Ibounai ese Iehova Ena Hairai Idia Hanamoa be Namo
“Lohiabada ena . . . hairaina bona iena goada badana do umui hanamoa. Lohiabada ena ladana badana do umui abia isi.”—SALAMO 96:7, 8.
1, 2. Edena gaudia ese Iehova idia hanamoa, bona daidia danu idia hagoadaia unai bamona idia karaia totona?
DAVIDA, Iese ena natuna, be Betelehema ena gabu kahirakahira dekenai ia tubu daekau bona mamoe naria merona ai ia lao. Reana unai mamoe naria gabunai iena tamana ena mamoe serina ia naria lalonai, regerege lasi hanuaboi momo lalonai ia ese guba ai hisiu momo herea ia itadia! Ita daradara lasi, Dirava ena lauma amo Salamo karoa 19 ena hereva namodia ia torea bona anelaia neganai, unai gaudia ia laloa lou: “Guba ese Dirava ena hairaina ia hedinaraia, bona guba dekenai noho gaudia ese, Dirava ia karaia gaudia idia hedinaraia noho. To idia gwauraia gaudia, be tanobada kahana ibounai dekenai idia lao vadaeni. Edia hereva be tanobada ena gabu ibounai, dekenai idia ginidae vadaeni.”—Salamo 19:1, 4.
2 Ena be Iehova ese guba ai ia havaraia hoa gaudia idia hereva diba lasi eiava edia gado regena be lasi, to dina bona hanuaboi ibounai idia ese Iehova ena hairai idia hahedinaraia. Dirava ia havaraia gaudia ese hanaihanai Dirava ena hairai idia hahedinaraia, bona regerege lasi dalanai Dirava idia hanamoa karana be “tanobada kahana ibounai dekenai” idia noho taudia ese idia itaia, bona unai ita laloa karana ese ita ia hagoadaia ita manau totona. To, Dirava ia havaraia gaudia ese regerege lasi dalanai Dirava idia hanamoa be hegeregere lasi. Kamonai taudia idia hagoadaia edia gado regena amo Dirava idia hanamoa totona. Salamo torea tauna ta ese Dirava idia tomadiho henia taudia mai edia abidadama dekenai, inai hereva helagana ia henia: “Lohiabada ena . . . hairaina bona iena goada badana do umui hanamoa. Lohiabada ena ladana badana do umui abia isi.” (Salamo 96:7, 8) Iehova idia tura henia taudia be mai edia moale ida unai hagoadaia herevana idia badinaia. To, Dirava ita hanamoa totona, dahaka ita karaia danu be namo?
3. Dahaka dainai taunimanima ese Dirava idia hanamoa?
3 Dirava ita hanamoa karana be uduna amo ita gwauraia herevadia sibona amo lasi. Isaia ena negai, Israela taudia be edia uduna bibina amo Dirava idia hanamoa, to mai momokani ida idia karaia lasi. Isaia dekena amo Iehova ia gwau: “Inai bese taudia be mai edia uduna hereva dekenai, lau dekenai idia raka kahirakahira noho, bona edia bibinadia sibona dekena amo, lau idia hanamoa noho, to edia lalodia be lau dekena amo idia daudau.” (Isaia 29:13) Unai bamona taudia ese idia gwauraia Dirava hanamoa herevadia ibounai be anina lasi. To, namona be iseda kudouna be Iehova lalokau henia karana amo ia honu bona ena hairai hereadaena ita laloa bada, unai amo Ia ita hanamoa herevadia be mai anina bada. Iehova sibona be Havaraia Tauna. Ia be Siahu Ibounai Diravana, Kara Maoromaoro Tauna, bona lalokau be Iena kara korikorina. Ia be eda hahemauri ena badina bona Lohia Badana maorona dainai, guba bona tanobada ai idia noho taudia ese Ia idia badinaia be namo. (Apokalupo 4:11; 19:1) Bema unai gaudia ita abia dae momokani, namona be eda kudouna ibounai ida Ia ita hanamoa.
4. Dirava ita hanamoa dalana dekenai Iesu ese dahaka hadibaia herevadia ia henia, bona edena bamona unai ita hagugurua diba?
4 Iesu Keriso ese Dirava ita hanamoa dalana ia gwauraia. Ia gwau: “Bema huahua momo do umui atoa neganai, egu Tamana be taunimanima ese do idia hanamoa. Unai dekena amo lauegu diba tahua taudia korikori do umui lao.” (Ioane 15:8) Edena dala ai huahua momo ita havaraia diba? Ginigunana be, mai iseda lalona ibounai ida “Basileia ena Sivarai Namona” ita harorolaia bona Dirava ia havaraia gaudia ibounai ida Dirava ena kara haida, ita itaia diba lasi karadia unai, ita gwauraia noho. (Mataio 24:14; Roma 1:20) Bona, unai dala amo ita ibounai be hahediba taudia matamatadia halaoa gaukarana ita durua, bena idia danu ese Iehova Dirava idia hanamoa. Iharuana be, lauma helaga ese eda lalonai ia havaraia huahuadia ita hahedinaraia be namo, bona ita hekwarahi Iehova Dirava ena kara hereadaedia ita tohotohoa totona. (Galatia 5:22, 23; Efeso 5:1; Kolose 3:10) Unai dainai, dina ibounai lalonai eda kara ese Iehova ia hanamoa.
“Tanobada Ibounai Dekenai”
5. Paulo ia gwau Keristani taudia edia maduna be, ma haida dekenai edia abidadama idia gwauraia amo Dirava idia hanamoa, unai ia herevalaia dalana mani oi gwauraia.
5 Paulo ese Roma taudia dekenai Keristani taudia edia maduna ia herevalaia, ma haida dekenai edia abidadama idia herevalaia karana amo Dirava idia hanamoa diba. Roma bukana ena hereva badana be, Iesu Keriso idia abidadama henia taudia sibona idia mauri diba. Roma karoa 10 lalonai, Paulo ia hahedinaraia iena negai idia noho Israela besena korikorina idia laloa Mose ena taravatu idia badinaia noho karana amo kara maoromaoro idia karaia, to “Keriso ia mai dainai, . . . Taravatu . . . be ia doko.” Unai dainai, Paulo ia gwau: “Bema oiemu uduna dekenai Iesu oi gwauraia ia be Lohiabada, bona bema oiemu kudouna dekenai oi hamomokania Dirava ese mase dekena amo Iesu ia hatorea isi, vadaeni do oi mauri.” Unai nega amo, “Iuda tauna be idau lasi, bona Iuda lasi tauna danu idau lasi. Badina Dirava be taunimanima ibounai edia Lohiabada, bona ia dekenai idia noinoi taudia dekenai iena hanamoa ia henia.”—Roma 10:4, 9-13.
6. Paulo ese Salamo 19:4 ena anina be edena bamona ia herevalaia?
6 Bena, Paulo ia henanadai: “To idia abidadama henia lasi taudia be edena bamona Lohiabada do idia noinoi henia diba? Bona iena Sivarai idia kamonai lasi taudia be edena bamona do idia abidadama diba? Bona bema haroro tauna be lasi neganai, edena bamona do idia kamonai?” (Roma 10:14) Paulo ese Israela taudia ia herevalaia neganai, ia gwau: “Haida be Sivarai Namona idia kamonai henia lasi.” Dahaka dainai Israela taudia idia kamonai lasi? Dala ia noho idia kamonai totona, to idia be mai edia abidadama lasi. Paulo ese Salamo 19:4 lalonai unai ia hahedinaraia, bona unai siri ai ia ese Keristani haroro gaukarana ia herevalaia, to Dirava ia havaraia gaudia ese regerege lasi dalanai Dirava idia hanamoa karana ia herevalaia lasi. Ia gwau: “ ‘Edia gadona ena sivarai, be tanobada ibounai dekenai idia gwauraia loaloa, bona edia hereva, be tanobada ena dokona momokani dekenai idia lao.’ ” (Roma 10:16, 18) Oibe, idia mauri lasi gaudia ese Iehova idia hanamoa hegeregerena, Keristani taudia ginigunadia ese hahemauri ena sivarai namona be gabu ibounai dekenai idia harorolaia, bona “tanobada ibounai dekenai” Dirava idia hanamoa. Paulo ese Kolose taudia ia tore henia neganai, sivarai namona ia bada ia lao dalana ia herevalaia danu. Ia gwau, sivarai namona be ‘tanobada ibounai dekenai idia harorolaia vadaeni.’—Kolose 1:23.
Idia Haroro Goadagoada Witnes Taudia
7. Iesu ena hereva hegeregerena, Keristani taudia edia maduna be dahaka?
7 Reana Iesu Keriso ia mase bena lagani 27 bamona murinai, Paulo be ena revareva Kolose taudia dekenai ia torea. Edena bamona unai nega kwadogina lalonai haroro gaukara be ia bada ia lao haraga ela bona Kolose dekenai? Unai bamona ia vara badina Keristani taudia ginigunadia idia haroro goadagoada, bona Iehova ese edia ura bada ia hanamoa. Iesu ia peroveta vadaeni, ia murinai idia raka taudia be do idia haroro goadagoada, ia gwau: “Sivarai Namona bese ibounai dekenai be do idia haroro henia guna.” (Mareko 13:10) Unai peroveta herevana dekenai, Iesu ese Mataio ena Evanelia bukana ena siri ginigabedia lalonai inai hahegani ma ia gwauraia: “Unai dainai do umui lao, bese ibounai be diba tahua taudia do umui halaoa, bona Tamana, Natuna, bona Lauma Helaga ena ladanai do umui bapatiso henia idia dekenai. Bona idia dekenai do umui hadibaia, umui dekenai lau henia hereva ibounai be do idia badinaia.” (Mataio 28:19, 20) Iesu be guba ai ia daekau bena nega daudau lasi murinai, iena murinai idia raka taudia ese unai hereva idia hagugurua matamaia.
8, 9. Kara bukana ena hereva hegeregerena, edena dala ai Keristani taudia ese Iesu ena hahegani idia badinaia?
8 Pentekoste 33 C.E. ai lauma helaga ia bubua murinai, Iesu ena murinai idia raka taudia mai edia kamonai ese idia karaia karana ginigunana be idia lao bona idia haroro, Ierusalema ai idia noho taudia dekenai “Dirava ena hoa gaudia” idia hadibaia. Edia haroro gaukara ese anina namona ia havaraia, bona “taunimanima 3000 bamona” be bapatiso idia abia. Hahediba taudia ese taunimanima vairanai Dirava idia hanamoa noho mai goada ida, bona anina namona idia havaraia.—Kara 2:4, 11, 41, 46, 47.
9 Daudau lasi murinai, tomadiho gunalaia taudia be unai Keristani taudia edia gaukara ena sivarai idia kamonai. Petero bona Ioane edia gari lasi karana idia itaia neganai, idia ese aposetolo taudia ruaosi idia oda henidia haroro gaukara idia hadokoa totona. To aposetolo taudia idia gwau: “Ai itaia bona ai kamonai gaudia ai hunia diba lasi, aiemai uduna ai koua diba lasi.” Idia hagaridia bona ruhadia murinai, Petero bona Ioane be edia tadikaka dekenai idia giroa lou, bona ibounai be Iehova idia guriguri henia. Mai gari lasi ida Iehova idia noia: “Oiemu hesiai taudia dekenai goada oi henia, vadaeni ai ese oiemu hereva do ai gwauraia, gari lasi.”—Kara 4:13, 20, 29.
10. Dahaka dagedage karadia idia matamaia, bona Keristani taudia momokanidia be edena bamona idia kara?
10 Unai guriguri be Iehova ena ura hegeregerena, badina gabeai ia vara gauna ese unai ia hahedinaraia goevagoeva. Aposetolo taudia idia dogoatao bona aneru ese hoa dalana amo idia ia ruhaia. Aneru ese ia hamaorodia: “Vadaeni umui lao, Dubu Helaga lalonai umui gini, bona inai mauri matamata herevana ibounai hanua taudia dekenai do umui hadibaia.” (Kara 5:18-20) Aposetolo taudia idia kamonai dainai, Iehova ese idia ia hanamoa noho. Unai amo “dina ibounai, Dubu Helaga lalonai bona ruma lalonai, taunimanima idia hadibaia noho, bona Iesu Keriso ena Sivarai Namona idia gwauraia noho. Inai gaukara idia hadokoa lasi.” (Kara 5:42) Ia hedinarai goevagoeva, Iesu ena murinai idia raka taudia be taunimanima vairanai Dirava idia hanamoa noho, bona dagedage karadia ese idia ia koua diba lasi.
11. Keristani taudia ginigunadia ese haroro gaukara be edena bamona idia laloa?
11 Daudau lasi murinai, Stefano idia dogoatao bona nadi amo idia hodoa mase. Ia idia hamasea murinai dagedage ia bada daekau Ierusalema dekenai, bona hahediba taudia ibounai be gabu idauidau dekenai idia lao, to aposetolo taudia sibona idia noho. Dagedage dainai idia lalo-manoka, a? Lasi vaitani. Baibel ia gwau: “Ia lulua taudia be gabu idauidau dekenai idia lao, Sivarai Namona idia harorolaia.” (Kara 8:1, 4) Dirava ena hairai idia harorolaia karana dekenai unai ura bada ia hedinarai loulou. Kara karoa 9 ita duahia neganai, Farisea Tauna Saulo, Taso tauna unai, be Iesu ena hahediba taudia dagedage henia totona Damaseko dekenai ia lao noho lalonai, matahanai lalonai Iesu ia itaia bena ia matakepulu. Damaseko ai, Anania be hoa dalanai Saulo ena matana ia hanamoa. Saulo—gabeai idia gwauraia aposetolo Paulo—ia karaia gauna ginigunana be dahaka? Sivarai ia gwau: “Vadaeni nega tamona, dubu lalonai ia ese Iesu ia harorolaia, ia gwau Iesu be Dirava ena Natuna.”—Kara 9:20.
Ibounai be Haroro Gaukara Idia Karaia
12, 13. (a) Histori toretore taudia edia hereva bamona, Keristani kongregesen ginigunadia amo dahaka ita dibaia be namo? (b) Kara bukana bona Paulo ese ia gwauraia herevadia, be edena dala ai histori toretore taudia edia hereva ida ia hegeregere?
12 Momo idia gwau, Keristani kongregesen ginigunana lalonai idia noho taudia ese haroro gaukara idia karaia. Philip Schaff be unai negai idia noho Keristani taudia ia herevalaia neganai, ia gwau: “Kongregesen iboudiai be haroro gaukara idia karaia, bona abidadama Keristani taudia ibounai be misinari taudia.” (History of the Christian Church) W. S. Williams ia gwau: “Ibounai idia diba Ekalesia ginigunana lalonai Keristani taudia ibounai be lauma ena harihari gauna idia abia dainai sivarai namona idia harorolaia diba.” (The Glorious Ministry of the Laity) Danu, ma ia gwau: “Iesu Keriso ia gwau lasi haroro gaukara be kongregesen lalonai dagi idia abia taudia sibona ese do idia karaia.” Idaunegai idia noho Keristani taudia ia inai henia tauna Celsus, ia gwau: “Vulu idia karaia taudia, tamaka idia karaia taudia, boromakau kopina ena kala idia haidaua taudia, idia duahiduahi diba lasi taudia bona hanua taudia be sivarai namona idia harorolaia goadagoada.”
13 Unai hereva be Kara bukana ai idia torea sivaraina ese ia hamomokania. Pentekoste 33 C.E. dekenai, lauma helaga ia bubua murinai, hahediba taudia ibounai, tatau bona hahine, ese Dirava ena hoa gaudia idia harorolaia. Stefano idia alaia mase bona dagedage karadia idia ore murinai, gabu idauidau dekenai idia heau lao Keristani taudia ibounai ese sivarai namona idia harorolaia badabada. Lagani 28 bamona murinai, Paulo be dubu gunalaia taudia oreana maragina ia tore henia lasi, to Heberu Keristani taudia ibounai ia tore henia neganai, ia gwau: “Unai dainai namona be Dirava do ita hanamoa, Iesu ena ladana dainai. Bona inai hanamoa Dirava dekenai do ita henia nega ibounai, boubou gauna bamona. Oibe, ita ese iseda uduna bibina Iesu dekenai do ita henia, bona ia do ita gwauraia hedinarai, ia be Lohiabada.” (Heberu 13:15) Paulo ese ena lalohadai haroro gaukara dekenai ia herevalaia neganai, ia gwau: “To gau tamona, Sivarai Namona lau harorolaia dainai lau heagi diba lasi. Badina unai bamona do lau karaia be Dirava ese ia oda vadaeni. Bema Sivarai Namona lau harorolaia lasi neganai, madi, lau be dika momokani!” (1 Korinto 9:16) Ia hedinarai goevagoeva, aposetolo edia negai idia noho kamonai Keristani taudia ibounai edia lalohadai be unai bamona danu.
14. Haroro bona abidadama idia gaukara hebou dalana be dahaka?
14 Oibe, Keristani tauna korikorina ese haroro gaukara ia karaia be namo, badina unai be abidadama hahedinaraia karana ta. Paulo ia gwau: “Iseda kudouna ena abidadama dekena amo Dirava ena vairanai do ita maoromaoro, bona inai abidadama be iseda uduna dekenai ita gwauraia hedinarai, be mauri do ita davaria.” (Roma 10:10) Kongregesen ai grup maragina ta—hegeregere dubu gunalaia taudia oreana—sibona be mai edia abidadama dainai haroro gaukara idia karaia be namo, a? Lasi vaitani! Keristani taudia momokanidia ibounai ese Lohiabada Iesu Keriso dekenai edia abidadama idia hagoadaia, bona unai ese idia ia veria ma haida dekenai unai abidadama idia gwauraia hedinarai totona. Bema unai bamona idia karaia lasi, edia abidadama be ia mase. (Iamesi 2:26) Aposetolo edia negai, kamonai Keristani taudia ibounai be unai dala amo edia abidadama idia hahedinaraia dainai, Iehova ena ladana idia hanamoa bada.
15, 16. Ena be hekwakwanai idauidau idia vara, to haheitalai haida oi gwauraia amo oi hahedinaraia haroro gaukara ia bada ia lao.
15 Aposetolo edia negai, ena be hekwakwanai idauidau be kongregesen lalonai bona murimurinai idia vara, to Iehova ese ena taunimanima ia hanamodia dainai edia namba ia bada ia lao. Hegeregere, Kara karoa 6 ese Heberu gado idia herevalaia bona Greek gado idia herevalaia taudia edia hepapahuahu sivaraina ia gwauraia. Aposetolo taudia be unai hekwakwanai idia hamaoromaoroa. Unai dainai, sivarai ia gwau: “Dirava ena hereva ia bada daekau, bona diba tahua taudia idia momo daekau Ierusalema dekenai, bona hahelagaia taudia momo danu ese Iesu ena dala idia abia dae.”—Kara 6:7.
16 Gabeai, Iudea ena King Heroda Agripa bona Turo bona Sidono taudia be politikol dalanai idia hepapahuahu. Unai hanua taudia be maino idia karaia totona lalo-ani herevadia idia gwauraia, bona edia noinoi haerelaia totona Heroda be hebou taudia vairanai ia haroro. Bona idia hebou taudia hutuma idia boiboi: “Inai be dirava ta ena gadona, tau ena gadona lasi.” Maoromaoro Iehova ena aneru ese Heroda Agripa ia botaia, bona ia mase badina “hairai ia henia lasi Dirava dekenai.” (Kara 12:20-23) Tanobada lohia taudia dekenai idia tabekau taudia ia hagaridia unai! (Salamo 146:3, 4) To, Keristani taudia be Iehova idia hanamoa noho. Unai dainai, ena be unai bamona heiriheiri karana politikol dekenai ia vara, to “Dirava ena hereva ia tubu, bona ia bada daekau, gabu momo dekenai.”—Kara 12:24.
Guna Bona Hari
17. Aposetolo edia negai, edia namba ia bada ia lao taudia ese dahaka idia karaia danu?
17 Oibe, aposetolo edia negai, tanobada hegegemadai Keristani kongregesen lalonai be Iehova Dirava idia hanamoa goadagoada taudia idia noho. Dirava idia badinaia Keristani taudia ibounai be sivarai namona idia harorolaia. Haida be kamonai taudia idia davaria bona idia hadibaia Iesu ena hahegani ibounai idia badinaia totona, Iesu ia hereva bamona. (Mataio 28:19, 20) Unai dainai, kongregesen taudia edia namba ia bada bona momo herea ese Iehova idia hanamoa, idaunegai King Davida bamona. Ibounai ese inai hereva helagadia idia gwauraia: “Lohiabada Dirava e, lau ese oi do lau hanamoa, mai egu kudouna ibounai danu. Lau ese oiemu ladana, be do lau hanamoa bada ela bona hanaihanai, badina oiemu lalokau lau dekenai be bada herea.”—Salamo 86:12, 13.
18. (a) Aposetolo edia negai ia noho Keristani kongregesen bona hari ia noho Kerisendom dekenai dahaka gaudia idia idau? (b) Hereva gabena ese dahaka do ia herevalaia?
18 Unai ita laloa dainai, tomadiho ia stadilaia profesa tauna Allison A. Trites ena hereva ese ita ia hagoadaia. Hari ia noho Kerisendom be Keristani taudia ginigunadia ida ia hahegeregerea neganai, ia gwau: “Hari inai negai, nega momo dubu lalonai idia noho famili edia natudia be abidadama taudia ai idia lao eiava dubu tauna ta be ena dubu ia rakatania bena dubu ma ta dekenai ia lao neganai, dubu taudia edia namba ia bada daekau. To, Kara bukana lalonai, kongregesen ia bada ia lao ena badina be taunimanima be edia kara idia haidaua bona Keristani taudia ai idia lao, unai negai Ekalesia ena gaukara be ia hamatamaia.” Unai ena anina be Keristani tomadiho momokanina be Iesu ese ia gwauraia dalana hegeregerena ia tubu lasi, a? Lasi vaitani. Hari inai negai, Keristani taudia momokanidia ese idia badinaia daladia ibounai be aposetolo edia negai idia noho Keristani taudia edia bamona, taunimanima edia vairanai Dirava idia hanamoa. Unai be hereva gabena ai do ita itaia.
Anina Oi Gwauraia Diba, A?
• Edena dala idauidau ai Dirava ita hanamoa?
• Paulo ese Salamo 19:4 ena anina be edena bamona ia herevalaia?
• Haroro bona abidadama idia gaukara hebou dalana be dahaka?
• Aposetolo edia negai ia noho Keristani kongregesen amo dahaka ita dibaia be namo?
[Picture on page 14, 15]
Guba gaudia ese Iehova ena hairai idia hahedinaraia noho
[Credit Line]
Courtesy of Anglo-Australian Observatory, photograph by David Malin
[Pictures on page 16]
Haroro bona guriguri be gau badana