinai, Amono bona Moaba taudia ese idia ta ta dekenai idia tuari henia. Unai dainai Iuda taudia be tano kaukau ena kohoro dekenai idia ginidae, bona kohoro ena ataiai dekena amo edia matana idia negea, unai tuari orea badana do idia itaia totona neganai, mase taudia sibona idia itaia. Unai tuari orea badana dekena amo ta ese ia heau mauri lasi.”—2 Sivarai 20:22-24.
10 Unai kara be Iehova ese ia perovetalaia herevana bamona: “Inai tuari dekenai be do umui tuari lasi.” (2 Sivarai 20:17) Keriso be “do ia kwalimu” totona ia mai neganai, Keristani taudia danu be do idia tuari lasi. To unai ia do vara lasi neganai, dika idia tuari henia noho, tuari gaudia momokanidia amo lasi, to lauma tuari gaudia idia gaukaralaia. Unai amo idia ese ‘kara namo dekena amo dika do idia halusia’ noho.—Roma 6:13; 12:17-21; 13:12; 2 Korinto 10:3-5.
Goga Ena Dagedage Karana be Daika ese Do Ia Hakaua?
11. (a) Goga ese edena orea ia gaukaralaia ena dagedage karadia idia hahedinaraia totona? (b) Lauma dalanai noga noho karana ena anina be dahaka?
11 Ia hedinarai lagani 1914 amo, Goga, Magoga tano tauna be Satani Diabolo. Ia be lauma tauna ta dainai, maoromaoro ta ia dagedage henia lasi, to taunimanima edia orea ia gaukaralaia iena ura karadia idia karaia totona. Edena orea ia gaukaralaia? Baibel ese unai orea ia gwauraia lasi, to idia ita diba totona ita dekenai gau haida ia hahedinaraia. Tanobada dekenai idia vara gaudia ese Baibel ena peroveta herevadia idia hamomokania lalonai, edia kara ita itaia namonamo diba. Iehova ena taunimanima be hereva kava karana idia dadaraia to lauma dalanai idia noga noho, bona idia diba politikol bona tomadiho dekenai idia vara gaudia ese Baibel ena peroveta herevadia idia hamomokania.
12, 13. Peroveta tauna Daniela ese Dirava ena taunimanima ese do idia abia dagedage karana ginigabena be edena bamona ia perovetalaia?
12 Peroveta tauna Daniela ese Dirava ena taunimanima idia dagedage henia karana ginigabena ia hahedinaraia, ia gwau: “Vadaeni mai badu dikadika danu do ia raka lao lou, taunimanima momo do ia hadikaia bona hamasea ore gwauraia. Vadaeni davara badana ena kone, bona ororo helagana, Dubu Helaga ia noho gabuna edia huanai, . . . iena palai ruma namo herea do ia haginia.”—Daniela 11:44, 45.
13 Baibel negadiai, “davara badana” be Meditereinien, bona “ororo helagana” be Siona, unai dainai Iehova ia gwau: “Siona Ororo ena ataiai dekenai, lauegu ororo helagana dekenai, lauegu King do lau atoa.” (Salamo 2:6; Iosua 1:4) Lauma dalanai, “davara badana ena kone, bona ororo helagana, Dubu Helaga ia noho gabuna edia huanai” ia noho tano ese horoa Keristani taudia edia noho lauma dalanai ia laulaulaia. Idia ese davara, Dirava amo idia daudau taudia unai, idia rakatania vadaeni, bona idia be guba Basileiana lalonai Keriso Iesu ida do idia lohia negana idia naria noho. Ia hedinarai goevagoeva, Dirava ena horoa hesiai taudia, bona edia bamodia mai edia kamonai, hutuma bada herea taudia unai, be not kahana ena King ese do ia dagedage henia neganai, Daniela ena peroveta herevana do ia guguru.—Isaia 57:20; Heberu 12:22; Apokalupo 14:1.
Dirava Ena Hesiai Taudia be Edena Bamona Do Idia Kara?
14. Dirava ena taunimanima idia dagedage henia neganai, edena gau toi do idia karaia?
14 Dirava ena hesiai taudia idia dagedage henia neganai, dahaka do idia karaia be namo? Iehosapata ena nega ai, Dirava ena bese taudia edia kara ese dala ia hahedinaraia lou. Unai bese taudia ia haganidia gau toi do idia karaia: (1) edia gabu dekenai do idia gini, (2) naria noho sibona, bona (3) Iehova ena kwalimu do idia itaia. Hari inai negai, Iehova ena taunimanima be edena bamona unai hereva idia badinaia diba?—2 Sivarai 20:17.
15. Iehova ena taunimanima be edia gabu dekenai do idia gini ena anina be dahaka?
15 Edia gabu dekenai do idia gini: Dirava ena taunimanima do idia daradara lasi, edia gabu dekenai do idia gini noho bona Dirava ena Basileia do idia durua bada. Edia Keristani gini siri karana do idia dogoatao noho. Edia Iehova badinaia karana dekenai ‘do idia gini goada, do idia marere lasi’ bona Iehova ena hebogahisi mai lalokauna dainai taunimanima edia vairanai Ia do idia hanamoa noho. (1 Korinto 15:58; Salamo 118:28, 29) Hari idia vara gaudia eiava gabeai do idia vara gaudia ta ese edia lalo-namo Iehova dekena amo do ia kokia diba lasi.
16. Edena dala ai Iehova ena hesiai taudia do idia naria noho sibona?
16 Naria noho sibona: Iehova ena hesiai taudia do idia hekwarahi lasi sibodia idia hamauria totona to Iehova do idia abidadama henia momokani. Ia sibona ia hegeregere tanobada ena heiriheiri amo iena hesiai taudia ia hamauridia totona, bona ia gwauhamata unai bamona do ia karaia. (Isaia 43:10, 11; 54:15; Lalohisihisi ena Ane 3:26) Iehova oi abidadama henia ena anina be lagani momo lalonai iena ura hagugurua totona ia gaukaralaia oreana, oi abidadama henia danu. Guna bamona lasi, Keristani taudia momokanidia ese edia tadikaka, Iehova bona ia abia hidi Pavapavana idia abia dae tadikakadia unai, idia abidadama henia be namo. Unai abidadama tatau ese Iehova ena taunimanima do idia hakaua. Edia hakaua dalana ita dadaraia karana ena dokona be reana dika.—Mataio 24:45-47; Heberu 13:7, 17.
17. Dahaka dainai Dirava ena abidadama hesiai taudia ese Iehova ena kwalimu do idia itaia?
17 Iehova ena kwalimu do idia itaia: Edia Keristani kara maoromaoro idia dogoatao taudia ibounai bona hahemauri totona Iehova dekenai idia tabekau taudia edia ahuna be mauri. Ela bona hora ginigabena—bona edia goada ena bada hegeregerena—Iehova ena kota dinana ena mai do idia gwauraia hedinarai. Namona be Dirava ese ia havaraia gaudia ibounai idia diba Iehova be Dirava momokanina bona tanobada dekenai ia be mai ena abidadama hesiai taudia. Ma nega ta lasi Iehova ena lohia siahuna ena maoro do idia hepapahuahulaia.—Esekiela 33:33; 36:23.
18, 19. (a) Edena dala ai Esodo karoa 15 dekenai ia noho kwalimu anena, ese Goga ena dagedage karadia amo do idia kwalimu taudia edia hemami ia hahedinaraia? (b) Hari Dirava ena taunimanima be dahaka idia karaia be namo?
18 Dirava ena taunimanima be mai edia goada matamatana ida tanobada matamatana lalonai do idia vareai, bona mai edia ura bada ida kwalimu anena ta do idia abia, idaunegai Israela taudia be Davara Kakakakana amo idia roho mauri neganai idia karaia bamona. Idia ese Iehova idia tanikiu henia bada ena henari karana idia ta ta bona idia ibounai latanai dainai, inai idaunegai anena do idia abia: “Lau be ane do lau abia, Lohiabada ena, badina be ia kwalimu herea vadaeni. . . . Lohiabada be tuari tauna, iena ladana be Lohiabada. . . . Lohiabada e, oiemu imana idiba kahana ese, ai dekenai idia tuari henia taudia ia alaia mase vadaeni. Oiemu siahu bada herea momokani ese, oi dekenai idia tuari henia taudia ia halusia. Oiemu badu ese lahi bamona Aigupito taudia ia gabua ore, rei kakoro ia gabua ore bamona. . . . Oi hamauria vadaeni besena oi ese oi gunalaia, oiemu gwauhamata hegeregerena. Oiemu goada dekenai oi hakaudia vadaeni, ia mai bona oiemu gabu helagana. . . . Oi ese idia do oi hakaua vareai, bona oiemu ororo korikori ena latanai do oi atodia. Oi Lohiabada ese oiemu noho gabuna dekenai oi halaoa vadaeni gabuna inai. Oi Lohiabada oiemu imana ese inai Dubu Helaga oi haginia vadaeni. Lohiabada e, oi be do oi King ela bona hanaihanai. Momokani Israela taudia be tano kaukau dekenai idia raka, davara ena huana dekenai. To Farao ena hosi bona ena kariota bona iena hosi guia taudia be davara ena lalona dekena amo idia heau lao, vadaeni Lohiabada ese davara ia abia lou, bona iena hurehure dekena amo idia ia koua.”—Esodo 15:1-19.
19 Hari mauri hanaihanai helarona ia hedinarai goevagoeva dainai, inai be nega namona Dirava ena hesiai taudia ese Ia dekenai edia badinaia karana idia hahedinaraia. Bona edia lalona idia hadaia, edia noho hanaihanai King do idia hesiai henia!—1 Sivarai 29:11-13.
Anina Oi Gwauraia Diba, A?
• Dahaka dainai Goga ese horoa taudia bona mamoe idaudia do ia dagedage henia?
• Edena dala ai Dirava ena taunimanima be edia gabu dekenai do idia gini?
• Naria noho sibona ena anina be dahaka?
• Edena dala ai Dirava ena taunimanima ese Iehova ena kwalimu do idia itaia?
[Picture on page 22]
Iehova ese Iehosapata bona ena taunimanima dekenai kwalimu ia henia, bona ia hamaorodia do idia tuari lasi
[Picture on page 24]
Horoa taudia bona mamoe idaudia idia gaukara hebou Iehova ena lohia siahuna idia abia isi totona
[Picture on page 26]
Idaunegai Israela taudia bamona, kahirakahira Dirava ena taunimanima be kwalimu anena ta do idia abia