Distrik Hebouhebou ai Idia Halasia Buka Matamatana Ita Moalelaia-Dirava Dibaia Dalana Ia Hahedinaraia
1 Vanegai iseda distrik hebouhebou ai, ita ese ena program ibounai ita moalelaia bada herea! Saturday adorahi ai buka matamatana, Diba ese Mauri Dekenai Ita Ia Hakaua Lao halasia herevana, bona idia gwauraia herevadia ita kamonaia neganai, iseda moale ia bada herea. Tanobada taudia bilioni momo ese Dirava sibona ia henia diba dibana—Dirava bona ena Natuna, Iesu Keriso, dibaia totona—idia abia be namo.—Aon. 2:1-6; Ioa. 17:3.
2 Hereva ia henia tauna be unai buka ena kahana idauidau ia hahedinaraia namonamo momokani! Unai buka ena karoa edia kwara namodia, haheitalai namodia, hereva momokani ena namo hahedinaraia namonamo dalana, auka lasi henanadai, bona karoa ta ta ibounai edia dokona ai maua ladana “Emu Diba Oi Tohoa,” be duahia taudia edia lalona veria gaudia. Baibel stadilaia taudia do ia durua Baibel ena hadibaia herevadia badadia do idia dibaia haraga totona.
3 Saturday bona Sunday edia hereva dokodia lalonai, ita idia hagoadaia famili stadi lalonai buka matamata ita gaukaralaia. Reana hari, buka oi duahia ore. Haroro gaukara ai inai buka matamata oi hariharilaia totona, reana hereva haida oi abia hidi vadaeni.
4 Laloa Lou Herevadia: Hereva ta “Tanobada Taudia be Dirava Do Idia Diba be Namo” ia henia tauna ena hereva haida reana oi laloatao. Idia toi be inai: (1) Baibel stadi lalonai inai buka oi gaukaralaia neganai, namona be hereva ma haida do oi atoa kau lasi, stadi ena hereva badadia do idia hedinarai goevagoeva lasi garina; buka ese karoa ta ta lalonai ia hamomokania gaudia sibona oi hadibalaia namonamo. (2) Karoa iboudiai idia lata lasi dainai, emu stadi negana ai reana karoa ta oi haorea diba. (3) Karoa ta ta edia dokona ai “Emu Diba Oi Tohoa” mauana ena henanadai amo riviu namona oi karaia diba.
5 Baibel Stadi Negana Ai: Pablisa momo idia ura idia diba bema edia Baibel stadi taudia ibounai ida inai buka matamata idia stadilaia matamaia be namo, eiava. Bema buka ma ta umui stadilaia ore gwauraia, namona be unai buka umui haorea. Bema buka umui do haorea gwauraia lasi, namona be Diba bukana do umui stadilaia hamatamaia. Bema Baibel stadi ta be buklet o pepapepa ta dekenai oi hamatamaia, namona be nega korikori ai buka matamatana oi hahedinaraia bona umui gaukaralaia emui stadi ai. Hua gabedia lalodiai Iseda Basileia Gaukara pepadia ai, Diba bukana gaukaralaia herevadia ma haida do idia hedinarai.
6 Iehova be inai buka matamatana ia henia taunimanima dekenai mauri hanaihanai ia henia dibana ita hadibalaia totona. Namona be hari ita hegaegae namonamo bona iseda nega bona goada ita henia ia do noho gaukara badana haorea totona.