“Dirava Dekenai Do Umui Raka Kahirakahira Lao, Vadaeni Ia Ese Umui Dekenai Do Ia Raka Kahirakahira Mai”
Guna Bona Hari—Goada Ia Abia Iena Mauri Ia Haidaua Totona
MEXICO dekenai ia noho hahinena ta ladana Sandra, ia gwau, iena ruma bese taudia ese ia idia ura henia lasi. Ena matamata negana lalonai ia idia dadaraia bona lalokau henia lasi. Ia gwau: “Unai nega lalonai lau mamia lau noho kava bamona bona lau vara ena badina bona egu mauri lau daradaralaia.”
Sandra be haisikuli dekenai ia noho neganai, ruma dekenai tamana ena uaina ia inua matamaia. Gabeai, sibona ena kekero muramura ia hoia matamaia bona kekero muramura inua momo kekenina ai ia lao. Ia gwau: “Gau ta ese lau ia hagoadaia lasi lau mauri noho totona.” Sandra ia daradoko dainai, drag ia ania matamaia. Ia gwau: “Lau ia durua egu hekwakwanai lau laloaboio totona, egu paosi lalonai kekero muramura ena botolo ta, drag haida eiava mariuana sisina lau abia loaloa.”
Sandra be medikol sikulina ia haorea murinai, kekero muramura inua karana ia habadaia. Ia ura ena mauri ia hadokoa toho. To, ia roho mauri.
Sandra ia hekwarahi tomadiho idauidau dekenai lauma dalanai bona hemami dalanai heduru ia tahua, to ia davaria lasi. To, ia hesiku bona ia lalohisihisi bada dainai, mai taitai ida Dirava dekenai ia boiboi loulou ia gwau: “Oi be edeseniai? Dahaka dainai lau oi durua lasi?” Sibona ia matauraia karana be ia ore ia lao neganai, Iehova ena Witnes hahinena ta ese ia hereva henia. Unai dala amo Baibel ia stadilaia matamaia. Sandra be ena stadi amo ia dibaia “Iehova be lalohisihisi taudia kahirakahira ia noho” neganai, unai ese ena kudouna ia hamarerea momokani.—Salamo 34:18.
Sandra dekenai Baibel stadi ia karaia hahinena ese Sandra ia durua, Adamu amo ita abia kara dika bona goevadae lasi maurina dainai ita moru diba, bona Iehova Dirava be unai ia diba. Sandra ia lalo-parara, Dirava ia diba ita be iena kara maoromaoro taravatudia ita badinaia goevagoeva diba lasi. (Salamo 51:5; Roma 3:23; 5:12, 18) Ia moale badina ia diba Iehova be iseda manoka gaudia ia laloa noho lasi, bona ita karaia diba lasi gaudia totona ia noia lasi. Salamo torea tauna ia henanadai: “Bema oi ese aiemai kara dika ibounai oi duahia neganai, daika ese oiemu kota lalonai ia kwalimu diba?”—Salamo 130:3.
Sandra ena kudouna ia hamoalea mai anina bada Baibel ena hereva momokanina be inai, Iesu Keriso ena mauri davalaia boubouna. Unai boubou dainai, Iehova be mai ena hebogahisi ida ia idia kamonai henia taudia ia gwauraidia maoromaoro taudia, ena be idia goevadae lasi. (1 Ioane 2:2; 4:9, 10) Oibe, “iseda dika danu ia ese ia gwauatao vadaeni” bona unai amo ita ia durua, ita laloa ita be anina lasi lalohadaina ita dadaraia totona.—Efeso 1:7.
Sandra be aposetolo Paulo ena haheitalai amo mai anina bada gaudia ia dibaia. Paulo ese Dirava ena hebogahisi karana ia laloa bada badina Dirava ese ena dika gunadia ia gwauatao bona ia durua ia karaia loulou kereredia ia hanaia totona. (Roma 7:15-25; 1 Korinto 15:9, 10) Paulo ese ena mauri dalana ia hamaoromaoroa, ‘iena tauanina ia botaia, bona iena ura ia karaia lasi,’ unai amo Dirava ese ia lalo-namo henia dalana dekenai ia raka diba. (1 Korinto 9:27) Ia ura lasi iena kara dika ese ia do ia biagua.
Sandra ena manoka karadia dainai ia lalo-hisihisi bada, to unai manoka karadia hanaia totona ia hekwarahi bada. Mai momokani ida Iehova ena heduru ia noia ia do ia durua unai ia hanaia bona ia hebogahisi henia totona. (Salamo 55:22; Iamesi 4:8) Sandra ia mamia Dirava ese ia ia laloa bada, unai dainai iena mauri dalana ia haidaua. Ia gwau: “Lau moale badina ful-taim hesiai gaukara lalonai Baibel amo ma haida lau hadibaia diba.” Ia moale danu badina iena taihuna badana bona maragina ia durudia Iehova idia diba totona. ‘Kara namodia ia karaia’ noho lalonai, Iehova ena Witnes taudia edia hebouhebou dekenai danu iena diba medikol gaudia dekenai ia gaukaralaia.—Galatia 6:10.
To, Sandra ese ia manadalaia karadia be edena bamona? Mai ena lalo-goada ida ia gwau: “Egu laloa dalana be goeva. Lau inuinu lasi, kuku eiava drag lau ania lasi. Unai ibounai be anina lasi lau dekenai. Lau tahua noho gauna lau davaria vadaeni.”
[Blurb on page 31]
“Lau tahua noho gauna lau davaria vadaeni”
[Box on page 31]
Baibel Ena Hakaua Hereva Namodia
Henunai idia noho Baibel ena hakaua hereva haida ese momo ia durudia idia manadalaia goeva lasi karadia idia rakatania totona:
“Unai dainai tauanina bona lauma hamiroa karadia ibounai do ita hadokoa, bona iseda mauri ita hagoevaia be namo. Vadaeni Dirava ena vairanai do ita noho namonamo, mai goeva bona mai gari danu.” (2 Korinto 7:1) Dirava ese kara mirodia amo sibodia idia hagoevaia bona kara dika idia dadaraia taudia ia hanamodia.
“Bema Lohiabada ita gari henia neganai, ita be kara dika do ita ura henia lasi.” (Aonega Herevadia 8:13) Mai hemataurai ida Dirava gari henia karana ese ta ia durua diba ia manadalaia kara dikadia bona drag ania karana ia hadokoa totona. Unai amo ena kara ia haidaua tauna ese Iehova ia hamoalea sibona lasi, to gorere idauidau ia abia lasi.
“Gavana bona gavamani ena siahu taudia do idia kamonai henia.” (Tito 3:1) Tano momo dekenai, gavamani ese drag haida abia eiava gaukaralaia karadia idia taravatua. Keristani taudia momokanidia ese idia taravatua drag idia abia lasi eiava idia gaukaralaidia lasi.