Gau Namona Ta Idia Davaria

Keristani taudia milioni momo be Krismas idia moalelaia lasi. Unai disisen idia karaia dainai edia hemami be edena bamona? Idia laloa gau namona ta idia reaia, a? Edia natudia idia lalohisihisi, a? Namona be tanobada ena kahana ibounai ai idia noho Iehova ena Witnes taudia edia lalohadai do ita laloa.

Iesu Keriso laloatao karana: Hahine ta ia gwau: “Lau be Iehova ena Witnes ai lau do lao lasi neganai, dubu dekenai lau lao momo lasi. Krismas eiava Ista negana ai sibona lau lao. To, unai neganai Iesu Keriso lau laloa lasi. Hari lau ese Krismas lau abia dae lasi, to wiki iboudiai nega rua Keristani hebou dekenai lau lao, bona Iesu ena sivarai Baibel lalonai be taunimanima ma haida dekenai lau hadibaia!”​—EVE, AUSTRALIA.

Henia karana ena moale: Mero matamatana ta ia gwau: “Lau laloa lasi negana ai ta ese harihari gauna ta ia henia neganai lau moale. Unai lau ura henia! Danu, lau ura kadi lau karaia, bona piksa lau penia ma haida dekenai lau henia totona, badina idia abia dae neganai idia moale, bona lau moale danu.”​—REUBEN, NORTHERN IRELAND.

Dabu taudia durua karana: Kekeni ta ia gwau: “Ai ura idia gorere taudia totona aniani ai karaia. Nega haida flaoaflaoa, keke, eiava harihari gauna ta ai henidia idia moale totona. Lagani ta lalonai dina idauidau ai idia ai vadivadi henia diba. Unai ai moalelaia.”​—EMILY, AUSTRALIA.

Famili idia hebou neganai: Hahine ta ia gwau: “Emai famili idia hebou neganai, emai natudia be edia varavara iboudiai idia dibaia namonamo diba. Lagani ta ta edia holide dinadia ai naria lasi emai famili ida ai hebou totona. Unai dainai emai varavara idia diba idia ai lalokau henia dainai idia ai vadivadi henia.”​—WENDY, CAYMAN ISLANDS.

Maino: Hahine ta ia gwau: “Krismas neganai, taunimanima idia bisi momo dainai maino karana idia laloa lasi. Baibel ena gwauhamata hereva taunimanima totona lau diba; Unai dainai lau moale. Bona lau laloparara unai gwauhamata dainai egu natudia be nega vaira ai do idia moale diba.”​—SANDRA, SPAIN.