Ieremia Bamona Oi Goada Noho
“Lohiabada dekenai do umui abidadama henia. Do umui laloa goada, daradara lasi. Lohiabada dekenai do umui abidadama henia.”—SALAMO 27:14.
1. Dahaka hahenamo namona be Iehova ena Witnes taudia ese idia moalelaia?
IEHOVA ENA WITNES TAUDIA be lauma paradaisona lalonai idia noho. (Isaia 11:6-9) Inai tanobada dikana lalonai, idia bona edia Keristani tadikakadia be lauma dalanai ia goada oreana lalonai idia noho, bona Iehova Dirava bona idia ta ta huanai maino ia noho. (Salamo 29:11; Isaia 54:13) Bona edia lauma paradaisona be ia bada ia lao noho. Unai be ‘mai edia lalona ibounai Dirava ena ura idia karaia’ taudia ibounai ese idia habadaia noho. (Efeso 6:6) Edena bamona unai idia karaia? Baibel ena hakaua herevadia idia badinaia bona ma haida idia hadibaia idia karaia bamona idia karaia totona, unai amo idia boiridia unai paradaiso ena hahenamo momo idia moalelaia totona.—Mataio 28:19, 20; Ioane 15:8.
2, 3. Keristani taudia momokanidia be dahaka idia haheaukalaia be namo?
2 To, ita gwau lasi lauma paradaisona ai ita noho dainai hekwakwanai do ita davaria lasi. Ita do goevadae lasi dainai gorere, buruka, bona mase edia hisihisi ita mamia. Danu, ita be “nega dokona” totona idia perovetalaia herevadia edia guguru negana lalonai ita noho. (2 Timoteo 3:1) Tuari, taravatu utua karadia, gorere, hitolo bada, bona dika badadia ma haida be taunimanima ibounai ese idia davaria, Iehova ena Witnes taudia danu.—Mareko 13:3-10; Luka 21:10, 11.
3 Unai sibona lasi, herevana ita be lauma paradaisona lalonai ita noho namo, to unai paradaiso lalonai idia noho lasi taudia ese ita idia dagedage henia noho. Iesu be ia murinai idia raka taudia ia hamaoroa: “Umui be tanobada ena lasi, lau ese tanobada dekena amo lau abia hidi umui, unai dainai tanobada ese umui do ia badu henia. Umui dekenai lau hamaoroa herevana do umui laloatao: Hesiai tauna ese iena biaguna ia hereaia lasi. Bema idia ese lau dekenai idia dagedage henia, umui dekenai danu do idia dagedage henia.” (Ioane 15:18-21) Hari danu be unai bamona. Taunimanima momo ese iseda tomadiho karana idia do lalo-pararalaia lasi eiava idia laloa bada lasi. Haida ese ita idia gwauraia dika, idia kirikirilaia, eiava—Iesu ia gwau bamona—ita idia badu henia. (Mataio 10:22) Nega momo, nius halasia oreadia ese ita idia gwauraia dika totona sivarai kereredia idia halasia. (Salamo 109:1-3) Oibe, ita ibounai ese hekwakwanai ita davaria, bona reana ita haida ita lalo-manoka matamaia. Edena bamona ita haheauka diba?
4. Ita haheauka totona heduru be daika amo ita abia?
4 Iehova ese ita do ia durua. Lauma helaga ena siahu amo salamo torea tauna ia gwau: “Kara maoromaoro tauna ena hisihisi be momo, to Lohiabada ese unai tau do ia durua, vadaeni unai hisihisi do ia ore.” (Salamo 34:19; 1 Korinto 10:13) Ita momo ita hamomokania diba, Iehova dekenai ita tabekau momokani neganai, goada do ia henia hekwakwanai ibounai ita haheaukalaia totona. Ia ita lalokau henia bona do ita abia moalena dainai, lalo-manoka bona gari mamina ita hanaia diba. (Heberu 12:2) Unai dainai, ena be hekwakwanai ita davaria, to ita gini goada noho.
Dirava Ena Hereva ese Ieremia Ia Hagoadaia
5, 6. (a) Haheauka idia hahedinaraia tomadiho taudia momokanidia haida be daidia? (b) Iehova ese peroveta gaukarana totona Ieremia ia boiria neganai, Ieremia be edena bamona ia kara?
5 Histori ibounai lalonai, ena be Iehova ena hesiai taudia be hekwakwanai badadia idia davaria, to idia moale noho. Haida be Iehova ese kamonai lasi taudia ia hahemaoro henia negadia ai idia noho. Unai bamona kamonai hesiai taudia haida be Ieremia bona ena negai idia noho taudia haida, bona Keristani taudia ginigunadia. Unai taudia edia haheitalai be Baibel lalonai idia torea, ita idia hagoadaia totona, bona ita stadilaia neganai ita dekenai gau momo idia hadibaia. (Roma 15:4) Hegeregere, Ieremia mani ita laloa.
6 Ieremia ia matamata neganai, Iehova ese ia boiria Iuda ai peroveta gaukarana ia karaia totona. Unai be gaukara aukana. Momo ese dirava koikoidia idia tomadiho henia. Ena be Iosaia, Ieremia ena hesiai gaukara ia hamatamaia neganai ia lohia noho king, be mai ena abidadama, to ia murinai idia lohia king iboudiai be abidadama lasi taudia bona taunimanima idia hadibaia taudia momo—peroveta bona hahelaga taudia unai—ese tomadiho momokanina idia abia isi lasi. (Ieremia 1:1, 2; 6:13; 23:11) Unai dainai, Iehova ese peroveta gaukarana totona Ieremia ia boiria neganai, Ieremia ena hemami be edena bamona? Ia gari bada! (Ieremia 1:8, 17) Ieremia ese ena hereva ginigunana ia laloatao: “Lau gwau, ‘Lohiabada Dirava e, lau be hereva dalana lau diba lasi, lau be mero sibona.’ ”—Ieremia 1:6.
7. Ieremia ese ia haroro henia taudia edia kara be edena bamona, bona iena hemami be edena bamona?
7 Ieremia ese ia haroro henia taudia momo be idia kamonai lasi, bona nega momo dagedage bada ia davaria. Nega ta, hahelaga tauna ta, Pasahuru, ese ia botaia bona aena koua auna amo ia guia. Ieremia ese ena hemami unai nega ai ia torea, ia gwau: “Lau ese Lohiabada do lau laloaboio, bona iena ladana dekenai do lau hereva lasi.” Reana nega haida unai bamona oi laloa—oi ura emu gaukara oi hadokoa. Ieremia ia haheauka totona ia ia durua gauna mani oi laloa. Ia gwau: “Oiemu [Dirava ena] hereva be lahi bamona, lauegu lalona ia gabua noho, ela bona lauegu turiana dekenai. Momokani lau ese oiemu hereva lau koua toho auka herea, to lau koua hegeregere lasi.” (Ieremia 20:9) Dirava ena hereva ena siahu oi dekenai be unai bamona, a?
Ieremia Ena Bamodia
8, 9. (a) Uria be dahaka manoka karana ia hahedinaraia, bona unai dainai dahaka ia vara? (b) Dahaka dainai Baruku ia lalo-manoka, bona edena bamona heduru ia abia?
8 Ieremia sibona be peroveta gaukarana ia karaia lasi. Ia be mai ena bamodia, bona reana unai ese Ieremia ia hagoadaia. To nega haida ena bamodia be aonega dalanai idia kara lasi. Hegeregere, ena bamona ta, peroveta tauna ladana Uria, ese Ierusalema bona Iuda hadikaia herevana ia gwauraia “Ieremia ia gwauraia hegeregerena.” To, King Iehoiakimi ese Uria hamasea totona oda ia henia neganai, unai peroveta tauna be ia gari dainai Aigupito dekenai ia heau mauri. Unai ese Uria ia hamauria lasi. King ena tau haida be ia idia lulua lao, idia abia, Ierusalema dekenai idia abia giroa, bona unuseniai idia alaia mase. Ieremia be unai kara dainai ia hoa bada!—Ieremia 26:20-23.
9 Ieremia ena bamona ma ta be ena toretore tauna, Baruku. Baruku be Ieremia ena durua tauna namona, to nega ta ia danu be lauma gaudia ia laloa bada lasi. Ia maumau matamaia, ia gwau: “Lau madi o, lau be dika vadaeni, badina Lohiabada ese egu hisihisi ena latanai lalohisihisi ma ia atoa kau vadaeni, bona lau tai noho, ia mai bona lau hesiku vadaeni, bona laga-ani sisina lau davaria diba lasi.” Baruku ia lalo-manoka dainai, lauma gaudia ia laloa bada lasi. To, Iehova be mai hebogahisi ida Baruku dekenai aonega sisibana ia henia, bona ena kara ia haidaua. Bena Iehova ese ia hamaoroa, Ierusalema idia hadikaia ore neganai, ia be do ia roho mauri. (Ieremia 45:1-5) Baruku be lauma dalanai ia goada lou neganai, unai ese Ieremia ia hagoadaia bada!
Iehova ese Ena Peroveta Tauna Ia Durua
10. Edena hereva amo Iehova ia gwauhamata Ieremia do ia durua?
10 To gau badana be inai, Iehova ese Ieremia ia rakatania lasi. Ena peroveta tauna ena hemami ia lalo-pararalaia bona ia hagoadaia bona ia durua. Hegeregere, Ieremia ena hesiai gaukara ia karaia matamaia neganai, ia daradara bema ia hegeregere unai hesiai gaukara ia karaia totona, unai dainai Iehova ese ia hamaoroa: “Idia dekenai do oi gari lasi, badina lau be oi dekenai do lau noho, bona lau ese oi do lau naria. Lau, Lohiabada lau hereva inai.” Bena, ena peroveta tauna dekenai ena gaukara ia hadibaia murinai, Iehova ia gwau: “Inai taudia ibounai ese oi do idia heai henia, to idia ta ese oi do ia halusia lasi. Badina be, lau be oi dekenai lau noho, bona oi do lau durua. Lau Lohiabada lau hereva inai.” (Ieremia 1:8, 19) Unai be hagoadaia herevana momokani! Bona Iehova ese ena gwauhamata ia hamomokania.
11. Edena bamona ita diba Iehova ese ena gwauhamata Ieremia ia durua totona ia hagugurua?
11 Unai dainai, Ieremia be au metauna amo idia guia bona taunimanima vairanai idia hevasehalaia murinai, Ieremia be mai gari lasi ida ia gwau: “Oi Lohiabada ese lau oi durua noho. Oi be goada bona mai oiemu siahu, bona unai taudia, lau idia hahisia noho taudia, be do idia moru. Hemarai bada do idia abia ela bona hanaihanai.” (Ieremia 20:11) Gabeai laganidia ai, Ieremia idia hamasea toho neganai, Iehova be ia danu ia noho, bona Baruku bamona, Ieremia be Ierusalema idia hadikaia ore neganai, ia roho mauri, to ia idia dagedage henia bona ena hadibaia hereva idia kamonai lasi taudia idia mase eiava Babulonia dekenai idia abia lao.
12. Herevana gau haida dainai ita lalo-manoka, to dahaka ita laloatao be namo?
12 Ieremia bamona, hari inai negai Iehova ena Witnes taudia momo ese hisihisi idauidau idia haheaukalaia. Ita herevalaia vadaeni bamona, unai hisihisi haida be iseda goevadae lasi karana, inai tanobada dekenai idia vara gaudia bona iseda gaukara idia dadaraia taudia dainai idia vara. Unai bamona hisihisi idauidau dainai ita lalo-manoka diba. Ieremia bamona, reana ita laloa iseda hesiai gaukara ita karaia noho diba lasi. Momokani, nega ta ta do ita lalo-manoka diba. Lalo-manoka ese iseda lalokau ena bada Iehova dekenai ia tohoa. Unai dainai, namona be iseda lalona ita hadaia, lalo-manoka dainai Iehova ena hesiai gaukara ita rakatania lasi totona, Uria ia karaia bamona. To, Ieremia ita tohotohoa bona Iehova ena heduru dekenai ita tabekau be namo.
Lalo-Manoka Ita Hanaia Daladia
13. Edena dala ai Ieremia bona Davida edia haheitalai ita badinaia diba?
13 Ieremia be hanaihanai Iehova Dirava ida ia herevahereva, ia dekenai ena kudouna ena hemami ia gwauraia bona ia amo goada ia noia. Unai be haheitalai namona ita badinaia totona. Idaunegai tauna Davida, unai goada abia Gabuna tamona dekenai ia tabekau tauna, ia gwau: “Lohiabada e, egu hereva do oi kamonai henia. Egu lalohisihisi ena regena mani do oi laloa. Egu King bona egu Dirava e! Durua totona oi dekenai lau taitai, be mani do oi kamonai henia, badina be oi dekenai lau noinoi noho.” (Salamo 5:1, 2) Davida ena mauri sivaraina, Dirava ena lauma amo idia torea gauna, ese ia hahedinaraia Davida ena guriguri dainai Iehova ese ia durua loulou. (Salamo 18:1, 2; 21:1-5) Unai hegeregerena, iseda hekwakwanai idia bada eiava toana be ita hanaia diba lasi neganai, Iehova ita guriguri henia bona iseda kudouna dekenai idia noho gaudia be ia dekenai ita gwauraia hedinarai, unai ese ita do ia hagoadaia bada. (Filipi 4:6, 7; 1 Tesalonika 5:16-18) Iehova be ia ura ita ia kamonai henia. To, ita ia hadibaia ia ese ‘ita ia naria noho.’ (1 Petero 5:6, 7) To, Iehova ita guriguri henia bona gabeai iena hereva ita kamonai lasi be ia namo lasi, ani?
14. Iehova ena hereva dainai Ieremia ena hemami be edena bamona?
14 Edena dala amo Iehova be ita dekenai ia hereva? Mani Ieremia ita laloa lou. Ieremia be peroveta tauna ta dainai, Iehova be maoromaoro ia dekenai ia hereva. Ieremia be Dirava ena hereva ese ena kudouna ia hamarerea dalana ia gwauraia, ia gwau: “Oi ese oiemu hereva lau dekenai oi henia, bona lau abia dae, aniani lau abia dae bamona. Bona inai oiemu hereva ese lau ia hamoalea momokani, badina be, Lohiabada, Siahu Ibounai Diravana, lau be oiemu.” (Ieremia 15:16) Oibe, Ieremia ia moale badina ia be Dirava ena ladana ai ia gaukara, bona Iena hereva ia laloa bada. Unai dainai, aposetolo Paulo bamona, Ieremia ia ura bada ia abia sivaraina ia harorolaia.—Roma 1:15, 16.
15. Edena dala ai Iehova ena hereva be iseda kudouna dekenai ita hadoa diba, bona dahaka gaudia laloa karana ese iseda lalona ia hagoadaia diba iseda uduna ita koua lasi totona?
15 Hari inai negai, Iehova be ita dekenai maoromaoro ia hereva lasi. To, Baibel lalonai ita totona Iena hereva ia noho. Unai dainai, bema mai momokani ida iseda Baibel stadi ita karaia bona ita dibaia gaudia ita laloa dobu, Dirava ena hereva ese iseda kudouna do “ia hamoalea momokani.” Bona ma haida dekenai unai hereva ita gwauraia neganai, Iehova ena ladana ita hahedinaraia dainai ita moale bada diba. Namona be ita laloaboio lasi hari inai negai ita sibona ese tanobada dekenai Iehova ena ladana ita gwauraia hedinarai noho. Iena Witnes taudia sibona ese Dirava ia haginia Basileiana ena sivarai namona idia harorolaia bona manau taudia idia hadibaia Iesu Keriso ena hahediba taudia ai idia lao totona. (Mataio 28:19, 20) Ita dekenai unai be hahenamo badana! Iehova ese mai lalokau ida ita dekenai unai ia henia dainai, iseda uduna ita koua diba lasi, ani?
Iseda Hebamo Ita Naria Namonamo
16, 17. Ieremia ena lalohadai hebamo dekenai be dahaka, bona edena dala ai ia ita tohotohoa diba?
16 Ieremia ese ma gau ta ia gwauraia, unai ese ia durua ia goada noho totona. Ia gwau: “Lau be moale hebou taudia edia huanai lau helai lasi. Idia danu lau kiri mai moale lasi, to oiemu oda lau kamonai henia, lau sibona lau helai, bona oiemu badu ese lau ia hahonua.” (Ieremia 15:17) Ieremia be ia ura sibona ia noho, badina ia ura lasi hebamo dikadia ese ena kara idia hadikaia garina. Hari ita be unai bamona ita laloa danu. Aposetolo Paulo ena sisiba ita laloaboio lasi, ia gwau “kara dika taudia danu umui turana karaia neganai, idia ese emui kara namona do idia hadikaia,” herevana unai kara namona be lagani momo lalonai ita manadalaia vadaeni.—1 Korinto 15:33.
17 Hebamo dikana ese dala ia kehoa diba tanobada ena lauma ese iseda laloa dalana ia hadikaia totona. (1 Korinto 2:12; Efeso 2:2; Iamesi 4:4) Unai dainai, namona be iseda lalona ita hadibaia, hebamo dikana ita dibaia bona ita dadaraia momokani totona. (Heberu 5:14) Bema Paulo be hari tanobada dekenai ia noho, matabodaga eiava dagedage muvini piksa eiava dagedage spot gadara ia raraia Keristani tauna dekenai dahaka do ia gwau? Internet dekenai ia diba lasi taudia ia tura henia tadikakana dekenai dahaka sisiba do ia henia? Hora momo lalonai vidio gadara ia gadaralaia eiava televisen ia raraia to sibona ena stadi ia karaia lasi Keristani tauna dekenai dahaka do ia laloa?—2 Korinto 6:14; Efeso 5:3-5, 15, 16.
Lauma Paradaisona Lalonai Oi Noho
18. Dahaka ese ita ia durua lauma dalanai ita goada noho totona?
18 Iseda lauma paradaisona ita laloa bada. Hari tanobada dekenai idia noho gaudia ibounai amo ta be unai bamona lasi. Abidadama lasi taudia danu ese Keristani taudia huanai ia noho lalokau, ma ta laloa karana, bona hebogahisi idia herevalaia. (Efeso 4:31, 32) To, hari inai negai lalo-manoka ita dadaraia momokani be gau badana. Hebamo namona, guriguri, bona stadi namonamo karana ese ita idia durua diba, lauma dalanai ita goada noho totona. Unai gaudia ese ita idia hagoadaia dainai, hekwakwanai ibounai lalonai Iehova dekenai do ita tabekau.—2 Korinto 4:7, 8.
19, 20. (a) Dahaka ese ita do ia durua ita haheauka totona? (b) Hereva gabena be daidia totona, bona daidia dekenai unai be mai anina danu?
19 Ita ura lasi Baibel ena sivarai idia inai henia taudia ese ita idia hagaria bona iseda abidadama ita rakatania. Ieremia idia dagedage henia taudia bamona, ita idia tuari henia taudia be Dirava idia tuari henia noho. Do idia kwalimu lasi. Iehova, iseda inai taudia edia goada ia hereaia momokani tauna, be ita ia hamaoroa: “Lohiabada dekenai do umui abidadama henia. Do umui laloa goada, daradara lasi. Lohiabada dekenai do umui abidadama henia.” (Salamo 27:14) Mai eda kudouna ibounai ida Iehova ita abidadama henia dainai, iseda lalona ita hadaia kara namodia ita karaia noho totona. Namona be ita diba momokani, Ieremia bona Baruku bamona, huahua do ita abia bema ita hesiku lasi.—Galatia 6:9.
20 Keristani taudia momo be hanaihanai lalo-manoka idia dadaraia. To, matamata taudia be hekwakwanai idia davaria danu. To, idia dekenai dala namodia momo idia kehoa danu. Hereva gabena be ita huanai idia noho matamata taudia totona. Danu tama sina bona kongregesen lalonai idia noho gwauhamata vadaeni taudia badadia ibounai dekenai be mai anina, badina edia hereva, haheitalai, bona heduru amo kongregesen lalonai idia noho matamata taudia idia durua diba.
Edena Bamona Do Oi Haere?
• Dahaka dainai ita diba lalo-manoka idia havaraia gaudia do ita davaria, bona heduru be daika amo ita abia be namo?
• Edena dala ai Ieremia ese lalo-manoka ia hanaia, herevana ena gaukara be ia auka?
• Dahaka dainai iseda kudouna ia ‘moale momokani,’ herevana hekwakwanai ita davaria?
[Picture on page 15]
Ieremia ia laloa ia matamata bona ena diba be bada lasi dainai, peroveta gaukarana ia karaia diba lasi
[Picture on page 16]
Ena be Ieremia idia dagedage henia, to ia diba Iehova be ‘mai ena goada bona siahu ida’ ia danu ia noho