“Lauegu Kudouna ai Ia Noho Dabu Mamina Ia Kokia”

“INAI harihari gauna namona Draw Close to Jehovah bukana dainai mai egu kudouna ibounai ida umui lau tanikiu henia. Unai buka ese egu kudouna ai ia noho dabu mamina ia kokia​​—⁠lau ura bada Iehova ese lau ia lalokau henia bona ia laloa bada. Hari lau mamia lau be Iehova bona iena lalokau Natuna kahirakahira lau noho. Lau ura inai buka lau herevalaia taunimanima ibounai dekenai bona ena kopi be lau lalokau henia taudia ibounai dekenai lau henia.” Unai be Iehova ena Witnes hahinena ta ena lalohadai, lagani 2002/03 “Basileia Harorolaia Goadagoada” Distrik Hebouhebou dekenai idia halasia rau 320 bukana totona. Mani inai buka matamata lalonai idia noho hereva haida bona idia halasia ena badina ita itaia.

Buka Matamata Lalonai Idia Noho Hereva Haida

Inai buka matamata lalonai edena bamona hereva idia noho? Inai stadi hereva rua dekenai idia noho herevadia ibounai​​—⁠bona ma gau momo! Buka ena karoa ibounai be 31, karoa ta ta ena lata be Gima Kohorona stadi hegeregerena. Hamatamaia herevana bona ena karoa ginigunadia toi murinai, buka be kahana foa dekenai idia haria, ena kahana ta ta be Iehova ena kara badadia ta ta idia kikilaia. Unai kahana ta ta ena hamatamaia herevana lalonai unai kara ta ia herevalaia sisina. Bena murinai idia noho karoa haida be Iehova ese unai kara ia hahedinaraia daladia idia herevalaia. Unai kahana ta ta dekenai karoa ta be Iesu ia herevalaia. Dahaka dainai? Badina, Iesu ia gwau: “Lau ia itaia tauna ese egu Tamana danu ia itaia.” (Ioane 14:⁠9) Iesu ese Iehova ena toana ia hahedinaraia goevagoeva dainai, iena kara ese Dirava ena kara ia hahedinaraia. Kahana ta ta ena karoa dokonai be Iehova do ita tohotohoa lalonai unai kara do ita hahedinaraia daladia ia hadibaia. Inai buka matamata be Iehova ena kara ia herevalaia neganai, Baibel ena buka ta ta ibounai amo hereva haida ia gwauraia.

Draw Close to Jehovah bukana be mai ena gau namodia haida danu. Karoa 2 amo ia matamaia, karoa ta ta be mai edia maua ladana “Questions for Meditation.” Maua lalonai idia noho siridia bona henanadai be karoa ena hereva riviulaia totona lasi. To, oi do idia durua Baibel oi gaukaralaia neganai, oi duahia kahana oi lalohadailaia totona. Namona be Baibel siridia oi duahia namonamo. Bena henanadai oi lalohadailaia bona oi hekwarahi emu mauri lalonai oi badinaia totona. Unai bamona laloa dobu karana ese oiemu kudouna do ia hamarerea, bona oi do ia durua Iehova kahirakahira oi lao totona.​​—⁠Salamo 19:⁠14.

Draw Close to Jehovah bukana lalonai idia noho laulau be idia tahua bona hegaegaelaia namonamo, duahia tauna do ia hadibaia bona ena lalona ia veria totona. Unai buka ena karoa ibounai 17 lalonai Baibel ena sivarai edia laulau mai hairaidia idia noho.

Dahaka Dainai Idia Halasia?

Dahaka dainai Draw Close to Jehovah bukana idia halasia? Inai buka matamatana ena badina badana be, ita do ia durua Iehova do ita dibaia namonamo, unai amo iseda Dirava ida hetura karana goadana do ita haginia.

Draw Close to Jehovah bukana amo namo do ia abia tauna ta oi laloa diba, reana emu Baibel stadi tauna eiava idia haroro lasi Keristani tadikaka bona taihu ta, a? Oi be edena bamona​​—⁠unai buka matamata oi duahia matamaia vadaeni, a? Bema lasi, karaharaga nega oi atoa oi duahia matamaia totona, ani? Nega oi atoa oi duahia gaudia oi laloa totona. Inai buka ese oi do ia durua Iehova Dirava kahirakahira oi lao, bona Basileia ena sivarai namona do oi harorolaia mai emu moale bona mai emu ura bada ida!